Yepi sma di wani leri sabi Gado

1. San kan psa te sma e yere a bun nyunsu?

FURU sma na ini a fosi yarihondro ben breiti di den fosi Kresten ferteri den fu Yesus, èn den ben wani tron Kresten wantewante. (Leisi Tori fu den apostel 13:47, 48; 16:14, 15.) Na ini a ten disi yu abi sma tu di breiti te den e yere a bun nyunsu fu a fosi leisi. Ma yu abi tra sma tu di no wani sabi noti fu a Kownukondre boskopu na a bigin, ma bakaten den wani kon sabi Gado èn den wani anbegi en. San wi musu du te wi miti ’sma di abi a yoisti denki’ na ini a preikiwroko?

2. Fu san ede wi kan agersi a preikiwroko fu wi nanga a wroko fu wan sma di e prani sani?

² Luku na eksempre disi. Wi kan agersi a preikiwroko fu wi nanga a wroko fu wan sma di e prani sani. Sonwan fu den n’nyan di a prani lepi kba, ma trawan no lepi ete. A sma di e prani sani musu koti den lepi n’nyan wantewante, ma a o tan sorgu gi den trawan di no lepi ete fu koti. Na so a de tu taki te wi feni wan sma di wani arki a boskopu fu wi, dan wi no musu draidrai fu yepi en fu tron wan disipel fu Krestes. Na a srefi ten, wi e tan luku fa wi kan yepi den tra sma di abi moro ten fanowdu fu kon si o prenspari a boskopu de di den yere (Yoh. 4:35, 36). Te wi man si taki sma wani kon sabi moro, dan wi o sabi san na a yoisti fasi fu yepi den. Na ini na artikel disi wi o luku san wi kan du na a fosi takimakandra di wi abi nanga sma di wani arki a boskopu fu wi. Wi o luku tu fa wi kan yepi den sma dati fu kon moro krosbei na Yehovah èn fu tron anbegiman fu en.

TE SMA WANI KON SABI MORO

3. San wi musu du te wi feni sma di wani sabi moro? (1 Korentesma 9:26)

³ Te wi feni sma di wani sabi moro, dan wi no musu draidrai fu yepi den fu kon sabi Yehovah èn fu kon moro krosbei na en. Wi musu aksi den sma dati efu den wani studeri Bijbel èn wi musu kari den kon na den konmakandra fu wi wantewante.​—Leisi 1 Korentesma 9:26.

4. Ferteri wan ondrofenitori fu wan sma di ben wani studeri Bijbel wantewante.

⁴ Aksi a sma efu a wani studeri Bijbel. Son sma di wi e miti wani studeri Bijbel wantewante. Fu eksempre, wan fodewroko, wan yongu uma na ini Kanada waka go na wan bukuwagi èn a teki wan kopi fu a Yu kan de koloku fu têgo!-brochure. A sisa di ben e tnapu na a bukuwagi, ferteri a yongu uma taki a ben kan kisi wan Bijbelstudie tu efu a ben o teki a brochure. A yongu uma ben wani sabi moro èn a gi a sisa en telefon nomru. Moro lati a dei dati, a yongu uma seni wan app gi a sisa fu aksi en o ten den ben o studeri. Di a sisa taigi en taki a ben o kon na en a weekend dati, dan a yongu uma aksi en: „Yu no kan kon tamara? Mi vrij tamara.” Den studeri a freida dati. A yongu uma kon na a konmakandra fu a fosi leisi a weekend dati èn heri esi a bigin tron wan mati fu Yehovah.

5. San wi musu du te wi e si taki wan sma no klari ete fu studeri Bijbel nanga wi?

⁵ A no de fu taki dati a no ala sma o de leki a yongu uma di ben wani studeri Bijbel wantewante. Son sma abi moro ten fanowdu. Kande wi musu bigin taki fu wan sani fosi di e hari a sma prakseri. Tòg wi musu tan abi a howpu taki a sma o wani studeri Bijbel wan dei èn wi musu tan poti prakseri na en. Te wi e du dati, dan kande fosi yu denki, a o wani studeri Bijbel. Fa wi kan aksi wan sma efu a wani studeri Bijbel? Meki wi go luku san son brada nanga sisa di sabi heri bun fa fu bigin Bijbelstudie, e taki.

6. San wi kan taki fu yepi a sma fu kon si taki a o kisi wini fu a Bijbelstudie?

⁶ Den preikiman nanga den pionier disi di sabi heri bun fa fu bigin wan Bijbelstudie nanga sma, ferteri taki na ini son kondre a moro bun fu no gebroiki wortu soleki „studie”, „Bijbel les”, noso „yu o kisi leri” te wi e taki fu a Bijbelstudie. Den kon si taki a moro bun fu gebroiki wortu soleki „takimakandra”, èn „kon sabi Bijbel moro bun”. Efu yu wani miti a sma baka fu taki go doro nanga en, dan kande yu kan taigi en: „Mi feni en moi fu si fa Bijbel e piki den prenspari aksi fu a libi”, noso „Bijbel a no gewoon wan kerki buku, ma a e gi wi bun rai”. Kande yu kan taki tu: „Na ini 10 noso 15 miniti yu kan leri wan sani di o yepi yu trutru na ini yu libi.” Yu no abi fu gebroiki wortu soleki „afspraak” noso „ibri wiki”, fu di dati kan meki a sma denki taki a o abi fu tan miti yu.

7. O ten son sma kon ferstan taki Bijbel e leri san tru? (1 Korentesma 14:23-25)

⁷ Kari den kon na wan fu den konmakandra fu wi. Soleki fa a sori, dan son sma na ini a ten fu Paulus kon ferstan taki den ben e leri san tru di den ben de na wan Kresten konmakandra. (Leisi 1 Korentesma 14:23-25.) Na so a de tu nanga furu sma na ini a ten disi. Furu sma e tron mati fu Yehovah moro esi te den e bigin kon na den konmakandra fu wi. O ten yu musu kari den fu kon? A Yu kan de koloku fu têgo!-buku e gi sma wan kari na ini les 10, ma yu no abi fu wakti teleki yu doro a les dati. A fosi leisi kba te yu e taki nanga a sma, yu kan kari en kon na wan konmakandra di e hori satra noso sonde. Kande yu kan taigi en san na a nen fu a publiki taki, noso yu kan ferteri en san wi o luku na ini a Waktitoren-studie fu a wiki dati.

8. San wi kan ferteri a sma te wi e kari en kon na den konmakandra fu wi? (Yesaya 54:13)

⁸ Te wi e kari wan sma kon na den konmakandra fu wi, dan a bun fu sori en taki den konmakandra fu wi no de leki den wan fu a kerki pe a gwenti go kande. Di wan Bijbelstudie ben de na a Waktitoren-studie fu a fosi leisi, dan a aksi a sma di ben e studeri nanga en: „A fesiman sabi ala sma nen?” A sisa taigi en taki wi alamala e pruberi fu sabi den nen fu den sma na ini wi gemeente, fu di a gemeente de leki wan famiri. Ne a Bijbelstudie taigi en taki na ini a kerki fu en, furu sma no sabi makandra nen. Wi kan ferteri den Bijbelstudie tu na sortu tra fasi a gemeente fu wi e difrenti fu tra kerki. (Leisi Yesaya 54:13.) Wi e kon makandra fu anbegi Yehovah, fu kisi leri fu en, èn fu gi makandra dek’ati (Hebr. 2:12; 10:24, 25). Dati meki den konmakandra fu wi e waka na wan orga fasi, wi e kisi bun leri, èn wi no e hori wisrefi na falsi kerki gwenti (1 Kor. 14:40). Den zaal fu wi meki na sowan fasi taki den bun fu kisi leri drape. Boiti dati, wi no e teki sei na ini politiek, wi no e hartaki fu sani, èn wi no e meki trobi. Kande a bun fu sori a studenti a felem fosi di nen San wi e du na ini wan Kownukondre zaal? Na so a o sabi san a kan ferwakti.

9-10. Te wi e kari wan sma kon na wan fu den konmakandra fu wi, dan san wi kan taigi en so taki a no e frede fu kon? (Luku a prenki.)

⁹ Son sma e tweifri fu kon na wan konmakandra fu wi, fu di den e frede taki sma o aksi den fu tron wan Yehovah Kotoigi. Gi a sma a dyaranti taki wi lobi te sma e kon na den konmakandra fu wi èn taki wi no e dwengi sma fu tron Kotoigi noso fu teki prati. Osofamiri mag kon, srefi efu den abi yongu pkin. Na den konmakandra fu wi pkin no e kisi leri aparti fu den p’pa nanga m’ma. Na presi fu dati, p’pa nanga m’ma e sdon makandra nanga den pkin fu den èn den e teki leri makandra. Na so p’pa nanga m’ma sabi taki den pkin fu den de veilig èn den sabi tu sortu leri den e kisi (Deut. 31:12). Na den konmakandra fu wi, wi no e dwengi sma fu gi bijdrage. Na presi fu dati, wi e gi yesi na a sani disi di Yesus ben taki: „Unu kisi sondro fu pai, sobun un musu gi sma sondro fu meki den pai” (Mat. 10:8). Kande yu kan taigi a sma tu taki a no abi fu weri diri krosi fu kon na den konmakandra. Gado e luku na ati fu sma, a no e luku san den e weri.​—1 Sam. 16:7.

¹⁰ Efu a sma e kon na a konmakandra, dan du san yu man fu meki a firi switi. Tyari en fu go taki den owruman odi èn sosrefi tra brada nanga sisa. Efu a sma e firi taki den brada nanga sisa abi switifasi èn taki den e broko den ede nanga en, dan a o wani kon baka. Te a konmakandra e hori, dan meki a luku na ini yu Bijbel efu a no abi wan. Yepi en fu suku den Bijbeltekst so taki a kan ferstan san a takiman e tyari kon na fesi.

TE YU BIGIN STUDERI NANGA A SMA

11. Fa yu kan sori taki yu e lespeki a ten fu a sma di wani kon sabi moro?

¹¹ San wi musu hori na prakseri te wi e studeri nanga wan sma? Lespeki a ten fu a sma èn hori na prakseri taki a abi tra sani fu du. Fu eksempre, efu yu meki mofo fu kon na a sma, dan doro drape biten, awansi dati a no a gwenti fu den sma na ini a kontren drape. Boiti dati, kande a moro bun fu hori en syatu a fosi lesi te yu e taki nanga a sma. Son preikiman di abi ondrofeni e taki dati a bun te yu e hori en syatu, awinsi a sma wani yere moro. Èn no taki tumsi furu. Meki a sma taki fa a e firi èn fa a e denki.​—Odo 10:19.

12. San wi musu pruberi fu du frukfruku kba te wi e studeri nanga wan sma?

¹² Te wi e studeri nanga wan sma, dan frukfruku kba wi wani pruberi fu yepi en fu kon sabi Yehovah nanga Yesus èn fu kon lobi den (Tori 10:25, 26) Na apostel Paulus ben de wan bun eksempre. Te a ben e gi sma leri, dan a ben e poti prakseri moro furu na Yesus Krestes, a sma di Yehovah seni kon fu yepi wi fu kon leri sabi en èn fu kon lobi en (1 Kor. 2:1, 2). Paulus ben sori krin tu taki a prenspari fu yepi nyun disipel fu kon abi bun fasi di Bijbel e agersi nanga gowtu, solfru, nanga diri ston (1 Kor. 3:11-15). Wan tu fu den bun fasi dati na bribi, koni, a koni fu man si sani krin, nanga bigi lespeki gi Yehovah (Ps. 19:9, 10; Odo 3:13-15; 1 Petr. 1:7). Gi sma leri na a fasi fa Paulus ben e du dati. Yepi den Bijbelstudie fu yu fu kon abi wan tranga bribi èn fu tron mati fu a P’pa fu den na hemel di lobi den trutru.​—2 Kor. 1:24.

13. Te wi e yepi sma di wani sabi moro, dan fa wi kan sori taki wi abi pasensi èn taki wi no e ferwakti tumsi furu fu den? (2 Korentesma 10:4, 5) (Luku a prenki.)

¹³ Te yu e gi sma leri, dan a bun fu teki na eksempre fu Yesus. Abi pasensi nanga sma èn no ferwakti tumsi furu fu den. No aksi den sani di kan meki den firi syen. Efu den no man ferstan wan sani wantewante, dan no tan taki fu a tori dati. Na presi fu dati yu kan go doro nanga a studie èn taki fu den tori dati bakaten. Na presi taki yu e tan dwengi wan sma fu bribi wan sani di a leri, a bun fu gi a Bijbelstudie na okasi fu denki fu a tori so taki a waarheid kan teki rutu na ini en ati (Yoh. 16:12; Kol. 2:6, 7). Bijbel e agersi den falsi leri di wi e pruberi fu rutu puru nanga wan fortresi. (Leisi 2 Korentesma 10:4, 5.) Kande a no makelek gi a Bijbelstudie fu no bribi wan sani moro di a ben e bribi bun langa kba. Dati meki wi musu yepi en fu fertrow tapu Yehovah. Na so a o moro makelek gi en fu rutu den falsi leri puru di ben prenspari gi en.​—Ps. 91:9.

TE NYUN SMA E KON NA DEN KONMAKANDRA

14. San wi musu du te nyun sma kon na den konmakandra fu wi?

¹⁴ Yehovah wani taki wi musu sori lobi gi ala sma, awinsi pe den e kmoto, awinsi san na a kulturu fu den, noso awinsi den gudu noso pôti (Yak. 2:1-4, 9). Sobun, fa wi kan sori lobi gi den nyun sma di e kon na den konmakandra fu wi?

15-16. Fa wi kan yepi nyun sma fu firi switi na den konmakandra fu wi?

¹⁵ A kan taki son sma e kon na den konmakandra fu wi fu di den wani sabi san e psa drape, noso kande wan famiriman noso wan mati fu den di de wan Kotoigi, gi den dek’ati fu go na den konmakandra fu wi. Sobun, te yu e si wan nyun sma na a konmakandra, dan go taki nanga a sma dati. Gi en wan switikon, ma no meki en tumsi. Aksi en fu kon sdon na yu sei. Meki a luku den tekst makandra nanga yu na ini yu Bijbel èn na ini den tra buku di wi e studeri, noso gi en wan Bijbel nanga den buku dati. Boiti dati, prakseri san moro yu kan du fu meki a firi switi. Wan man di ben kon na wan fu den konmakandra fu wi ben taigi a brada di ben gi en wan switikon taki a ben e syensyen fu di a no ben weri moi krosi leki den tra sma. A brada taigi en taki aladi Yehovah Kotoigi e weri moi krosi fu go na den konmakandra, tòg den de leki ala tra sma. A sani dati gi a man wan korostu firi. A man disi di dopu te fu kba, noiti no fergiti a sani di a brada ben taigi en. Ma a bun fu hori a sani disi na prakseri: Te yu e taki nanga sma fosi a konmakandra bigin noso baka a konmakandra, dan luku bun fu no aksi-aksi den wan lo sani di kan meki den firi syen.​—1 Petr. 4:15.

¹⁶ Wan tra fasi fa wi kan meki den nyun sma firi switi na den konmakandra, na te wi e taki na wan lespeki fasi fu sma di no de Kotoigi noso fu a bribi fu den. Wi wani du a srefi te wi e gi piki èn te wi e hori den difrenti pisi fu a konmakandra. No taki sani di kan meki den nyun sma firi wan fasi noso di kan meki taki den no e kon moro na den konmakandra (Tit. 2:8; 3:2). Fu eksempre, noiti wi wani krutu a bribi fu sma di no de Kotoigi (2 Kor. 6:3). Den brada di e hori publiki taki e luku bun taki den no e du den sortu sani disi. Fu di den e hori na prakseri taki sma di no de Kotoigi de tu na den konmakandra, meki den e ferklari son wortu noso son prakseri di den sma disi no ben o man ferstan.

17. San wi wani du te wi feni sma na ini a kontren fu wi di wani leri sabi Gado?

¹⁷ A wroko di wi e du fu meki disipel e kon moro prenspari dei fu dei. Èn wi o tan suku sma di wani kon sabi Gado nanga a Wortu fu en (Tori 13:48). Te wi e du dati, dan wi no musu draidrai fu aksi den efu den wani studeri Bijbel èn wi musu de gaw tu fu kari den kon na den konmakandra fu wi. Na so wi o man yepi den fu bigin waka na tapu a pasi „di e tyari sma go na libi”.​—Mat. 7:14.