Fu san ede a nen fu Yehovah prenspari so gi Yesus

1-2. (a) San Yesus du a neti fosi sma kiri en? (b) Sortu aksi wi o luku na ini na artikel disi?

A NETI fu fodewroko 14 Nisan, Yesus ben e hori a Memrefesa fu Masra makandra nanga den getrow apostel fu en. A ben sabi taki heri esi Yudas ben o tori en, sma ben o fon en, èn baka dati, den feanti fu en ben o kiri en. Sobun, baka di den kba n’nyan, dan a taigi den apostel fu en furu sani fu gi den dek’ati. Èn syatu fosi den gwe libi a sodrokamra, Yesus taki wan prenspari begi. Na apostel Yohanes skrifi a begi dati di de fu feni na ini Yohanes kapitel 17.

² Na ini na artikel disi, wi o poti prakseri na wan tu sani di wi kan leri fu a begi fu Yesus. Nanga sortu sani a ben e broko en ede syatu fosi a dede? San ben prenspari gi en na a ten di a ben e du a diniwroko fu en dyaso na grontapu? Meki wi go luku den piki tapu den aksi disi.

„MI MEKI DEN KON SABI YU NEN”

3. San Yesus ben taki fu Yehovah en nen èn san a ben wani taki nanga dati? (Yohanes 17:6, 26)

³ Na ini a begi fu en, Yesus ben taki: „Mi meki den kon sabi yu nen.” Fu taki en leti, a ben taki tu leisi taki a meki den disipel fu en kon sabi Yehovah en nen. (Leisi Yohanes 17:6, 26.) San a ben wani taki nanga dati? A de so taki a ben musu meki den kon sabi taki Gado en nen na Yehovah? Den disipel fu Yesus ben de Dyu, sobun, den ben sabi kba taki Gado en nen na Yehovah. A nen dati de fu feni dusundusun leisi na ini den Hebrew Buku fu Bijbel. Sobun, di Yesus taki: „Mi meki den kon sabi yu nen”, dan a no leri a ben wani leri den sma taki Gado nen na Yehovah, ma na presi fu dati a ben wani leri den sortu Gado Yehovah de. Yesus yepi den disipel fu en fu kon sabi Yehovah moro bun. A yepi den fu kon sabi san Yehovah abi na prakseri gi grontapu nanga libisma, san Yehovah du kba, san a o du na ini a ten di e kon, èn sortu fasi a abi. Nowan sma sabi Yehovah leki fa Yesus sabi en.

4-5. (a) Fa a nen fu wan sma kan kon abi moro waarde gi wi? Gi wan eksempre. (b) Fa den disipel fu Yesus kon sabi Yehovah moro bun?

⁴ Kow taki dati wan fu den owruman na ini yu gemeente na wan datra èn a nen David. Yu sabi a brada dati omeni yari kba. Ma wan dei yu e kon siki so te taki yu abi a yepi fu en fanowdu. Den e lon tyari yu go na a at’oso pe a brada disi e wroko èn a e yepi yu fu kon betre baka. Now yu lobi a brada disi moro leki fa yu ben lobi en fosi èn te yu e yere en nen, dan yu e prakseri san a du gi yu. Now David no de soso na owruman di yu sabi, ma a de sosrefi a datra di kibri yu libi.

⁵ Na leti so den disipel ben sabi Yehovah en nen kba. Ma a nen kon abi moro waarde gi den fu di Yesus yepi den fu kon sabi Yehovah moro bun. Fu san ede wi kan taki dati? Fu di ala sani di Yesus ben e taki èn ben e du, ben e sori taki a abi den srefi fasi fu en P’pa. Sobun, di den disipel poti prakseri na a fasi fa Yesus ben e gi leri, èn di den si fa a ben e libi nanga trawan, dan dati yepi den fu kon sabi Yehovah moro bun.​—Yoh. 14:9; 17:3.

’YU EIGI NEN, A NEN DI YU GI MI’

6. Fu san ede Yesus ben kan taki dati Yehovah gi en En nen? (Yohanes 17:11, 12)

⁶ Na ini a begi fu en, Yesus aksi Yehovah fu du disi gi den disipel fu en: „Kibri den fu yu eigi nen ede, a nen di yu gi mi.” (Leisi Yohanes 17:11, 12.) Disi wani taki dati sma ben kan kari Yesus Yehovah tu? Nôno. Luku san Yesus ben taki na ini a begi fu en: „Kibri den fu yu eigi nen ede.” Sobun, sma no ben o kari Yesus Yehovah. Ma dan san Yesus ben wani taki di a taki dati Gado gi en a nen fu en? A fosi sani, na taki Yehovah ben seni Yesus fu taki gi en. A kon na ini a nen fu en P’pa èn a du wondru na ini a nen dati (Yoh. 5:43; 10:25). Boiti dati, a nen Yesus wani taki „Yehovah na ferlusu”. Iya, a nen fu Yesus abi furu fu du nanga a nen fu Yehovah.

7. Fu san ede Yesus ben kan taki na ini a nen fu Yehovah? Gi wan eksempre.

⁷ Fu di wan ambassadeur e teki presi gi wan tiriman, meki a kan taki gi a tiriman dati. Sobun, den sani di na ambassadeur e taki, abi leti so furu krakti leki te a tiriman ben o taki. Na a srefi fasi Yesus ben e teki presi gi Yehovah èn a ben e taki nanga a pipel na ini a nen fu en.​—Mat. 21:9; Luk. 13:35.

8. Fu san ede Yehovah taki dati Yesus ben e du sani „na ini” en nen srefi fosi a kon na grontapu? (Eksodes 23:20, 21)

⁸ Bijbel e kari Yesus „a Wortu” fu di Yehovah gebroiki en fu ferteri den engel nanga libisma san Yehovah ben wani den fu kon sabi èn san a ben wani taki den du (Yoh. 1:1-3). A kan taki Yesus ben de na engel di Yehovah ben seni fu sorgu gi den Israelsma na a ten di den ben de na ini a gran sabana. Yehovah taigi den Israelsma fu gi yesi na a engel dati, dan a taigi den tu fu san ede den ben musu du dati. Yehovah ben taki: „Fu di a e du sani na ini mi nen.”a (Leisi Eksodes 23:20, 21). Yehovah ben taki disi fu di Yesus e taki gi en èn fu di a de a moro prenspari sma di e sori taki Yehovah santa èn taki ala ten a e du san reti.

„MI TATA, GI YU NEN GLORI”

9. O prenspari a nen fu Yehovah ben de gi Yesus? Fu san ede wi kan taki dati?

⁹ Soleki fa wi si kba, dan a nen fu Yehovah ben prenspari srefsrefi gi Yesus srefi fosi a ben kon na grontapu. Èn di a ben de na grontapu, dan ala sani di a ben e du ben e sori tu o prenspari a nen fu Yehovah de gi en. Di a diniwroko fu Yesus ben e kon na wan kba, dan a aksi Yehovah: „Mi Tata, gi yu nen glori.” Wantewante en P’pa piki en nanga tranga sten kmoto fu hemel: „Mi ben gi mi nen glori kaba èn mi o du en baka.”​—Yoh. 12:28.

10-11. (a) Fa Yesus gi a nen fu Yehovah glori? (Luku a prenki.) (b) Fu san ede sma musu kon sabi taki ala ten Yehovah e du san reti èn taki en nen santa?

¹⁰ Yesus ben gi en P’pa nen glori tu. Fa a du dati? Wán fasi fa a du dati, na taki a meki sma kon sabi den moi fasi fu en p’pa èn a ferteri den sortu bigi sani a du. Ma a du ete wan tra sani. Yesus ben musu sori taki Yehovah ala ten ben du san reti èn taki en nen santa. Yesus sori o prenspari a sani disi de di a leri den bakaman fu en a Wi Tata begi. A ben taki: „Wi Tata na hemel, meki yu nen de santa.”​—Mat. 6:9.

¹¹ Fu san ede sma musu kon sabi taki ala ten Yehovah e du san reti èn taki a santa? Fu di Satan ben ferteri lei fu Yehovah Gado na ini a Dyari fu Eden. Satan na wan leiman èn a ben taki dati Yehovah ben e hori wan sani na baka gi Adam nanga Eva di ben o tyari wini kon gi den (Gen. 3:1-5). Fu taki en leti, Satan ben wani meki sma denki taki Yehovah no e du sani na wan reti fasi. Fu di Satan ferteri lei fu Yehovah, meki sma ben kan denki taki Yehovah na wan takru Gado. Bakaten, na a a ten fu Yob, Satan ben taki dati den sma di e dini Yehovah e du dati soso fu di den e kisi sani fu en. A leiman dati ben taki tu taki sma o tapu fu dini Yehovah te tesi e miti den, fu di den no lobi en trutru (Yob 1:9-11; 2:4). Ten ben de fanowdu fu tyari kon na krin efu na Yehovah ben e lei, noso efu na Satan.

„MI GI MI LIBI”

12. San Yesus ben de klarklari fu du gi a nen fu Yehovah?

¹² Yesus ben de klarklari fu dede srefi, so taki a ben kan kon na krin taki Yehovah santa èn taki ala ten a e du san reti (Yoh. 10:17, 18).b Adam nanga Eva di ben de sondro sondu, drai baka gi Yehovah èn den teki a sei fu Satan. Ma tra fasi leki den, Yesus ben de klarklari fu kon na grontapu èn fu sori a lobi di a ben abi gi Yehovah. Dati meki Yesus gi yesi na Yehovah na ini ala sani (Hebr. 4:15; 5:7-10). A tan gi yesi na Yehovah en heri libi langa teleki a dede na wan ogr’ati fasi na a pinapostu (Hebr. 12:2). Na so a sori taki a lobi Yehovah nanga a nen fu en.

13. Fu san ede Yesus ben de a moro bun sma fu sori taki Satan na wan leiman? (Luku a prenki.)

¹³ Ala sani di Yesus du e sori taki a no Yehovah na wan leiman, ma na Satan (Yoh. 8:44). Yesus ben sabi Yehovah moro bun leki iniwan sma di oiti ben de na libi. Efu den sani di Satan ben taki fu Yehovah ben tru, dan Yesus ben o sabi dati. Ma Yesus no meki noti tapu en fu opo taki gi a nen fu Yehovah, fu di a ben sabi taki den sani di Satan ben taki fu Yehovah no ben tru. Srefi di a ben gersi leki Yehovah ben gwe libi en, Yesus ben de klarklari fu dede èn fu tan getrow na en lob’ati P’pa, na presi fu drai baka gi en.​—Mat. 27:46.c

„MI KLARI A WROKO DI YU GI MI FU DU”

14. Fa Yehovah blesi Yesus fu di a ben tan gi yesi na en?

¹⁴ A neti fosi Yesus dede, a ben e begi èn na ini a begi dati a taki: „Mi klari a wroko di yu gi mi fu du.” A ben de seiker taki Yehovah ben o blesi en fu di a ben tan gi yesi na en (Yoh. 17:4, 5). Èn a no fu soso Yesus fertrow en P’pa bika Yehovah no meki a tan na ini a grebi (Tori 2:23, 24). A gi Yesus wan opobaka èn a gi en wan hei posisi na hemel (Fil. 2:8, 9). Te fu kba, Yesus bigin tiri leki Kownu fu Gado Kownukondre. San a Kownukondre dati ben o du? A di fu tu pisi fu a Wi Tata begi e taki: „Meki yu Kownukondre kon. Meki yu wani pasa na grontapu soleki fa a e pasa na hemel.”​—Mat. 6:10.

15. San moro Yesus o du?

¹⁵ Na ini a ten di e kon, Yesus o feti nanga den feanti fu Gado èn a o pori den ogrisma na ini Armagedon (Openb. 16:14, 16; 19:11-16). Syatu baka dati, a o trowe Satan go na ini „a dipi peti di no abi gron”, pe a no o man du noti (Openb. 20:1-3). Dan Yesus o tiri wán dusun yari langa, a o tyari freide kon baka na grontapu, èn a o yepi libisma fu kon de sondro sondu. A o gi den dedewan wan opobaka. A o sorgu taki heri grontapu tron wan paradijs. A wani fu Yehovah o kon tru.​—Openb. 21:1-4.

16. Fa a libi o de na a kba fu a Dusun Yari Tiri?

¹⁶ Fa a libi o de na a kba fu a Dusun Yari Tiri? Siki nanga sondu no o de moro. Libisma no o abi den 144.000 salfuwan fanowdu moro fu dini leki priester gi den èn den no o abi Yesus fanowdu moro tu fu dini leki Granpriester fu man abi wan matifasi nanga Yehovah. Èn „a lasti feanti”, dede, no o de moro. Den grebi o leigi. Den dedewan o kisi libi baka. Nowan sma na grontapu o abi sondu.​—1 Kor. 15:25, 26.

17-18. (a) San e psa na a kba fu a Dusun Yari Tiri? (b) San Yesus o du te a tiri fu en kon na wan kba? (1 Korentesma 15:24, 28) (Luku a prenki.)

¹⁷ San moro o psa na a kba fu a Dusun Yari Tiri? Na a ten dati, wan tumsi prenspari sani o psa. Nowan sma o tweifri moro efu Yehovah na wan santa Gado di ala ten e du san reti. Fa so? Na ini a Dyari fu Eden, Satan ben taki dati Yehovah na wan leiman èn taki a no e tiri libisma na wan lob’ati fasi. Sensi a ten dati, den wan di e lespeki Yehovah èn e gi en grani, santa a nen fu en ibri leisi baka. Sobun, na a kba fu a Dusun Yari Tiri, a nen fu Yehovah o santa dorodoro. Na a ten dati a o kon na krin taki Yehovah di de na hemel na trutru wan lob’ati P’pa.

¹⁸ Na a kba fu a Dusun Yari Tiri, ala sma o sabi taki ala den sani di Satan ben taki fu Yehovah, na soso lei. San Yesus o du te a tiri fu en kon na wan kba? A o opo ensrefi teige Yehovah, neleki fa Satan ben du dati? Nôno! (Leisi 1 Korentesma 15:24, 28.) Yesus o gi a Kownukondre abra baka na en P’pa. A o saka ensrefi na ondro a tiri fu Yehovah. Iya, tra fasi leki Satan, Yesus de klarklari fu gi Yehovah ala frantwortu baka di a ben kisi, fu di a lobi Yehovah.

19. San a nen fu Yehovah wani taki gi Yesus?

¹⁹ A no e ferwondru wi taki Yehovah ben de klarklari fu gi Yesus a nen fu en. Yesus sori wi krin suma na en P’pa. Sobun, san a nen fu Yehovah wani taki gi Yesus? Gi Yesus, a nen dati prenspari moro leki iniwan tra sani. Yesus ben de klarklari fu dede gi a nen dati, èn a o de klarklari fu gi ala sani abra baka na Yehovah na a kba fu a Dusun Yari Tiri. Fa wi kan teki na eksempre fu Yesus? Wi o piki na aksi dati na ini a tra artikel.