Trow di fiti na ini na ai fu Gado nanga libisma

„Wan trow-oso ben de na Kana . . . Yesus nanga den disipel fu en ben kisi wan kari tu fu kon na a trow-oso.”—YOHANES 2:1, 2.

1. Na sortu sani wi musu poti prakseri te wi e luku a tori di e taki fu a ten di Yesus ben de na ini Kana?

YESUS, a mama fu en, nanga wan tu fu den disipel fu en, ben sabi taki a e gi prisiri te a pipel fu Gado e hori wan trow-oso na wan fasi di fiti. Bijbel e sori taki Krestes ben meki wan trow-oso kon tron wan tumusi aparti trow-oso, fu di a du a fosi wondru fu en drape, èn na so a meki den sma di ben de drape abi moro prisiri (Yohanes 2:1-11). Kande yu go na trow-oso fu Kresten di wani dini Yehovah leki wan koloku trowpaar, èn kande yu ben abi prisiri tu di yu ben de drape. Noso kande yu e prisiri fu di yusrefi o hori so wan trow-oso, noso fu di yu o yepi wan mati fu yu fu meki a trow-oso fu en waka na wan fasi di fiti. San yu kan du fu meki wan trow-oso waka na wan fasi di fiti?

2. San Bijbel e taki fu a fasi fa sma ben e trow?

² Kresten kon si taki a rai na ini a Wortu fu Gado na wan bigi yepi gi wan man nanga wan uma di wani trow (2 Timoteyus 3:16, 17). A tru taki Bijbel no e sori wi finifini na sortu fasi wan Kresten musu trow. Wi kan frustan fu san ede disi de so, bika ibri kondre abi tra gwenti nanga tra wet di e kenki baka wan pisi ten. Fu eksempre, na ini owruten Israel, wan spesrutu seremonia no ben e hori te wan man nanga wan uma ben e trow. Tapu a trowdei, a trowmasra ben e tyari na uma di ben o tron en wefi go na en eigi oso, noso na a oso fu en papa (Genesis 24:67; Yesaya 61:10; Mateyus 1:24). A sani disi ben e sori taki den tu sma disi trow, èn den no ben e hori wan seremonia soleki fa sma gwenti fu du na ini a ten disi.

3. Na sortu okasi na ini Kana, Yesus ben du wan sani fu meki sma abi moro prisiri?

³ Na so den Israelsma ben e trow. Baka dati, den ben e hori wan fesa son leisi, soleki fa skrifi na ini Yohanes 2:1. Na ini furu bijbelvertaling a vers disi vertaal pikinmoro na a fasi disi: „Wan trow ben de na ini Kana.” Ma a fiti taki a Griki wortu fu fositen vertaal leki „trowfesa” noso „trow-oso” (Mateyus 22:2-10; 25:10; Lukas 14:8).a A tori e sori krin taki Yesus ben de na wan Dyu trow-oso, èn taki a ben du wan sani fu meki den sma di ben de drape abi moro prisiri. Ma wan prenspari sani na ini a tori disi, na taki a fasi fa sma ben e trow na ini a ten dati, e difrenti fu a fasi fa sma e trow na ini a ten disi.

4. Na sortu fasi son Kresten e bosroiti fu trow, èn fu san ede den wani trow na a fasi dati?

⁴ Na ini a ten disi a de so na ini furu kondre taki Kresten di wani trow musu du wan tu sani akruderi lantiwet. Te den du den sani dati kaba, dan den kan trow na iniwan fasi fa den wani, solanga dati e kruderi nanga lantiwet. Den e meki wan krutuman, wan komsarsi, noso wan kerki fesiman di kisi primisi fu lanti, trow den, èn efu den wani den kan trow sondro pranpran èn sondro taki furu sma de. Son sma di e bosroiti fu trow na a fasi disi, kande e aksi wan tu famiriman, noso wan tu Kresten mati fu de leki kotoigi gi den na a trow, noso fu prisiri makandra nanga den na a prenspari okasi disi (Yeremia 33:11; Yohanes 3:29). Na so a de tu taki tra Kresten kande no wani hori wan bigi trowfesa, fu di den sa musu sreka bun furu sani na fesi, èn fu di a fesa dati sa kostu furu moni. Na presi fu dati, den kan bosroiti fu nyan nanga makandra èn sosrefi nanga wan tu mati noso famiriman. Awansi fa wi wani hori wi trow-oso, wi musu frustan taki kande tra lepi Kresten e denki tra fasi fu a tori disi.—Romesma 14:3, 4.

5. Fu san ede furu Kresten wani taki wan trow-lezing e hori te den e trow? Na sortu sani a lezing disi e poti prakseri?

⁵ Furu Kresten di meki mofo, wani taki wan lezing di teki puru fu Bijbel e hori na a trow fu den.b Den sabi taki na Yehovah seti a trowlibi, èn taki A e gi sma koni rai na ini a Wortu fu en fu sori den fa den kan abi wan bun trowlibi, so taki den kan de koloku (Genesis 2:22-24; Markus 10:6-9; Efeisesma 5:22-33). Èn furu trowpaar wani taki Kresten mati nanga famiriman de na a trow-oso fu den, fu di den wani den fu prisiri makandra nanga den. Ma fa a de nanga den someni difrenti sani di sma musu du fu man trow akruderi lantiwet, èn fa a de nanga den gwenti fu a kondre pe den e tan? Na artikel disi sa poti prakseri na a fasi fa a situwâsi de na ini difrenti kondre. Kande yu no sabi sonwan fu den sani disi, noso kande sma na ini a kondre fu yu e du sani heri tra fasi. Ma toku, yu kan kon sabi sortu gronprakseri noso sortu sani de prenspari gi den futuboi fu Gado.

A fiti fu trow akruderi lantiwet

6, 7. Fu san ede wi musu poti prakseri na lantiwet te a abi fu du nanga trow afersi, èn fa wi kan sori taki wi e hori den wet dati na prakseri?

⁶ Aladi a de so taki Yehovah seti a trowlibi, toku sma di o trow musu saka densrefi tu na ondro libisma tirimakti. A sani disi fiti. Yesus ben taki: „Pai Caesar den sani di de fu Caesar, ma pai Gado den sani di de fu Gado” (Markus 12:17). Na apostel Paulus ben taki wan srefi sortu sani: „Ibri sma musu saka ensrefi na ondro den tiriman, bika nowan tiriman kan de efu Gado no gi en na okasi; na Gado gi den tiriman di de, na okasi fu tiri, ma a makti fu den e difrenti fu a di fu en.”—Romesma 13:1; Titus 3:1.

⁷ Na ini furu kondre a de so taki Caesar, noso lanti, e bosroiti o owru wan sma musu de fu man trow. Sobun, te tu Kresten wani trow, èn Bijbel no e krutu a trow fu den, dan den e gi yesi na a wet di lanti fu a kondre dati poti, te a abi fu du nanga trow afersi. Kande den sma disi musu kisi wan papira pe skrifi na tapu taki den abi primisi fu trow, kande wan lantiman musu trow den, noso kande den musu skrifi na ini lantibuku bakaten taki den trow. Di Caesar Augustus ben gi a komando taki sma ben musu go „skrifi den nen na lantibuku”, dan Maria nanga Yosef gi yesi na a komando dati, èn den go na Betlehem fu ’skrifi den nen na lantibuku’.—Lukas 2:1-5.

8. O ten Gado e si tu sma leki wan trowpaar, èn san Yehovah Kotoigi no e du fu dati ede?

⁸ Te tu Kresten e trow akruderi lantiwet, dan Gado e si den tu sma disi leki wan trowpaar. Fu dati ede Yehovah Kotoigi di trow kaba, no e hori a trow fu den fu a di fu tu leisi, èn den no e pramisi makandra ete wan leisi taki den sa tan getrow na makandra leki trowpaar, soleki fa sma gwenti fu du te den trow 25 noso 50 yari (Mateyus 5:37). (Son kerki feni taki te sma trow akruderi lantiwet, dan wan priester noso wan kerki fesiman musu hori wan seremonia èn a musu taki dati den tu sma disi tron masra nanga wefi, bika efu dati no pasa, dan fu taki en leti, den sma disi no trow na wan fasi di fiti.) Na ini furu kondre, lanti e gi primisi taki wan futuboi fu Yehovah Kotoigi trow sma. Te dati de so, dan a ben o bun te a brada disi e trow den sma na ini a Kownukondre zaal, èn a ben o bun tu taki wan lezing e hori baka dati. A Kownukondre zaal na a presi pe sma e anbegi a tru Gado, èn a presi disi fiti fu hori wan lezing di e taki fu a trowlibi di Yehovah Gado seti.

9. (a) Te a de so taki wan lantiman o trow tu Kresten, dan san den kan bosroiti fu du? (b) Fa den owruman e yepi fu meki a trow-oso waka na wan fasi di fiti?

⁹ Na ini tra kondre, lantiwet e taki dati sma musu trow na wan lantikantoro, noso taki wan lantiman musu trow den. Kresten e gi yesi na a wet dati, èn baka dati a de so nofo tron taki wan trow-lezing e hori na ini a Kownukondre zaal na a srefi dei, noso a dei baka dati. (Te tu sma trow na wan lantikantoro, noso te wan lantiman trow den, dan a no ben o bun fu meki furu dei pasa fosi den hori a trow-lezing, fu di den trow na fesi Gado nanga libisma, èn sosrefi na fesi a Kresten gemeente.) Efu wan lantiman o trow wan trowpaar, èn a trowpaar disi wani taki wan lezing e hori na ini wan fu den Kownukondre zaal, dan den musu aksi den owruman fu a Diniwroko Komte fu a gemeente dati na fesi, efu den mag du dati. Te den owruman kon sabi efu a trowpaar tyari densrefi na wan fasi di fiti, dan den sa sorgu taki a trow-lezing no e hori na a ten te wan konmakandra, noso wan tra programa e hori na ini a zaal (1 Korentesma 14:33, 40). Den owruman sa luku tu sortu sani a trowpaar wani sreka so taki a trow kan hori na ini a zaal, èn den sa bosroiti tu efu den o meki bekènti na wan konmakandra taki wan trow o hori na ini a zaal.

10. Efu wan lantiman musu trow tu Kresten, dan fa dati o abi krakti tapu a trow-lezing?

¹⁰ Na owruman di e hori a trow-lezing sa pruberi fu hori en na wan switi fasi, a sa gi sma deki-ati na yeye fasi, èn a sa taki na wan lespeki fasi. Efu wan lantiman ben trow den tu sma kaba fosi a lezing, dan na owruman sa tyari kon na krin taki den tu sma disi trow akruderi den wet fu Caesar. Efu a de so taki na a ten di a lantiman trow den tu sma disi, den no pramisi makandra taki den o tan getrow na makandra, dan den kan du dati na a lezing.c Efu a trowpaar disi ben pramisi makandra a sani disi kaba di a lantiman trow den, ma den wani du dati na fesi Yehovah èn a gemeente, dan den musu taki na wan fasi di e sori den tra sma taki den ben pramisi makandra kaba taki den o tan getrow na makandra. Na so fasi den e sori taki den ben poti „na ondro wán tyatyari” kaba.—Mateyus 19:6; 22:21.

11. Fa sma e trow na ini son kondre, èn fa dati abi krakti tapu a trow-lezing?

¹¹ Na ini son kondre, a kan de so taki lantiwet no e taki dati sma musu hori wan seremonia te den o trow, noso taki wan lantiman musu trow den. Den tu sma e poti den nen na tapu wan spesrutu papira di e sori taki den trow, èn den e gi wan lantiman a papira disi. Baka dati, a lantiman e skrifi na ini lantibuku taki den tu sma disi trow. A sani disi na wan buweisi taki den tu sma disi na masra nanga wefi, èn a dei di skrifi na tapu a trow papira, na a trowdei fu den. Soleki fa wi ben taki kaba na fesi, dan a ben o bun te wan trow-lezing di teki puru fu Bijbel, e hori wantewante baka te wan trowpaar trow na a fasi disi. Den kan aksi wan brada di lepi na yeye fasi, fu hori a lezing disi na ini a Kownukondre zaal. A brada sa taigi den sma di kon fu arki a lezing, taki den tu sma disi trow, fu di syatu bifo a lezing a lantiman skrifi dati na ini a lantibuku. Efu a trowpaar wani pramisi makandra taki den o tan getrow na makandra, dan den musu du dati akruderi den bodoi di skrifi na ini paragraaf 10, èn na ini a futuwortu fu a paragraaf disi. Den sma di kon na a Kownukondre zaal sa prisiri makandra nanga a trowpaar, èn den sa kisi wini fu a rai di e komoto fu Gado Wortu.—Singi fu Salomo 3:11.

Sma di e trow akruderi a kulturu fu den èn sma di e trow na fesi wan lantiman

12. San a wani taki dati sma e trow akruderi a kulturu fu den, èn san bun fu du baka te sma trow na a fasi disi?

¹² Na ini son kondre, trowpaar e trow akruderi a gwenti fu a kulturu (noso a lo) fu den. Disi no abi fu du nanga a libi di tu sma e libi nanga makandra, èn a no abi fu du tu nanga a situwâsi di sma e si leki wan trutru trowlibi na son kondre, namku taki tu sma e pramisi makandra taki den sa de getrow na makandra, aladi den no trow akruderi lantiwet.d Na presi fu dati, te sma e trow akruderi a kulturu fu den, dan son leisi a famiri fu a trowmisi e pai a famiri fu a trowmasra wan gudu, èn a famiri dati e teki a gudu. A sani disi e sori taki den tu sma disi trow akruderi lantiwet èn akruderi Bijbel. Te tu sma trow na a fasi disi, dan lanti e si den leki masra nanga wefi, èn den tu sma disi musu tan getrow na makandra. Baka dati, a de so nofo tron taki a trowpaar kan go skrifi na lantibuku taki den trow akruderi a kulturu fu den. Te den du dati, dan son leisi den e kisi wan trow papira. Te a trowpaar skrifi na lantibuku taki den trow, dan dati kan de wan kibri gi den noso gi a wefi, efu a masra fu en lasi libi, èn sosrefi gi den pikin di den o meki kande. A gemeente e gi iniwan sma di trow akruderi a kulturu fu den, a rai fu no draidrai fu skrifi na lantibuku taki den trow. A moi fu sabi taki, a Wet di Gado gi Moses, ben e taki dati sma ben musu skrifi na ini dokumenti suma trow èn suma gebore.—Mateyus 1:1-16.

13. Fu san ede a bun taki wan trow-lezing e hori baka te tu sma trow akruderi a kulturu fu den?

¹³ Den tu sma di trow akruderi a kulturu fu den, èn sosrefi akruderi lantiwet, e tron masra nanga wefi. Soleki fa wi si kaba, dan a ben o bun te Kresten di e trow na a fasi disi, e aksi taki wan trow-lezing e hori na ini a Kownukondre zaal, pe den kan pramisi makandra taki den sa tan getrow na makandra. Efu a trowpaar e du dati, dan a brada di e hori a lezing sa taigi den arkiman taki den tu sma disi trow kaba akruderi den wet fu Caesar. Wán trow-lezing nomo sa hori. A trowpaar disi e trow wán leisi, namku akruderi a kulturu fu den, noso akruderi lantiwet, èn wán lezing e hori di teki puru fu Bijbel. Te a trow-lezing e hori syatu baka a trow, èn tapu a srefi dei, efu dati kan, dan dati sa meki sma na ini a libimakandra kisi lespeki gi a fasi fa Kresten e trow.

14. San wan Kresten kan du efu a de so taki sma kan trow akruderi a kulturu fu den, èn taki wan lantiman kan trow sma?

¹⁴ Na ini son kondre pe lantiwet e gi pasi taki sma trow akruderi a kulturu fu den, a de so tu taki wan lantiman kan trow sma. Te wan lantiman e trow tu sma, dan a trowpaar kan pramisi makandra taki den sa tan getrow na makandra, èn den kan skrifi na lantibuku taki den trow. Son Kresten trowpaar feni en moro bun fu trow na a fasi disi, leki fu trow akruderi a kulturu fu den. A no de fanowdu fu trow na ala tu fasi, fu di ala den tu fasi disi fu trow e kruderi nanga lantiwet. Den sani di paragraaf 9 nanga 10 e taki fu a trow-lezing èn fu a pramisi di a trowpaar e pramisi makandra taki den sa tan getrow na makandra, e fiti tu na ini a situwâsi disi. A moro prenspari sani, na taki den tu sma disi e trow na wan fasi di fiti na ini na ai fu Gado nanga libisma.—Lukas 20:25; 1 Petrus 2:13, 14.

Tan abi lespeki gi a trowlibi

15, 16. Na sortu fasi sma musu sori lespeki gi a trowlibi?

¹⁵ Di wan problema ben opo kon na ini a trowlibi fu a kownu fu Persia, dan a moro hei raiman fu en di nen Memukan, gi en rai di ben o abi bun bakapisi. A taigi en ’taki ala den wefi musu lespeki a masra fu den’ (Ester 1:20). A no de fanowdu taki wan libisma kownu gi Kresten trowpaar a rai dati, bika wefi musu gi grani na a masra fu den. Na so a de tu taki Kresten masra e gi grani èn e prèise a trowpatna fu den (Odo 31:11, 30; 1 Petrus 3:7). A no musu de so taki baka te wi trow furu yari kaba, dan fosi wi e kisi lespeki gi a trowlibi fu wi. Wi musu sori taki wi abi lespeki gi a trowlibi wantewante te wi trow, iya, bigin fu a dei di wi trow, èn sosrefi baka dati.

¹⁶ A no musu de so taki soso tapu a trowdei fu den, wan man nanga wan uma, namku wan masra nanga wan wefi, abi a lespeki disi. Efu wan Kresten owruman sa hori a trow-lezing, dan a musu du dati na wan lespeki fasi tu. Na ini a lezing a e taki nanga a trowpaar. Fu di a takiman musu sori lespeki gi a trowpaar, meki a no sa taki sani fu meki sma lafu nomo, èn a no sa taki sani di abi fu du nanga a kulturu fu den. A no sa taki fu tori di a trowpaar no wani tra sma fu kon sabi, fu di dati kan meki a trowpaar nanga den arkiman firi syen. Na presi fu dati, a sa taki na wan switi fasi, èn a sa gi den arkiman deki-ati, fu di a e poti spesrutu prakseri na a Sma di seti a trowlibi èn na den tumusi koni rai fu En. Iya, te na owruman e hori a trow-lezing na wan lespeki fasi, dan a trow dati sa gi Yehovah Gado grani.

17. Fu san ede Kresten musu trow akruderi lantiwet?

¹⁷ A no de fu taki dati yu kon si sortu difrenti sani sma musu du te den wani trow akruderi lantiwet. Kande sonwan fu den sani disi no de fanowdu na ini a kondre fu yu. Toku, wi alamala leki Yehovah Kotoigi musu frustan taki a de tumusi prenspari fu trow na wan fasi di e sori taki wi abi lespeki gi den wet fu a kondre, èn gi den sani di Caesar e aksi fu wi (Lukas 20:25). Paulus e gi wi a rai disi: „Gi ala sma san den abi reti na tapu: efu wan sma wani taki yu musu pai belasting moni, dan pai a belasting moni; efu wan sma wani taki yu musu pai lantimoni, dan pai a lantimoni; efu wan sma wani taki yu musu frede en, dan frede en; efu wan sma wani taki yu musu gi en grani, dan gi en grani” (Romesma 13:7). Iya, a fiti taki tu Kresten di e trow, abi lespeki gi a seti di Gado poti na ini a ten disi, èn den musu du dati bigin fu a trowdei fu den.

18. Na sortu tra sani wi musu poti prakseri te wi o trow, èn fa wi kan kon sabi moro fu a tori dati?

¹⁸ Nofo tron a de so taki baka te tu Kresten trow, dan den abi wan prisiri demakandra, iya den kan abi wan trowfesa, noso den e nyan nanga makandra èn sosrefi nanga trawan. Memre taki Yesus ben de na so wan fesa. Efu so wan demakandra e hori, dan fa a rai fu Bijbel kan yepi wi fu sorgu taki a demakandra disi e gi grani na Gado, èn taki a e gi a nyun trowpaar nanga a Kresten gemeente wan bun nen? Na artikel di e kon sa taki fu a tori dati.e

Libi na wan fasi di e sori taki yu abi bribi

„Efu wan sma no e du san a e bribi, dan a bribi dati na wan dede sani.”—YAKOBUS 2:17.

1. Fu san ede den fosi Kresten ben e libi na wan fasi di ben e sori taki den abi bribi?

MORO furu a ben de so taki den fosi Kresten ben e libi na wan fasi di ben e sori taki den abi bribi. A disipel Yakobus ben gi ala Kresten a rai disi: „Un musu tron sma di e du san a wortu e taki, èn un no musu de sma di e yere nomo.” A ben taki moro fara: „Soleki fa a skin dede te wan sma no e bro moro, na so bribi sondro wroko dede tu” (Yakobus 1:22; 2:26). Sowan 35 yari baka di Yakobus skrifi den sani disi, furu Kresten ben e tan du sani di fiti, fu sori taki den abi bribi. Ma a de wan sari sani taki sonwan fu den no ben e du dati. Yesus ben prèise a gemeente fu Smirna, ma a ben taigi furu fu den sma na ini a gemeente fu Sardes: „Mi sabi den sani di yu e du, taki yu e tyari a nen taki yu de na libi, ma toku yu dede.”—Openbaring 2:8-11; 3:1.

2. Sortu sani Kresten musu aksi densrefi te a abi fu du nanga a bribi fu den?

² Fu dati ede, Yesus gi den sma na ini Sardes a rai fu sori a lobi di den ben abi fosi gi a Kresten waarheid, èn fu de na ai na yeye fasi. Fu taki en leti, a rai disi ben de gi ala den sma di ben o leisi den wortu fu en bakaten (Openbaring 3:2, 3). Ibriwan fu wi kan aksi ensrefi: ’Fa a de nanga den sani di mi e du? Den sani di mi e du e sori krin taki ala ten mi e du ala san mi man fu sori a bribi disi, srefi te a no abi fu du nanga afersi soleki a preikiwroko noso den gemeente konmakandra?’ (Lukas 16:10) Te a abi fu du nanga a sori di wi musu sori taki wi abi bribi, dan wi kan poti prakseri na furu afersi fu wi libi, ma meki wi taki fu wán fu den nomo, namku prisiri demakandra, soleki Kresten trow-fesa.

Prisiri demakandra pe furu sma no de

3. San Bijbel e taki fu prisiri demakandra?

³ Furu fu wi breiti te wi e kisi wan kari fu go na wan prisiri demakandra fu koloku Kresten. Yehovah na „a koloku Gado” di wani taki den futuboi fu en de koloku (1 Timoteyus 1:11). Yehovah meki Salomo skrifi a tru tori disi na ini Bijbel: „Mi fu mi sei, ben feni prisiri bun, bika wan moro bun sani no de na ondro a son gi libisma, leki fu nyan, dringi, èn prisiri, èn a musu de wan kompe gi den te den e du tranga wroko, ala den dei fu a libi fu den” (Preikiman 3:1, 4, 13; 8:15). Wi kan prisiri na a fasi dati te wi e nyan nanga makandra leki osofamiri, noso te wi de makandra nanga wan tu tru anbegiman fu meki prisiri.—Yob 1:4, 5, 18; Lukas 10:38-42; 14:12-14.

4. Na sortu sani wan sma musu poti prakseri te a e seti sani fu abi wan prisiri demakandra?

⁴ Efu yu e seti sani fu abi so wan prisiri demakandra, èn yu abi a frantwortu fu a demakandra dati, dan yu musu prakseri bun fa yu wani taki sani musu waka, srefi efu yu e kari wan tu Kresten brada noso sisa kon fu nyan makandra nanga yu, noso fu taki switi tori (Romesma 12:13). A ben o bun fu sorgu taki „ala sani waka na wan fasi di fiti”, èn taki yu e meki „a koni fu Gado” tiri yu (1 Korentesma 14:40; Yakobus 3:17). Na apostel Paulus ben skrifi: ’Awansi unu e nyan noso dringi, noso awansi san unu e du, du ala sani fu gi Gado glori. Un no musu du nowan sani di e meki sma fadon’ (1 Korentesma 10:31, 32). Na sortu sani wi musu poti bun prakseri? Te yu e luku den sani dati na fesi, dan dati kan yepi yu fu sorgu taki den sani di yu nanga den fisitiman e du, e sori taki yu e libi akruderi a bribi fu yu.—Romesma 12:2.

Fa a prisiri demakandra o de?

5. Fu san ede wan sma di e kari trawan kon na wan prisiri demakandra, musu denki bun efu a o bosroiti taki sopi o de fu dringi èn efu poku o prei?

⁵ Furu sma di e kari trawan kon na wan prisiri demakandra, ben musu bosroiti efu sopi ben o de fu dringi. Sopi no de fanowdu fu meki sma prisiri na so wan demakandra. Memre taki Yesus ben gi nyanyan na wan bigi grupu sma di ben kon na en, fu di a meki taki moro brede nanga fisi kon de. A tori no e taki dati a ben gi sma win na wan wondrufasi, aladi wi sabi taki a ben man du dati (Mateyus 14:14-21). Efu yu e bosroiti taki sopi o de fu dringi na a demakandra, dan no meki a de tumusi furu, èn sorgu taki tra sani de fu dringi tu gi den sma di no wani dringi sopi (1 Timoteyus 3:2, 3, 8; 5:23; 1 Petrus 4:3). Luku bun taki yu no e meki nowan sma firi leki yu e dwengi en fu dringi wan sani di kan beti „leki wan takru sneki” (Odo 23:29-32). Fa a de nanga poku noso singi? Efu poku o prei na a prisiri demakandra fu yu, dan a no de fu taki dati yu sa luku bun sortu poku yu o prei, fu di yu o poti prakseri na a fasi fa a poku e naki, èn na den wortu fu a poku (Kolosesma 3:8; Yakobus 1:21). Furu Kresten feni taki te Kownukondre poku e prei, noso te den e singi den Kownukondre singi makandra nanga den fisitiman, dan a sani dati e gi prisiri (Efeisesma 5:19, 20). Èn a no de fu taki dati yu sa luku ten na ten taki a poku no e prei tumusi tranga so taki sma no o man taki bun nanga makandra, èn yu sa luku tu taki a poku no e fruferi den birtisma.—Mateyus 7:12.

6. Fa wan sma di e orga wan prisiri demakandra kan sori taki a abi bribi, te a abi fu du nanga takimakandra noso tra sani?

⁶ Na wan prisiri demakandra, Kresten kan taki fu difrenti sani, den kan leisi wan pisi tori aladi den trawan e arki, noso den kan fruteri makandra moi ondrofenitori. Efu sma e bigin taki fu sani di no fiti, dan a sma di orga a prisiri demakandra kan sorgu na wan koni fasi taki den e drai a tori fu taki fu tra sani di fiti. A musu luku bun sosrefi taki wán sma nomo no e taki doronomo. Efu a e si taki dati e pasa, dan a kan sori a sma na wan lespeki fasi taki a moro bun fu meki tra sma taki tu. Kande a kan taki nanga trawan, a kan aksi yonguwan fu fruteri fa den e si wan tori, noso a kan bigin nanga wan tori di e gi difrenti sma okasi fu taki wan sani. Te disi e pasa, dan yonguwan nanga owruwan sa nyan bun fu a prisiri demakandra. Te yu di e orga a prisiri demakandra e handri nanga koni èn e hori den firi fu trawan na prakseri, dan ala sma di de drape sa kon ’sabi taki yu de klariklari fu fiti yusrefi’ (Filipisma 4:5). Den sa si taki yu abi bribi, èn taki a abi krakti tapu ala afersi fu yu libi.

Trow nanga trowfesa

7. Fu san ede wan sma musu luku bun fa a e orga wan trow, èn sosrefi a trowfesa di e hori baka dati?

⁷ Wan moi okasi pe sma kan abi prisiri, na wan Kresten trow. Owruten futuboi fu Gado, èn sosrefi Yesus nanga den disipel fu en, ben e go na den sortu prisiri okasi disi, èn na den fesa di ben e hori baka a trow (Genesis 29:21, 22; Yohanes 2:1, 2). Ma na ini a ten disi, a kon na krin taki a no makriki srefisrefi fu orga wan trowfesa na so wan fasi taki trawan e si taki den orgaman handri nanga koni, èn taki den sabi san na den moro prenspari sani gi Kresten. Ma toku den sortu prisiri demakandra disi na aladei sani na ini a libi, èn den e gi wan Kresten na okasi fu sori taki a abi bribi.

8, 9. Fa den sani di e pasa na furu trowfesa e sori taki den wortu di skrifi na 1 Yohanes 2:16, 17, tru?

⁸ Furu sma di no sabi Bijbel gronprakseri, noso di no e broko den ede nanga den sani dati, e si wan trow leki wan okasi pe den kan du ala sortu sani di no fiti, noso den e si en leki wan okasi pe sma e gi pasi taki trawan e du den sani dati. Wan tijdschrift fu Europa ben sori san wan uma di trow no so langa ete, taki fu a trow fu en di ben gersi a di fu wan „kownu”. Na uma ben taki: ’Wi ben e rèi na ini wan asiwagi di fo asi ben e hari, baka na asiwagi dati yu ben abi 12 asiwagi èn sosrefi wan asiwagi nanga pokuman di ben e prei poku. Baka dati, wi nyan switi nyanyan na a trowfesa, èn moi poku ben e prei. Iya, a ben de wan kefalek trowfesa. Ala sani waka soleki fa mi ben wani, èn mi ben e firi leki wan umakownu a dei dati.’

⁹ Aladi a kan taki ibri kondre abi en eigi gwenti, toku den sortu denki dati e sori taki na apostel Yohanes ben abi leti di a skrifi: „Ala den sani di de fu grontapu, namku a lostu fu a skin, a lostu fu den ai, èn a prodo di wan sma e prodo nanga den gudu di a abi, no e kon fu a Tata, ma den sani disi e kon fu grontapu.” Yu denki taki tu lepi Kresten di o trow, ben o wani a trow fu den fu gersi a di fu wan „kownu”, fu di den wani hori wan kefalek bigi fesa? Na presi fu dati den musu de sma di e hori na prakseri taki „a sma di e du a wani fu Gado sa tan fu têgo”.—1 Yohanes 2:16, 17.

10. (a) Fu san ede a de prenspari taki sma di no wani abi wan tumusi bigi trowfesa e seti sani na fesi? (b) Fa den tu sma di o trow musu bosroiti suma den o gi wan kari?

¹⁰ Kresten trowpaar musu hori na prakseri san na den moro prenspari sani, èn sosrefi san fiti, èn Bijbel kan yepi den fu du dati. Aladi a trowdei na wan prenspari okasi, toku den sabi taki disi na soso a bigin fu a trowlibi fu tu Kresten di abi a howpu fu libi fu têgo. Den no de fruplekti fu abi wan bigi trowfesa. Ma efu den e bosroiti fu abi wan prisiri demakandra, dan den sa musu luku omeni dati sa kostu, èn fa a prisiri demakandra disi o de (Lukas 14:28). Na ini a Kresten trowlibi fu den, a masra sa de na edeman soleki fa Bijbel e sori (1 Korentesma 11:3; Efeisesma 5:22, 23). Sobun, a trowmasra abi a moro bigi frantwortu fu a trowfesa. A no de fu taki, dati a sa taki na wan lobi-ati fasi nanga na uma di o tron en wefi, fu bosroiti fu eksempre suma den o kari, noso omeni sma den man kari kon na a trowfesa. Kande den no sa man kari ala den mati nanga famiriman fu den, èn dati no de wan koni sani fu du tu. Fu dati ede, den sa musu bosroiti fu no kari tumusi furu sma. A trowpaar musu abi a frutrow taki efu den no man gi wan kari na son Kresten brada nanga sisa, dan den sma dati no sa mandi, fu di den e frustan fu san ede a trowpaar teki a bosroiti dati.—Preikiman 7:9.

„A fesiman fu a fesa”

11. Sortu frantwortu wan „fesiman fu a fesa” kan abi na wan trowfesa?

¹¹ Efu wan trowpaar bosroiti fu abi wan trowfesa, dan fa den kan sorgu taki sani e tan waka na wan fasi di fiti? Furu yari langa kaba, Yehovah Kotoigi sabi taki a de wan koni sani fu abi wan sma di e tyari spesrutu frantwortu na wan trowfesa, èn Bijbel e taki fu a sma disi na ini a tori di e taki fu a trowfesa pe Yesus ben go na ini Kana. Na a trowfesa dati, yu ben abi wan „fesiman fu a fesa”, namku wan lepi bribiman (Yohanes 2:9, 10). Na so a de tu taki wan koni trowmasra sa gi wan lepi Kresten brada a tumusi prenspari frantwortu disi. Baka te a fesiman fu a fesa kon sabi san na den winsi fu a trowmasra èn sortu sani a trowmasra lobi, dan a kan seti ala den sani dati finifini bifo a fesa, èn sosrefi na a ten te a fesa e hori.

12. San a trowmasra musu hori na prakseri efu a bosroiti taki sopi o de fu dringi?

¹² Soleki fa paragraaf 5 e sori, dan son trowpaar e bosroiti taki sopi no o de fu dringi na a trowfesa fu den, fu di te sma o dringi tumusi furu sopi, dan dati kan pori a prisiri okasi disi, èn a kan meki taki sani waka na wan fasi di no fiti (Romesma 13:13; 1 Korentesma 5:11). Ma efu den bosroiti taki sopi o de fu dringi, dan a trowmasra musu sorgu taki tumusi furu sopi no e prati. Win ben de na a trowfesa pe Yesus ben go na ini Kana, èn Yesus ben sorgu taki bun win ben de fu dringi. Disi na san a fesiman fu a fesa ben taki fu a win dati: „Ala sma e poti a bun win fosi, èn te den sma kon drungu kaba, dan den e poti a win di no bun so. Yu kibri a bun win èn now fosi yu e kon nanga a win disi” (Yohanes 2:10). A no de fu taki dati Yesus no ben gi sma deki-ati fu kon drungu, bika a ben si a sani dati leki wan sani di no fiti (Lukas 12:45, 46). A fruwondru di a fesiman fu a fesa ben e fruwondru taki a win ben bun so, e sori taki son leisi a ben si taki son fisitiman ben e kon drungu na trowfesa (Tori fu den Apostel 2:15; 1 Tesalonikasma 5:7). Fu dati ede a trowmasra, nanga a lepi Kresten di a e poti leki fesiman fu a fesa, musu sorgu taki ala sma di de drape e gi yesi na a krin rai disi: „No dringi win teleki unu kon drungu, bika dati e meki sma libi wan yayolibi.”—Efeisesma 5:18; Odo 20:1; Hosea 4:11.

13. Na sortu sani wan trowpaar musu poti prakseri efu den e bosroiti taki poku o prei na a trow-oso fu den, èn fu san ede den musu du dati?

¹³ Neleki fa a de na tra prisiri demakandra, na so sma musu luku bun na trowfesa taki efu poku o prei, a no e prei tumusi tranga so taki sma no sa man taki bun nanga makandra. Wan Kresten owruman ben taki: „Baka wan pisi ten, te sma e bigin taki moro tranga, noso te den e bigin dansi, dan a poku e kon moro tranga. A kan de so taki a poku di ben e prei safri na a bigin fu a fesa, e prei bun tranga now, èn sma no man taki bun nanga makandra srefi. Wan trowfesa e gi sma na okasi fu abi prisiri demakandra. A ben o de wan sari sani te sma no e kisi na okasi fu du dati, fu di a poku e prei tumusi tranga!” Na ini a situwâsi disi sosrefi a trowmasra nanga a fesiman fu a fesa musu sori taki na den abi a frantwortu fu a fesa. Iya, efu den yuru den pokuman disi noso efu den no yuru den, den no musu gi pasi taki den pokuman e bosroiti sortu poku e prei, noso o tranga a poku e prei. Paulus ben skrifi: „Awinsi san unu e taki, noso awinsi san unu e du, du ala sani na ini a nen fu Masra Yesus” (Kolosesma 3:17). Te den fisitiman go na oso baka a trowfesa, dan a poku di ben e prei sa memre den taki a trowpaar ben e du ala sani na ini a nen fu Yesus, a no so? Na so a musu de.

14. Sortu sani Kresten musu man memre nanga prisiri fu wan trow-oso?

¹⁴ Iya, te wan trow orga bun, dan sma sa memre na okasi dati nanga prisiri. Adam nanga Edyta, di trow 30 yari kaba, ben taki fu wan trowfesa pe den ben go: „Yu ben kan si krin taki den sma drape na Kresten. Sma ben e singi prèisesingi gi Yehovah, èn den ben e du wan tu tra moi sani tu. A dansi nanga a poku no ben de den moro prenspari sani. A ben de wan prisiri okasi di gi sma deki-ati, èn ala sani waka akruderi Bijbel gronprakseri.” A de krin fu si taki a trowmisi nanga a trowmasra kan du furu sani fu sori taki den abi bribi.

Trowkado

15. Sortu Bijbel gronprakseri e fiti te a abi fu du nanga trowkado?

¹⁵ Na ini furu kondre a de wan gwenti taki mati nanga famiriman e gi den sma di o trow wan kado. San yu kan hori na prakseri te yu e bosroiti fu du dati? We, memre san na apostel Yohanes ben taki fu „a prodo di wan sma e prodo nanga den gudu di a abi”. A no ben taki dati Kresten abi a fasi disi, bika den sani di Kresten e du e sori taki den abi bribi. Na presi fu dati, a ben taki dati a „grontapu di e pasa gowe” abi a fasi disi (1 Yohanes 2:16, 17). Te wi e luku a sani disi di Yohanes skrifi nanga yepi fu santa yeye, dan a de so taki a trowpaar musu meki ala sma drape kon sabi suma gi den wan kado? Kresten fu Masedonia nanga Akaya ben gi den brada na ini Yerusalem bijdrage, ma Bijbel no e taki dati den ben meki sma kon sabi suma ben gi bijdrage (Romesma 15:26). Furu Kresten di e gi wan trowkado, no sa wani taki sma poti prakseri na den fu di den gi a kado dati, ma na presi fu dati den sa wani taki trawan no sabi taki na den gi a kado dati. Meki wi go luku a rai fu Yesus na ini Mateyus 6:1-4, di abi fu du nanga a tori disi.

16. Fa trowpaar kan luku bun fu no hati den firi fu tra sma te a abi fu du nanga trowkado?

¹⁶ Te sma e meki trawan kon sabi suma gi wan kado, dan dati kan meki taki sma e „strei nanga makandra”, fu di den o luku sortu kado moro bun, noso sortuwan moro diri. Fu dati ede, wan koni Kresten trowpaar no sa meki trawan kon sabi suma gi wan kado. Te den e meki trawan kon sabi suma gi wan kado, dan dati kan meki taki sma di kande no ben man bai wan kado, firi syen (Galasiasma 5:26; 6:10). A no de fu taki, dati a no de wan fowtu sani te a trowmasra nanga a trowmisi sabi suma gi den wan kado. Den kan kon sabi dati efu a sma di gi a kado poti wan karta na a kado dati, ma a trowpaar no sa leisi dati na publiki. Te wi e bai, te wi e gi, èn te wi e kisi trowkado, dan wi alamala e kisi na okasi fu sori taki srefi na ini wan afersi leki disi di abi fu du nanga wi eigi tori, a bribi fu wi abi krakti tapu den sani di wi e du.a

17. Sortu marki Kresten musu abi, te a abi fu du nanga a bribi fu den, èn nanga ala den sani di den e du?

¹⁷ A no de fu taki dati te wi e libi na wan fasi di fiti, te wi e go na den Kresten konmakandra, èn te wi e teki prati na a preikiwroko, dan dati no nofo fu sori taki wi abi bribi. Meki a de so taki ibriwan fu wi sori taki a bribi fu en abi krakti tapu ala sani di a e du. Iya, wi kan sori taki wi abi bribi te wi e ’du ala san wi ben musu du’, sosrefi den sani di abi fu du nanga den afersi di wi kari na tapusei.—Openbaring 3:2.

18. Fa den wortu di skrifi na ini Yohanes 13:17 sori fu de tru, te a abi fu du nanga Kresten trowfesa èn nanga prisiri demakandra?

¹⁸ Yesus ben gi den getrow apostel fu en wan moi eksempre, di a saka ensrefi fu wasi den futu, èn baka dati a taki: „Efu unu sabi den sani disi, dan koloku fu unu te unu e du den” (Yohanes 13:4-17). A kan taki na ini a kondre pe wi e libi now, a no de fanowdu, noso sma no gwenti fu wasi den futu fu wan tra sma, soleki den futu fu wan fisitiman di kon na wi oso. Ma soleki fa wi si na ini na artikel disi, dan yu abi sosrefi tra afersi fu a libi pe wi kan du sani di e sori taki wi lobi trawan, èn taki wi e hori trawan na prakseri, soleki den sani di abi fu du nanga prisiri demakandra èn nanga Kresten trowfesa. Ala den sani disi sa sori taki wi abi bribi. Wi kan sori taki dati de so te wi o trow, te wi de na wan trowfesa, noso na wan prisiri demakandra fu Kresten di wani sori nanga den sani di den e du, taki den abi bribi.

[Futuwortu]

San yu ben sa piki?

Fa yu kan sori taki yu abi bribi

• te yu e orga wan prisiri demakandra?

• te yu e orga wan trow noso wan trowfesa?

• te yu e gi noso te yu e kisi wan trowkado?

[Prenki na tapu bladzijde 24]

Meki „a koni fu Gado tiri” wi, srefi te wi e kari wan tu sma nomo

Meki a trowdei fu yu gi yu moro prisiri, èn meki sani waka na wan fasi di fiti

„A TROWDEI fu mi ben de wan fu den moro prenspari èn prisiri dei fu mi libi”, na so Gordon di trow pikinmoro 60 yari, e taki. Fu san ede a trowdei na so wan prenspari dei gi tru Kresten? Disi na wan dei te tu sma e meki wan santa sweri na fesi den wan di den lobi trutru, namku a patna fu den, nanga Yehovah Gado (Mateyus 22:37; Efeisesma 5:22-29). Iya, sma di meki mofo fu trow, wani nyan bun fu a trowdei fu den, ma den wani gi grani tu na a Sma di seti a trowlibi.—Genesis 2:18-24; Mateyus 19:5, 6.

Fa wan trowmasra kan sorgu taki a prisiri okasi disi e waka na wan fasi di fiti? San wan trowmisi kan du fu sori lespeki gi en masra èn gi Yehovah? Fa trawan di de na a trow kan meki taki a trowfesa e tron wan prisiri okasi? Meki wi go luku wan tu Bijbel gronprakseri di sa yepi wi fu gi piki tapu den aksi dati. Te wi e handri akruderi den gronprakseri dati, dan wi sa man wai pasi gi problema di kan meki taki a spesrutu okasi disi e waka na wan fasi di no fiti.

Suma abi a moro bigi frantwortu?

Na ini furu kondre a de so taki wan futuboi fu Yehovah Kotoigi mag trow sma akruderi lantiwet. Srefi na kondre pe lantiwet e taki dati wan lantiman musu trow tu sma, a ben o bun te wan trowpaar e aksi taki wan lezing di teki puru fu Bijbel e hori. Nofo tron a de so taki a sma di e hori a lezing e aksi a trowmasra fu poti prakseri na a frantwortu di Gado wani taki a musu teki na en tapu leki ede fu na osofamiri (1 Korentesma 11:3). Fu dati ede, a trowmasra abi a moro bigi frantwortu fu den sani di e pasa na a trow. A no de fu taki, dati nofo tron sani seti langa ten na fesi gi a trow, èn gi a fesa di e hori baka dati. Fu san ede a kan muilek gi a trowmasra fu seti den sani disi?

Wan reide, na taki den famiriman fu den sma di o trow, noso a trowmisi, kande o wani taigi a trowmasra fa sani musu seti gi a trow. Rodolfo, di trow furu sma kaba, e taki: „Son leisi den famiriman e dwengi a trowmasra fu du sani soleki fa den wani, spesrutu te den famiriman disi e yepi fu pai gi den kostu fu a trowfesa. Kande den feni taki den sabi moro bun sortu sani musu pasa na a trow èn na a fesa. Disi kan meki taki a trowmasra no man tyari a frantwortu di a abi na a okasi disi, na wan bun fasi.”

Max di e trow sma moro leki 35 yari kaba, e taki: „Mi kon si taki a e kon tron wan gwenti taki a trowmisi e bosroiti san o pasa na a trow èn na a fesa, èn na so fasi a trowmasra no e kisi nofo okasi fu taki san ensrefi wani fu pasa.” David, di trow furu sma tu, e taki: „A kan taki son trowmasra no gwenti fu teki fesi, èn taki nofo tron den no abi furu fu du nanga den sani di e seti gi a trow.” Fa a trowmasra kan tyari a frantwortu fu en na wan bun fasi?

A e gi moro prisiri te sma e taki nanga makandra

Efu a trowmasra wani tyari a frantwortu fu en na wan bun fasi te a e seti sani gi a trow, dan a musu taki krin nanga trawan. Bijbel e sori krin: „Sani no sa waka bun te sma no e taki krin nanga makandra” (Odo 15:22). Ma te a trowmasra e taki fosi nanga a trowmisi, nanga den famiriman, èn nanga trawan di kan gi en rai fu Bijbel, fu meki den kon sabi fa a wani seti sani gi a fesa, dan na so fasi a kan wai pasi gi problema.

Iya, a de tumusi prenspari taki tu sma di meki mofo fu trow, e taki fosi nanga makandra sortu sani den wani seti sani gi a trow fu den, èn na sortu fasi den o du dati. Fu san ede? We, luku na eksempre fu a trowpaar Ivan nanga Delwyn. Aladi den tu sma disi na fu tu difrenti kulturu, toku den abi wan koloku trowlibi furu yari langa kaba. Ivan e memre fa den ben seti sani gi a trow, èn a e taki: „Mi ben sabi soifri fa mi ben wani taki a trow fu mi ben musu waka, èn mi ben wani sosrefi wan trowfesa pe ala mi mati ben o de, mi ben wani abi wan trow-kuku, èn mi ben wani a trowmisi fu mi fu weri wan weti trow-yapon. Delwyn fu en sei, ben wani wan trow-oso sondro tumusi furu pranpran èn sondro tumusi furu sma, èn a no ben wani abi trow-kuku. A ben e prakseri srefi fu no weri wan trow-yapon, ma wan tra sani.”

Fa a trowpaar disi di ben abi difrenti denki fu sani, kon agri nanga makandra? We, den taki krin nanga makandra, èn den du dati na wan switi fasi (Odo 12:18). Ivan e taki moro fara: „Wi studeri artikel soleki den wan na ini De Wachttoren fu 15 april 1984, di e sori fa wi kan gebroiki a rai fu Bijbel te a abi fu du nanga trow afersi.a Den artikel dati yepi wi fu si a trow fu wi soleki fa Gado e si en. Fu di wi kweki na difrenti fasi, meki wi ben musu kenki a denki fu wi, èn te fu kaba wi kon agri nanga makandra.”

Aret nanga Penny du wan srefi sortu sani. Aret e taki fu a trowdei fu den: „Mi nanga Penny ben taki fu den difrenti sani di wi ben wani gi a trow fu wi, èn wi ben man agri nanga makandra. Wi begi Yehovah fu blesi a trowdei fu wi. Mi suku rai tu na den papa nanga mama fu wi, èn na wan tu lepi trowpaar na ini a gemeente. Den rai di den gi wi yepi wi trutru. Leki bakapisi fu dati, a trow fu wi waka heri bun.”

Weri krosi èn moi yusrefi na wan fasi di fiti

Wi kan frustan taki trowmisi nanga trowmasra wani weri bun krosi na a trow fu den (Psalm 45:8-15). Kande den e gebroiki den ten, den krakti, nanga den moni, fu kan abi krosi di fiti. Sortu Bijbel gronprakseri kan yepi den fu kon si sortu krosi fiti èn moi fu weri?

Luku san a trowmisi e weri na a okasi disi. Aladi ibri sma na ini ibri kondre abi en eigi sani di a lobi, toku a rai fu Bijbel e fiti na ala presi. Umasma musu „moi densrefi nanga krosi di fiti, èn den musu du dati na wan lespeki fasi èn nanga krin frustan”. Kresten uma musu gi yesi na a rai disi ala ten, èn a no de fu taki dati den musu du dati tu na a trowdei fu den. A tru taki wan sma no abi „diri krosi” fanowdu fu meki a trow fu en de wan prisiri okasi (1 Timoteyus 2:9; 1 Petrus 3:3, 4). A e gi sma prisiri trutru te den e gi yesi na a rai disi!

David, di wi ben taki fu en kaba, e taki moro fara: „Furu trowpaar e meki muiti fu hori densrefi na Bijbel gronprakseri, èn wi musu prèise den fu di den e du dati. Ma son leisi, a yapon fu den trowmisi èn a di fu den umasma di e waka nanga a trowmisi, no ben fiti, fu di a ben opo tumusi na tapusei, noso fu di yu ben kan si pasa a yapon fu den.” Te wan lepi Kresten owruman e taki nanga a trowmasra èn nanga a trowmisi bifo a trow fu den, dan a abi a gwenti fu yepi den fu kon si sani soleki fa Gado e si den. Fa a e du dati? A e aksi den efu den krosi di den o weri, na krosi di fiti fu weri go na wan Kresten konmakandra. A no de fu taki dati a fasi fa a krosi meki kan difrenti fu den krosi di sma gwenti fu weri go na den konmakandra, èn kande son sma lobi fu weri den krosi di sma fu a kondre dati gwenti fu weri go na wan trow. Ma awansi fa a no fa, a krosi di den e weri musu de krosi di fiti den hei Kresten markitiki. Srefi efu son sma na grontapu e taki dati Bijbel e poti tumusi furu wet gi sma te a abi fu du nanga a fasi fa den musu tyari densrefi, toku tru Kresten e weigri fu tyari densrefi akruderi den denki fu grontapu.—Romesma 12:2; 1 Petrus 4:4.

„Mi nanga Aret no ben e si den krosi noso a trowfesa leki a moro prenspari sani”, na so Penny e taki, „ma na presi fu dati wi poti ala wi prakseri na a pisi fu a trow di abi fu du nanga yeye afersi. Dati ben de a moro prenspari pisi fu a dei. Den prenspari sani di mi e memre fu a dei dati, a no a krosi di mi ben e weri, noso den sani di mi nyan, ma na den sma di ben abi demakandra nanga wi, èn a koloku firi di mi ben abi fu di mi trow nanga a man di mi lobi.” A ben o bun te wan Kresten trowpaar hori den sortu sani disi na prakseri te den e sreka sani gi a trow fu den.

A fiti fu trow na ini a Kownukondre zaal

Furu Kresten trowpaar wani trow na ini a Kownukondre zaal, efu na okasi de fu du dati. Fu san ede den wani dati? Wan trowpaar e taki fu san ede den ben wani dati: „Wi ben frustan taki a trowlibi na wan seti fu Yehovah. Di wi trow na ini a Kownukondre zaal, a presi pe wi e anbegi Gado, dan dati yepi wi fu kon frustan krin na a bigin kaba, taki Yehovah musu de wan pisi fu wi trowlibi. Wan tra reide fu san ede a bun taki wi trow na ini a Kownukondre zaal, na presi fu trow na wan tra presi, na taki den famiriman fu wi di no de na bribi èn di ben kon na a trow fu wi, kon si taki na anbegi di wi e anbegi Yehovah na wan tumusi prenspari sani gi wi.”

Efu den owruman di abi a frantwortu gi a Kownukondre zaal e gi primisi taki a trow hori drape, dan a trowpaar musu taigi den na fesi efu den abi na prakseri fu sreka wan tu sani na ini a zaal. Wan fasi fa a trowmasra nanga a trowmisi kan sori lespeki gi den sma di den kari kon na a trow, na te den e du ala san den man fu de biten na a trow. Èn a no de fu taki dati a trowpaar sa sorgu taki ala sani e waka na wan lespeki fasi (1 Korentesma 14:40).b Na so fasi a trow fu den no sa de leki a di fu den grontapusma di e du sani na wan fasi di no fiti.—1 Yohanes 2:15, 16.

Den sma di de na a trow kan sori tu taki den e si a trowlibi soleki fa Yehovah e si en. Fu eksempre, den no sa fruwakti taki a trow dati kefalek moro leki tra Kresten trow, neleki na strei sma e strei nanga makandra. Lepi Kresten e frustan tu taki a moro prenspari èn taki a abi moro wini fu de na a trowlezing di e hori na ini a Kownukondre zaal, leki fu de na a trowfesa noso a prisiri demakandra di e hori baka dati. Efu wan Kresten man go na soso wán fu den tu okasi disi, dan a no de fu taki dati a moro bun fu go na a Kownukondre zaal. William di de wan owruman, e taki: „Efu den fisitiman no de na a Kownukondre zaal sondro taki wan reide de gi dati, ma den de na a trowfesa di e hori baka ten, dan dati e sori taki den no e warderi a santafasi fu na okasi disi. Srefi efu wi no kisi wan kari fu kon na a trow-oso, toku wi kan go na a Kownukondre zaal pe den tu sma e trow, fu horibaka gi a trowmasra nanga a trowmisi èn fu gi wan bun kotoigi na den famiriman fu den di no de na bribi.”

Sma kan de nanga prisiri ete baka a trowdei

Na ini a grontapu disi, sma e meki furu moni nanga a trow di trawan e trow. Wan raportu di meki no so langa pasa e sori taki nofo tron „den kostu di sma musu pai te den o trow na ini Amerkankondre, na 22.000 Amerkan dala, noso afu fu a moni di den Amerkan e wroko na ini wán yari”. Furu sma di trow no so langa ete, noso den famiriman fu den, gi pasi taki reklame abi krakti na den tapu, èn na so a du kon taki fu a wán dei dati den meki bigi paiman di kan teki furu yari fu pai. A de wan koni sani fu bigin a trowlibi na so wan fasi? Den sma di no sabi noso di no e broko den ede nanga Bijbel gronprakseri, kan bosroiti fu meki den bigi paiman dati, ma nanga tru Kresten a de heri tra fasi!

Furu Kresten trowpaar hori wan pikin trow-oso so taki den abi nofo moni fu pai gi den kostu fu dati, èn den poti moro prakseri na a pisi fu a trow di abi fu du nanga yeye afersi. Na so den ben man gebroiki a ten nanga a moni fu den na wan fasi di e sori taki den gi densrefi abra na Gado (Mateyus 6:33). Luku na eksempre fu Lloyd nanga Alexandra, di de na ini a furuten diniwroko 17 yari kaba, sensi den trow. Lloyd e taki: „Kande son sma feni taki tumusi furu pranpran no ben de na a trow fu wi, ma mi nanga Alexandra ben breiti srefisrefi taki sani waka so. Wi no ben wani a trowdei fu wi fu de wan hebi fu di wi meki furu paiman, ma na presi fu dati a ben musu de wan okasi fu sori taki wi e gi grani na a seti di Yehovah poti so taki tu sma kan de koloku trutru.”

Alexandra e taki moro fara: „Mi ben e pionier bifo wi trow, èn mi no ben wani tapu nanga a spesrutu grani disi, soso fu abi wan bigi trow. A trowdei fu wi ben de heri aparti. Ma a dei disi ben de a bigin nomo fu a libi di wi ben o libi nanga makandra leki masra nanga wefi wi heri libi langa. Wi teki a rai fu no poti tumusi furu prakseri na a trowdei fu wi, ma wi suku a tiri fu Yehovah na ini a libi fu wi leki trowpaar. Iya, a sani disi meki taki Yehovah blesi wi trutru.”c

Iya, a trowdei fu yu na wan spesrutu okasi. A fasi fa yu e tyari yusrefi a dei dati, èn sosrefi den sani di yu e du, kan sori fa yu nanga yu trowpatna o tyari unsrefi na ini a ten di e kon. Fu dati ede, abi a frutrow taki Yehovah sa tiri yu (Odo 3:5, 6). A moro prenspari sani di yu musu hori na prakseri fu a dei dati, na a pisi di abi fu du nanga yeye afersi. Un musu horibaka gi makandra leki trowpaar te unu e teki a frantwortu na un tapu di Gado gi unu. Na so fasi yu kan bigin a trowlibi fu yu na a yoisti fasi, èn te Yehovah blesi yu, dan yu sa de nanga prisiri furu yari baka a trowdei fu yu.—Odo 18:22.