Dini Jehovah, no Satan

Wi alamala moesoe teki wan sei. Ofoe wi e dini Jehovah ofoe wi e dini Satan nanga en ogri jeje. Wi no kan doe ala toe. Fa a de wan koni sani foe dini Jehovah!

Jehovah boen

So leki fa wi si, dan den ogri jeje abi prisiri foe gi sma skin-ati èn foe kori den. Jehovah no de so. A lobi libisma neleki fa wan papa e lobi den pikin foe en. En na a Giman foe „ibri boen presenti èn ibri kado di boen dorodoro” (Jakobus 1:17). A no e hori noti san boen a baka gi libisma, srefi awinsi a e kostoe en a moro diri sani. — Efeisesma 2:4-7.

Go prakseri den sani di Jesus, a Manpikin foe Gado, ben doe na grontapoe. A ben meki babawsma taki èn ben meki den breniwan si. A ben dresi gwasiman nanga lanman. A ben poeroe ogri jeje na sma tapoe èn ben dresi ala sortoe siki. Jesus ben wiki srefi den dedewan kon a libi baka nanga a krakti foe Gado. — Mateus 9:32-35; 15:30, 31; Lukas 7:11-15.

Na presi foe froeteri lei foe kori wi, dan ala ten Gado e froeteri waarheid. A no e kori wan sma noiti. — Numeri 23:19.

Tan farawe foe gwenti di no krin

Neleki fa anansititei e hori wan freifrei, na so kroektoe bribi nanga lei e hori miljoenmiljoen sma. Den e frede den dedewan. Den e frede den ogri jeje. Den e broko den ede nanga floekoe, marki foe san o kon, tapoe, nanga obiasani. Bribi nanga gwenti di abi den fondamenti na tapoe den lei foe Satan Didibri tai den hori. No wan foe den sani disi ben kisi den foetoeboi foe Gado hori.

Jehovah de foeroe tron moro makti leki Didibri. Efoe joe e dini Jehovah, a sa kibri joe foe den ogri jeje no doe joe ogri (Jakobus 4:7). Wisi no sa abi krakti na joe tapoe. Foe eksempel, na Nigeriakondre, dri makti bonoeman ben taki den wisiwortoe foe den foe kiri wan Kotoigi foe Jehovah di ben weigri foe gowe libi a foto. Di den wisi no wroko dan wan foe den bonoeman ben kon frede, a ben go na a Kotoigi èn ben begi en pardon.

Efoe den ogri jeje e trobi joe, joe kan kari Jehovah na en nen èn a sa kibri joe (Odo 18:10). Ma efoe joe wani kisi na kibri foe Gado, dan joe moesoe fri joesrefi krinkrin foe ala sani di abi foe doe nanga afkodrei nanga na anbegi foe ogri jeje. Anbegiman foe Gado na a Efeise foe owroeten ben doe dati. Den ben tjari ala den obiaboekoe foe den kon makandra èn ben bron den (Tori foe den Apostel 19:19, 20). Den foetoeboi foe Gado ini a ten disi moesoe doe a srefi. Fri joesrefi foe tapoe, titei „foe ogri no miti joe”, obiasani, obiaboekoe nanga ala tra sani di abi foe doe nanga afkodrei tori.

Anbegi Gado na a troe fasi

Efoe joe wani plisi Gado, dan a no nofo foe gowe libi falsi anbegi nomo èn foe tapoe foe doe ogri sani. Joe moesoe anbegi fajafaja na wan soifri fasi. Bijbel e sori san de fanowdoe foe doe disi:

Kon de wán nanga Jehovah Kotoigi

Satan nanga den ogri jeje abi sma na grontapoe di e leri èn e doe fowtoe sani. Ma Jehovah abi wan pipel toe. Den na Jehovah Kotoigi (Jesaja 43:10). Na a heri grontapoe joe abi moro leki siksi miljoen Kotoigi. Den alamala e doe foeroe moeiti foe doe boen sani èn foe leri sma a waarheid. Ini foeroe kondre joe kan miti den na a Kownoekondre zaal, pe den sa bari joe wan switikon.

A wroko foe den na foe jepi tra sma foe dini Gado. Den sa studeri bijbel nanga joe na joe oso, èn jepi joe foe leri fa foe anbegi Jehovah na a reti fasi. Joe no abi foe pai den foe disi. Den Kotoigi breiti foe leri sma a waarheid, bika den lobi sma èn den lobi Jehovah Gado.