Fu san ede wi de na libi?

A piki fu Bijbel

Fu kon sabi san na a marki fu a libi, wi kan poti difrenti aksi soleki: ’Fu san ede wi de na grontapu?’ ’A libi fu mi abi wan marki?’ Bijbel e sori taki a marki fu a libi na fu abi wan matifasi nanga Gado. Luku san Bijbel e taki fu a tori disi.

• Gado na wi Mekiman. Bijbel e taki: „Na [Gado] meki wi. A no wi meki wisrefi.”​—Psalm 100:3; Openbaring 4:11.

• Gado abi wan marki nanga ala san a meki. A abi wan marki nanga wi tu.​—Yesaya 45:18.

• Gado meki wi nanga na angri fu kon sabi fu san ede wi de na libi. Wi musu sabi taki wi „abi Gado fanowdu” na ini wi libi (Mateyus 5:3). Gado wani taki wi kisi den sani di wi wani.​—Psalm 145:16.

• Wi e sori taki wi abi Gado fanowdu te wi e du muiti fu kon abi wan bun matifasi nanga en. Aladi a kan gersi leki wi no man tron wan mati fu Gado, toku Bijbel e gi wi a deki-ati disi: „Kon krosibei na Gado èn a o kon krosibei na unu.”​—Yakobus 4:8; 2:23.

• Fu man tron Gado mati, wi musu libi soleki fa en wani. Bijbel e taki na ini Preikiman 12:13: „Lespeki a tru Gado èn hori den komando fu en, fu di dati na san libisma musu du.”

• Na ini a ten di e kon wi o kisi a libi di Gado ben abi na prakseri gi libisma. Gado o puru ala pina na grontapu èn den sma di tron mati fu en èn di e dini en o libi fu têgo.​—Psalm 37:10, 11.