Sma no e fertrow den politiekman moro​—San Bijbel e taki?

Na ini a yari 2024 moro furu verkiezing o hori na heri grontapu moro leki oiti bifo. Ma tòg furu sma no e fertrow den politiekman moro.

• Di den aksi wan bigi grupu Amerkan san den e denki fu den politiekman, dan den taki dati „moro furu politiekman e denki densrefi nomo èn den e suku soso den eigi bun” na presi fu du bun gi den sma fu a kondre.a​—Pew Research Center, 19 september 2023.

Sosrefi furu yongu sma no e fertrow den politiekman moro.

• „Furu yonguwan na ini a ten disi wani suku fasi fu lusu den problema, ma di sma ben poti aksi gi den den taki dati den no feni taki den politiekman wani lusu den problema fu sma.”​—The New York Times, 29 yanuari 2024.

• „Wan ondrosuku sori taki yongu sma e fertrow den sma di e meki youtube video moro leki den e fertrow den politiekman.”​—The Korea Times, 22 yanuari 2024.

Wi kan bribi taki den politiekman o meki taki wi o abi wan moro bun libi? Suma wi kan bribi?

Wi musu luku bun suma wi e fertrow

A bun te sma e denki bun fosi den e fertrow wan sma. Bijbel e taki dati „wan sma sondro ondrofeni e bribi ala san sma e taki, ma a koniwan e luku bun pe a e poti en futu”.​—Odo 14:15.

• Fu man sabi sortu nyunsu tru noso no tru, dan yu kan leisi na artikel di nen „Luku bun nanga nyunsu di no tru”.

Boiti dati, srefi den eerlijk politiekman di wani du bun gi sma, no man du ala san den wani. Dati meki Bijbel e warskow wi:

• „No poti un fertrow tapu heihei sma noso tapu iniwan libisma, bika den no man ferlusu unu.”​—Psalm 146:3.

Wan fesiman di yu kan fertrow

Bijbel e leri wi taki Gado poti wan kfalek bun fesiman di wi kan fertrow. En nen na Yesus Krestes (Lukas 1:32, 33). Yesus na a Kownu fu Gado Kownukondre. A Kownukondre na wan regering di de na hemel.​—Mateyus 6:10.

• Yu kan kon sabi fu san ede yu kan fertrow Yesus èn san a o du fu lusu den problema di wi abi. Leisi den artikel di nen „Suma na a Kownu fu Gado Kownukondre?” èn „San Gado Kownukondre o du?”