Wai Pasi gi Falsi Bribi!

Satan nanga den ogri yeye fu en no wani taki yu e dini Gado. Den wani puru ala sma na Gado efu den man. Fa den e pruberi fu du disi? Wán fasi de nanga falsi bribi (2 Korentesma 11:13-15). Wan bribi falsi te a no e leri sma a waarheid fu Bijbel. Falsi bribi de neleki falsi moni — a kan gersi trutru moni, ma a no warti notinoti. A kan tyari bun furu problema kon gi yu.

Bribi di e lei, noiti no kan plisi Yehovah, a Gado fu waarheid. Di Yesus ben de na grontapu, dan wan kerki ben de di ben wani kiri en. Den ben prakseri taki na anbegi fu den ben de a yoisti wan. Den ben taki: „Wi abi wán Tata, Gado.” Yesus ben agri? Nôno! A ben taigi den: „Unu na fu un tata Didibri” (Yohanes 8:41, 44). Na ini a ten disi furu sma e prakseri taki den e anbegi Gado. Ma te yu luku en bun dan den e dini Satan nanga den ogri yeye fu en!​—1 Korentesma 10:20.

Neleki fa wan bon di pori e meki takru froktu, na so falsi bribi e meki sma di e du takru sani. Na fu den takru sani di sma e du ede, meki grontapu lai problema. Sma no e libi akruderi bun gwenti nanga wet. Den e feti, den e fufuru. Sma e kwinsi trawan, sma e kiri trawan, èn sma e dwengi trawan fu abi seks nanga den. Furu sma di e du den takru sani disi abi wan bribi, ma a bribi fu den no e meki den du san bun. Den kan de Gado mati nomo te den e tapu fu du takru sani.​—Mateus 7:17, 18.

Falsi bribi e leri sma fu begi kruktu gado. Gado e taki dati wi no musu begi kruktu gado. Dati na wan bun sani. Yu ben o lobi en te wan sma noiti no ben taki nanga yu, ma a ben taki soso nanga a fowtow fu yu? A sma ben kan de wan trutru mati fu yu? Nôno, a no ben kan de yu mati. Yehovah wani meki sma taki nanga en, no nanga wan popki noso wan fowtow, di no abi libi.​—Exodus 20:4, 5.

Falsi bribi e leri taki a bun fu kiri trawan te feti de. Yesus ben taki dati den mati fu Gado ben o lobi makandra. Wi no e kiri sma di wi lobi (Yohanes 13:35). A no bun srefi fu kiri takru sma. Di den feanti fu Yesus ben kon fu teki en go sroto, dan a no ben meki den disipel fu en feti gi en meki den feanti dati no ben man du en ogri.​—Mateus 26:51, 52.

Falsi bribi e leri sma taki den ogri sma sa pina na ini wan faya hel. Ma Bijbel e leri taki sondu e tyari wi go dede (Romesma 6:23). Yehovah na wan Gado fu lobi. Wan Gado di lobi wi, ben o pina sma fu têgo? Kwetikweti! Na ini Paradijs, soso wán bribi sa de, a wan di Yehovah feni bun (Openbaring 15:4). No wan bribi di gron na tapu den lei fu Satan sa de moro.