Yu kan leri sani ete fu den moro prenspari leri fu Bijbel?

1. Fa den sani di yu leri di yu bigin studeri Bijbel ben abi krakti na yu tapu?

DEN sani di wi leri di wi bigin studeri Bijbel kenki wi libi. Fu eksempre, di wi kon sabi taki Gado nen na Yehovah, dan dati gi wi dek’ati fu leri sabi en moro bun (Yes. 42:8). Di wi kon sabi san e psa trutru nanga den dedewan, dan wi no ben e aksi wisrefi moro efu den lobiwan fu wi di dede e pina (Preik. 9:10). Èn di wi leri taki Gado o meki grontapu tron wan paradijs, dan wi no ben e broko wi ede moro nanga a tamara fu wi. Wi ben de seiker taki wi no abi fu libi fu wan syatu pisi ten nomo, dus 70 noso 80 yari, ma fu têgo.​—Ps. 37:29; 90:10.

2. Fa 2 Petrus 1:12, 13 e sori taki lepi Kresten kan leri sani ete fu den moro prenspari leri fu Bijbel?

² Noiti wi musu fergiti o prenspari den fosi sani de di wi ben leri fu Bijbel. Na apostel Petrus ben skrifi a di fu tu brifi fu en gi den Kresten di ben e ’tai hori na den tru tori di den ben leri’. (Leisi 2 Petrus 1:12, 13.) Ma na a ten dati, ogr’ati sma ben kon na ini a gemeente èn den ben wani meki den brada nanga sisa drai baka gi a waarheid (2 Petr. 2:1-3). Petrus ben wani gi den brada nanga sisa fu en dek’ati so taki den ben o man kibri densrefi gi den falsi leri di sma ben e leri trawan. Dati meki a memre den na wan tu fu den leri fu Bijbel di den ben sabi kba. Den leri disi ben o yepi den fu tai hori na Yehovah te na a kba.

3. Fu san ede ala Kresten musu tan denki dipi fu den moro prenspari leri fu Bijbel? Gi wan eksempre.

³ Srefi efu wi e dini Yehovah omeni yari kba, tòg wi kan leri nyun sani fu den moro prenspari leri fu Bijbel. Teki fu eksempre wan mama di sabi bori heri bun. En nanga en umapkin kan gebroiki den srefi sani fu meki wan supu. Ma fu di a mama abi moro ondrofeni, meki a kan gebroiki den srefi sani fu meki omeni sortu switi supu. Na so a de tu taki brada nanga sisa di e dini Yehovah wan langa pisi ten kba kan leri difrenti nyun sani fu wan Bijbeltekst, aladi den wan di bigin studeri Bijbel no so langa psa, no man du dati ete. A situwâsi fu wi èn den sani di wi e du now na ini a diniwroko kenki sensi di wi dopu. Te wi e prakseri den sani di wi ben leri kba fu Bijbel, dan kande wi e kon sabi nyun sani di wi kan fiti na ini wi libi now. Meki wi go luku sortu nyun sani den wan di e dini Yehovah wan langa pisi ten kba kan leri fu dri prenspari leri fu Bijbel.

YEHOVAH NA WI MEKIMAN

4. Sortu krakti a ben abi na wi tapu, di wi kon sabi taki Yehovah na a Mekiman?

⁴ „A sma di meki ala sani na Gado” (Hebr. 3:4). Wi sabi taki a sma di meki grontapu nanga ala sani na tapu abi ala koni nanga ala makti. Na en meki wi, sobun, a sabi wi dorodoro. San moro prenspari, na taki a e broko en ede nanga wi èn a sabi san wi abi fanowdu. Fu di wi sabi taki Yehovah na wi Mekiman, meki wi libi kenki èn wi e du wan bun sani nanga wi libi.

5. San kan yepi wi fu kon abi sakafasi? (Yesaya 45:9-12)

⁵ Te wi e ferstan taki Yehovah na a Mekiman, dan dati kan leri wi tu taki wi musu kon abi sakafasi. Baka di Yob bigin poti tumsi furu prakseri na ensrefi èn na tra libisma, dan Yehovah memre en taki En na a Almakti Mekiman (Yob 38:1-4). A sani disi yepi Yob fu kon ferstan taki ala ten Yehovah e du san reti. Bakaten, a profeiti Yesaya skrifi a sani disi: „Yu denki taki wan pisi klei ben o taigi a sma di o meki wan sani nanga en: ’San yu e meki?’”​—Leisi Yesaya 45:9-12.

6. O ten a bun fu prakseri fa wi Mekiman koni èn fa a makti? (Luku den prenki.)

⁶ Te wan sma e dini Yehovah furu yari kba, dan a ben kan bigin fertrow tumsi tapu en eigi denki, na presi taki a e fertrow tapu Yehovah èn tapu a Wortu fu en (Yob 37:23, 24). Sobun, te a sma disi e denki dipi fu wi Mekiman, Yehovah, èn te a e prakseri fa a Gado disi koni èn fa a makti, dan fa dati e yepi en? (Yes. 40:22; 55:8, 9) Te a e ferstan taki den prakseri fu Yehovah prenspari moro en eigi prakseri, dan disi o yepi en fu kon abi sakafasi.

7. San yepi Rahela fu fiti ensrefi na den kenki di kon na ini na organisâsi?

⁷ Rahela di e libi na ini Slofeinia, kon si taki a sani di yepi en fu fiti ensrefi di kenki kon na ini na organisâsi, na taki a ben e denki dipi fu a Mekiman. A e taki: „A no ala ten a ben makelek gi mi fu fiti misrefi na den kenki di kon na ini na organisâsi. Fu eksempre mi ben luku a Update nr. 8 fu a Tiri Skin 2023, di ben e taki dati brada mag abi wan barba now. Ma mi skreki di mi si taki wan brada di ben abi wan barba ben e hori wan lezing. Dati meki mi begi Yehovah fu yepi mi fu fiti misrefi na a kenki disi.” Rahela kon si taki fu di Yehovah na a Mekiman fu hemel nanga grontapu, meki a sabi ala ten san na a moro bun fasi fu tiri na organisâsi fu en. Efu yu feni en muilek fu fiti yusrefi na wan kenki di kon na ini na organisâsi, dan meki ten fu denki dipi fu a koni èn a makti di wi Mekiman abi.​—Rom. 11:33-36.

FU SAN EDE GADO E GI PASI TAKI WI E PINA

8. Fa wi kisi wini fu di Gado gi pasi taki pina e miti wi?

⁸ Fu san ede Gado e gi pasi taki pina miti wi? Son sma di no man piki na aksi disi kon mandi srefsrefi nanga Gado, noso den e bribi taki Gado no de trutru (Odo 19:3). Ma tra fasi leki den sma dati, yu leri taki a no Yehovah e meki taki wi e pina, ma wi e pina fu di wi gebore nanga sondu nanga swakifasi. Yu leri tu taki fu di Yehovah abi pasensi nanga libisma, meki a gi pasi taki milyunmilyun sma kan leri sabi en èn den kan kon sabi fa Yehovah o tyari wan kba kon na pina fu ala ten (2 Petr. 3:9, 15). Fu di yu kon sabi fu san ede Yehovah e gi pasi taki sma e pina, meki yu kon moro krosbei na en.

9. O ten a bun fu prakseri fu san ede Yehovah e gi pasi taki sma e pina?

⁹ Wi e ferstan taki wi musu abi pasensi aladi wi e wakti Yehovah fu tyari wan kba kon na pina. Ma te problema e miti den lobiwan fu wi, te sma no e libi bun nanga den, noso te wan fu den dede, dan wi ben kan aksi wi srefi fu san ede Yehovah no e tyari wan kba kon na den sani disi (Hab. 1:2, 3). Na den sortu momenti dati, a bun fu prakseri fu san ede Yehovah e gi pasi taki ret’ati sma e pinaa (Ps. 34:19). Wi musu hori na prakseri tu taki Yehovah o tyari wan kba kon na pina fu ala ten.

10. San yepi Anne fu feni trowstu baka di en m’ma dede?

¹⁰ Te wi e ferstan fu san ede sma e pina, dan dati kan yepi wi fu hordoro. Anne, di e libi na a èilanti Mayotte, na ini India Se, e taki: „Di mi m’ma dede wan tu yari psa, dan mi ben e sari srefsrefi. Ma mi ben e tan memre misrefi taki a no Yehovah e meki sma pina. Yehovah no man wakti fu tyari wan kba kon na ala pina di sma e pina èn a o wiki den lobiwan fu wi di dede. Te mi e denki dipi fu den tori dati, dan mi e kisi sowan korostu firi taki mi srefi no man bribi dati.”

11. Te wi sabi fu san ede Yehovah e gi pasi taki sma e pina, dan fa dati kan yepi wi fu tan preiki?

¹¹ Te wi sabi fu san ede Gado e gi psa taki sma e pina, dan dati kan gi wi dek’ati fu tan preiki. Petrus ben tyari kon na krin taki Yehovah abi pasensi, fu di a wani taki sma sori berow so taki den kan kisi ferlusu. Baka dati a skrifi: „Un musu luku sortu sma un musu de. Tyari unsrefi na wan santa fasi èn du sani di e sori taki unu e dini Gado fayafaya” (2 Petr. 3:11). Wan fu den „sani di e sori taki wi e dini Gado fayafaya”, na a preikiwroko fu wi. Neleki wi P’pa na hemel, wi lobi tra sma. Wi wani taki den musu libi na ini a nyun grontapu fu Gado pe ala sani o waka na wan reti fasi. Yehovah di abi pasensi, e gi ala sma na ini a kontren fu yu na okasi fu tron wan anbegiman fu en. Yu abi a moi grani fu wroko makandra nanga Gado èn fu yepi so furu sma leki yu man fu kon sabi en fosi a kba kon.​—1 Kor. 3:9.

WI E LIBI NA INI „DEN LASTI DEI”

12. Fu di wi sabi taki wi e libi na ini „den lasti dei”, dan fa dati e yepi wi?

¹² Bijbel e sori krin fa sma ben o de na ini „den lasti dei” (2 Tim. 3:1-5). Te wi e si fa sma na wi lontu e tyari densrefi, dan disi e sori krin taki Bijbel no e lei. Te wi e luku fa sma e kon moro ogri dei fu dei, dan dati e yepi wi fu de moro seiker taki Gado Wortu e taki san tru.​—2 Tim. 3:13-15.

13. Fa na agersitori di Yesus ferteri na Lukas 12:15-21 kan yepi wi?

¹³ Fu di wi sabi taki wi e libi na ini den lasti dei, meki a moro makelek gi wi fu tan poti prakseri na den moro prenspari sani. Wi kan leri fu san ede a bun fu du disi te wi e luku na agersitori di Yesus ferteri na Lukas 12:15-21. (Leisi en.) Fu san ede Bijbel e kari a man wan „don man”? A no ben taki dati fu di a man ben gudu, ma fu di a ben e ’tyari moro nanga moro gudu kon na wán gi ensrefi, aladi a no ben gudu na ini Gado ai’. A man ben meki wan bigi fowtu fu di a no ben e gebroiki en ten bun èn a no ben o libi langa moro. Gado taigi a man: „Tideneti srefi yu o lasi yu libi.” Now di a kba fu a grontapu disi e kon moro krosbei, wi ben kan aksi wisrefi a sani disi: ’Den sani di mi e suku fu du e sori taki mi e gebroiki mi ten na wan koni fasi? Fa a de nanga den marki di mi e yepi den pkin fu mi fu poti? Mi e gebroiki mi krakti, mi ten, nanga mi moni moro furu fu tyari gudu kon na wán na hemel?

14. Fa na ondrofenitori fu Miki e yepi wi fu si fu san ede a bun fu hori na prakseri taki wi e libi na ini den lasti dei?

¹⁴ Te wi e luku den beweisi di e sori taki wi e libi na ini den lasti dei, dan disi kan yepi wi fu teki bun besroiti na ini a libi. Na dati psa nanga wan sisa di nen Miki. A e taki: „Di mi klari skoro, dan mi ben wani du wan wroko di ben o gi mi okasi fu studeri a libi fu meti. Ma mi ben wani pionier tu èn mi ben wani go dini na wan kontren pe moro preikiman ben de fanowdu. Lepi mati gi mi a rai fu denki bun efu a ben de wan koni sani fu suku a wroko di mi ben wani èn fu pionier na a srefi ten. Den memre mi taki a grontapu disi o kon na wan kba heri esi. Ma na ini a nyun grontapu, mi o man studeri a libi fu ala den meti di mi lobi èn mi o man du dati fu ala ten. Dati meki mi besroiti fu du wan tu syatu opleiding fu leri du bun wroko. Na so mi ben man feni wan wroko di ben e gi mi okasi fu pionier èn fu froisi go na Ekwador pe moro preikiman ben de fanowdu.” Miki nanga en masra e du kringwroko now na ini a kondre dati.

15. Fu san ede wi no musu lasi howpu te sma no wani arki a bun nyunsu? Gi wan eksempre. (Luku den prenki.)

¹⁵ Wi no musu las’ati te sma no wani arki a bun nyunsu. Sma kan kenki. Luku na eksempre fu Yesus en afu-brada Yakobus. A ben gro kon makandra nanga Yesus, a si fa Yesus tron a Mesias, èn a si tu fa Yesus gi sma leri na wan fasi fa nowan sma ben du dati. Ma omeni yari langa Yakobus no tron wan bakaman fu Yesus. Na baka di Yesus kisi wan opobaka, dan fosi a brada fu en tron wan disipel, èn a tron wan fayafaya disipel tub (Yoh. 7:5; Gal. 2:9). A prenspari fu no lasi howpu te famiriman no wani poti bribi ete na ini a bun nyunsu èn a prenspari tu fu tan preiki gi den wan di no ben wani arki yu fosi. Hori na prakseri taki wi musu du a wroko fu wi fayafaya, fu di wi e libi na ini den lasti dei. Den sani di yu e taigi den sma disi kan abi krakti na den tapu bakaten, kande fosi a bigi banawtu bigin srefi.c

TAN SORI WARDERI GI DEN SANI DI YEHOVAH E LERI WI

16. Fa yu kisi wini fu den sani di Yehovah e leri wi? (Luku a faki „Gebroiki den fu yepi trawan”.)

¹⁶ Sonwan fu den sani di na organisâsi e leri wi nanga yepi fu Bijbel, na gi sma di no sabi furu fu Bijbel. Fu eksempre, a lezing di e hori ibri wiki, spesrutu artikel nanga felem tapu jw.org, èn den tijdschrift di wi e prati na ini a preikiwroko, meki spesrutu gi sma di no de Kotoigi. Ma tòg wi e kisi wini fu den leri dati. Den e meki taki wi e kon abi moro lobi gi Yehovah, den e tranga a bribi di wi abi na ini a Wortu fu en, èn den e yepi wi fu tron moro bun leriman fu Bijbel.​—Ps. 19:7.

17. Na ini sortu situwâsi a bun fu prakseri den moro prenspari leri fu Bijbel?

¹⁷ Wi leki Yehovah Kotoigi breiti srefsrefi te wi e kon ferstan wan Bijbel tru tori moro krin. Ma wi de nanga tangi tu gi den prenspari Bijbel leri di wi kon sabi di wi bigin studeri Bijbel, fu di den hari wi kon na a waarheid. Soleki fa wi si, dan wi e kisi wini ete fu den tru tori disi. Efu wi feni taki wi eigi denki moro bun, aladi wi e kisi rai fu na organisâsi, dan a bun fu memre taki na a Mekiman di abi ala makti nanga koni e tiri na organisâsi. Te wi, noso wan lobiwan fu wi e kisi tesi, dan wi kan hori pasensi èn wi kan prakseri fu san ede Yehovah e gi pasi taki sma e pina. Èn te wi musu besroiti san na a moro bun fasi fu gebroiki wi ten nanga wi moni, dan wi kan hori na prakseri taki wi e libi na ini den lasti dei èn taki a kba e kon heri esi. Meki a de so taki den sani di Yehovah leri wi e tan yepi wi fu tron koni sma di e tan dini en getrow.