Suku trowstu na Yehovah

1. San ben de a situwâsi fu den Dyu di ben e libi na ini Babilon?

PRAKSERI fa den Dyu di ben de na ini katibo na Babilon ben musu fu firi. Furu yari langa, den ben e tan trangayesi Yehovah. Dati meki Yehovah gi pasi taki den Babilonsma pori a kondre fu den èn den tyari den go na ini katibo na Babilon. Fa a libi drape ben de gi den Dyu? (2 Kron. 36:15, 16, 20, 21) A no de fu taki dati den Dyu di ben e libi na ini Babilon ben man du den aladei sani fu a libi (Yer. 29:4-7). Tòg a libi no ben makelek gi den èn den no ben wani tan drape kwetkweti. Fa den ben feni a situwâsi fu den? Luku san wan fu den ben taki: „Na sei den liba fu Babilon wi ben e sdon. Wi bigin krei di wi prakseri Sion” (Ps. 137:1). Den Dyu di ben e firi brokosaka ben abi trowstu fanowdu, ma suma ben o trowstu den?

2-3. (a) San Yehovah du gi den Dyu di ben de na ini katibo na Babilon? (b) San wi o luku na ini na artikel disi?

² Yehovah na „a Gado fu ala trowstu” (2 Kor. 1:3). Yehovah lobi den futuboi fu en èn a wani trowstu den. A ben sabi taki sonwan fu den Dyu na ini Babilon ben o firi sari taki den ben trangayesi en èn a ben sabi tu taki den ben o drai kon baka na en (Yes. 59:20 ). Sobun, moro leki 100 yari fosi den Dyu ben go na ini katibo, a meki a profeiti Yesaya skrifi a buku di e tyari en nen. Fa a buku fu Yesaya ben o yepi den? Yesaya e taki: „’Trowstu, trowstu mi pipel’, na so a Gado fu unu taki” (Yes. 40:1). Nanga yepi fu den sani di a profeiti Yesaya ben skrifi, Yehovah gi den Dyu di ben de na ini Babilon a trowstu di den ben abi fanowdu.

³ Neleki den Dyu di ben de na ini katibo, wi abi trowstu fanowdu tu ten na ten. Na ini na artikel disi wi o luku dri fasi fa Yehovah ben trowstu den Dyu na ini Babilon: (1) A pramisi taki a ben o gi den Dyu pardon te den ben sori berow, (2) a gi a pipel fu en howpu, èn (3) a yepi den fu no broko den ede tumsi. Wi o luku tu fa Yehovah e trowstu wi na a srefi fasi na ini a ten disi.

YEHOVAH DE KLARKLARI FU GI WI PARDON

4. Fa Yehovah sori taki a de klarklari fu gi sma pardon? (Yesaya 55:7)

⁴ Yehovah na a „a Tata di abi furu sari-ati” (2 Kor. 1:3). Wi kan si dati di a meki Yesaya pramisi den Dyu taki a ben o gi den pardon. (Leisi Yesaya 55:7.) A taki: „Mi o sori yu bun-ati fu ala ten èn mi o sari yu” (Yes. 54:8). Fa Yehovah ben o sori sar’ati gi den Dyu? Aladi a Dyu pipel ben tan furu yari langa na ini Babilon fu di den ben trangayesi Yehovah, tòg Yehovah pramisi den taki den no ben o tan drape fu ala ten (Yes. 40:2). Den wortu disi ben musu fu trowstu den Dyu di ben abi berow èn di ben wani gi yesi na Yehovah.

5. Fu san ede wi abi moro reide fu bribi taki Yehovah de klarklari fu gi wi pardon fu den sondu fu wi?

⁵ San disi e leri wi? Yehovah de klarklari fu gi den futuboi fu en pardon nanga en heri ati. Na dati den Dyu di ben de na ini katibo ben e bribi. Na ini a ten disi, wi abi moro reide leki den fu bribi taki Yehovah de klarklari fu gi wi pardon fu den sondu fu wi. Fu san ede? Fu di wi sabi san Yehovah du fu man gi wi pardon. Hondrohondro yari baka di Yesaya ben taki fu a fasi fa Yehovah e gi pardon, Yehovah seni en lobi Manpkin kon na grontapu fu gi en libi gi ala sma di abi berow fu den sondu fu den. Fu di Yesus dede gi wi, meki Yehovah man ’figi den sondu fu wi puru’ (Tori 3:19; Yes. 1:18; Ef. 1:7). Yehovah trutru na wan Gado di de klarklari fu gi wi pardon.

6. Fu san ede a de wan trowstu gi wi te wi e prakseri fa Yehovah de klarklari fu gi wi pardon? (Luku a prenki.)

⁶ Den wortu fu Yehovah na Yesaya 55:7 kan trowstu wi te wi e tan sari fu wan sondu di wi ben du, aladi wi sori berow kba. Wi kan tan firi so, spesrutu te wi e kisi fu du nanga den takru bakapisi fu a fowtu di wi meki. Ma efu wi taki nanga den owruman fu a sondu fu wi èn efu wi tapu fu du san no bun, dan wi kan de seiker taki Yehovah gi wi pardon. Èn te Yehovah e gi wi pardon, dan a no e memre a sondu moro di wi ben du. (Luku Yeremia 31:34.) Sobun, efu Yehovah no e tan prakseri den sondu di wi ben du, dan wi no musu du dati tu. San prenspari gi Yehovah, a no den fowtu di wi ben meki na ini a ten di psa, ma san wi e du now (Esek. 33:14-16). Heri esi, a Tata fu wi di abi furu sar’ati, o puru iniwan problema di wi abi fu di wi ben meki fowtu.

7. San kan gi wi dek’ati fu go taki nanga den owruman efu wi du wan seryusu sondu?

⁷ San wi musu du efu wi konsensi e fon wi fu di wi du wan seryusu sondu èn wi no wani taki trawan kon sabi san wi du? Bijbel e gi wi dek’ati fu go suku yepi na den owruman (Yak. 5:14, 15). Kande wi no o feni en makelek fu taigi den san wi du. Ma san wi musu hori na prakseri, na taki Yehovah e gebroiki den man disi fu yepi wi èn taki neleki Yehovah, den man disi o abi sar’ati nanga wi. Luku fa wan brada di nen Arthura feni trowstu fu di a ben sabi taki Yehovah de klarklari fu gi sma pardon. A brada disi en konsensi ben e trobi en fu di a ben du wan sani di no bun. A e ferteri: „Mi ben e luku porno pkinmoro wán yari langa. Ma di mi arki wan lezing di abi fu du nanga a konsensi fu wi, dan mi taigi mi wefi nanga den owruman san mi ben du. Baka dati, mi ben e firi moro bun, ma mi ben e sari ete fu a sani di mi ben du. Den owruman memre mi taki Yehovah no ben drai baka gi mi. A e gi wi pir’ai fu di a lobi wi. Den taki switi nanga mi èn a sani dati trowstu mi trutru. A yepi mi fu si misrefi soleki fa Yehovah e si mi.” Tide na dei, Arthur e dini leki pionier èn leki dinari ini a diniwroko. A de wan trowstu gi wi fu sabi taki Yehovah e sori sar’ati gi wi te wi e sori berow.

YEHOVAH E GI WI HOWPU

8. (a) Sortu howpu Yehovah ben gi den Dyu na ini Babilon? (b) Soleki fa Yesaya 40:29-31 e sori, dan fa den Dyu di ben sori berow ben o firi fu di Yehovah ben gi den howpu?

⁸ Den Dyu ben kan denki taki den no ben o man drai go baka na a kondre fu den. Disi de so fu di nofo tron den Babilonsma no ben e fri den katiboman fu den (Yes. 14:17). Ma Yehovah gi a pipel fu en howpu. A pramisi den taki a ben o ferlusu den èn taki den ben o drai go baka na a kondre fu den. Èn noti ben o man tapu pasi gi Yehovah fu du san a pramisi (Yes. 44:26; 55:12). Gi Yehovah, Babilon ben de leki fini doti (Yes. 40:15). Te yu e bro tapu fini doti, dan a e wai gwe. Na so makelek a ben o de gi Yehovah fu ferlusu a pipel fu en. Fa a howpu di Yehovah ben gi den Dyu ben o yepi den? A howpu dati ben o trowstu den. Ma a ben o du moro leki dati. Yesaya ben skrifi: „Den wan di e fertrow na tapu Yehovah o kisi krakti baka.” (Leisi Yesaya 40:29-31.) Iya, a howpu di den ben kisi ben o gi den krakti baka èn den ben o „frei hei neleki den abi frei fu aka”.

9. Fu san ede den Dyu ben kan de seiker taki Yehovah ben o ferlusu den fu Babilon?

⁹ Yehovah ben gi den Dyu na ini Babilon reide fu de seiker taki a ben o du san a pramisi. Fa a du dati? Prakseri den profeititori di ben kon tru kba. Den ben sabi taki Asiria ben teki a noordsei kownukondre Israel abra èn taki a kondre dati ben tyari a pipel go na ini katibo (Yes. 8:4). Den ben si fa den Babilonsma ben pori Yerusalem èn fa den ben tyari den go na ini katibo (Yes. 39:5-7). Den ben sabi taki a kownu fu Babilon ben breni Kownu Sedekia èn taki a ben tyari en go na Babilon (Yer. 39:7; Esek. 12:12, 13). Ala den sani disi kon tru soleki fa Yehovah ben taki (Yes. 42:9; 46:10). Den sani disi ben musu fu overtoigi den taki Yehovah ben o ferlusu den soleki fa a ben pramisi.

10. San kan yepi wi fu tan abi wan tranga howpu na ini den lasti dei disi?

¹⁰ San disi e leri wi? Te wi e firi brokosaka, dan a howpu di wi abi gi a ten di e kon kan gi wi krakti baka. A situwâsi na grontapu e kon moro ogri dei fu dei èn den makti feanti fu Gado e gens wi. Ma wi no musu bruya. Yehovah pramisi wi taki wi o libi fu têgo na ini Paradijs. Wi musu tan poti prakseri na a howpu dati. Efu wi no ben o du dati, dan a howpu fu wi o de leki wan moi presi di wi no man si krin fu di wi e luku psa wan doti fensre. Fa wi kan krin a fensre, noso fa wi kan sorgu taki a howpu fu wi e tan tranga? Wi kan meki ten ibri leisi fu prakseri o moi a libi fu wi o de na ini a nyun grontapu. Wi kan leisi artikel, wi kan luku felem, èn wi kan arki poku di abi fu du nanga a howpu fu wi. Èn te wi e begi, wi kan taki nanga Yehovah fu ala den sani di wi e ferwakti fu si na ini Paradijs.

11. San yepi wan sisa di ben e siki seryusu, fu kisi krakti baka?

¹¹ Prakseri fa Joy, wan sisa di ben e siki seryusu, kisi trowstu nanga krakti fu a howpu fu en. A e taki: „Te den problema fu mi e meki mi firi brokosaka, dan mi e taigi Yehovah fa mi e firi èn mi sabi taki a e ferstan mi. Na den momenti dati, Yehovah gi mi ’a krakti di bigi pasa marki’” (2 Kor. 4:7). Joy e si ensrefi tu na ini a nyun grontapu, pe „nowan sma di e tan na ini a kondre o taki: ’Mi siki’” (Yes. 33:24). Te wi e taigi Yehovah tu fa wi e firi èn te wi e tan poti prakseri na a howpu fu wi, dan wi o kisi krakti baka.

12. Fu san ede wi kan fertrow den pramisi fu Yehovah? (Luku a prenki.)

¹² Neleki den Dyu na ini Babilon, wi abi furu reide tu fu bribi taki den pramisi fu Yehovah o kon tru na ini a ten disi. Prakseri den profeititori di e kon tru nownow. Fu eksempre, we si fa a Grontapumakti fu Ingrisikondre nanga Amerkankondre ’tranga na a wán sei èn swaki na a tra sei’ (Dan. 2:42, 43). Boiti dati, wi e yere taki ’na ini a wan presi baka a trawan gronseki de’ èn wi e preiki gi sma fu „ala kondre” (Mat. 24:7, 14). Fu di wi e si fa den profeititori disi nanga furu trawan sosrefi e kon tru, meki wi de seiker taki ala den pramisi fu Yehovah o kon tru.

YEHOVAH E YEPI WI FU NO FREDE

13. (a) Sortu problema den Dyu ben o kisi te a ten ben doro gi den fu kisi ferlusu? (b) Soleki fa Yesaya 41:10-13 e sori, dan fa Yehovah trowstu den Dyu na ini Babilon?

¹³ Yehovah ben gi den Dyu di ben e libi na ini Babilon wan moi howpu taki den ben o kon fri. Ma a ben sabi taki o moro a ten dati ben doro, o moro a libi ben o hebi gi den. Yehovah ben taki dati wan makti kownu ben o kon feti nanga den kondre lontu Babilon èn a ben o teki den abra. Baka dati a kownu ben o kon feti nanga Babilon srefi (Yes. 41:2-5). Den Dyu ben musu broko den ede? Langa ten fosi a sani disi psa, Yehovah ben trowstu a pipel fu en. A ben taki: „No frede, bika mi de nanga yu. No luku leki yu e frede, bika mi na yu Gado.” (Leisi Yesaya 41:10-13.) San a ben wani taki nanga den wortu „mi na yu Gado”? A no de so taki na memre a ben e memre den Dyu taki den ben musu anbegi en, fu di den ben sabi taki den ben musu du dati. Na presi fu dati, a ben e memre den taki a ben den nanga den èn taki a ben o yepi den.​—Ps. 118:6.

14. Sortu tra sani Yehovah du fu yepi den Dyu fu no frede?

¹⁴ Wan tra fasi fa Yehovah yepi den Dyu fu no frede, na taki a memre den taki a abi ala makti èn taki a koni srefsrefi. A aksi den fu luku den stari na hemel. A no taigi den nomo taki na en meki den stari, ma a taigi den tu taki a sabi a nen fu ibri stari (Yes. 40:25-.28). Efu Yehovah sabi a nen fu ibri stari, dan seiker a sabi a nen fu ibriwan fu den futuboi fu en. Èn efu Yehovah ben abi a makti fu meki den stari, dan seiker a abi a makti fu yepi en pipel. A tru, den Dyu di ben de na ini Babilon no ben abi nowan reide fu frede.

15. Fa Yehovah sreka den Dyu gi san ben o psa?

¹⁵ Yehovah taigi en pipel tu san den ben musu du te a ten ben doro taki den kisi ferlusu. Na ini Yesaya kapitel 26 Yehovah ben taigi en pipel: „Un go na ini un kamra èn tapu den doro. Un go kibri fu wan syatu pisi ten, teleki mi ati no bron moro” (Yes. 26:20). A kan taki den Dyu ben fiti a rai disi di Kownu Sirus ben kon feti nanga Babilon. Wan Griki historia skrifiman ben taki dati di Sirus go na ini Babilon, a „taigi den [srudati fu en] fu kiri iniwan sma di de na dorosei”. Wi kan ferstan taki den sma di ben e libi na ini Babilon ben musu fu frede. Ma a ben musu fu de so taki den Dyu na ini Babilon no lasi den libi fu di den gi yesi na den rai fu Yehovah.

16. Fu san ede wi no musu broko wi ede tumsi nanga san o psa na a ten fu a bigi banawtu? (Luku a prenki.)

¹⁶ San disi e leri wi? Heri esi a bigi banawtu o bigin èn dati o de a moro ogri ten di oiti ben de na grontapu. Te a bigin, dan furu sma o bruya èn den o frede. Ma dati no o de so nanga a pipel fu Yehovah. Wi sabi taki Yehovah na wi Gado. Wi o tnapu let’opo fu di wi sabi taki ’a frulusu fu wi de krosbei’ (Luk. 21:28). Srefi te wan grupu kondre o kon feti nanga wi, wi o tan fertrow tapu Yehovah. Yehovah o gebroiki den engel fu kibri wi èn a o gi wi rai di o kibri wi libi. Fa wi o kisi den rai dati? Wi no sabi ete. Ma a kan taki wi o kisi den rai dati nanga yepi fu den gemeente fu wi. Kande den gemeente disi na den agersi „kamra” pe wi o feni kibri. Fa wi kan sreka wisrefi gi den sani di o psa? Wi musu tron moro bun mati fu den brada nanga sisa fu wi, wi musu de klarklari fu gi yesi na den rai di wi e kisi fu na organisâsi, èn wi musu abi a fertrow taki Yehovah e tiri na organisâsi fu wi.​—Hebr. 10:24, 25; 13:17.

17. Fa yu kan suku trowstu na Yehovah?

¹⁷ Aladi a libi no ben makelek gi den Dyu di ben de na ini Babilon, tòg Yehovah gi den a trowstu di den ben abi fanowdu. A o du a srefi gi wi. Sobun, awinsi san e psa na ini a ten di e kon, tan suku trowstu na Yehovah. Dati meki yu musu abi a fertrow taki a de klarklari fu gi den getrow futuboi fu en pardon èn taki a e broko en ede nanga yu. Tan abi wan tranga howpu. Èn noiti no fergiti taki yu no abi fu frede, fu di Yehovah na yu Gado.