Yehovah Kotoigi e drai baka gi den sma di ben abi a srefi bribi leki den?

Wi no e drai baka gi sma di dopu leki Yehovah Kotoigi, ma di no e preiki moro èn di no e moksi moro nanga den brada nanga sisa. Na presi fu dati, wi e go na den èn wi e pruberi fu yepi den fu kon abi na angri baka fu du den sani baka di den ben gwenti du.

Wi no e puru wan sma fu a gemeente wantewante te a du wan seryusu sondu. Ma te wan dopu Kotoigi e tan trangayesi den wet fu Bijbel èn a no abi berow fu den sondu fu en, dan den o puru a man noso na uma dati fu a gemeente. Bijbel e taki krin: „Puru na ogriman na un mindri.”​—1 Korentesma 5:13.

San e pasa te den puru wan man fu a gemeente, ma en wefi nanga pikin na Yehovah Kotoigi ete? En nanga en osofamiri no abi a srefi bribi moro, ma toku den na famiri ete. Dati meki a trowlibi nanga na osofamiri libi no e kenki.

Sma di puru fu a gemeente kan kon na den gemeente konmakandra fu wi èn efu den wani den kan aksi den owruman rai fu Bijbel. A marki fu a rai na fu yepi a sma fu doro den marki baka fu tron wan Yehovah Kotoigi. Wan sma di puru fu a gemeente, ma di tapu fu du sani di no bun èn di wani libi baka soleki fa Bijbel e sori, kan tron wan Yehovah Kotoigi baka.