Bar’wroko gi na warskow foe Gado
„Bikasi dan so wan bigi benawtoe sa de soleki sensi na bigin foe grontapoe te leki now no ben kon, èn no sa kon moro toe. Foe taki leti, efoe den dé no ben koti sjatoe, dan no wan skin no ben sa kisi loesoe; ma foe den sma ede di ben verkisi, meki den dé dati sa koti sjatoe.” — Matt. 24:21, 22.
1, 2. (a) Fa na grontapoe de wán bigi birti foe soema? (b) Sortoe kefarliki bakapisi a abi dati ala volkoe de krosibé birtisma?
A eri grontapoe de ini disi ten wán bigi birti foe sma. Nanga wi moro esi wrokosani foe vervoer wi ben kan fré abra a evenaar ofoe abra toe pool lontoe na grontapoe ini moro mendri leki wan dé. Nanga internationaal konkroetité ofoe nanga radio-konkroetité, ini wan toe minuut wi ben sa kan taki nanga ibri pisi foe na grontapoe nanga wan birti. Wi kan njan boen foeroe dorosé njanjan, foe di ini disiten pikinmoro ala sani e tjari komoto foe den moro farawe presi foe grontapoe.
2 Foe di na eri libisma-famiri tai so krosibé nanga makandra, dan alamala de ini den srefi gevaar. So wan 66 jari pasa kaba, dati wani taki, ini na wan eeuw disi, dan sma ini ala oekoe foe na grontapoe ben kon froestan boen na troe foe so wan rampoe leki wan grontapoe-feti. Twenti-na-wan jari baka na moro ogri grontapoe-feti ben kon na wan kaba, dan wan moro ogri feti ben bigin gi na grontapoe. Èn now, 36 jari baka di wi abi na grontapoe-sek’seki dati na wi baka, dan wan moro takroe feti e kon na wi tapoe, Nowan sma kan taki troetroe taki: ’O, san e pasa drape, so farawe, no kan miti mi dja!’ Wan sma di e redeneer so èn taki so, e bidrigi ensrefi. Wi alamala de now krosibé birti foe makandra, ma foe di wi no e tjari wisrefi leki boen birtisma, wan problema e kon, ja, wan grontapoe gevaar e kon na wi tapoe. Sma e opo den sten foe wi jere wan tranga warskow.
3. (a) Foe sanede meki sma di e loekoe sani boen e bribi dati grontapoe de ini dede-gevaar? (b) Fa grontapoe sma e prakseri foe Gado?
3 Foe di den sortoe bigi sani disi de ini a tori, meki son sma di e degedege e aksi densrefi: A eri grontapoe de troe-troe ini dede-gevaar? Sma di e loekoe sani boen èn di séker no de rampoeproféti, e piki na aksi disi nanga Ja! Na sari piki no de soso tapoe na gron foe san na libisoema-famiri kan doe ensrefi. Wi moe ori wan moro tranga fanowdoe sani na prakseri. Dati kan troetroe? Ja. Fa so? Foe di wan Soema de di abi na grontapoe disi nanga ala na libi foe meti nanga libisoema. Ma, pikinso soema nomo e ori en na prakseri. Sma nanga grontapoe koni foe na wetenschappelijk eeuw disi e si densrefi leki toemsi onafhankelijk ini denki foe go bribi ini wan Mekiman ofoe foe aksi densrefi: San a abi ini prakseri? Na Mekiman na a tra sé, no de nanga so wan tranga-ati dati a no e broko-ede nanga libisma afersi. Den e poti en na wan sé leki a no de ofoe leki a de so farawe dati a no de ini a tori ofoe no abi belangstelling na ini a tori.
4. Sortoe belangstelling Jehovah abi leki na éginari foe na grontapoe, gi en goedoe? (b) San moe doe foe meki na grontapoe tron wan switi tanpresi?
4 Ma wan sma di abi gron no moe abi belangstelling foe san de foe en? A de soso wan joisti sani, dati a wani sorgoe en so boen leki a kan. Spesroetoe efoe na goedoe foe en abi troetroe foeroe waarde. A so wi Mekiman e prakseri foe dati. Te wi loekoe na sorgoe foe na grontapoe, dan wi no kan poti a troe foe na tori na wan sé dati na grontapoe te nanga na dé foe tide e ramponeer èn de ini gevaar srefi foe go ini wan takroe pori. A gersi leki a ben wakti langa nofo foe soifri na grontapoe foe ala sma di de frantwortoe foe na ramponeer foe en fosi volmaakti goedoe. Na ten di a wani doe na krinwroko disi, moe de now krosibé. A ben meki wan boekoe skrifi foe den sani disi. San a abi na prakseri foe doe leki na boekoe dati taki?
WAN FOSITEN SITUWASI DI GERSI DI FOE NOW
5. Oten ini na ten di pasa den libisma ben de ini wan srefi situwasi leki now?
5 Foeroe sma kande sa froewondroe foe sabi dati na wan fositen okasi na eri libisma-famiri di ben libi na a ten dati, ben de ini wan srefi situwasi leki ini san ala sma foe na eri grontapoe de now na ini. Ini na ten dati wan sani ben pasa tapoe na eri grontapoe. Disi ben de ini den dé foe wan man, di wi alamala di e libi now, komoto foe en. Na gemeenschappelijk fositen papa foe wi ben de na man di ben nen Noach, na manpikin foe Lamech. Foe den dé foe Noach na boekoe foe a Mekiman di ben skrifi nanga en jeje ben taki: „Baka wan pisiten Noach ben tron na papa foe dri manpikin: Sem, Cham nanga Jafeth. Èn grontapoe ben kon pori ini na ai foe na troe Gado èn grontapoe ben kon foeroe nanga ogri dwengi. Gado ben si soboen na grontapoe èn loekoe! a ben pori, bikasi ala skin ben pori en pasi na grontapoe.” — Gen. 6:10-12.
6, 7. (a) Sortoe warskow ben gi na grontapoe ini den dé foe Noach? (b) Fa a ben doe kon dati a grontapoe ben tron wan vrédefasi tanpresi baka?
6 San ben pasa dan foe meki na grontapoe disi tron wan boen tanpresi foe vréde? Den ogriman di ben pori grontapoe ben go feti na a eri grontapoe èn den ben kiri makandra na so wan fasi? Na warskow di Noach ben moe gi na a ten dati ben de disi dati wan bigi rampoe di libisma ben sa tjari kon èn di a libisma-famiri no ben sa kan pasa srefi-srefi? Nono! Na presi foe dati, a ben bar’wroko gi wan warskow foe Gado, wan boskopoe di a ben moe meki bekenti na libisoema leki wan komando foe Gado. Ala sma ben kisi warskow foe na sani di Gado ben de foe doe foe na boen foe wan korostoe, boen grontapoe, pe boen maniri sma ben kan njan switi foe na libi. Gado ben ferteri na Noach dati den sma no ben sa arki na en èn dati Noach foe datede ben moe bow wan ark ofoe wan kisi di e drifi gi ensrefi nanga en oso-famiri, ala nanga ala aiti sma sili. Tapoe na dé foe 2370 bifo G.T. di ben taki na fesi na grontapoe froedoe ben broko loesoe. A ben de „wan wroko foe Gado”. Libisma ben kisi na paiman foe dede ini watra.
7 „Na wroko foe Gado” dati ben tjari wan boen sani kon gi a libisma-famiri. Na libisma-lo ben kisi nanga dati wan njoen bigin. Wan regtvaardiki oso-famiri di ben frede Gado èn di ben meki na libi go doro na wan grontapoe di na momenti dati ben de ini vréde èn boen, ben de na fundamenti foe wan njoen libisma-libimakandra.
WAN SREFI GRONTAPOE PORI DE KROSIBÉ
8. (a) Fa Jezus Kristus ben teki den dé foe Noach gersi nanga now? (b) Sortoe sani de toemsi krosibé, èn san foe datede moe doe ini disi?
8 Dati ben de na wan enkri okasi bifo wi ten dati na eri libisma-famiri ben tanapoe na fesi dede. A ben de wan model foe wi ten, pe wan grontapoe di abi miljard miljard soema de ini gevaar. Disi no de wi doengroe, libisma taki-go-taki-kon foe afersi, no wan prakseri di pasa marki. A prakseri disi no meki moro bigi soleki na prakseri foe wan grontapoe barinen man, wan proféti di ben bigi moro Noach, namkoe Jezus Kristus, no ben meki moro bigi. Di a ben sori na a ten foe wi a ben taki: „Bikasi soleki den dé foe Noach ben de, na so na de-noja foe na Manpikin foe libisma sa de. Bikasi soleki den ben de ini den dé dati bifo na froedoe, den ben njan èn den ben dringi, man ben trow èn oema ben gi foe trow, te leki na dé di Noach ben go na ini na ark èn den no ben poti prakseri te leki na froedoe ben kon èn ben wasi den alamala poeroe, na so na de-noja foe na Manpikin foe libisma sa de” (Matt. 24:37-39). Soleki na égi profétitori foe Kristus foe den grontapoe-toestand taki, di ben sa de ini na ten foe en de-noja di no ben sa de foe si, na so na grontapoe-situwasi foe wi sensi na jari 1914 e akroederi nanga di ini Noach dé. Foe datede meki wan srefi „wroko foe Gado” moe de e kon. Now na warskow di Gado ben gi moe meki bekenti na a eri libisma-famiri di de ini gevaar. Na aksi di wi e aksi wisrefi de: Soema sa de den sma di sa go ini na ark leki Noach?
9. (a) Foe sanede wi abi reden foe bribi dati na „bigi benawtoe” di ben taki na fesi de krosibé? (b) Foe sanede na moro bigi kontroe foe Jezus profétitori moe de ini a ten di e kon, wansi wan „bigi benawtoe” ben kon tapoe Jeruzalem ini 70 G.T.?
9 Srefi te wi no loekoe san na Boekoe foe na Mekiman, na bijbel abi foe taki, dan wi abi reden foe bribi dati na seti foe sani disi de ini en „ten foe na kaba”. Den laatste dé foe na seti foe sani disi pikinmoro kon na wan kaba. Wi kan froewakti dati na troetroe kaba foe en sa go makandra nanga wan ten foe moeilijkheid, wan „bigi benawtoe”, di sa de moro spesroetoe èn di sa pori sani moro leki na froedoe foe Noach dé. Na sori dati foe Jezus tapoe den dé foe Noach, ben de wan pisi foe en laatste profétitori di a ben taki ini na jari 33 G.T. San a ben taki na fesi no ben abi wawan foe doe nanga Jeruzalem pori nanga na anoe foe den Romeinsma ini 70 G.T. ma ben go srefi te ini na ten foe wi. Na pori foe na santa foto dati ben de na émarki foe wan „bigi benawtoe” di ben kon tapoe den djoe ini na Romein district Judéa ini na Midden-Oosten. Ma a de krin dati Jezus ben moe abi moro ini prakseri leki na pori foe Jeruzalem ini a ten dati, di a ben taki: „Bikasi dan so wan bigi benawtoe sa de soleki sensi na bigin foe grontapoe te leki now (na jari 33 G.T) no ben kon, èn no sa kon moro toe. Foe taki leti, efoe den dé no ben koti sjatoe, dan no wan skin no ben sa kisi loesoe; ma foe den sma ede di ben verkisi, meki den dé dati sa koti sjatoe.” — Matt. 24:21, 22; Mark. 13:19, 20.
10, 11. (a) Fa na apostel Petrus ben skrifi foe wan grontapoepori di de foe kon? (b) San de fasi ini algemeen foe so wan grontapoe pori foe na anoe foe Gado ini disi ten?
10 Wan foe den discipel foe Jezus, na apostel Petrus, ben tai na kaba foe na grontapoe ini Noach dé na profètifasi nanga na kaba foe na disiten seti foe sani tapoe na émarki foe disi „ten foe a kaba” (Dan. 12:4). Kontrari na fadon foe watra ini den dé foe Noach, Petrus ben taki a fesi foe wan „faja” di no wawan ben sa pori na agersi grontapoe, ma sosrefi toe na agersi hemel (2 Petr. 3:5-12). Ini na teki gersi sani nanga makandra, Petrus no ben tjari na pori foe Jeruzalem nanga anoe foe den Romeinsma kon ini na prenki, èn disi ben pasa sjatoe baka en dede leki martelaar.
11 Ini na ten dati ini Petrus dé, den kristen ben bribi ini san ben kari algemeen na „kaba foe grontapoe” (Matt. 24:3, Na Njoen Testament ini aladé tongo). Ma san de now, 1900 jari na baka, na situwasi, spesroetoe na mindri sma di e taki dati den de kristen ofoe di de wan memre foe den kerki foe na kristenheid? Den e bribi ini so wan sani? Pikinmoro no! Wi kan loekoe wawan na a fasi fa den e feti baka den goedoe foe na grontapoe disi di e go ini pori.
12. (a) Sortoe grontapoe pori sma ini frantwortoe positie e frede now? (b) Fa soema e owpoe foe pasa wan grontapoe pori?
12 Ma tokoe sma de ini frantwortoe positie di san den e taki a fesi no komoto ini bijbel, ma di e taki wan sani na fesi di e sori tapoe na „kaba foe grontapoe”. Den e warskow wi foe a kon di a kan kon èn den e doe disi kaba sensi na barster foe toe atoombom na a kaba foe na Tweede Grontapoefeti ini 1945. Now den sokari „Kern-mogendheden” abi so foeroe kernbom dati den abi na makti foe pori ala a libi foe libisma nanga meti na grontapoe foeroe tron, efoe dati ben sa kan. Srefi nanga voorzichtig fasi den e taki foe radiologische bom. Nanga disi ala libisma ben sa dede, ma den goedoe foe den sondro libi ben sa tan. Ma sortoe waarde oso abi di tan abra efoe libisma no de foe libi na ini? Den ben sa de soso wan „Spoekoefoto” ofoe „Spoekoe-grontapoe”. Èn soema ben sa wani prakseri na so wan sani? Na gevaar de wan troetroe sani. Den sma e froewakti foe na Verenigde Naties, di e teri now 153 kondre, dati den sa drai so wan grontapoe kiri poeroe. Ma na Verenigde Naties, pe ala kernmogendheden de wan pisi foe en, no man foe stop dati na libisma-lo maskadreri ensrefi èn den de foe a tori disi wan soso owpoe.
13. (a) Sortoe aksi di abi foe doe nanga libi èn dede, wi moe piki? (b) Foe sanede meki sma di no de na kerki no abi wan piki di e gi satisfaksi, èn so wan piki de?
13 Ma soema kan loesoe na libisma-famiri foe kiri ensrefi? Sma di no de ini wan kerki moesoe poti now boen prakseri na a aksi disi. Foe di den no e bribi ini a bijbel, meki dati den no kan gi wan piki di e gi satisfaksi. Den no kan sori wi tapoe no wan loesoeman. Ma disi wani taki dati no wan loesoeman no de? Kolokoe nono!
NA WAN ENKRI FONTEN FOE TROE OWPOE
14. Foe sanede a de wan redelek sani foe bribi dati na Mekiman abi wan prakseri nanga na grontapoe?
14 Sabiman no kan bewijsi wi dati a grontapoe foe wi nanga den libisma di de na tapoe ben meki ensrefi. Wan Mekiman ben moesoe de. Soboen san wi kan taki foe en? Ini so wan 1600 jari kaba bifo wi gewoon teri, a ben sorgoe dati wan séker Job, wan getrow man, ondro santa jeje ben ferteri na wetenschappelijk waarheid dati En ben anga a grontapoe foe wi na noti ini na loktoe. A ben anga na grontapoe drape foe noti? (Job 26:7). A ben de wan toeval dati wi de now a tapoe nanga someni miljard sma? Disi ben de wan misték ofoe a no ben abi na a sé foe en no wan sani na prakseri nanga en? A ben gi pasi dati ini a ten disi a de monjo foe libi sani. A ben de na prakseri foe en dati ala miljard miljard libisma ben sa slakti makandra èn ben sa libi na grontapoe foe wi leki wan dede planeet ini a loktoe foe fré lontoe? Nanga ini prakseri san a de ferteri wi, dan wi no kan poti so wan law sani na en tapoe.
15. (a) San na Gado prakseri nanga na grontapoe? (b) San Gado sa doe heri esi?
15 Nanga en jeje a ben meki a koni man Salomo, na manpikin foe kownoe David, skrifi disi ini a bijbel: „Wan libisma-lo e go, èn wan libisma-lo e kon; ma grontapoe e tanapoe srefi te ten di no abi marki” (Pred. 1:4). Nanga en jeje a ben meki Jesaja skrifi toe: „Disi Jehovah ben taki . . . na Setiman foe na grontapoe èn na Mekiman foe en, . . . di no ben meki en foe soso, di ben seti en foe sma libi a tapoe: ’Mi na Jehovah, èn wan trawan no de’” (Jes. 45:18). A de pramisi foe datede dati na grontapoe noiti sa libi na baka sondro sma di e libi a tapoe. Ma san a sa poeroe krinkrin foe na grontapoe, de na disiten seti foe sani na tapoe a grontapoe disi, di ogri sma ben bow, a grontapoe di de wan goedoe foe Gado. Na djaranti disi wi e kisi nanga na tangi di tanapoe ini na laatste boekoe foe na bijbel: „Wi e taki joe tangi, Jehovah Gado, na Almaktiwan, . . . dati joe ben teki joe bigi krakti èn joe ben go tiri leki kownoe. Ma den naatsi ben kisi atibron, èn joe atibron ben kon, nanga na faste ten . . . foe pori den di e pori na grontapoe.” — Openb. 11:17, 18.
16. (a) Sortoe plan den naatsi abi now, èn sortoe warskow e gi ini disi? (b) Tapoe sortoe warskow wi alamala sa poti prakseri tapoe wan froestan fasi?
16 Foe abi winimarki na a sé foe sroedati, meki den naatsi ben meki plan foe pori „na grontapoe” so bigi leki a kan èn so ogri leki wi kan prakseri. Bacterie, chemicalie nanga takroe bom e ori klarklari foe kebroiki wantronwantron tapoe na moro strategisch fasi gi ibri feanti. Disi no de ori leki wan kibri tori. Dja nanga jana joe e jere swaki warskow dati na libi foe na libisma-famiri de ini gevaar. Aladi den warskow disi de na a joisti ten èn nanga reti, tokoe na Mekiman foe na grontapoe, Jehovah Gado, no tanapoe na baka. Na warskow di a meki skrifi ini bijbel, abi foe doe nanga en égi doe „foe pori den sma di e pori na grontapoe”. A sa abi en doe ondro en makti. Sma di a de feni boen sa tan na libi. Sma di lobi na libi, spesroetoe tego libi ini wan Paradijs, wani de sote na mindri den sma di sa tan na libi.