San na bonu nanga wisi trutru?

1. A de so taki furu sma e bribi na ini sani soleki bonu nanga wisi?

„NA INI Afrika a de wan law sani fu aksi sma efu bonu na wan trutru sani”, na so wan buku e taki. A e taki sosrefi dati „iniwan Afrikansma, awinsi sortu posisi a abi, den alamala e bribi taki bonu na wan trutru sani di prenspari srefisrefi” (African Traditional Religion). Awinsi wan sma no go na skoro, noso awinsi a kisi hei skoroleri, toku a e bribi na ini sani soleki bonu nanga wisi. Yu abi Islam fesiman nanga Kresten fesiman di e bribi na ini den sani disi tu.

2. Fu pe a krakti fu man bonu e komoto, soleki fa furu sma e denki?

² Furu sma na ini Afrika e bribi taki wan freimde yeye krakti de na den lontu, di libisma no man frustan. Den e taki dati Gado e basi a krakti disi. Den yeye nanga den afo kan gebroiki a krakti disi. Son libisma sabi fa fu kisi pikinso fu a krakti disi tu, èn den e gebroiki dati fu du bun, noso fu du ogri.

3. San na wisi èn san a kan du, soleki fa sma e bribi?

³ Nofo tron sma e gebroiki wisi fu du ogri nanga den feanti fu den. Soleki fa sma e bribi, dan wisiman abi a makti fu seni fremusu, fowru, sneki, nanga tra meti fu du ogri nanga trawan. Na furu presi, sma e bribi taki wisi kan meki taki wan sma go feti nanga trawan, taki a no man kisi pikin, taki a e siki, èn taki a dede srefi.

4. San furu sma e bribi taki wisiman noso bonuman kan du, èn fu san ede den e bribi dati?

⁴ Na furu presi na ini Afrika, sma e bribi trutru taki wan libisma kan kenki kon tron wan meti. Nofo tron den e bribi taki wisiman noso bonuman abi a makti fu kenki densrefi tron tigri, noso aboma-sneki. Na ala sei sma e frede tu taki wan wisiman noso wan bonuman kan kenki trawan kon tron meti. Na a westsei fu Afrika, sma e bribi taki wisiman noso bonuman kan poti a yeye fu wan sma na ini wan fowru, noso na ini wan tra meti, so taki a meti dati e go du wan sma ogri. Furu Afrikansma e taki dati son sma si nanga den eigi ai fa wan trawan kenki tron wan meti. Den e taki dati a sani disi noiti no kan de anansitori, fu di furu sma nanga krinkrin frustan fruteri taki den si den sani disi.

5. Fu san ede son sma e bonu, èn san den sma disi gwenti du?

⁵ Sma e taki dati son fasi fu bonu na fu kibri sma gi ogri. Nofo tron den sma di e bonu fu kibri densrefi gi ogri, gwenti fu weri linga noso bui di abi spesrutu krakti. Den e dringi spesrutu sortu dresi tu, noso den e lobi dati na den skin. Den e poti spesrutu sortu sani na ini den oso, noso na ini a gron, fu di den e bribi taki den sani dati abi a krakti fu kibri den gi ogri. Den e poti tekst fu a Koran noso fu a Bijbel na ini spesrutu sani di den e weri leki wan tapu na den skin.

Lei nanga bedrigifasi

6. San Satan nanga den ogri yeye fu en du na ini a ten di pasa, èn fa wi musu denki fu a krakti di den abi?

⁶ A tru taki Satan nanga den ogri yeye fu en na feanti di kan du libisma ogri trutru. Den kan abi krakti tapu a frustan èn tapu a libi fu libisma. Na ini a ten di pasa, den ben go na ini libisma nanga meti èn den meki den sma nanga den meti du san den wani (Mateyus 12:43-45). Aladi wi no musu denki taki a krakti fu den na wan lawlaw sani, toku wi no musu denki tu taki den abi krakti pasa marki.

7. San Satan wani wi fu bribi? Gi wan eksempre fu tyari disi kon na krin.

⁷ Satan na a basi fu bedrigifasi. A e kori sma fu meki den denki taki a abi moro krakti leki san a abi trutru. Fu gi yu wan eksempre: No so langa pasa, di feti ben de na ini wan Afrikan kondre, den srudati gebroiki cassette-lolo nanga boksu fu frede den feanti fu den. Fosi den ben e go feti nanga den feanti, dan den ben e drai wan lolo pe yu ben kan yere ala sortu kefalek gon nanga bom e sutu. Den ben wani den feanti fu denki taki wan bigi legre kon feti nanga den nanga ala sortu kefalek gon. Na so a de tu taki Satan wani sma fu bribi taki a abi krakti pasa marki. A wani frede libisma, so taki den kan du san en wani na presi fu du san Yehovah wani. Meki wi luku dri lei now, di Satan wani sma fu bribi.

8. San na wan lei di Satan wani sma fu bribi?

⁸ Wan lei di Satan wani sma fu bribi na disi: Ogri no e miti wan sma somarso; efu a no wan libisma du en, dan a musu de taki na wan freimde sortu krakti du en. Fu eksempre, kon meki wi taki dati wan pikin e dede fu malaria. Kande en mama sabi taki na maskita e tyari a siki disi. Ma kande a e bribi tu taki na wan sma wisi a pikin, so taki a maskita beti en.

9. Fa Bijbel e sori taki a no ala problema e kon fu Satan?

⁹ A tru taki Satan abi a krakti fu meki son problema miti libisma, ma a no yoisti fu denki taki ala problema e kon fu Satan. Bijbel e taki: „A no den esi-esiwan e wini a streilon, èn a no den trangawan e wini a feti, sosrefi a no den koniwan abi a nyanyan, èn a no den wan di abi frustan abi a gudu, èn srefi den wan di abi sabi, a no den wan di trawan feni bun; bika ten nanga sani di e pasa sondro fu sma fruwakti dati, e miti den alamala” (Preikiman 9:11). Kande wan sma na ini wan streilon e lon moro esi leki den trawan, ma a no abi fu de so taki na en o wini a strei. Wan ’sani di a no ben fruwakti’, kan meki taki a lasi a strei. Kande a e stotu en futu, dan a e fadon; kande a e kon siki, noso kande a e drai en futu. Den sortu sani disi kan pasa nanga iniwan sma. A no abi fu de so taki na Satan meki taki wan ogri pasa, noso taki na wisi den wisi wan sma; ogri kan miti iniwan sma na iniwan ten.

10. San sma e taki fu wisiman noso bonuman, èn fa wi du sabi taki disi na wan lei?

¹⁰ Wan di fu tu lei di Satan wani sma fu bribi, na disi: Libisma kan kenki densrefi noso wan tra sma kon tron wan meti fu go du ogri. Ma aksi yusrefi now: ’Efu wan wisiman, noso wan bonuman kan du dati, dan sortu sani e gowe libi en skin fu go na ini wan meti?’ Soleki fa wi ben si kaba, dan a yeye a no wan sani di kan gowe libi a skin fu wan sma. A yeye na a libikrakti di e gi krakti na a skin, ma a yeye fu ensrefi no man du noti sondro a skin. Sosrefi, Yehovah Gado no ben meki libisma na so wan fasi taki den kan kenki densrefi tron meti. A de krin fu frustan taki Gado noiti no kan gi libisma a krakti fu man kenki densrefi tron meti di no abi frustan, bika efu a ben o du dati, dan a ben o handri teige en eigi wet.

11. Fu san ede wi sabi taki wisiman noso bonuman no man gowe libi den skin, èn taki den no man kenki densrefi tron meti? Yu e bribi disi?

¹¹ A sili èn sosrefi a yeye no kan gowe libi a skin fu go du wan sani, awinsi na bun sani noso ogri sani. Sobun, wisiman noso bonuman no man gowe libi den skin, èn den no man kenki densrefi tron meti tu. A no tru taki den e du den sani di den taki dati den man du, noso di den denki taki den du.

12. Fa Satan e meki sma bribi taki den du son sani, aladi dati no tru?

¹² Ma fa a de nanga den ondrofenitori fu sma di ben e bonu wan ten? Satan kan meki sma bribi taki den ondrofeni wan sani, aladi dati no de so. Nanga yepi fu fisyun, Satan kan meki sma denki taki den si, yere, noso du son sani, aladi dati no tru. Na a fasi disi, Satan e pruberi fu meki sma drai baka gi Yehovah èn fu meki den denki taki Bijbel no e taki tru tori.

13. (a) A de so taki son fasi fu bonu bun? (b) San Bijbel e taki fu bonu?

¹³ Wan di fu dri lei na disi: Te wan sma e bonu fu kibri ensrefi gi ogri, dan dati na wan bun sani. Bijbel no e taki dati son fasi fu bonu bun, èn trawan no bun. A e krutu ala sortu fasi fu bonu. Luku sortu wet Yehovah ben gi a pipel Israel fu sani di abi fu du nanga bonu èn fu sma di e bonu:

• „Un no musu bonu.”​—Lefitikus 19:26.

• „Efu wan man noso wan uma de di e wroko gi ogri yeye, noso di e du lukuman-wroko, dan un musu kiri en nomonomo.”​—Lefitikus 20:27.

• „Nowan sma musu de na un mindri . . . di e du bonu noso wan sma di e suku marki fu sabi san o pasa, noso wan towfruman, èn nowan sma di e taki mofo fu wisi wan tra sma, noso wan sma di e suku rai na wrokoman fu den ogri yeye, noso na sma di e du lukuman-wroko.”​—Deuteronomium 18:10-14.

14. Fu san ede Yehovah ben meki wet di e krutu a bonu di sma e bonu?

¹⁴ Den wet disi e sori krin taki Gado no wani en pipel fu bonu. Yehovah ben gi en pipel den wet disi fu di a ben lobi den. A no ben wani taki den frede ala ten èn taki den waka nanga ala sortu kruktu denki. A no ben wani taki ogri yeye kwinsi den.

15. Fa Bijbel e sori taki a krakti fu Yehovah bigi moro a di fu Satan?

¹⁵ Bijbel no e sori finifini san ogri yeye man du èn san den no man du, ma a e sori krin taki a krakti fu Yehovah Gado bigi omeni tron moro a di fu Satan nanga den ogri yeye fu en. Yehovah ben meki taki Satan trowe komoto fu hemel (Openbaring 12:9). Luku sosrefi taki Satan ben aksi primisi fu tesi Yob, èn taki a ben gi yesi di Gado warskow en taki a no ben mag kiri Yob.​—Yob 2:4-6.

16. Na suma wi musu go suku kibri?

¹⁶ Odo 18:10 e taki: „A nen fu Yehovah na wan tranga toren. Na drape a regtfardikiwan e lon go èn e kisi kibri.” Sobun, wi musu go suku kibri na Yehovah. Den futuboi fu Gado no e bribi taki spesrutu sortu dresi noso tapu, kan kibri den gi den ogri di Satan nanga den ogri yeye e du, èn den no e frede tu te wisiman noso bonuman taki mofo fu du den ogri. Den futuboi fu Gado e bribi san Bijbel e taki, namku: „Fu Yehovah en sei, den ai fu en e luku a heri grontapu lontu fu gebroiki a krakti fu en fu a bun fu den sma di lobi en nanga den heri ati.”​—2 Kroniki 16:9.

17. Sortu dyaranti Yakobus 4:7 e gi wi, ma san wisrefi musu du?

¹⁷ Yu kan abi so wan overtoigi tu te yu e dini Yehovah. Yakobus 4:7 e taki: „Fu dati ede, saka unsrefi na Gado ondro; ma kakafutu gi Didibri, èn a sa lon gowe fu unu.” Efu yu e dini a tru Gado èn e saka yusrefi na en ondro, dan yu kan de seiker taki Yehovah sa kibri yu.