Yu kan de seiker taki Yehovah gi yu pardon

1-2. Fa wi e firi te wi e ferstan taki Yehovah gi wi pardon fu den sondu fu wi? (Luku na tapu a kafti.)

KOWNU David ben sabi fa a de te yu konsensi e trobi yu fu di yu ben du sondu (Ps. 40:12; 51:3; luku san skrifi na loktusei fu a psalm). A ben meki wan tu seryusu fowtu na ini en libi. Ma a ben sori taki a ben abi trutru berow èn Yehovah ben gi en pardon (2 Sam. 12:13). Dati meki a ben de wan ferlekti gi David di a kon ferstan taki Yehovah ben gi en pardon.​—Ps. 32:1.

² Neleki David wi kan firi ferlekti tu te Yehovah gi wi pardon fu den sondu fu wi. Srefi efu wi du wan seryusu sondu, a de wan trowstu fu sabi taki Yehovah o gi wi pardon te wi abi trutru berow, te wi e begi en fu gi wi pardon, te wi e taki nanga den owruman, èn te wi e du ala san wi man fu no du a srefi sondu baka (Odo 28:13; Tori 26:20; 1 Yoh. 1:9). Èn wi breiti so te taki te Yehovah gi wi pardon fu a sondu fu wi, a no o krutu wi noiti moro gi a sondu dati, èn a no o strafu wi tu.​—Esek. 33:16.

3-4. Fa wan sisa ben e firi baka di a dopu, èn san wi o luku na ini na artikel disi?

³ Ma son leisi, wi ben kan tweifri efu Yehovah gi wi pardon trutru. Na so Jennifer ben e firi. A ben kweki na ini waarheid, ma di a kon moro bigi, dan a bigin du ogri sondro taki en m’ma nanga p’pa ben sabi. Ma wan tu yari baka dati, a tyari kenki kon, a gi ensrefi abra na Yehovah, èn a dopu. A e taki: „Fosi, mi ben lobi du hurudu, mi ben e dringi sopi teleki mi kon drungu, mi ben de wan faya-ati sma, èn mi ben e prakseri soso moni. Mi ben sabi taki Yehovah kan gi wi pardon nanga yepi fu a ferlusu-ofrandi fu Krestes. Ma aladi mi ben sori berow èn mi ben begi Yehovah fu gi mi pardon, tòg mi ben e tweifri efu a ben gi mi pardon trutru.”

⁴ Yu feni en muilek son leisi fu bribi taki Yehovah gi yu pardon fu den fowtu di yu ben meki? Yehovah na wan Gado di abi sar’ati. David ben de seiker taki Yehovah ben gi en pardon èn Yehovah wani taki wi musu firi ferlekti neleki fa David ben e firi ferlekti. Na ini na artikel disi wi o luku fu san ede a prenspari fu bribi taki Yehovah gi wi pardon trutru. Wi o luku tu san kan yepi wi fu bribi dati.

FU SAN EDE A PRENSPARI FU BRIBI TAKI YEHOVAH GI WI PARDON?

5. San Satan wani taki wi musu bribi? Gi wan eksempre.

⁵ Te wi e bribi taki Yehovah gi wi pardon, dan Satan no o man kori wi. No fergiti taki Satan o du ala san a man fu tapu wi fu dini Yehovah. Fu eksempre, Satan kan pruberi fu kori wi taki Yehovah no o gi wi pardon fu den sondu fu wi. Prakseri san psa nanga a man na ini Korente di ben puru fu a gemeente fu di a ben du hurudu (1 Kor. 5:1, 5, 13). Ma di a man disi sori berow bakaten, dan Satan ben wani taki den brada nanga sisa na ini a gemeente dati ben musu weigri fu gi en pardon èn taki den no ben musu teki en baka na ini a gemeente. Èn efu a gemeente no ben gi a man disi pardon, dan a man ben kan denki taki Yehovah noiti no ben o man gi en pardon. Kande a ben o „sari so te” taki a ben o tapu fu dini Yehovah. Na ini a ten disi, Satan wani kori wi tu fu bribi taki Yehovah no o man gi wi pardon noiti fu den sondu fu wi, soso fu meki wi tapu fu dini en. Ma „wi sabi san [Satan] abi na prakseri”.​—2 Kor. 2:5-11.

6. Fa wi kan feni ferlekti te wi konsensi e trobi wi?

⁶ Te wi e bribi taki Yehovah gi wi pardon, dan wi konsensi no o trobi wi moro. Te wi du sondu, dan wi e firi sari (Ps. 51:17). Dati na wan bun sani fu di te wi e firi sari, dan dati kan gi wi dek’ati fu tyari kenki kon (2 Kor. 7:10, 11). Ma efu wi e tan nanga a denki taki Yehovah no gi wi pardon, dan wi kan las’ati so te taki wi e tapu fu dini Yehovah. Na presi fu dati, te wi e bribi taki Yehovah gi wi pardon trutru, dan wi konsensi no o trobi wi moro. Na so wi o man go doro fu dini Yehovah, wi o abi wan krin konsensi, èn wi o de nanga prisiri baka (Kol. 1:10, 11; 2 Tim. 1:3). San kan yepi wi fu de seiker taki Yehovah gi wi pardon?

SAN KAN YEPI WI FU BRIBI TAKI YEHOVAH GI WI PARDON TRUTRU?

7-8. San Yehovah taigi wi fu ensrefi, èn fu san wi kan de seiker? (Eksodes 34:6, 7)

⁷ Prakseri san Yehovah ben taki fu ensrefi. Luku san Yehovah ben taigi Moses tapu Sinai-bergi.a (Leisi Eksodes 34:6, 7.) Aladi Yehovah abi furu moi fasi, tòg a ferteri Moses soso taki en na „wan Gado di abi sari-ati nanga switifasi”. Yu denki taki sowan Gado ben o weigri fu gi wan anbegiman fu en pardon aladi na anbegiman ben sori taki a abi trutru berow fu a sondu di a du? Noiti! Dati ben o de wan ogr’ati sani fu du èn a ben o sori tu taki Yehovah no abi sar’ati. Noiti Yehovah o de so!

⁸ Te Yehovah e taki dati a abi sar’ati, dan wi kan abi a fertrow taki a e taki san tru. A no e lei noiti (Ps. 31:5). Sobun, wi kan bribi san a e taki. Efu yu feni en muilek fu bribi taki Yehovah gi yu pardon trutru, dan aksi yusrefi: ’Mi e bribi taki Yehovah na wan Gado di abi sar’ati èn taki a ben o gi iniwan sma pardon te den e sori berow fu den fowtu fu den?’ Efu yu e bribi dati, dan yu kan de seiker taki a gi yu pardon tu.

9. San Psalm 32:5 e leri wi te a abi fu du nanga a fasi fa Yehovah e gi wi pardon?

⁹ Prakseri san Yehovah e leri wi na ini Bijbel te a abi fu du nanga a fasi a e gi wi pardon. Luku san a Bijbel skrifiman David ben taki fu a fasi fa Yehovah e gi wi pardon. (Leisi Psalm 32:5.) David ben taki: „Yu gi mi pardon fu den fowtu nanga den sondu fu mi.” A Hebrew wortu di vertaal nanga „gi pardon” wani taki „opo go na loktu”, noso „tyari gwe”. Di Yehovah gi David pardon, dan fu taki en leti, a opo den sondu fu en tyari gwe. David ben e firi ferlekti fu di a ben sabi taki Yehovah ben gi en pardon trutru (Ps. 32:2-4). Wi kan firi ferlekti tu neleki David. Te wi e sori berow nanga wi heri ati, dan wi konsensi no o trobi wi moro fu di Yehovah opo den sondu fu wi tyari gwe.

10-11. San den wortu „de klarklari fu gi sma pardon” e leri wi fu Yehovah? (Psalm 86:5)

¹⁰ Leisi Psalm 86:5. Na ini a tekst disi, David e taki dati Yehovah „de klarklari fu gi sma pardon”. Disi wani taki dati Yehovah no de gaw fu kisi atibron te wi meki fowtu, èn ala ten a e gi sma pardon te den sori berow. Fu san ede Yehovah de so? Na ini na artikel na fesi, wi leri taki Yehovah e pramisi taki a o tan lobi den wan di lobi en èn noiti a o gwe libi den. Fu di a lobi wi so, meki a de klarklari fu gi iniwan sma pardon, solanga den e sori berow (Yes. 55:7). Efu yu e tweifri efu Yehovah gi yu pardon fu wan fowtu di yu ben meki, dan aksi yusrefi: ’Mi e bribi taki Yehovah de klarklari fu gi iniwan sma pardon, solanga den e sori berow èn e begi en fu abi sari’ati nanga den? Efu mi e bribi dati, dan mi kan de seiker taki a gi mi pardon tu di mi aksi en fu abi sar’ati nanga mi.’

¹¹ Bijbel e taigi wi tu taki Yehovah e ferstan krin fa wi meki èn taki wi na sondu sma (Ps. 139:1, 2). Meki wi go luku san David e taki na ini wan tra psalm èn fa dati kan yepi wi tu fu bribi taki Yehovah de klarklari fu gi wi pardon.

SAN YEHOVAH E HORI NA PRAKSERI FU WI?

12-13. Soleki fa Psalm 103:14 e sori, dan san Yehovah e hori na prakseri fu wi èn fa a e libi nanga wi?

¹² Leisi Psalm 103:14. David e taki dati Yehovah e „hori na prakseri taki na fu doti wi meki”. Nanga den wortu dati, David e tyari kon na krin san na wan reide fu san ede Yehovah de klarklari fu gi sma pardon te den sori berow fu den sondu fu den. Yehovah e tan hori na prakseri taki wi na sondu sma. Meki wi go luku moro fini san David ben taki.

¹³ David e taki dati Yehovah „sabi heri bun fa wi meki”. A meki Adam fu a „doti fu a gron” èn a sabi heri bun fa libisma meki èn san den abi fanowdu. Fu eksempre, den musu nyan, den musu sribi, èn den musu bro. Srefi sma di no abi sondu musu du den sani disi (Gen. 2:7). Yehovah sabi dati heri bun. Ma di David taki dati Yehovah e hori na prakseri taki na fu doti wi meki, dan dati ben wani taki tu dati ala ten Yehovah e firi gi wi, fu di sabi taki wi na sondu sma. A sabi taki wi o meki fowtu son leisi, èn te a si taki wi abi trutru berow, dan a e sori sar’ati gi wi èn a e gi wi pardon.​—Ps. 78:38, 39.

14. (a) San moro David taki fu a fasi fa Yehovah e gi wi pardon? (Psalm 103:12) (b) San wi kan leri fu a fasi fa Yehovah gi David pardon? (Luku a faki „A fasi fa Yehovah e gi pardon èn e fergiti den fowtu fu wi”.)

¹⁴ San moro kan yepi wi fu de seiker taki Yehovah gi wi pardon? (Leisi Psalm 103:12.) David e taki dati te Yehovah e gi wan sma pardon, dan A e poti den sondu fu wi „so fara leki son-opo de fu sondongo”. A presi pe son e opo èn pe son e dongo de so fara fu makandra taki noiti den o man miti. Disi wani taki dati te Yehovah e gi wi pardon fu den sondu fu wi, dan a de neleki a e tyari den gwe bun fara fu wi. Soleki fa wan buku e taki, dan Yehovah e tyari den sondu fu wi gwe so fara taki nowan sani o man meki a prakseri den baka. Boiti dati, a no o krutu wi moro, èn a no o strafu wi moro tu. ​—Esek. 18:21, 22; Tori 3:19.

15. San wi kan du efu wi e tweifri ete efu Yehovah gi wi pardon fu den fowtu fu wi?

¹⁵ Fa den wortu fu David na Psalm 103 kan yepi yu te yu e tweifri efu Yehovah gi yu pardon trutru? Soleki fa wi ben si kba, dan Yehovah e hori na prakseri taki yu na wan sondu sma. Èn te sma abi trutru berow fu den sondu fu den èn e tyari kenki kon, dan a de klarklari fu gi den pardon. No fergiti taki Yehovah besroiti taki a no o prakseri den sondu fu yu noiti moro. Sobun, a no o krutu yu moro gi den sondu dati èn a no o strafu yu moro tu. Yehovah no e tan prakseri den fowtu di yu ben meki. Yu no musu du dati tu (Ps. 130:3). Te wi e bribi taki Yehovah gi wi pardon trutru, dan wi konsensi no o trobi wi moro èn wi kan go doro fu dini Yehovah nanga prisiri.

16. Gi wan eksempre di e sori fu san ede a no bun fu tan prakseri den sondu di wi ben du te Yehovah gi wi pardon kba. (Luku a prenki.)

¹⁶ Luku na eksempre disi. Te wan sma e rèi wan wagi, dan wanwan leisi a kan luku na ini a spikri fu man si san e kon na en baka. Ma efu a ben o du dati doronomo, dan dati kan tyari problema kon. A musu tan luku go na fesi noso a kan meki wan aanrijding. Na so a de tu taki a bun son leisi fu prakseri den fowtu di wi ben meki fosi. Dati kan yepi wi fu no meki den srefi fowtu dati baka. Ma efu wi e tan poti prakseri na wan sondu di wi ben du te Yehovah gi wi pardon kba gi dati, dan wi kan lasi prisiri èn kande wi no o man dini en nanga wi heri ati moro. Na presi fu dati, wi musu tan poti prakseri na a pasi di de na wi fesi. Wi de tapu a pasi di e tyari sma go na libi na ini a nyun grontapu di Gado pramisi. Drape wi „no o memre den fosten sani moro” di ben e meki wi firi sari.​—Yes. 65:17; Odo 4:25.

TAN OVERTOIGI YUSREFI TAKI YEHOVAH GI YU PARDON

17. Fu san ede wi musu tan overtoigi wisrefi taki Yehovah lobi wi èn taki a gi wi pardon trutru?

¹⁷ Wi musu tan overtoigi wisrefi taki Yehovah lobi wi èn taki a gi wi pardon (1 Yoh. 3:19). Fu san ede? Fu di Satan no o tapu fu pruberi fu kori wi taki Yehovah no lobi wi èn taki a no o gi wi pardon noiti. Awinsi fa a no fa, a wani taki wi musu tapu fu dini Yehovah. Wi kan ferwakti taki Satan o du moro muiti fu meki wi tapu fu dini Yehovah, fu di a sabi taki en ten syatu (Openb. 12:12). Wi no musu meki a wini!

18. San yu kan du fu overtoigi yusrefi taki Yehovah lobi yu èn taki a gi yu pardon trutru?

¹⁸ Na ini na artikel na fesi, wi si san o yepi yu fu bribi taki Yehovah gi yu pardon. Efu yu wani de seiker taki Yehovah gi yu pardon, dan prakseri san Yehovah e taki fu ensrefi. Denki dipi fu san Bijbel e taki fu a fasi fa Yehovah e gi sma pardon. No fergiti taki a sabi taki yu na wan sondu sma èn taki a o sori sar’ati gi yu. Èn hori na prakseri taki te a e gi sma pardon, dan a no e prakseri den sondu fu den moro èn a no e krutu den moro tu gi den sondu dati. Disi o meki taki yu o firi koloku fu di yu o de seiker taki Yehovah sori sar’ati gi yu. Neleki David yu o man taki: „Grantangi Yehovah taki yu gi mi pardon ’fu den fowtu nanga den sondu fu mi’!”​—Ps. 32:5.