San yu kan du te yu kon weri fu a siki di panya na heri grontapu

A de so taki a frede di yu e frede a COVID-19 siki e meki yu kon weri? Efu dati de so, dan yu no de yu wawan. Na ini den mun di pasa, sma na heri grontapu ben abi fu kenki den libi fu sorgu taki den no kisi a siki disi. Datra Hans Kluge na driktoro gi Europa fu na organisâsi fu gosontu afersi na heri grontapu, èn a e taki dati furu sma e du ala muiti fu no meki a COVID-19 siki panya. Te yu e kon weri fu di yu e frede a siki disi, dan a makriki fu du sani bruyabruya èn fu no du den sani di yu musu du.

Efu yu kon weri fu a siki di panya na heri grontapu, dan no lasi-ati. Bijbel yepi furu sma fu man libi na ini a muilek ten disi èn a kan yepi yu tu.

O ten wi kan taki dati wan sma kon weri fu wan siki di panya na heri grontapu?

Te yu kon weri fu di yu e frede a siki di panya na heri grontapu, dan dati a no wan siki, ma na a firi di yu e kisi bika yu no sabi o ten a sani disi o kaba. Aladi ibri sma de tra fasi, toku son sani de fu si na furu sma di kon weri kaba fu di den frede a siki disi.

Den no wani du den sani di den musu du
Den no e nyan noso sribi moro leki fa den ben gwenti
Ala sani e fruferi den
Den e stress fu sani di den ben gwenti du bun
A muilek gi den fu poti prakseri na sani
Den e firi leki howpu no de

Fu san ede yu musu feti teige a firi disi?

Te yu kon weri fu a siki disi, dan yu noso trawan kan kisi a siki makriki. Efu yu no e feti nanga a firi disi, dan safrisafri yu no o wani kibri yusrefi moro gi a covid-siki. Baka wan pisi ten, yu no o si a virus leki wan seryusu sani moro, aladi a e panya go doro èn a e kiri sma. Te yu weri fu libi na ini lockdown, dan kande yu o wani kon moro fri, èn dati kan meki taki yu noso trawan kisi a siki disi moro makriki.

Na ini a muilek ten disi furu sma kon si taki a tru san Bijbel e taki na Odo 24:10: „Yu e firi brokosaka te nowtu miti yu? Efu dati de so,dan yu no o abi furu krakti.” Bijbel e leri wi prenspari sani di kan yepi wi te wi e firi brokosaka, spesrutu na ini a ten disi fu a siki di panya na heri grontapu.

Sortu Bijbel gronprakseri kan yepi yu fu feti nanga a firi disi?

No go krosibei fu sma, ma tan app noso bel den mati fu yu

San Bijbel e taki: „Wan trutru mati . . . gebore fu te nowtu de. ”—Odo 17:17.

Fu san ede a prenspari: Trutru mati e gi wi deki-ati (1 Tesalonikasma 5:11). Na a tra sei, te wi no e moksi nanga trawan fu wan langa ten dan wi kan kisi gosontu problema.—Odo 18:1.

Pruberi fu du disi: Tan abi demakandra nanga den mati fu yu. Kande yu kan du dati te yu e bel den, app den, gi den wan videocall, noso seni wan e-mail gi den. Suku fu de nanga yu mati spesrutu te yu e firi brokosaka, èn tan luku fa a e go nanga den. Fruteri den san yu e du na ini a ten disi pe a siki panya na heri grontapu. Suku fasi fu du bun sani gi yu mati, dan yu nanga yu mati o firi bun.

San trawan taki

„Mi e pruberi fu seti sani fu miti nanga mi mati nanga yepi fu videoconferencing leki Zoom. Son leisi mi e taki nanga den wan-fru-wan. Ma tra leisi, wi breiti fu prei wan sani noso fu taki pikinso. Aladi a no de a srefi leki te yu nanga a sma srefi e miti, toku a e yepi wi furu. A siki disi di panya na heri grontapu meki taki a libi kon muilek, dati meki a de prenspari fu suku mati èn fu taigi den trutru fa wi e firi. Dati no makelek, ma wi alamala abi yepi fanowdu.”—Megan, Kanada.

„Aladi wi e angri fu de makandra nanga wi famiri nanga mati, toku wi feni wan tu fasi fu taigi den taki wi lobi den trutru. Wi osofamiri ben meki karta nanga pikin kado gi furu fu den mati fu wi. Na tapu den karta wi ben skrifi wan Bijbeltekst tu fu gi den deki-ati, so taki den sabi taki wi e prakseri den. A sani disi gi wi bun furu prisiri! Te wi e teki wi ten fu du sani gi trawan, dan dati e yepi wi fu frigiti den broko-ede di wi abi.”—Emma nanga en masra Nathan, nanga den pikin, Eli nanga Hope, Amerkankondre.

Pruberi fu du bun sani na ini a muilek situwâsi disi

San Bijbel e taki: „Gebroiki a ten fu unu na wan koni fasi.”—Efeisesma 5:16.

Fu san ede a prenspari: Te yu e gebroiki yu ten na wan koni fasi, dan dati kan yepi yu fu tan abi wan bun denki èn fu no broko yu ede tumusi.—Lukas 12:25.

Pruberi fu du disi: No poti prakseri na san yu no man du moro, ma prakseri fu bun sani di yu kan du na ini a ten disi. Fu eksempre, yu kan du son sani now fu di yu abi moro ten, noso sani di yu lobi fu du. Yu kan gi moro ten na yu famiri now?

San wan tu sma taki

„Wi ben man du wan lo tra wroko na oso soleki prani gruntu, du tra pikin wroko, èn ferfi na oso.”—Evan nanga en wefi Samantha, nanga den pikin, Eli nanga Adam, Zuid-Afrika.

„Na ini ala den 30 yari di wi trow kaba, now mi nanga mi wefi abi moro ten gi makandra. Dati meki taki wi kon lobi makandra moro, fu di wi kon frustan den swakifasi fu wi moro bun, ma sosrefi den bun fasi fu wi. Wi de srekasreka now fu yepi makandra te tra muilek ten doro.”—Ivan nanga en wefi Eve, Italiakondre.

Hori yusrefi na wan schema

San Bijbel e taki: „Meki ala sani pasa . . . soleki fa sani seti.”—1 Korentesma 14:40.

Fu san ede a prenspari: Te sma e du sani soleki fa den gwenti du, dan furu tron den e firi moro bun èn den de moro koloku.

Pruberi fu du disi: Meki wan schema di fiti na a situwâsi fu yu now. Poti ten fu du yu skorowroko, yu grontapu wroko, nanga yu wroko na oso. Ma poti ten tu fu du sani di e meki yu kon moro krosibei na Gado. Tra sani di bun gi yu fu du tu na fu de nanga yu famiri, go koiri, nanga du sport. Ten na ten yu musu luku yu schema baka, èn kenki en te a de fanowdu.

San wan tu sma taki

„Mi e du den srefi sani di mi ben gwenti du bifo a siki panya na heri grontapu. Na presi fu du son sani di mi ben gwenti du, dan mi e sport now, ma toku ala mamanten mi e opo a srefi yuru di mi ben gwenti opo. Den sani di mi gwenti du now, e meki taki mi no e prakseri a siki disi, èn mi e poti moro prakseri na mi famiri nanga mi mati.”—Kgaogelo, Zuid-Afrika.

„Mi lobi opo mamanten, dan mi e meki wan sani fu nyan èn mi e dringi mi kofi soleki fa mi ben gwenti. Dan mi e sreka misrefi, weri mi krosi neleki mi o gwe fu mi oso. A sani disi yepi mi fu firi bun fu misrefi, èn fu de na ai a heri dei.”—Carmel, Fransikondre.

Fiti yusrefi te a weer e kenki

San Bijbel e taki: „A koniwan si taki ogri o miti en èn a go kibri.”—Odo 22:3.

Fu san ede a prenspari: Na son presi, te a weer kenki na son pisi ten fu a yari, dan yu no kan go na dorosei so furu. Ma toku a prenspari fu go na dorosei fu teki pikinso son, bika dati bun gi yu gosontu nanga yu frustan.

Pruberi fu du disi: Efu a kowru ten doro, pruberi fu kenki yu oso noso yu wrokopresi na sowan fasi taki a son skèin kon na inisei. Aladi a kowru, toku pruberi fu du son sani na dorosei. Efu a kan, dan weri krosi di e kibri yu bun gi a kowru weer so taki yu man tan moro langa na dorosei.

Efu a waran ten doro, dan sma o de moro furu na dorosei, dan yu musu luku bun. Luku pe yu wani go, dan go na wan yuru te furu sma no de drape.

San trawan e taki

„Mi e libi na wan presi pe alen e fadon furu, dati meki ibri tron baka mi musu du wan tra sani. Solanga mi si pikinso son, mi e go na dorosei esi-esi. Srefi efu na waka mi e waka pikinso, noso na rèi mi e rèi mi baisigri pikinso, toku na dati e yepi mi fu firi moro bun.”—Sameena, Fransikondre.

„Te a son e skèin furu, dan a moro makelek fu du sani na dorosei. Ma now di a moro kowru pisi ten fu a yari e doro, dan mi e meki wan schema fu sani di mi wani du na inisei.”—Tiffany, Kanada.

Tan kibri yusrefi teige a COVID-19 siki

San Bijbel e taki: „A sma sondro frustan e kisi bigi atibron èn a e frutrow tumusi tapu ensrefi.”—Odo 14:16.

Fu san ede a prenspari: A COVID-19 siki e kiri sma, èn efu wi no e luku bun moro, dan wi kan kisi a siki disi.

Pruberi fu du disi: Ten na ten, a bun fu luku baka sortu wet lanti poti fu kibri sma gi a siki disi èn luku efu yu de na ai ete. Denki bun san yu e du, èn fa den san di yu e du sa abi krakti tapu yu, yu famiri nanga tra sma.

San trawan e taki

„Mi e du san mi man fu no panya a siki disi. Aladi trawan no e hori densrefi na den rai di den e kisi, toku mi e denki fu san mi kan du fu kibri misrefi nanga mi famiri.”—Daryn, Zuid-Afrika.

Tranga a matifasi di yu abi nanga Gado

San Bijbel e taki: „Kon krosibei na Gado èn a o kon krosibei na unu.”—Yakobus 4:8.

Fu san ede a prenspari: Gado kan yepi yu fu pasa iniwan tesi di yu e kisi.—Yesaya 41:13.

Pruberi fu du disi: Leisi ala dei wan pisi na ini Gado Wortu, Bijbel. A schema disi fu leisi Bijbel o yepi yu fu bigin leisi en ibri dei.

Yu kan aksi den Yehovah Kotoigi fa yu kan de na den konmakandra fu den na ini a ten fu a COVID-19 siki. Fu eksempre, nanga yepi fu videoconferencing den e hori konmakandra na heri grontapu ibri wiki, den memre a dede fu Yesus a yari di pasa, èn den hori den kongres.

Bijbel tekst de di kan yepi yu nanga a firi disi

Yesaya 30:15: „Efu unu wani de tranga, dan a wan-enkri sani di un musu du na fu tan tiri èn frutrow na mi tapu.”

San a wani taki: Te wi e frutrow na tapu den rai di Gado e gi wi, dan dati o yepi wi fu no bruya na ini a muilek ten disi.

Odo 15:15: „Den heri libi langa na soso problema e miti den mofinawan, ma gi den sma di e prisiri na ini den ati, a gersi leki a de wan fesa ala ten.”

Dati wani taki: Te wi e poti prakseri na sani di bun, dan dati o yepi wi fu de koloku na ini a muilek ten disi.

Odo 14:15: „Wan sma sondro ondrofeni e bribi ala san sma e taki, ma a koniwan e luku bun pe a e poti en futu.”

Dati wani taki: Hori yusrefi na den rai di wi e kisi èn di bun gi a gosontu fu wi, no de gaw fu bribi taki a no de fanowdu fu no du den sani disi.

Yesaya 33:24: „Nowan sma di e tan na ini a kondre o taki: ’Mi siki.’”

Dati wani taki: Gado e pramisi taki a o puru ala sortu siki.