Ala Kresten na trutru Kresten?

OMENI Kresten de na grontapu? Soleki fa wan buku e taki, dan na ini 2010 pikinmoro 2,3 milyard Kresten ben de na heri grontapu (Atlas of Global Christianity). Ma a srefi buku e taki tu dati den Kresten dati de na ini moro leki 41.000 difrenti sortu Kresten kerki. Ibriwan fu den kerki disi abi en eigi leri nanga wèt di e sori sma fa den musu tyari densrefi. Fu di someni difrenti sortu Kresten kerki de, meki wi kan frustan taki son sma e bruya èn taki den no lobi a situwâsi dati srefisrefi. Kande den e aksi densrefi efu ala Kresten na trutru Kresten.

Meki wi luku a tori na wan tra fasi. Nofo tron, wan sma di e go na wan tra kondre, musu man sori douane fu sortu kondre a de èn a musu abi papira noso paspoort fu sori suma na en. Na so a de tu taki wan tru Kresten no musu taki nomo dati a e bribi na ini Krestes. A musu man sori dati tu. Na sortu fasi a musu du dati?

Sma bigin gebroiki a wortu „Kresten” syatu baka a yari 44. A Bijbel historia skrifiman Lukas ben skrifi: „A fosi leisi di Gado meki sma kari den disipel Kresten, ben de na Antiokia” (Tori fu den apostel 11:26). Den Kresten ben de disipel fu Krestes. Ma o ten wi kan taki dati wan sma na wan disipel fu Yesus Krestes? Wan buku e taki: „Te wan sma na wan disipel fu Yesus, dan dati wani taki dati a gi [en] heri libi abra na en . . . èn a du dati dorodoro, nanga en heri ati” (The New International Dictionary of New Testament Theology). Fu dati ede, wan tru Kresten na wan sma di e gi yesi na den leri nanga den rai fu Yesus di seti a Kresten bribi, a e du dati dorodoro èn nanga en heri ati.

Den sortu sma disi de fu feni na ini a ten disi? Fa sma ben o kon sabi suma na den trutru bakaman fu Yesus? San Yesus srefi ben taki? Wi e gi yu deki-ati fu luku sortu piki Bijbel e gi tapu den aksi disi. Na ini den artikel di e kon, wi o poti prakseri na feifi sani di Yesus ben taki fu den bakaman fu en, fu yepi wi fu kon sabi suma na den. Wi o luku fa den Kresten fu a fosi yarihondro ben sori taki den ben de trutru Kresten. Wi o luku sortu Kresten grupu na ini a ten disi e du san Krestes e taki.

„Tan du den sani di mi taki”

„Efu unu tan du den sani di mi taki, dan unu na mi disipel trutru. Unu o sabi san tru èn dati o meki unu kon fri.”​—YOHANES 8:31, 32.

San disi wani taki? Den ’sani di Yesus ben taki’, na den sani di a ben e leri sma èn di ben e kon fu wan sma di hei moro en. „A Tata di seni mi kon, taigi mi san mi musu taki èn san mi musu leri sma”, na so Yesus ben taki (Yohanes 12:49). Di Yesus ben e begi en hemel Tata, Yehovah Gado, dan a taki: „Yu wortu e taki san tru.” A ben gwenti gebroiki Gado Wortu te a ben e gi leri (Yohanes 17:17; Mateyus 4:4, 7, 10). Fu dati ede, tru Kresten e ’tan du den sani di a taki’. Iya, den e si a Wortu fu Gado, Bijbel, leki wan buku di e taki „san tru” èn leki a wan-enkri buku di e sori den san den musu bribi èn fa den musu tyari densrefi.

Fa a ben de nanga den fosi Kresten? Na apostel Paulus di skrifi furu fu den Bijbel buku, ben abi lespeki tu gi Gado Wortu, neleki Yesus. A ben skrifi: ’Na Gado srefi ben meki sma skrifi ala den sani di de na ini Gado Buku, èn den sani disi bun’ (2 Timoteyus 3:16). Den man di ben kisi a frantwortu fu gi den Kresten leri, ben musu ’hori densrefi finifini na a wortu di tru’ (Titus 1:7, 9). Den fosi Kresten ben kisi a rai fu wai pasi gi ’soso takitaki di e bedrigi sma, fu di den sani disi no abi noti fu du nanga den leri fu Krestes, ma nanga den gwenti fu libisma èn nanga den sani di e tiri grontapu’.​—Kolosesma 2:8.

Suma e du a sani dati na ini a ten disi? Wan buku fu a Lomsu kerki e taki: „A Lomsu Kerki no e luku nomo san den Santa Buku fu Bijbel e taki fu kon sabi efu ala den sani di kon na krin de so trutru. Sobun, a srefi lespeki di sma abi gi den Santa Buku fu Bijbel, den musu abi tu gi den gwenti di wi e si leki santa sani.” Wan artikel na ini a tijdschrift Maclean’s ben e taki fu wan domri na ini Toronto, Kanada, di ben aksi: „Fu san ede wi musu meki wan denki fu 2000 yari pasa tiri wi fu du sani tra fasi? Wi abi wi eigi moi denki, ma wi e meki den lasi krakti doronomo te wi e luku efu den e kruderi nanga san Yesus noso Bijbel e taki.”

Wan buku e taki fu Yehovah Kotoigi: „Den e si Bijbel leki a wan-enkri buku di musu sori den san den musu bribi èn fa den musu tyari densrefi” (New Catholic Encyclopedia). No so langa pasa, wan Kotoigi sisa na ini Kanada ben wani taigi wan man drape suma na en. Ne a man koti en mofo èn a taki: „Mi sabi suma na yu,” aladi a sori go na a Bijbel fu en, „mi si a Bijbel fu yu”.

„Den no de wan pisi fu grontapu”

„Grontapu e teige den, fu di den no de wan pisi fu grontapu.”​—YOHANES 17:14.

San disi wani taki? Fu di Yesus no ben de wan pisi fu grontapu, meki a no ben e teki sei na ini politiek èn na ini den kesekese di ben de na mindri sma. A ben taki: „Efu mi kownukondre ben de fu a grontapu disi, dan den dinari fu mi ben o feti, so taki den Dyu no ben o kisi mi. Ma soleki fa mi taki kaba, mi kownukondre no de fu a grontapu disi” (Yohanes 18:36). A gi den bakaman fu en a rai tu fu no denki, fu no taki, èn fu no tyari densrefi na wan fasi di Gado Wortu e krutu.​—Mateyus 20:25-27.

Fa a ben de nanga den fosi Kresten? Jonathan Dymond, wan skrifiman fu kerkitori, ben taki dati den fosi Kresten „ben e weigri fu teki prati na [orloku], awansi sma ben e kosi den, awansi sma ben o poti den na strafu-oso, noso awansi sma ben o kiri den”. Den ben e weigri fu teki sei, awansi den ben o nyan pina. Fu di den ben e hori densrefi na bun markitiki, meki den ben de heri tra fasi leki tra sma. Petrus ben taigi den Kresten: „Fu di unu no e waka moro nanga den fu go libi a srefi fisti yayo libi, meki den e fruwondru èn den e taki ogri fu unu” (1 Petrus 4:4). Historia skrifiman Will Durant ben skrifi taki „den sma di ben e anbegi falsi gado èn di ben lobi meki prisiri, ben e fruferi fu den [Kresten] fu di den ben e anbegi Gado fayafaya èn fu di den ben e tyari densrefi na wan fasi di fiti”.

Suma e du a sani dati na ini a ten disi? Luku san wan buku e taki fu a gwenti di Kresten abi fu no teki sei na ini politiek: „A no fiti te wan sma e weigri fu waka nanga fetisani” (New Catholic Encyclopedia). Wan artikel ben sori taki wan organisâsi di e feti gi den reti fu sma na ini Afrika (African Rights), ben meki wan raportu fu a kiri di sma kiri ipi-ipi trawan na ini Rwanda na ini 1994. A raportu dati ben sori taki ala kerki ben de na ini a tori, „boiti Yehovah Kotoigi” (Reformierte Presse).

Wan man di e gi leri na skoro ben kragi taki „nowan grupu noso organisâsi ben krutu a lei di sma ben e lei, den ogri-ati sani di sma ben e du, nanga den tumusi takru sani di pasa leki bakapisi fu dati”. Baka di a taki nanga sma fu a United States Holocaust Memorial Museum, dan a skrifi: „Now mi sabi san pasa trutru.” A kon sabi taki Yehovah Kotoigi ben e tai hori na a bribi fu den, aladi sma ben du furu takru sani nanga den.

Fa a de nanga a fasi fa den e tyari densrefi? Wan tijdschrift e taki: „Furu yongu sma fu a Lomsu Kerki no e agri nanga den kerkileri di e taki dati tu sma no mag libi nanga makandra sondro fu trow èn taki sma no mag abi seks fosi den trow” (U.S. Catholic). A tijdschrift e sori san wan kerki fesiman ben taki: „Bun furu yongu sma, mi denki moro leki 50 procent, e libi kaba nanga wan patna fosi den trow.” Wan buku e taki dati Yehovah Kotoigi „de nomonomo fu hori densrefi na hei markitiki te a abi fu du nanga a fasi fa den e tyari densrefi” (The New Encyclopædia Britannica).

’Un musu lobi makandra’

„Mi e gi unu wan nyun komando, taki un musu lobi makandra. Neleki fa mi lobi unu, na so un musu lobi makandra tu. Na a fasi disi ala sma o sabi taki unu na mi disipel, te unu lobi makandra.”​—YOHANES 13:34, 35.

San disi wani taki? Krestes ben taigi den bakaman fu en fu lobi makandra neleki fa a ben lobi den. Fa Yesus ben sori taki a lobi den? A ben lobi ala sortu sma, aladi sma na ini a ten fu en ben e desko sma fu tra kondre èn sosrefi umasma (Yohanes 4:7-10). Fu di Yesus ben abi lobi, meki a gi en ten nanga en krakti fu yepi trawan èn a no suku en eigi bun (Markus 6:30-34). Te fu kaba, Krestes sori lobi na a moro bun fasi di de. A ben taki: „Mi na a moro bun skapuman. A moro bun skapuman e gi en libi gi den skapu fu en.”​—Yohanes 10:11.

Fa a ben de nanga den fosi Kresten? Na ini a fosi yarihondro, Kresten ben e kari makandra „brada” noso „sisa” (Fileimon 1, 2). Sma fu ala ras ben kan kon na ini a Kresten gemeente, fu di den Kresten ben e bribi taki „nowan difrenti de na mindri Dyu nanga Grikisma, bika den alamala abi a srefi Masra” (Romesma 10:11, 12). Baka a Pinksterfesa fu a yari 33, den disipel na ini Yerusalem „ben e seri den gron fu den èn ala sani di den ben abi, dan den prati a moni nanga makandra, so taki ibriwan fu den ben kan kisi san a ben abi fanowdu”. Fu san ede den ben du dati? Den ben du dati so taki den nyun sma di ben teki dopu ben kan tan na ini Yerusalem èn ben kan tan „poti prakseri na den leri fu den apostel” (Tori fu den apostel 2:41-45). San ben meki taki den yepi den trawan? Baka di den apostel dede, 200 yari no ben pasa ete di Tertulianus skrifi san trawan ben taki fu Kresten: „Den lobi makandra trutru . . . èn den de klariklari srefi fu dede gi makandra.”

Suma e du a sani dati na ini a ten disi? Wan buku e taki dati na ini den hondrohondro yari di pasa, sma di e kari densrefi Kresten, „du moro ogri sani nanga makandra, leki den ogri di sma di no e bribi na ini Gado du nanga den” (The History of the Decline and Fall of the Roman Empire, 1837). Wan ondrosuku di sma ben du no so langa pasa na ini Amerkankondre e sori taki furu sma di e taki dati den e anbegi Gado, no lobi sma fu tra ras, èn furu fu den sma disi e kari densrefi Kresten. Nofo tron kerki sma fu a wan kondre no abi noti fu du nanga sma fu tra kondre di de fu a srefi bribi leki den, èn den no de klariklari fu yepi den tra sma dati te den de na nowtu.

Na ini 2004, bigi winti wai sowan fo leisi na ini tu mun ten na ini Florida. Baka dati, na amra-basi fu wan komte na ini Florida di e sorgu taki sma di de na nowtu e kisi yepi, luku fu si efu sma ben e gebroiki den sani di den ben e kisi na wan yoisti fasi. A ben taki dati nowan enkri tra grupu ben orga so bun leki den Yehovah Kotoigi, èn a taki tu dati a ben o gi den iniwan sani di den ben abi fanowdu. Wan pisi ten na fesi, na ini 1997, wan grupu Yehovah Kotoigi go na a Demokrasia Republiek Kongo fu yepi Kresten brada nanga sisa, nanga tra sma drape di ben de na nowtu. Kotoigi na ini Europa ben tyari sani kon na wán gi den brada drape èn den sani dati ben warti wán milyun Amerkan dala.

„Mi meki den kon sabi yu nen”

„Mi meki den sma di yu puru na ini grontapu èn di yu gi mi, kon sabi yu nen. . . . Mi meki den kon sabi yu nen èn mi o tan fruteri den fu yu nen.”​—YOHANES 17:6, 26.

San disi wani taki? Yesus ben meki sma kon sabi a nen fu Gado, fu di a gebroiki a nen dati na ini a preikiwroko fu en. Te Yesus ben e leisi den Santa Buku, soleki fa a ben gwenti, dan a no de fu taki dati a ben e leisi a nen fu Gado tu (Lukas 4:16-21). A ben leri den bakaman fu en fu begi: „Tata, meki yu nen kon santa.”​—Lukas 11:2.

Fa a ben de nanga den fosi Kresten? Na apostel Petrus ben fruteri den owru man na Yerusalem taki Gado ben puru wan pipel na mindri sma fu ala kondre, fu „tyari en nen” (Tori fu den apostel 15:14). Den apostel nanga tra Kresten ben e preiki taki „ibri sma di e kari a nen fu Yehovah o kisi frulusu” (Tori fu den apostel 2:21; Romesma 10:13). Den gebroiki a nen fu Gado tu na ini den buku di den ben skrifi. Luku san wan buku nanga Dyu wèt, di skrifi na a ten fu a yari 300, e taki fu a bron di gensman ben e bron den buku di den Kresten ben skrifi: „Den buku fu den Evangelie preikiman nanga den buku fu den minim [sma e denki taki den ben de Dyu Kresten] den no e kibri gi a faya. Den e libi den na ini a faya meki den bron . . . makandra nanga ala den difrenti presi pe a Nen fu Gado skrifi” (The Tosefta).

Suma e du a sani dati na ini a ten disi? Den biginwortu fu wan Bijbel di wan kerki organisâsi na ini Amerkankondre tyari kon na doro, e taki: „Fosi a ten fu den Kresten, den sma fu a Dyu bribi tapu fu gebroiki a nen fu Gado, fu di te sma ben o gi a wan-enkri Gado wan nen, dan a ben o gersi leki tra gado de tu. Boiti dati, a no fiti srefisrefi taki den Kresten bribi na heri grontapu e gebroiki a nen dati” (Revised Standard Version). Dati meki den puru a nen fu Gado, èn den poti a wortu „MASRA” na ini a presi fu en. No so langa pasa, a Vatikaan taigi den beskopu fu en a sani disi: „Sma no mag gebroiki a nen fu Gado di e skrifi nanga den Hebrew letter YHWH,a na ini singi noso begi.”

Suma na ini a ten disi e gebroiki a nen fu Gado èn suma e meki sma kon sabi a nen dati? Di Sergey ben de wan tini na ini Kirgistan, a ben luku wan felem di ben e sori taki a nen fu Gado na Yehovah. Sowan tin yari langa a no ben yere a nen fu Gado moro. Bakaten, di Sergey ben froisi go tan na Amerkankondre, tu Kotoigi fu Yehovah kon na en oso èn den sori en a nen fu Gado na ini Bijbel. Sergey ben breiti srefisrefi taki a ben feni sma di e gebroiki a nen fu Yehovah. A moi fu sabi taki wan wortubuku pe den wortu „Yehovah Gado” skrifi na ini, e taki dati disi na „wan almakti gado èn sosrefi a wan-enkri Gado di Yehovah Kotoigi e anbegi” (Webster’s Third New International Dictionary).

[Futuwortu]

„A bun nyunsu disi fu a Kownukondre o preiki gi sma”

„A bun nyunsu disi fu a Kownukondre o preiki gi sma na heri grontapu, so taki sma fu ala kondre kan yere dati, èn dan a kaba o kon.”​—MATEYUS 24:14.

San disi wani taki? Na Evangelie skrifiman Lukas ben skrifi taki Yesus „bigin go na ala den foto nanga den dorpu fu preiki a bun nyunsu fu Gado Kownukondre èn fu fruteri ala sma disi” (Lukas 8:1). Yesus srefi ben taki: „Mi musu go fruteri a bun nyunsu fu Gado Kownukondre na tra foto tu, bika na fu disi Gado ben seni mi kon” (Lukas 4:43). A seni den disipel fu en fu preiki a bun nyunsu na ini den foto nanga den dorpu, èn bakaten a taigi den: „Unu sa de kotoigi fu mi . . . te na den moro farawe presi fu grontapu.”​—Tori fu den apostel 1:8; Lukas 10:1.

Fa a ben de nanga den fosi Kresten? Den disipel fu Yesus no ben draidrai fu du san Yesus ben taigi den. „Ibri dei den ben e gi sma leri doronomo na ini a tempel èn na ibri oso. Den ben e fruteri sma a bun nyunsu fu Yesus, a Krestes” (Tori fu den apostel 5:42). A no wan pikin grupu prenspari sma nomo ben e du a preikiwroko. A historia skrifiman Neander ben taki dati „Celsus, a fosi sma di ben skrifi takru sani fu a Kresten bribi, ben e lafu a tori taki sma di ben e meki sani fu skapu-wiwiri, sma di ben e meki susu, sma di ben e meki sani fu leribuba, sma di no ben sabi leisi noso skrifi, iya, srefi den moro lawlaw sma ben e preiki a bun nyunsu fayafaya.” Na ini a buku fu en, Jean Bernardi ben skrifi: „[Den Kresten] ben musu go na ala presi fu taki nanga ala sma. Den ben musu go na den bigi pasi èn na ini den foto, na den pren èn na sma oso. Awinsi sma ben wani arki den, noso awinsi sma no ben wani yere noti fu den. . . . Den ben musu go na den moro farawe presi fu grontapu” (The Early Centuries of the Church).

Suma e du a sani dati na ini a ten disi? „Wan fu den sani di meki taki so furu sma na ini a ten disi no wani yere noti fu Gado, na taki kerki no e si en leki wan seryusu sani fu preiki èn fu gi sma leri”, na so David Watson, wan priester fu na Anglikan Kerki ben taki. Na ini a buku fu en, José Luis Pérez Guadalupe, ben skrifi fu a wroko di sma fu den Evangelie Kerki, den Adventist Kerki, èn fu tra kerki e du. A taki dati „den no e preiki oso fu oso”. A ben taki fu Yehovah Kotoigi: „Den seti sani fu go oso fu oso doronomo” (Why Are the Catholics Leaving?)

Jonathan Turley ben taki wan moi sani na ini a buku di nen Cato Supreme Court Review, 2001-2002. A ben taki: „Efu yu taki nomo fu Yehovah Kotoigi, dan wantewante sma e prakseri preikiman di e go na sma oso na den moro fruferi yuru. Gi Yehovah Kotoigi, a wroko di den e du fu go oso fu oso fu meki bakaman, no de nomo fu panya a bribi fu den, ma a wroko dati prenspari srefisrefi gi den eigi bribi.”

[Faki na tapu bladzijde 9]

Suma e du den sani disi?

Te yu e luku den buweisi fu Bijbel di wi tyari kon na fesi na ini den artikel disi, dan suma na ini a ten disi e libi soleki fa tru Kresten musu libi? Aladi dusundusun difrenti kerkigrupu de di e kari densrefi Kresten, toku wi musu hori na prakseri taki Yesus ben taigi den bakaman fu en: „A no ala sma di e taigi mi: ’Masra, Masra’, o go na ini a Kownukondre fu hemel. Ma na a sma di e du a wani fu mi Tata na hemel o go na ini” (Mateyus 7:21). Te wi kon sabi suma e du a wani fu a Tata, sobun te wi kon sabi suma na den wan di abi a tru Kresten bribi, èn te wi abi demakandra nanga den, dan dati kan meki wi kisi têgo blesi te Gado Kownukondre e tiri. Wi e gi yu wan kari fu aksi Yehovah Kotoigi, den sma di gi yu a tijdschrift disi, fu fruteri yu moro fu Gado Kownukondre èn fu den blesi di wi o kisi.​—Lukas 4:43.