Fa fu Feni a Tru Bribi

Efu yu wani de wan mati fu Gado, dan yu musu libi akruderi a bribi di Gado feni bun. Yesus ben taki dati „den tru anbegiman” ben o anbegi Gado akruderi „waarheid” (Yohanes 4:23, 24). Wán bun fasi nomo de fu anbegi Gado (Efeisesma 4:4-6). A tru bribi e tyari sma go na têgo libi, èn falsi bribi e tyari sma go dede.​—Mateus 7:13, 14.

Yu kan kon sabi san na a tru bribi te yu e luku den sma finifini di e libi akruderi a bribi dati. Fu di Yehovah bun, meki den sma di de tru anbegiman fu en, musu de bun sma tu. Neleki fa wan bun apresinabon e meki apresina di bun, na so a tru bribi e meki bun sma.​—Mateus 7:15-20.

Den mati fu Yehovah abi furu lespeki gi Bijbel. Den sabi taki Bijbel komopo na Gado. Den e meki den sani di Bijbel e taki, e tiri a libi fu den, lusu den problema fu den, èn yepi den fu leri fu Gado (2 Timoteus 3:16). Den e pruberi fu du san den e preiki.

Den mati fu Yehovah e sori taki den lobi makandra. Nanga a leri di Yesus ben leri sma fu Gado èn nanga a meki di a ben meki sikisma kon betre, a ben sori taki a ben lobi den. Den sma di e libi akruderi a tru bribi e sori tu taki den lobi tra sma. Neleki Yesus, na so den no e broko-ai gi pôti sma noso gi sma di de fu wan tra kulturu. Yesus ben taki dati sma ben o sabi suma na den disipel fu en fu di den ben o sori taki den lobi makandra.​—Yohanes 13:35.

Den mati fu Gado e lespeki Gado nen, Yehovah. Efu wan sma e weigri fu gebroiki yu nen, dan a sma dati ben o de wan bun mati fu yu? Nôno! Te wi abi wan mati, dan wi e gebroiki a nen fu en èn wi e fruteri trawan bun sani fu a mati dati. Dati meki den sma di wani de Gado mati musu gebroiki en nen èn fruteri trawan fu en. Yehovah wani taki wi e du dati.​—Mateus 6:9; Romesma 10:13, 14.

Neleki Yesus, na so den mati fu Gado e leri sma fu Gado Kownukondre. Gado Kownukondre na a hemel tiri di sa meki grontapu kon tron wan paradijs. Den mati fu Gado e fruteri trawan a bun nyunsu disi fu Gado Kownukondre.​—Mateus 24:14.

Yehovah Kotoigi e pruberi fu de mati fu Gado. Den e lespeki Bijbel èn den lobi makandra. Den e gebroiki Gado nen èn den e lespeki en tu. Den e leri trawan fu Gado Kownukondre. Yehovah Kotoigi e libi akruderi a tru bribi di de na grontapu na ini a ten disi.