Fu san ede Yehovah Kotoigi e go baka na sma di ben taki „Mi no wani arki”?

Lobi gi Yehovah nanga tra sma e gi den Yehovah Kotoigi a dek’ati fu prati a Bijbel boskopu nanga ala sma, srefi den wan di ben taki „Mi no wani arki” (Mateyus 22:37-39). Lobi gi Gado e yepi wi fu gi yesi na a komando fu en manpkin ’fu preiki finfini’ (Tori 10:42; 1 Yohanes 5:3). Fu man du disi, wi e preiki a boskopu fu Gado doronomo, neleki fa den profeiti fu Gado na ini owruten ben e du dati (Yeremia 25:4). Fu di wi lobi tra sma, meki wi e pruberi fu prati a „bun nyunsu fu a Kownukondre” di kan kibri sma libi nanga ala sma, sosrefi den wan di ben taki dati den no wani arki.​—Mateyus 24:14.

Nofo tron wi e miti sma di wani arki na den oso pe sma no ben wani arki fosi. Poti prakseri na den dri sani disi:

• Sma e froisi.

• Tra sma ini na oso wani arki a boskopu fu wi.

• Sma e kenki. Den sani di e psa na grontapu noso a situwâsi fu son sma e meki taki den kon „sabi taki den abi Gado fanowdu” èn den e kon wani sabi a boskopu fu Bijbel (Mateyus 5:3). Srefi den wan di ben gens wi kan kenki, neleki fa Paulus ben kenki.​—1 Timoteyus 1:13.

Ma tòg, wi no e dwengi sma fu arki a boskopu fu wi (1 Petrus 3:15). Wi e bribi taki ala sma musu teki den eigi besroiti te a abi fu du nanga na anbegi.​—Deuteronomium 30:19, 20.