Yesus o tyari wan kba kon na ala ogri

Yesus sabi fa wi e firi te wi e kisi fu du nanga den ogri di sma e du nanga wi, noso te sma no e libi bun nanga wi. Sma ben lei gi en taki a du ogri, den ben fon en somaar, den ben tyari en go na krutu aladi a no ben noti, den ben gi en wan strafu di a no ben musu kisi èn den kiri en na wan ogr’ati fasi. Aladi a no ben du nowan ogri, tòg a no ben denki ensrefi, ma a ben de klarklari fu gi „en libi leki wan lusu-paiman fu frulusu furu sma” (Mateyus 20:28; Yohanes 15:13). Now a de Kownu fu Gado Kownukondre èn dyonsro a o du san reti gi heri grontapu. Dan noiti moro sma o de di e du ogri.​—Yesaya 42:3.

Bijbel e ferteri wi fa grontapu o de baka te Yesus tyari den kenki disi kon:

• „Den ogriwan no o de moro. Yu o luku pe den ben de fosi, ma den no o de moro. Ma den safr’ati sma o kisi grontapu èn den o abi furu prisiri fu di freide o lai.”​—Psalm 37:10, 11.

Fa wi kan sori taki wi e warderi den sani di Yesus du kba èn den sani di a o du ete gi wi?Wan fasi fa wi kan du dati na te wi e leri moro fu „a bun nyunsu fu Gado Kownukondre”. Na fu a boskopu disi Yesus ben e preiki (Lukas 4:43). Leisi na artikel di nen „San na Gado Kownukondre?”