PISI 8

Drai baka gi falsi bribi èn teki a tru bribi

1. Sortu bosroiti di abi fu du nanga na anbegi, sma na ini a ten disi musu teki?

YESUS ben taki: „A sma di no de na mi sei, de teige mi” (Mateyus 12:30). Sobun, efu wi no de na a sei fu Yehovah, dan wi de na a sei fu Satan. Furu sma e denki taki den e anbegi Gado na wan fasi di a feni bun, ma Bijbel e taki dati Satan „e kori sma na heri grontapu” (Openbaring 12:9). Milyunmilyun sma e bribi taki den e anbegi Gado, ma te yu luku en bun, dan na Satan Didibri den e anbegi! Sma na ini a ten disi musu teki wan bosroiti: Den musu anbegi Yehovah, „a Gado fu waarheid”, noso den musu anbegi Satan, „a tata fu ala lei”.—Psalm 31:5; Yohanes 8:44.

Komoto na ini falsi bribi

2. San na wan fasi fa Satan e pruberi fu tapu sma fu anbegi Yehovah?

² A moro koni bosroiti di wan sma kan teki, na fu dini Yehovah, iya, dati na a bosroiti di e meki taki Gado feni wan sma bun. Ma Satan no lobi nowan sma di e dini Gado, èn dati meki a e sorgu taki den e kisi wan lo broko-ede nanga problema. Wan fasi fa a e du disi, na taki a e meki trawan spotu den, noso gens den; kande a e gebroiki mati nanga famiriman srefi fu du disi. Yesus ben warskow: „Iya, den feanti fu wan sma sa de en eigi osofamiri.”—Mateyus 10:36.

3. Te den famiri noso mati fu yu e gens yu fu no anbegi Gado, dan san yu o du?

³ Te a sani disi e pasa nanga yu, dan san yu o du? Furu sma sabi taki den no e anbegi Gado na a yoisti fasi, ma toku den e draidrai fu tapu nanga a fasi fu anbegi disi. Den e denki taki den e drai baka gi den famiri fu den te den du disi. Ma dati na wan yoisti denki? Efu yu ben kon sabi taki wan tu krosibei famiri fu yu ben e gebroiki drugs, dan yu no ben o warskow den taki a drugs kan pori den libi? Yu no ben o go gebroiki a drugs makandra nanga den, a no so?

4. San Yosua ben taigi den Israelsma fu a fasi fu anbegi na ini en ten?

⁴ Yosua ben gi den Israelsma deki-ati fu tapu nanga a falsi anbegi nanga den kruktu gwenti di den afo fu den ben abi. A ben taki: „Now, frede Yehovah èn dini en sondro fowtu èn ini waarheid, èn puru den gado di un afo ben dini na a tra sei fu a Liba èn na Egepte, èn dini Yehovah” (Yosua 24:14). Yosua ben de loyaal na Yehovah èn Yehovah ben blesi en. Efu wi de loyaal na Yehovah, dan a o blesi wi tu.—2 Samuel 22:26.

Kerkileri—San tru èn san no tru

A Dri-wánfasi: Furu kerki e leri sma taki Gado na wan Dri-wánfasi. Den e taki dati „a Tata na Gado, a Manpikin [Yesus] na Gado, èn a Santa Yeye na Gado; toku a no dri Gado de, ma wán Gado nomo”.

Bijbel no e gebroiki a wortu „Dri-wánfasi” srefisrefi, èn a no e leri sma tu taki Yehovah na dri sma na ini wán skin. Yehovah wawan na Gado. Wan Korentesma 8:6 e taki: „Fu taki en leti, wán Gado nomo de gi wi, a Tata.” Yehovah na a Moro Heiwan. Yesus a no Gado, ma en na „a Manpikin fu Gado” (1 Yohanes 4:15). Na so a de tu taki a santa yeye a no Gado. A santa yeye no de wan sma srefi. A de a wroko krakti fu Gado, noso a krakti di Gado e gebroiki fu du sani.—Tori fu den Apostel 1:8; Efeisesma 5:18.
A sili: Furu kerki e leri sma taki a sili na wan sani na ini a skin fu libisma di noiti no kan dede. Bijbel e leri sma taki a sili na a libisma srefi, èn soleki fa wi alamala sabi, wan libisma kan dede.—Genesis 2:7; Esekièl 18:4.
A helfaya: Falsi kerki e leri sma taki den sili fu ogrisma e pina fu têgo na ini hel. Bijbel e taki dati den dedewan „no sabi notinoti” (Preikiman 9:5). Bijbel e leri sma sosrefi taki „Gado na lobi” (1 Yohanes 4:8). Yehovah, a lobi-ati Gado, noiti no o pina sma nanga faya.

A faki: San Bijbel e taki fu a Dri-wánfasi, a sili, nanga a helfaya?

Trowe ala sani di abi fu du nanga falsi anbegi

5. Fu san ede wi musu pori ala bonusani di wi abi?

⁵ Te wi wani komoto na ini falsi bribi, dan disi wani taki tu dati wi musu pori ala bonusani di wi abi, soleki tapu, keti, linga, bui, nanga tra sani di abi fu du nanga bonu. Disi de prenspari fu di dati e sori taki wi e frutrow tapu Yehovah dorodoro.

6. San son Kresten fu a fosi yarihondro du nanga den bonubuku fu den?

⁶ Luku san son Kresten fu a fosi yarihondro ben du di den bosroiti fu teki a tru bribi. Bijbel e taki: „Bun furu fu den sma di ben e du bonuwroko tyari den buku fu den kon na wán èn den bron den na fesi ala sma.”—Tori fu den Apostel 19:19.

7. San wi kan du efu ogri yeye e muilek wi?

⁷ Efu wan sma ben e bonu fosi a bigin dini Yehovah, dan a kan taki ogri yeye o muilek en ete. Efu a sani disi e pasa nanga yu, dan begi Yehovah nanga wan tranga sten èn kari en nen. A o yepi yu trutru.—Odo 18:10; Yakobus 4:7.

8. San Kresten e denki fu popki, prenki, noso tra sani di abi fu du nanga falsi anbegi?

⁸ Den sma di wani dini Yehovah no musu abi nowan popki, nowan prenki, èn nowan tra sani di abi fu du nanga falsi anbegi; den no musu gebroiki den sani dati tu. Tru Kresten „e waka nanga bribi, èn no nanga san [den] e si” (2 Korentesma 5:7). Den e hori densrefi na a wet fu Gado di e sori taki den no mag gebroiki nowan popki, noso tra sani fu anbegi en.—Exodus 20:4, 5.

Abi demakandra nanga a pipel fu Yehovah

9. Sortu rai Bijbel e gi sma di wani kon koni?

⁹ Bijbel e taki: „A sma di e waka nanga konisma, sa kon koni” (Odo 13:20). Efu wi wani kon koni, dan wi musu waka, noso abi demakandra, nanga Yehovah Kotoigi. Disi na den sma di e waka a pasi di e tyari sma go na libi.—Mateyus 7:14.

10. Fa Yehovah Kotoigi kan yepi yu fu dini Gado?

¹⁰ Den Kotoigi e broko den ede trutru nanga tra sma. A wroko fu den, na fu yepi opregtisma fu frustan den tru tori fu Bijbel di e meki taki wan sma kan kisi têgo libi. Den kan yepi yu tu, fu di den o studeri Bijbel nanga yu, sondro taki yu abi fu pai gi dati. Den sa gi piki tapu den aksi fu yu èn den sa sori yu fa yu kan gebroiki a sabi fu Bijbel na ini yu libi.—Yohanes 17:3.

11. Fa den Kresten konmakandra kan yepi yu?

¹¹ Na den konmakandra fu den Kotoigi, di den gwenti fu hori na ini wan Kownukondre zaal, yu o leri moro fu den pasi fu Yehovah. Yu o angri moro nanga moro fu anbegi Gado na a yoisti fasi. Yu o leri tu fa fu yepi trawan fu kon sabi den tru tori fu Bijbel.—Hebrewsma 10:24, 25.

12. Fa begi kan yepi yu fu dini Gado?

¹² A no de fu taki, dati o moro yu e kon sabi a wani fu Yehovah nanga den sani di a abi na prakseri, o moro yu o kon frustan èn warderi den lobi-ati fasi fu en. Wan tra sani, na taki yu o wani plisi Yehovah trutru èn yu o wani wai pasi gi sani di a no feni bun. Memre taki yu kan begi Yehovah fu yepi yu fu du sani di bun èn fu no du sani di no bun.—1 Korentesma 6:9, 10; Filipisma 4:6.

13. Fa yu kan meki Yehovah ati prisiri?

¹³ Baka wan pisi ten, te yu e gro na yeye fasi, dan seiker yu sa si o prenspari a de fu gi yusrefi abra na Yehovah èn fu teki dopu leki wan Kotoigi fu en. Te yu kon de wan memre fu a pipel fu Yehovah, dan yu o meki Yehovah ati prisiri srefisrefi (Odo 27:11). Yu sa de wan fu den koloku sma fu suma Gado e taki: „Mi sa tan na den mindri èn mi sa waka na den mindri, èn mi sa de a Gado fu den, èn den sa de a pipel fu mi.”—2 Korentesma 6:16.

Mi kon fri fu den ogri yeye

Wan neti di mi nanga mi masra ben de na bedi e sribi, mi yere wan sten kari mi nen dri leisi. Ne mi si a plafon e prati na tu, èn wan bal fu faya fadon na tapu mi bere. A no de fu taki dati mi masra no ben si nowan fu den sani disi. Ma toku, wan tu mun langa mi ben e firi wan faya e bron mi.

Baka siksi mun, a sten kari mi baka. Wantronso a ben gersi leki a heri oso de na ini dipi watra. Ne wan bigi aboma-sneki komoto na ini a watra èn a lolo ensrefi na mi anu. Mi ben e feti fu seki en puru na mi anu. Mi ben frede te fu dede. Dan wantronso a watra nanga a sneki no ben de moro, èn wan sani trowe mi bun tranga na gron. Wan tu yuru langa mi ben flaw. Ne a sten taigi mi fu go baka na wan bonukampu na ini a dorpu pe mi ben e tan. Di mi aksi a yeye san na en nen, a kari wan nen di wani taki „a wan di abi furu gudu, ma nowan pikin”. A ben pramisi mi taki a ben o meki mi kon gudu fu di a ben o gi mi a krakti fu man dresi sma.

Fu ala sei, sikisma ben e kon na mi. Fosi wan sikisma doro mi oso, mi ben kan si en kaba na ini wan spesrutu spikri. Te a siki sma ben doro mi oso, dan mi ben e naki mi anu na tapu di fu en, èn wantronso mi ben sabi san ben e du en èn sortu dresi mi ben musu gi en. A yeye ben e taigi mi tu omeni moni den sma ben musu pai.

Mi ben e kisi bun furu moni nanga tra sani, fu di den dresi fu mi ben e wroko bun. Iya, mi ben tron wan ’sma di abi furu gudu’, ma mi ben sabi sosrefi san a wani taki fu no abi „nowan pikin”. Ibri tron te mi ben kisi wan pikin, a wan na en fesi ben e dede. A sani disi ben meki mi firi brokosaka srefisrefi. Na ini den 12 yari di mi ben e dini a yeye disi, siksi pikin fu mi dede.

Mi bigin begi Gado fu yepi mi. Mi ben e begi fayafaya. Ne wan dei Yehovah Kotoigi naki na mi doro. Mi ben gwenti fu yagi den sma disi gowe, ma a dei dati mi bosroiti fu arki den. Den takimakandra di wi ben abi, meki mi kon frustan taki mi ben e dini wan ogri yeye! Sobun, mi teki a bosroiti fu tapu nanga ala sani di abi fu du nanga ogri yeye.

Di mi taigi a yeye taki mi no o dini en moro, a warskow mi taki problema o kon. Ma mi taigi en: „Mi kaba nanga yu.”

Mi bron ala den sani di mi ben e gebroiki fu dini en. Mi studeri Bijbel nanga den Kotoigi, mi tron wan futuboi fu Yehovah, èn mi teki dopu na ini 1973. Now mi abi feifi gosontu pikin. A masra fu mi tron wan dopu Kotoigi tu.—Soleki fa Josephine Ikezu fruteri.

A faki: Fa wan uma kon fri fu ogri yeye?