San Gado Kownukondre o du so taki wi kan abi wan bun gosontu

„A no fu di wi no e si a COVID-19 siki moro leki wan seryusu kefar gi heri grontapu, meki disi no wani taki dati a siki disi no de wan kefar moro gi a gosontu fu sma na heri grontapu . . . Efu wan tra takru siki o kon di o panya na ala sei, dan wi musu de srekasreka. Wi de seiker taki a o kon wan dei.”​—Datra Tedros Adhanom Ghebreyesus, edeman fu Na organisâsi fu gosontu afersi na heri grontapu, 22 Mei 2023.

A COVID-19 siki e meki taki furu sma e feti nanga den gosontu ete. A e meki tu taki den abi furu broko-ede èn den e feti nanga depressie. Yu denki taki den regering nanga den organisâsi di e luku a gosontu fu sma o de srekasreka efu wan tra takru siki panya na heri grontapu, spesrutu te yu e si taki den no man yepi wi srefi nanga den siki di wi abi now?

Bijbel e taki fu wan regering di o sorgu taki wan dei wi alamala o de gosontu. A e taki dati „a Gado fu hemel o seti wan kownukondre” noso wan regering (Danièl 2:44). A regering dati o meki taki „nowan sma di e tan na ini a kondre o taki: ‘Mi siki’” (Yesaya 33:24). Ala sma o de gosontu èn den o tranga leki di den ben yongu.​—Yob 33:25.