Grontapu o kisi pori?

A piki fu Bijbel

Nôno, noiti grontapu o kisi pori, noiti a o bron nanga faya èn noiti wan trawan o kon na en presi tu. Bijbel e leri wi taki Gado meki grontapu fu sma libi na tapu fu têgo.

• „Na den reti-ati sma o kisi grontapu. Èn fu têgo den o tan libi drape.”​—Psalm 37:29.

• „[Gado] seti grontapu na tapu wan steifi fondamenti. Fu ala ten, iya, fu têgo nowan sma o man seki en.”​—Psalm 104:5.

• „Grontapu e tan fu ala ten.”​—Preikiman 1:4.

• „A sma di seti en leki fa a de èn a sma di poti en steifi na en presi. . . . A no meki en fu soso, ma a seti en fu sma libi na tapu.”​—Yesaya 45:18.

Libisma o pori grontapu?

Gado no o gi pasi taki libisma pori grontapu nanga a doti di den e doti grontapu, nanga den feti di den e feti noso na iniwan tra fasi. Na presi fu dati, a o „pori den wan di e pori grontapu” (Openbaring 11:18). Fa a o du dati?

Libisma regering, di no man kibri a grontapu fu sma pori en, musu meki presi gi a Kownukondre di de na hemel (Danièl 2:​44; Mateyus 6:​9, 10). Gado Manpikin, Yesus Krestes o tiri a Kownukondre dati (Yesaya 9:​6, 7). Di Yesus ben de na grontapu a ben abi a makti fu basi sani soleki a winti nanga a se (Markus 4:​35-​41) . Leki Kownu fu Gado Kownukondre, Yesus o tiri ala sani na grontapu. A o meki taki ala sani de baka leki fa a ben de na ini a dyari fu Eden.​—Mateyus 19:28; Lukas 23:43.

Bijbel e leri taki grontapu o bron nanga faya?

Nôno, Bijbel no e leri dati. Son sma e denki taki grontapu o bron nanga faya fu di 2 Petrus 3:7 e taki: „A libi den hemel nanga a grontapu fu now fu bron den nanga faya.” Luku tu prenspari penti di o yepi wi fu frustan san den wortu disi wani taki:

1. Bijbel e gebroiki den wortu „den hemel”, „grontapu” nanga „faya” gi difrenti sani. Fu eksempre, Genesis 11:1 e taki: „Na a ten dati ala sma na grontapu ben e taki wán tongo èn den ben abi wán fasi fu taki.” Dyaso „grontapu” e sori go na a libisma libimakandra.

2. Den tra vers fosi 2 Petrus 3:7 e sori san den wortu hemel, grontapu nanga faya wani taki. Vers 5 nanga 6 e poti prakseri na a Frudu na ini a ten fu Noa. Na a ten dati wan owru grontapu ben kisi pori, ma a planeiti fu wi no kisi pori. Na presi fu dati, a Frudu pori na ogri libisma libimakandra noso „grontapu” (Genesis 6:11). A Frudu pori „den hemel” tu. Dati na den sma di ben e tiri a grontapu na a ten dati. Sobun, na den ogrisma kisi pori, a no a planeiti fu wi. Noa nanga en osofamiri pasa a pori disi libilibi èn den ben libi na grontapu.​—Genesis 8:15, 18.

Neleki fa a watra fu a Frudu ben pori den ogrisma, na so a „faya” fu 2 Petrus 3:7 o pori ogrisma. A no o pori a grontapu pe wi e libi na tapu. Gado pramisi „nyun hemel nanga wan nyun grontapu” pe „retidu o de” (2 Petrus 3:13). A „nyun hemel” noso nyun regering dati na Gado Kownukondre. A o tiri a „nyun grontapu” noso a nyun libisma libimakandra. Te a Kownukondre dati o tiri, grontapu o tron wan paradijs pe freide o de.​—Openbaring 21:​1-4.