Wi no de wi w’wan noiti

1-2. (a) Fu san ede wi kan de seiker taki wi no de wi w’wan noiti te tesi e miti wi? (b) San wi o luku na ini na artikel disi?

TE HEBI tesi e miti wi, dan wi ben kan firi leki wi de wi w’wan na ini wan bigi busi sondro fu sabi pe wi musu go. Ma wi no de wi w’wan. Wi lobi P’pa na hemel e si san e miti wi èn a e pramisi taki a o yepi wi. Yehovah e gi wi a moi dyaranti disi: „Mi o yepi yu trutru.”​—Yes. 41:10.

² Na ini na artikel disi wi o luku (1) fa Yehovah e tiri wi, (2) fa a e sorgu gi wi, (3) fa a e kibri wi, èn (4) fa a e trowstu wi. Yehovah e gi wi a dyaranti taki a no o fergiti wi noiti, awinsi sortu tesi e miti wi. Noiti a o gwe libi wi. Sobun, wi no de wi w’wan noiti.

YEHOVAH E TIRI WI

3-4. Fa Yehovah e tiri wi? (Psalm 48:14)

³ Leisi Psalm 48:14. Yehovah no e ferwakti fu wi taki wi e tiri wisrefi. Fa a e tiri den getrow futuboi fu en na ini a ten disi? A e du dati nanga yepi fu Bijbel (Ps. 119:105). Yehovah e gebroiki a Wortu fu en fu yepi wi fu teki besroiti èn fu kon abi fasi di o meki taki wi de moro koloku now èn taki wi kisi têgo libi na ini a ten di e kon.a Fu eksempre, a e leri fu gi trawan pardon èn fu no tan atibron na den tapu, a e leri wi fu de eerlijk na ini ala san wi e du, èn a e leri wi tu fu lobi trawan nanga wi heri ati (Ps. 37:8; Hebr. 13:18; 1 Petr. 1:22). Te wi e sori den fasi disi, dan wi e tron moro bun p’pa nanga m’ma, moro bun trowpatna, èn moro bun mati.

⁴ Na ini Bijbel, Yehovah e ferteri wi fu sma di ben kisi den srefi sortu tesi leki wi èn di ben abi den srefi firi leki wi (1 Kor. 10:13; Yak. 5:17). Te wi e leisi den ondrofenitori disi di psa trutru èn te wi e fiti den sani di wi e leri, dan tu fasi de fa wi e kisi wini. A foswan, na taki wi e kon ferstan taki wi no de wi w’wan. Den srefi sortu problema disi ben miti tra sma tu èn den ben man psa den problema disi fu di Yehovah yepi den (1 Petr. 5:9). A di fu tu, na taki wi e leri fa fu hordoro nanga prisiri te tesi e miti wi.​—Rom. 15:4.

5. Suma Yehovah e gebroiki fu tiri wi?

⁵ Yehovah e gebroiki wi Kresten brada nanga sisa tu fu tiri wi.b Fu eksempre, kring-owruman gwenti kon na den gemeente fu gi wi dek’ati. Den lezing fu den e tranga a bribi fu wi èn den e yepi wi fu tan na ini wánfasi (Tori 15:40–16:5). Gemeente owruman e du tranga muiti tu fu yepi ibriwan fu wi fu tan abi wan bun matifasi nanga Yehovah (1 Petr. 5:2, 3). P’pa nanga m’ma e leri den pkin fu den fu lobi Yehovah, den e leri den fa fu teki koni besroiti èn fu kon abi bun fasi (Odo 22:6). Èn lepi Kresten sisa de wan bun eksempre gi yongu sisa, fu di den e gi den bun rai nanga dek’ati. ​—Tit. 2:3-5.

6. San wi musu du fu man kisi wini fu a tiri fu Yehovah?

⁶ Yehovah gi wi ala san wi abi fanowdu fu man abi wan koloku libi. Fa wi kan sori taki wi de nanga tangi gi san a du gi wi? Odo 3:5, 6 e taki: „Fertrow tapu Yehovah nanga yu heri ati. No fertrow tapu yu eigi ferstan.” Te wi e fertrow tapu Yehovah, dan a ’o sori wi a yoisti pasi’. Disi wani taki dati a o yepi wi fu wai pasi gi furu problema èn fu abi wan moro koloku libi. Wi de nanga tangi trutru taki Yehovah sabi wi heri bun èn taki a lobi wi so te, taki a e gi ibriwan fu wi rai di wi abi fanowdu.​—Ps. 32:8.

YEHOVAH E SORGU GI WI

7. San na wan tu fasi fa Yehovah e sorgu gi wi? (Filipisma 4:19)

⁷ Leisi Filipisma 4:19. Boiti taki Yehovah e tiri wi, a e blesi a muiti di wi e du fu feni n’nyan, krosi, nanga wan presi fu tan (Mat. 6:33; 2 Tes. 3:12). A no fowtu taki wi e broko wi ede nanga den sani disi. Ma Yehovah no wani taki wi e broko wi ede tumsi (Mat. 6:25). Fu san ede? Fu di wi P’pa na hemel noiti no o gwe libi den getrow anbegiman fu en te den de na nowtu (Mat. 6:8; Hebr. 13:5). Wi kan bribi en te a e taki dati a o sorgu gi wi.

8. San Yehovah du gi David?

⁸ Luku a fasi fa Yehovah yepi David. A pisi ten di David ben de wan loweman, a libi ben muilek srefsrefi gi en. Na a ten dati, Yehovah ben e gi en nanga den man fu en san den ben abi fanowdu fu man tan na libi. Di David ben e prakseri fa Yehovah sorgu gi en na a ten dati, dan a taki: „Mi ben yongu, now mi kon owru. Ma noiti mi si taki Gado gwe libi wan ret’ati sma. Noiti mi si taki den pkin fu en e waka e suku n’nyan” (Ps. 37:25). A kan taki neleki David, yu si tu fa Yehovah ben de klarklari fu sorgu gi yu noso gi yu brada nanga sisa di a libi ben kon hebi.

9. Fa Yehovah e sorgu gi a pipel fu en na ini a ten disi te rampu e miti den? (Luku den prenki.)

⁹ Yehovah e sorgu tu gi a pipel fu en te rampu psa. Fu eksempre, di wan angriten ben de na ini a fosi yarihondro, dan Kresten fu difrenti kondre seni n’nyan-sani gi den brada nanga sisa fu den di ben de na nowtu (Tori 11:27-30; Rom. 15:25, 26). Na ini a ten disi, a pipel fu Gado e yepi den brada nanga sisa tu di de na nowtu. Te wan rampu psa, dan Yehovah e gi a pipel fu en dek’ati fu sorgu taki den wan di e libi na ini den kontren dati e kisi sani soleki n’nyan, watra, krosi, nanga dresi. Te oso nanga Kownukondre zaal kisi pori, dan grupu brada nanga sisa di e du bow-wroko e seti den kon bun baka. Èn futuboi fu Yehovah no e draidrai fu trowstu den wan di lasi den oso noso lobiwan fu den, èn den e gi den dek’ati nanga yepi fu Bijbel.c

10-11. San yu e leri fu na ondrofenitori fu Borys?

¹⁰ Yehovah de klarklari tu fu sorgu gi den wan di no e anbegi en ete. Fu di wi wani de leki Yehovah, meki wi e suku okasi fu sori swit’fasi gi den wan di no abi a srefi bribi leki wi (Gal. 6:10). Te wi e du disi, dan nofo tron wi e feni okasi fu yepi sma fu kon sabi wi nanga Yehovah moro bun. Luku na ondrofenitori fu Borys. A de wan edeman fu wan skoro èn a e libi na ini Ukraini. Aladi Borys no de wan Yehovah Kotoigi, tòg a ben gwenti fu sori swit’fasi gi den studenti fu en di de Kotoigi èn ala ten a ben e lespeki a bribi fu den. Fu di feti ben de na ini a kontren pe Borys ben e tan, meki a besroiti fu lowe go na wan tra kontren pe ogri no ben o miti en so makelek. Di a du dati, dan den brada fu wi yepi en. Bakaten, Borys go na wan Memrefesa fu a dede fu Krestes. Di a ben e prakseri ala den sani di den brada du gi en, dan a taki: „Den Kotoigi sori swit’fasi gi mi èn den sorgu bun gi mi. Mi de nanga tangi gi san den du gi mi.”

¹¹ Neleki wi P’pa na hemel di abi sar’ati nanga sma, wi kan sori lobi tu gi den wan di de na nowtu, awinsi den no abi a srefi bribi leki wi (Luk. 6:31, 36). Wi e howpu taki a muiti di wi e du fu lobi sma o abi leki bakapisi taki den e tron disipel fu Krestes (1 Petr. 2:12). Ma awinsi den no e tron disipel fu Krestes, tòg wi o de koloku fu di „wan sma o de moro koloku te a e gi sani”.​—Tori 20:35.

YEHOVAH E KIBRI WI

12. Fa Yehovah o sorgu gi a pipel fu en leki grupu? (Psalm 91:1, 2, 14)

¹² Leisi Psalm 91:1, 2, 14. Na ini a ten disi, Yehovah e pramisi fu kibri a pipel fu en gi iniwan sani di ben kan pori a matifasi di den abi nanga en. Noiti a o gi pasi taki Satan pori a tru anbegi (Yoh. 17:15). Èn te „a bigi banawtu” bigin, dan wi no abi fu tweifri srefsrefi taki Yehovah o du san a pramisi a pipel fu en. A o yepi wi fu tan abi wan tranga bribi èn a o kibri wi gi ogri.​—Openb. 7:9, 14.

13. Na sortu fasi Yehovah e kibri ibriwan fu wi?

¹³ Fa Yehovah e kibri ibriwan fu wi? Yehovah gi wi a Bijbel so taki wi kan kon sabi san bun èn san ogri (Hebr. 5:14). Te wi e hori wisrefi na den gronprakseri di de fu feni na ini Gado Wortu, dan wi e sorgu taki a matifasi di wi abi nanga Yehovah no e pori. Wi o man teki bun besroiti tu di o yepi wi fu de moro koloku èn moro gosontu (Ps. 91:4). Boiti dati, Yehovah e gebroiki a gemeente fu kibri wi (Yes. 32:1, 2). Te wi e bemui nanga den wan di lobi Yehovah èn di e hori densrefi na den gronprakseri fu en, dan wi o kisi dek’ati èn disi o yepi wi fu wai pasi gi ogri.​—Odo 13:20.

14. (a) Fu san ede Yehovah no e kibri wi gi ala tesi? (b) Fu san wi kan de seiker, soleki fa Psalm 9:10 e sori? (Luku a futuwortu.)

¹⁴ Na ini owruten, Yehovah ben e kibri den futuboi fu en gi ogri son leisi so taki den no ben e kisi mankeri èn so taki den no ben e lasi den libi. Ma a no ben e du dati ala ten. Son leisi ’sani di wi no e ferwakti’ kan miti wi (Preik. 9:11). Boiti dati, Yehovah gi pasi taki sma ferfolgu sonwan fu den futuboi fu en. A gi pasi srefi taki sma kiri sonwan fu den, so taki a ben kan kon na krin taki Satan na wan leiman (Yob 2:4-6; Mat. 23:34). Den sortu sani dati kan miti wi tu na ini a ten disi. Aladi a kan taki Yehovah no o tyari wan kba kon na den tesi di e miti wi, tòg wi kan de seiker taki noiti a o gwe libi den wan di lobi en.d​—Ps. 9:10.

YEHOVAH E TROWSTU WI

15. Fa wi e kisi trowstu fu den begi fu wi, fu Gado Wortu, èn fu wi Kresten brada nanga sisa? (2 Korentesma 1:3, 4)

¹⁵ Leisi 2 Korentesma 1:3, 4. Son leisi wi e sari, wi e broko wi ede, noso wi e firi brokosaka. Kande yu de na ini wan situwâsi nownow di e meki yu firi leki yu de yu w’wan. Kande yu e aksi yusrefi efu wan sma e ferstan fa yu e firi? Yehovah e ferstan fa yu e firi. Boiti taki a e ferstan fa wi e firi, a e „trowstu wi te wi de na ini ala sortu banawtu”. Fa a e du dati? Te wi e taigi Yehovah san de na tapu wi ati, dan a e gi wi a „freide fu Gado di bigi moro iniwan sani di libisma man frustan” (Fil. 4:6, 7). Wi e feni trowstu tu te wi e leisi na ini Bijbel san Yehovah e taigi wi. Na ini a Wortu fu en, Yehovah e taigi wi o furu a lobi wi, a e leri wi fa fu de koni sma, èn a e gi wi howpu. Wi e kisi trowstu tu na den Kresten konmakandra pe wi e kisi Bijbel leri di e gi wi dek’ati. Boiti dati, wi kan abi demakandra nanga wi brada nanga sisa di lobi wi.

16. San yu e leri fu na ondrofenitori fu Nathan nanga Priscilla?

¹⁶ Wi kan si fa Yehovah e gebroiki Bijbel fu trowstu wi èn fu gi wi dek’ati te wi e luku na ondrofenitori fu Nathan nanga Priscilla di e libi na ini Amerkankondre. Wan tu yari psa, den besroiti fu froisi go tan na wan presi pe moro Kownukondre preikiman ben de fanowdu. Nathan e taki: „Wi ben abi a fertrow taki Yehovah ben o blesi a muiti di wi ben e meki.” Ma di den doro na ini a nyun toewijzing fu den, dan den kon siki èn den no ben man feni wan wroko fu sorgu densrefi. Te fu kba a trowpaar disi ben musu drai go baka na oso èn drape den ben abi moniproblema ete. Nathan e taki: „Mi ben e aksi misrefi fu san ede Gado no ben blesi wi na a fasi fa wi ben ferwakti dati. Mi bigin aksi misrefi tu efu mi ben du wan ogri.” Ma te fu kba, Nathan nanga Priscilla kon si taki Gado no ben gwe libi den di den ben de na nowtu. Nathan e taki: „Na ini den muilek ten dati, Bijbel kon de leki wan koni mati di ben e tiri wi èn di ben e gi wi dek’ati. Wi ben e poti prakseri na a fasi fa Yehovah yepi wi fu hordoro na a ten dati, na presi fu poti prakseri na den tesi di ben e miti wi. A sani disi yepi wi fu no tweifri taki Yehovah o tan yepi wi na ini a ten di e kon.”

17. Fa wan sisa di nen Helga kisi trowstu? (Luku a prenki.)

¹⁷ Wi brada nanga sisa kan trowstu wi tu. Fa so? Luku na eksempre fu Helga di e libi na ini Hongaria. Furu yari langa, difrenti problema miti en di ben gi en brok’ede, èn a ben e firi leki a no warti noti. Ma te a e prakseri a ten dati baka, dan a kan si fa Yehovah ben e trowstu en nanga yepi fu a gemeente. A e taki: „Ala ten Yehovah yepi mi te a ben e si taki a libi ben e kon hebi gi mi. Mi ben abi wan grontapuwroko, mi ben musu sorgu gi a pkin fu mi di siki, èn tra tesi ben e miti mi tu. Na ini den lasti 30 yari, nowan dei no psa di Gado no trowstu mi soleki fa a ben pramisi. Nofo tron a e trowstu mi nanga yepi fu den moi sani di trawan e taigi mi fu gi mi dek’ati. Mi ondrofeni furu leisi taki sma seni wan app noso wan karta gi mi, noso den e taki wan sani fu gi mi dek’ati te mi abi dati tranga fanowdu.”

18. Fa wi kan trowstu trawan?

¹⁸ Wi abi a grani fu trowstu trawan neleki fa wi Gado e du dati. Fa wi kan trowstu trawan? Wi kan arki den nanga pasensi, wi kan taki sani fu trowstu den, èn wi kan du sani fu yepi den (Odo 3:27). Wi e du muiti fu trowstu ala sma di e pina, sosrefi den wan di no e dini Gado ete. Te den birtisma fu wi e sari, te den e siki, noso te den e broko den ede nanga wan sani, dan wi e leisi Bijbeltekst gi den di e gi den dek’ati. Te wi e teki na eksempre fu Yehovah, „a Gado fu ala trowstu”, dan wi no o yepi soso den Kresten brada nanga sisa fu wi di abi en muilek, ma a kan taki wi o yepi sosrefi den wan di no e dini Gado ete fu kon leri sabi en.​—Mat. 5:16.

YEHOVAH O YEPI WI ALA TEN

19. San Yehovah e du gi wi èn fa wi kan teki na eksempre fu en?

¹⁹ Yehovah e broko en ede trutru nanga ala sma di lobi en. A no e gwe libi wi te wi abi problema. Neleki fa wan p’pa noso wan m’ma e sorgu en pkin fu di a lobi en, na so Yehovah e sorgu gi den getrow anbegiman fu en. A e tiri wi, a e sorgu gi wi, a e kibri wi, èn a e trowstu wi. Wi e teki na eksempre fu wi lobi P’pa na hemel te wi e horbaka gi trawan te tesi e miti den èn te wi e gi den dek’ati. Na ini a grontapu disi, problema nanga sari sani kan miti wi, ma wi kan de seiker taki Yehovah de nanga wi. A gi wi a dyaranti disi: „No frede, bika mi de nanga yu” (Yes. 41:10). A pramisi disi e gi wi a fertrow taki wi no de wi w’wan noiti.