Aksi 1: Fu san ede mi de na libi?

ROSALIND, di kweki na ini Ingrisikondre, ben lobi fu leri sani. A ben wani yepi sma tu. Baka di a kaba nanga skoro, a feni wan bun wroko pe a ben yepi sma di no ben abi tanpe, èn a ben yepi sma di abi wan mankeri na den skin noso sma di no man leri bun. Aladi a ben abi wan wroko di ben gi en prisiri èn di ben pai bunbun moni, toku a e taki: „Na omeni yari kaba mi e aksi misrefi: ’Fu san ede wi de na grontapu?’ èn ’Fu san ede wi de na libi?’”

Fu san ede a no fowtu fu poti na aksi disi?

Libisma no de leki meti di no man denki fu sani. Wi man leri fu sani di ben pasa nanga wi, wi man prakseri san wi o du na ini a ten di e kon, èn wi man luku san e gi wi prisiri na ini a libi.

Fa son sma e piki na aksi disi?

Furu sma e denki taki a moro prenspari sani fu san ede wi de na libi, na fu kon gudu noso fu kisi biginen so taki wi kan de koloku.

San a piki dati e sori fu den sma disi?

Na densrefi kan taki san prenspari na ini a libi. Den sani di den wani, prenspari moro den sani di Gado wani.

San Bijbel e leri wi?

Kownu Salomo ben abi kefalek furu gudu èn a ben abi furu sani di ben gi en prisiri, ma a ben kon si taki den sani disi no meki a tan abi wan koloku libi. A ben taki san e meki wan sma de koloku trutru, di a skrifi: „Now di mi taki ala sani kaba, a moro prenspari sani na disi: Lespeki a tru Gado èn hori den komando fu en, fu di dati na san libisma musu du” (Preikiman 12:13). San a wani taki fu hori den komando fu Gado?

Wan fu den sani di Gado wani, na taki wi e prisiri fu a libi. Salomo ben skrifi: „A moro bun sani di wan libisma kan du fu dati ede, na fu nyan, dringi èn prisiri nanga a tranga wroko fu en. Na disi mi si tu. Iya, misrefi kon si taki na a tru Gado e gi pasi taki den sani disi e pasa.”—Preikiman 2:24.

Gado wani tu taki wi lobi wi osofamiri èn taki wi e sorgu gi den. Luku sortu bun rai di de makriki fu frustan a e gi ibri memre fu na osofamiri.

„Den masra musu lobi den wefi leki den eigi skin.”—Efeisesma 5:28.
„A wefi musu abi bigi lespeki gi en masra.”—Efeisesma 5:33.
„Un pikin, gi yesi na un papa nanga mama.”—Efeisesma 6:1.

Efu wi hori wisrefi na den Bijbel rai disi, wi sa de koloku èn wi sa abi prisiri. Ma a moro prenspari sani di wi kan du, na fu leri ala san wi man fu wi Mekiman èn fu kon krosibei na en so taki a tron wi mati. Iya, Bijbel e taigi wi fu „kon krosibei na Gado”. Dan a e pramisi wi a moi sani disi: „A o kon krosibei na unu” (Yakobus 4:8). Te yu e du a sani disi di Bijbel e taki, dan yu o prisiri trutru fu di yu o sabi fu san ede yu de na libi.

Rosalind di kari na a bigin, kon frustan now fu san ede a de na libi. Na tapu bladzijde 10 fu a tijdschrift disi, yu kan leisi san meki taki a e si sani tra fasi now.

Efu yu wani sabi moro krin fa yu kan tyari yusrefi na wan fasi di e plisi Gado, dan luku kapitel 12 fu a buku San Bijbel e leri wi trutru? Yu kan download en na www.pr418.com/srn

Fu san ede wi de na libi? San Yesus ben taki fu disi?

Yesus ben sabi heri bun fu san ede a ben de na libi. A ben taki: „Na fu disi ede mi gebore èn na fu disi ede mi kon na grontapu, so taki mi kan fruteri sma san tru” (Yohanes 18:37). A moro prenspari sani na ini Yesus en libi ben de fu leri sma den tru tori fu Gado èn den sani di Gado abi na prakseri fu du.

Wi sa de koloku te wi e waka baka na eksempre fu Yesus. Yesus srefi e aksi wi fu leri fu en (Mateyus 11:29). Luku tu fasi fa wi kan du dati.

Yesus leri wi taki efu wi wani de koloku, dan wi musu ’sabi taki wi abi Gado fanowdu’ (Mateyus 5:3). Wi kan leri sabi „a wan-enkri tru Gado, èn a sma di [a] seni kon, Yesus Krestes”.—Yohanes 17:3.

Yesus ben taigi den bakaman fu en taki den musu leri tra sma san densrefi ben leri. A ben taki: „Fu dati ede, go na sma fu ala kondre èn meki den tron disipel. Dopu den na ini a nen fu a Tata, fu a Manpikin, èn fu a santa yeye. Leri den fu du ala san mi taigi unu fu du.”—Mateyus 28:19, 20.

Den sma di sabi taki den abi Gado fanowdu e kon leri sabi en te den e studeri Bijbel èn den e du san den leri. Den sma disi kon si taki den libi kon moro bun. Te den e leri tra sma fu kon sabi Gado, dan den e kon si moro krin fu san ede den de na libi.