TAN NA AI!
A COVID-siki kiri 6 milyun sma—San Bijbel e taki?
Na Organisâsi fu Gosontu Afersi na heri grontapu (WHO) taki dati teleki 23 mei 2022, a COVID-19 siki kiri 6,27 milyun sma. Ma tapu 5 mei 2022 a WHO meki bekènti taki den e denki taki moro furu sma lasi libi. Den taki dati na ini 2020 nanga 2021 „kande sowan 14,9 milyun sma dede fu di den kisi fu du nanga a COVID-19 siki di panya na heri grontapu”. Bijbel e taki wan sani fu den sari sani disi di e pasa na grontapu?
Bijbel ben sori kaba taki siki ben o de di ben o kiri ipi-ipi sma
Yesus ben taki dati „takru siki” ben o de di ben o kiri ipi-ipi sma. Disi ben o pasa na ini wan ten di Bijbel e kari „den lasti dei”.—Lukas 21:11; 2 Timoteyus 3:1.
A profeititori fu Yesus e kon tru na ini a ten disi. Efu yu wani sabi moro fu a tori disi, dan leisi na artikel di nen „San na ’a kaba’?”
Bijbel e trowstu sma
„A Gado fu ala trowstu, . . . e trowstu wi te wi de na ini ala sortu banawtu.”—2 Korentesma 1:3, 4.
Furu sma di lasi wan lobiwan na ini dede feni trowstu di den leisi san Bijbel e taki. Na ini den artikel „Te yu e row—San yu kan du nownow kaba” nanga „A moro bun yepi gi den wan di e sari”, yu kan leri moro fu a tori disi.
Bijbel e sori wi taki wan lusu o kon fu ala ten
„Meki yu Kownukondre kon. Meki yu wani pasa na grontapu soleki fa a e pasa na hemel.”—Mateyus 6:10.
Dyonsro „a Kownukondre fu Gado” o sorgu taki „nowan sma di e tan na ini a kondre o taki: ’Mi siki’” (Markus 1:14, 15; Yesaya 33:24). Efu yu wani sabi moro fu a regering disi di de na hemel èn san a o du, dan luku a felem di nen San na Gado Kownukondre?
Wi e gi yu wan kari fu leri moro fu san Bijbel e taki. Te yu du dati, dan yu nanga yu osofamiri o kon sabi den koni rai nanga den moi pramisi fu Gado.