Miljoenmiljoen sma di de na libi now noiti sa dede komoto foe wi grontapoe
„Mi de na opo-baka èn a libi. Na sma di e sori bribi na ini mi, awasi a dede, a sa kon baka na libi; èn ibri wan sma di e libi èn di e sori bribi na ini mi, noiti sa dede.” — JOHANNES 11:25, 26.
1. San a wani taki gi wan kolkoe sma foe no dede noiti komoto foe wi gronatpoe?
KON OEN taki dati wan sma noiti sa dede. Dati ben sa wani taki gi sowan sma di abi so wan kolokoe dati alaten a ben sa tan libi dja na grontapoe leki wan man ofoe oema di kan dede. A de redelek foe prakseri so, a no so? Èn a no e akroederi nanga den wortoe foe Jezus Kristus di skrifi dja na tapoesé èn di ben taki moro leki tinanégi jarhondro psa kaba? Ija!
2, 3. Sortoe howpoe den Hebrew Boekoe ben poti na wi fesi? (b) San de na algemene fasi foe prakseri foe na religi sistema foe na kristenheid?
2 Den santa Hebrew Boekoe, foe Genesis te nanga Maleachi, no e gi libisma wan hemel howpoe, èn dat’ede meki den djoe di ben hori densrefi soifri na den Boekoe disi, no ben abi no wan howpoe ofoe lostoe foe go na hemel. Ma den Hebrew Boekoe e poti foe troe na howpoe tapoe tégo libi na wi fesi. (Psalm 37:29; Job 4:1-15). Gi wan gebore djoe di ben besnij tégo libi na grontapoe ondro na Kownoekondre foe na pramisi Messias ben de wan kewon howpoe èn froewakti.
3 Ma, disi no de ini algemeen na prakseri na ini na kerki sistema foe na kristenheid. Den e bribi èn e leri atki wi libisma abi wan sili di no kan dede na ini wi skin, di e dede èn dati te wi e dede na dede di wi no kan lon komoto foe en, na sili disi e fri ensrefi èn e go na ini na jejekondre di ai no kan si. Drape a e ondrofeni kroetoe èn Gado e seni en go kande na wn hemel foe blesi ofoe na wan presi pe a e kisi strafoe foe wan pina foe tégo efoe a sma no ben de wan getrow kristen. Èn na algemene fasi foe si sani na ini a kristenheid de dati a grontapoe, a son, a moenkenki èn den strai moesoe bron èn pori krinkrin, na ini wan bigi faja na a heri grontapoe.
4. Foe san-ede a no edede komoto noiti foe wi grontapoe no gersi leki a de wan boen njoensoe gi foeroe sma di e prakseri abra a toestand foe a disiten grontapoe?
4 Te joe loekoe so wan religieus fasi foe si sani foe a sé foe religi, dan noiti a ben sa kan kon troe dati „miljoenmiljoen sma di e libi now noiti sa dede komoto foe wi grontapoe.” Tokoe, foeroe sma kan aksi wi: Soema no ben sa wani libi na wan planeet di, soleki fa a de now, lai nanga angriten, pestsiki, gronseki, feti, internationale nanga raciale bita-ati, makandra nanga na poti na ipi-ipi foe atoom fetisani di de wan kefar gi na libi foe ala libisma na grontapoe? Efoe den sortoe takroe sani disi ben sa tan tanteri wi grontapoe go dorodoro, dan moro foeroe foe den sma di e prakseri redelek ben sa wani foe kon fri foe en — awansi disi ben sa wani taki dede gi den!
Na fosi prakseri nanga a grontapoe
5. Fa a grontapoe ben de di Gado poti libisma na tapoe, èn fa Gado e denki foe libisma?
5 Ma, na a fosi bigin foe libisma, a Mekiman ben gi na grontapoe na libisma foe libi foe tégo. Dan foe troe a ben de wan ’boen grontapoe’. Na bijbel tori e ferteri wi taki, a baka di a Mekiman ben seti na gronatpoe situwasi gi na fosi man nanga oema èn a ben poti den na tapoe grontapoe, „Gado ben si ala sani di a ben meki, èn loekoe! a ben de heri boen” (Genesis 1:31). Efoe a no ben de heri boen gi na Mekiman, a noiti ben sa poti en libisma pikin djaso na ini a presi disi. Na srefi Skrifiman disi foe na tori fa sani meki e taki foe Gado, a Mekiman: „Na Krépiston, volmaakti en wroko de, bikasi ala en pasi de retidoe. Wan Gado foe getrowfasi, na soema no wan kroektoedoe de” (Deut. 32:4). Joe kan lési a no wan presi pe na Almakti Gado foe en wroko, ofoe doe, moesoe taki pardon na wan sma. Leki wan boen Tata a ben lobi libisma foe sensi a bigin. Te now ete a lobi libisma.
6, 7. Foe san-ede wi kan abi na froetrow taki Gado mekisani foe na grontapoe èn libisma na tapoe en no sa de wan soso projekt?
6 Wan kolokoe de taki Gado mekisani na grontapoe èn libisma no sa de wan soso wroko. Di Gado ben poti wan marki na fesi di ben sa gi en grani foe na fosi man nanga oema, Gado ben komanderi Adam nanga Eva foe meki pikin di de volmaakti èn foe foeroe na grontapoe nanga den. Den ben kisi na komando toe foe poti na grontapoe na den ondro te leki a tron wan paradijs na a heri grontapoe èn foe abi makti foe tiri abra ala mekisani di ben de moro lagi leki libisma (Genesis 1:28). A sari foe si taki baka 6.000 jari foe a de foe libisma na grontapoe nanga en ondrofeni, a libisma famiri no ben man foe doe san a ben kisi leki komando foe doe. Moro ogri ete, libisma e pramisi densrefi foe figi densrefi poeroe foe na grontapoe èn dati moro foeroe nanga den moro ogri sani san densrefi meki na ini den bita-atifasi foe den. Ma a no foe di libisma foe na moro bigi pisi no ben man doro a marki, ben wani taki taki Gado leki Mekiman no ben man doro a marki.
7 Na fosi prakseri foe Gado nanga na grontapoe sa kontroe. Wi abi a djaranti foe Gado foe dati! (Jesaja 55:11). Na ini Prékiman 1:4 a Bijbel e taki: „Wan geslagti e go, èn wan geslagti e kon; ma grontapoe e tan tanapoe te ten di no abi marki.” Èn na ini Jesaja 45:18 Gado a Mekiman e sori tapoe ensrefi leki „Na Sma di seti na grontapoe èn na Mekiman foe en,” èn a e taki moro fara: „En na sma di poti en stéfi, di no meki en foe soso, di seti en srefi foe sma libi na tapoe: ’Mi na Jehovah, èn no wan tra wan de boiti mi.’” Wan volmaakti libisma famiri, di kisi na presenti foe tégo libi, sa libi a tapoe ete na ini a reti ten foe Gado!
8, 9. (a) Foe san-ede a prakseri foe Gado nanga na grontapoe, dati libisma sa libi a tapoe de kontrari na troe tori taki den disiten hemel nanga grontapoe sa psa gwe? (b) San na den „njoen hemel” nanga a „njoen grontapoe”, èn san na a bijbel pramisi na ini a tori foe den?
8 Na apostel Petrus no etaki kontra na djaranti di skrifi na tapoesé, di e meki wi kisi wan korostoe ati te a e warskow wi taki den hemel nanga grontapoe di de now sa pasa gwe. Nono, bikasi leti baka di a memre wi foe na sani disi di sa psa èn di de so krosbé now, a e taki moro fara: „Ma njoen hemel nanga wan njoen grontapoe de di wi e froewakti akroederi en pramisi, èn na ini den disi reti-doe sa de” (2 Petrus 3:10-13). Gado pramisi foe den sortoe njoen hemel èn njoen grontapoe tan kibri na ini Jesaja 66:22: „’Bikasi neleki fa den njoen hemel nanga na njoen grontapoe di mi e meki sa tanapoe na mi fesi’, na so den wortoe foe Jehovah de, ’na so den bakapikin foe joe nanga joe nen sa tan tanapoe.’”
9 Aha, ija, den njoen hemel nanga na njoen grontapoe sa tan tanapoe na fesi foe Jehovah; den sa tan tanapoe stéfi, den sa hori doro, den sa tan go doro! Na „njoen grontapoe” abi na ini en wan regtvaardiki libisma ras di sa tan libi na ini na grontapoe di krin, di na Mekiman seti „foe sma tan libi na ini” (Jesaja 45:18). Den „njoen hemel”, di de njoen regtvaardiki hemel makti, sa abi na tiri abra na krin grontapoe èn den regtvaardiki sma di sa libi na tapoe. Dan Jehovah Gado „foe troe no ben sa meki a heri moi grontapoe foe wi foe a tan foe soso”. A grontapoe sa meki a kisi reti ete leki Mekiman!
Go libilibi na ini na „njoen grontapoe”
10, 11. (a) San ondrosoekoeman foe den grontapoe afersi no e hori na ini prakseri te den e teki sani na fesi èn foe dat’ede san wi kan pasa libilibi èn go na ini san? (b) San wi kan leri dati Noach nanga en famiri ben psa libilibi na Froedoe?
10 Na prenki di ondrosoekoeman foe grontapoe afersi e gi ini algemeen no e meki howpoe de dati libisma sa psa libilibi go na ini wan njoen èn moro betre seti foe sani. Kolokoe dati den fasi foe prakseri sani a no di foe na Mekiman foe grontapoe, èn ooktoe dti den pasi no de di foe en (Jesaja 55:8-11). Den prakseri no sidon na tapoe san ben psa na grontapoe langa ten a fesi kaba na ini den dé foe a man Noach. Ala den nucl;eaire bom èn den tra fetisani foe den naatsi no man kon na a bakafoetoe foe na krakti foe na grontapoe Froedoe di fadon komoto foe loktoe foe tjari wan kaba kon na na owroe grontapoe foe ogridoe. Nanga wan sari-atifasi Jehovah Gado na Mekiman ben sreka sani na fesi dati na libisma famiri ben sa kan psa libilibi na ogri kaba foe grontapoe foe na ten dati, sodati den ben sa kan tan libi doro na grontapoe.
11 Nomo aiti libisma di tan na libi foe na owroe grontapoe dati, namkoe Noach nanga en wefi èn den dri manpikin nanga den wefi. Nanga jepi foe den aiti libisma sili dati wi libisma geslagti ben kisi wan njoen bigin, na ini regtvaardikifasi (2 Petrus 2:5; 3:6). Disi de leki wan model gi a krosbé ten di moe kon (Genesis 9:1-7). San disi e sori de, taki, neleki fa Noach nanga en famiri ben pasa libilibi na kaba foe na grontapoe foe den dé, na so wi kan pasa libibi na kaba foe na grontapoe disi go na ini na njoen seti foe sani di de so krosbè foe kon!
12, 13. (a) Foe san-ede meki miljoenmiljoen sma di e libi now no e frede na kaba foe na owroe seti foe sani disi (b) Foe san wi kan de séker te wi abi na begi na ini prakseri di na Manpikin foe libisma ben leri wi foe na letterlek grontapoe?
12 Miljoenmiljoen sma na grontapoe e ferstan dati den „njoen hemel” èn na „njoen grontapoe” de langalanga na wi fesi foe kon. Den no e frede na kaba foe na owroe grontapoe disi, awasi a kaba sa feni presi neleki nanga faja di sa njan den hemel nanga na grontapoe poeroe. Den sabi foe na Wortoe foe den Mekiman foe ala sani di den kan fertrow a tapoe, dati wi letterlek grpntapoe sa tan neleki fa a ben tan di a fosi grontapoe ben kon na wan kaba na ini den dé foe den fosten tata Noach. Na psalmskrifiman di ben abi santa jeje ben taki san e kon now foe a grontapoe: „Foe taki foe den hemel, den hemel na foe Jehovah, ma na grontapoe a ben gi a den manpikin foe libisma.” — Psalm 115:16.
13 „Den manpikin foe libisma” no ben meki gi hemel, ma gi grontapoe, pe na Mekiman ben gi den foe libl. Djaso na grontapoe na Bigi Leriiman di ben kari ensrefi a „Manpikin foe libisma” ben leri en discipel foe begi na Mekiman so: „Wi Tata na ini hemel, joe nen moe kon santa. Meki joe Kownoekondre kon. Meki joe wani moe pasa, soleki na ini hemel so toe na grontapoe” (Mattéus 24:37; 6:9, 10). Foe na „sma di e jere begi” moesoe piki na begi dati nanga jepi foe a kon foe en hemel kownoekondre, wi letterlek grontapoe moesoe pasa na kaba di e kon krosbé foe a seti foe sani di moesoe foe go na ini pori (Psalm 65:2). Na tapoe na grontapoe dati, den sma di tan na libi sa doe na wani foe na hemel Tata neleki den engel na ini hemel ben doe dati na wan loyaal fasi.
14. Soema sa bigin a „njoen grontapoe”, èn fa na njoen grontapoe dati sa kon moro bigi?
14 Fa wan eri moi sani didon na fesi foe den sma di e doe a wani foe Gado na ini na grontapoe di sa kon krin! Den libisma di sa libi psa na gronapoe foe now, di e loekoe na fesi foe doe dienst sondro kaba gi na hemel Tata na wan paradijs grontapoe, sa bigin na „njoen grontapoe” ondro na Messiaans „njoen hemel”. Baka wan pisiten na pramisi „njoen grontapoe” disi sa kon moro bigi foe di nanga na opobaka foe den dedewan foe libisma di bai kon fri, di sa kon leri regtvaardikifasi èn di sa de ferprekti foe doe san regtvaardiki (Johannes 5:28, 29). Nanga disi ini prakseri, san wi di e froewakti foe libi pasa na kaba fo na seti foe sani disi, moesoe doe?
15, 16. (a) San na apostel Petrus ben sori taki de na joisti fasi foe doe gi sma di sa psa libilibi na kaba foe na grontapoe disi na ini a ten di e kon? (b) Sortoe sma Noach ben de na ini de dé foe na Froedoe, èn fa en nanga en osofamiri ben kisi pai?
15 Dati na wan boen aksl. Moro leki 1900 jari psa kaba na apostel Petrus ben sori san ben moe de na piki tapoe na aksi dati, di a ben skrifi: „Foe di ala den sani disi moesoe loesoe èn lasi gwe, sortoe sma joe sa moe de na ini santa fasi foe tjari joesrefi èn doe foe gi wisrefi na Gado, froewakti èn tan hori boen na ini prakseri na de-noja foe na dé foe Jehovah, nanga san den hemel di de now sa loesoe èn lasi gwe nanga faja èn den elementi sa smelter gwe foe di den faja srefsrefi!” (2 Petrus 3:11, 12). Efoe a ben fiti gi na apostel di ben abi santa jeje foe skrifi den wortoe dati 1900 jari psa kaba na ini na ten di na Romeini Kownoekondre ben de na en hémarki, dan a fiti moro srefi na ini den laatste dé disi foe na seti foe sani disi dati den wortoe disi foe fermane taki gi den Kotoigi foe Jehovah. Na „de-noja disi foe na dé foe Jehovah” sa doro en hémarki nanga a loesoe èn lasi gwe, leki na ini wan smelterkan, foe na agersi „grontapoe èn den wroko a tapoe.” — 2 Petrus 3:10.
16 Na ini den laatste dé bifo na kaba foe na grontapoe foe fesi na froedoe, „Noach ben de wan regtvaardiki man. A ben bewijsi taki a de sondro fowtoe a mindri den sma foe en ten. Noach ben waka nanga na troe Gado” (Genesis 6:9). Foe di Noach ben waka leki a edeman foe en pikin famiri na so wan fasi, ben meki na Gado nanga soema a ben waka hori den na libi. Baka di Noach nanga en famiri komoto libilibi na ini na ark foe ferloesoe, den ben gebroiki foe bigin wan njoen seti foe sani na ini regtvaardikifasi ondro den blesi foe Jehovah Gado. Ne Gado ben meki wan ferbontoe nanga den sma disi di ben psa libilibi na grontapoe Froedoe taki noiti agen a sa tjari wan grontapoe Froedoe kon abra a libismageslagti dja na grontapoe. — Genesis 9:8-17.
17. Te o fara Noach ben gi warskow èn sortoe situwasi e akroderi nanga a ten disi?
17 Noach ben kisi wan moi pisi ten a fesi na warskow taki wan alen ben sa fadon na grontapoe di ben sa de so hebi dati a ben sa tapoe na heri grontapoe na ondro watra. A no moro mendri Jehovah Kotoigi ben gi warskow ini a di foe twènti jarhondro disi foe na kaba foe na grontapoe disi. Na warskow disi abi en roetoe na ini na bijbel di skrifi ondro santa jeje èn na tapoe na kontroe foe en profétitori, di wi e meki kon a krin taki wi e kon moro krosbé foe na kaba foe na seti foe sani disi di foeroe nanga tranga.
Bari wan switi-kon gi den dedewan di drai kon baka na grontapoe
18. Sortoe prenki foe a ten di de na wi fesi soleki fa a skrifi na ini Openbaring foe a troe foe na opobaka foe den grontapoe dedewan e foeroe miljoenmiljoen Kotoigi nanga prisiri?
18 Na ini a ten disi miljoenmiljoen Jehovah Kotoigi ’di e waka nanga Gado’ e prisiri foe na prenki di den e si na den fesl èn di skrifi na ini Openbaring 20:11-14, pe wi e lési: „Èn mi ben si wan bigi weti troon èn na sma di ben sidon na en tapoe. Grontapoe nanga hemel lon gwe foe en fesi, èn no wan presi ben feni moro gi den. Èn mi ben si den dedewan, den bigiwan nanga den pikinwan, tanapoe na fesi foe na troon, èn boekoelolo ben opo. Ma wan tra boekoelolo ben opo; a de a boekoelolo foe libi. Èn den dedewan ben kisi kroetoe nanga jepi foe den sani di ben skrifi na ini den boekoelolo akroederi den sani di den ben doe. Èn na se ben gi den dedewan na ini en, èn dede nanga Hades ben gi den dedewan na ini den, èn ibriwan aparti ben kisi kroetoe akroederi den sani di den ben doe. Èn dede nanga Hades ben iti go na ini na se foe faja. Disi wani taki na di toe toe dede, na se foe faja.”
19. Fa na situwasi sa de na grontapoe te den libisma dedewan di kisi wan opobaka drai kon baka, èn sortoe behandeling den sa kisi foe den bigin na njoen libi baka?
19 Den sma di opo komoto foe dede soleki fa na bijbel profétitori dati e taki, no sa kon baka na ini wan grontapoe di no abi sma na tapoe. Miljoenmiljoen Jehovah Kotoigi di gi densrefi abra èn dopoe e ferwakti foe pasa libilibi na agersi owroe hemel èn grontapoe di ben lon gwe foe gi den dedewan di kisi wan opobaka wan switikon na ini wan grontapoe di e bow baka foe tron wan paradijsna a heri grontapoe (Lukas 23:43). A njoen seti foe sani sa de kaba moi fara. Den sma di pasa libilibi na kaba foe na seti foe sani disi na wan lobifasi sa sreka langa ten a fesi sani gi den dedewan di bai kon fri toe dede èn di sa drai kon baka.
20. Sortoe komando di Jezus ben gi na na sé foe Lazarus nnaga Jaïrus oemapikin e sori san den sma di psa libilibi sa moesoe doe na na sé foe den miljardmiljard sma di kisi opobaka?
20 Den miljoenmiljoen sma dati di tan na libi sa tjari kon baka na ini den prakseri, fa sjatoe baka di Jezus ben opo en lobi mati Lazarus foe dede na grebi drape na ini Bethania, krosbé foe Jeruzalem, ben komanderi den sma di ben de kotoigi foe na opobaka wondroe disi foe loesoe Lazarus foe den dedekrosi di ben domroe en. Na a srefi fasi, di Jezus ben opo na oemapikin foe na djoe tiriman Jaïrus foe dede, a ben „gi komando dati den ben moesoe gi en wan sani foe njan” (Lukas 8:55; Johannes 11:44). Sondro degedege den sma di tan na libi sa kisi komando foe hemel foe sreka sani di fiti gi den miljardmiljard sma di sa drai kon baka komoto foe dede.
21, 22. (a) Nanga jepi foe sortoe programma den sma di tan a libi sa jepi den dedewan di kisi opobaka foe njan boen dorodoro foe den winimarki foe Kristus dede? (b) Foe san-ede na „njoen grontapoe” sa de regtvaardiki foe sensi en bigin?
21 Wan bigi leriwroko sa de foe doe toe. Disi e kroederi nanga san Gado seti na fesi gi den dedewan di e drai kon baka foe kan njan boen foe den wini marki foe na ferloesoe paiman foe Jezus Kristus. Soso te den e doe so, dan den sa kan libi na ini wan Edens grontapoe, na ini libisma volmaakti fasi. Nownow kaba „na bigi ipi” foe den sma di sa tan libi psa „na bigi benawtoe” e sreka densrefi foe teki prati ini na wondroe leri programma dati. Den srefi ben njan boen foe den wini foe na ofrandi dede foe „na Lam foe Gado”, Jezus Kristus (Johannes 1:29). Disi na san e sori na ini Openbaring 7:9-14, pe foe eksempre e taki foe den: „Den disi de den sma di komoto foe na bigi pina, èn den ben wasi den krosi èn meki den kon weti na ini na broedoe foe na Lam.” Soboen, foe di den e kisi den winimarki foe na ferloesoe ofrandi foe Kristus, den ben teki gersi nanga sma di „weri weti krosi.”
22 Foe na „bigi ipi” disi den e taki toe na wan agersi fasi: „Den e doe gi en santa dienst dé nanga neti na ini en tempel” (Openbaring 7:15). Na ini na „bigi benawtoe” di de na wi fesi e kon, den weti krosi no sa teki poeroe foe den, ma presi foe dati den sa tan doe santa dienst gi Jehovah Gado sondro degedege na ondro en kibri (Openbaring 7:17). „weti krosi”, den sa de na bigin foe na „njoen grontapoe”, so dati na ini en, foe sensi en fosi bigin, „retidoe sa de.” — 2 Petrus 3:13.
Aksi foe loekoe san wi leri ete wan tron
◻ Sortoe fasi foe prakseri foe a libi di moesoe kon ete sma ben abi na ini a ten di psa èn a ten disi?
◻ San na Gado prakseri gi na grontapoe, èn fa na bijbel e bewijsi disi?
◻ Fa na sani di psa nanga Noach nanga en osofamiri e gi wi fertrow dati miljoenmiljoen sma di de now a libi noiti sa dede?
◻ Soema sa gi den dedewan wan switikon, èn sortoe sani sa sreka gi den a fesi?
[Prenki na tapoe bladzijde 3]
Noach nanga en famiri psa na Froedoe. Miljoenmiljoen sma sa psa na kaba foe na grontapoe disi libilibi
[Prenki na tapoe bladzijde 4]
Soleki Lazarus ben kisi wan switikon foe de baka a libi, na so sma di psa Armageddon libilibi sa gi den dedewan wan switikon