Suma o yepi den borgu fu den kondre?​—San Bijbel e taki?

Den Verenigde Naties e taki:

• Fu 7 oktober te go miti 23 oktober 2023, moro leki 6400 sma lasi libi èn 15.200 sma kisi mankeri fu di wan feti de na mindri Gasa nanga Israel. Furu fu den sma disi ben de borgu fu den tu presi disi. Boiti dati, dusundusun sma ben abi fu lowe go na wan tra kondre.

• Te nanga 24 september 2023, a feti na mindri Rosiakondre nanga Ukraini meki taki na ini Ukraini 9701 sma lasi libi èn 17.748 kisi mankeri.

Sortu howpu Bijbel e gi den sma di e pina fu di wan feti de?

Wi kan abi howpu?

Bijbel taki dati Gado o „meki taki feti o kon na wan kaba” (Psalm 46:9). A o du dati, fu di a o meki wan regering noso wan kownukondre puru ala libisma regering (Danièl 2:44). Gado Kownukondre o tyari ferlusu kon gi ala libisma.

Luku san Yesus Krestes, a Kownu fu Gado Kownukondre o du:

• „A o frulusu den pôti sma di e bari suku yepi, sosrefi ala den mofina sma nanga iniwan sma di no abi yepiman. A o firi sari gi den mofina sma èn gi den pôti sma èn a o frulusu den pôti sma. A o kibri den libi, so taki sma no man kwinsi den moro noso du ogri-ati sani nanga den.”​—Psalm 72:12-14.

Gado o gebroiki a Kownukondre dati fu puru ala pina nanga sari di feti nanga ogridu tyari kon.

• „A o figi ala watra puru na den ai èn dede no o de moro. Nowan sari, noso krei, noso pen no o de moro. Den fositen sani pasa kaba.”​—Openbaring 21:4.

Dyonsro Gado Kownukondre o kenki a fasi fa sma e du sani na grontapu. Bijbel ben taki dati wi ben „o yere taki feti e feti” èn na dati e psa na ini a ten disi (Mateyus 24:6). Den sani di e psa nownow e sori taki wi e libi na ini „den lasti dei” pe libisma o tiri a grontapu.​—2 Timoteyus 3:1.