Na ten gi wan waktiman leki Ezechiël
1. (a) Sensi oten Gado ben meki en „waktiman”-klasse bar’wroko gi en warskow èn nanga sortoe prakseri? (b) San na kristenheid ben doe na presi dati a ben meki sma jere na warskow?
Moro leki 30 jari bifo atoombom ben barster ini na Fara Oosten, Jehovah ben poti nanga en sari-ati en waktiman foe bar’wroko gi na warskow foe san ben de now krinkrin krosibé, ini na ten foe na libisma-lo disi. Srefi bifo ini 1914 na Fosi Grontapoe-feti ben bigin, a ben poti en „waktiman”-klasse foe bar’wroko gi na warskow. Disi no ben doe wawan foe warskow den sma di ben wani sabi fa den ben kan tan ini libi, ma sosrefi toe foe warskow den tranga-ede feanti foe Jehovah. Na so fasi den feanti dati sa sabi foe sortoe fonten na pori e kon. Nowan sma sa kan feni fowtoe ofoe abi wan gron foe kragi, dati A no ben warskow den sma na fesi. Na kristenheid, di abi na bijbel ini moro leki 1000 tongo, ben moe de, tapoe na gron foe san a taki a de, foe troe na wrokosani foe meki sma jere na warskow. Ma a no ben doe wroko leki so. Na presi foe dati, a ben teki prati na den toe grontapoefeti nanga tra feti foe na eeuw disi, èn den feti disi ben tjari boen foeroe pori kon tapoe grontapoe. Soema de dan na „waktiman”-klasse di de moro leki wán soema?
2, 3. (a) Soema Gado ben teki foe meki sma jere na warskow foe wan grontapoe froedoe èn soema a ben kebroiki ini na ten disi foe meki sma jere so wan srefi warskow? (b) Foe sanede a frantwortoe no kan poti tapoe Jehovah foe na lasi foe libi?
2 Noach no ben préki wawan ini en dé, ma foe poti krakti gi en mofo-boskopoe ben bow sosrefi toe wan bigi ark. Foe datede meki Noach ben de ini na ten dati Jehovah spesroetoe kotoigi nanga waktiman. En oso-famiri di ben abi 7 soema na ini ete, ben tanapoe na en baka ini en prekti leki waktiman. Ini Hebr. 11:1-7 wi e kisi foe jere dati foe na sé foe Noach kotoigi ben gi dati a ben prisiri Gado. A ben de wan kotoigi foe Jehovah Gado di a ben feni boen. A ben de „wan prékiman foe regtvaardiki fasi” (2 Petr. 2:5). Ini disi ten wi tanapoe na fesi wan „doe foe Gado” di sa de na eri grontapoe leki na froedoe foe Noach dé. Leki fa den tori e sori, dan soema Gado e kebroiki foe warskow na eri grontapoe foe disi? Faja kristensma di sma sabi alape leki „Jehovah Kotoigi”. Jehovah foe datede te nanga now de troetroe fri foe fowtoe. A no ben frigiti foe meki sma sabi na Gado warskow nanga jepi foe den miljoen miljoen kotoigi foe en!
3 Te ini na kaba foe na seti foe sani di e kon tapoe a eri grontapoe, libisma libi e go lasi, dan na frantwortoe foe disi no sa de na Jehovah. A sa kon tapoe den skowroe foe ala sma di poti en a wan sé foe handri akroederi na Gado warskow. A kristenheid srefi no ben poti prakseri tapoe a warskow, di kotoigi foe Jehovah ben meki sma jere. Fa a ben sa de efoe makandra nanga Jehovah Kotoigi den ben meki sma jere na warskow di Gado ben gi? Fa disi ben sa de wan bigi difrenti ini libisma afersi!
A WAKTIMAN FOE ISRAËL INI OWROETEN
4. (a) Soema Jehovah ben wiki foe den wan proféti gi en pipel Israël èn soema na proféti e agersi? (b) Sortoe komando Ezechiël ben kisi?
4 Nanga jepi foe en Gado krakti meki Jehovah ben sabi a fesi dati srefi na kristenheid ben sa moe jere en laatste warskow. A ben sabi san na istoria foe en pipel foe den ten bifo Kristus ben wani agersi. Ini na jari 613 bifo G.T. a ben meki wan djoe opo kon, di ben nen Ezechiël foe de wan proféti gi en égi pipel. Soboen aladi Ezechiël ini a ten dati ben de leki katiboman ini na kondre Babylon, tokoe a ben de Jehovah waktiman gi Israël. Den profétitori di a ben taki ben tjari go na a zuid-westen, na Jeruzalem ini na kondre Juda. San Jehovah ben taigi Ezechiël ini a ten dati de prenspari gi wi ini a ten disi, bikasi Ezechiël ben de wan agersi fasi foe Jehovah disiten salfoe kotoigi. Na salfoe klasse disi ben handri akroederi nanga den sani di Jehovah ben taki gi Ezechiël nanga den wortoe disi: „Libisma pikin, leki wan waktiman mi ben meki joe gi na oso foe Israël, èn joe moe jere foe mi mofo wan wortoe èn foe mi ede joe moe warskow den. Te mi taki gi wan ogri soema taki: ’Séker joe sa dede’, èn joe no warskow en troetroe èn joe no e taki troetroe foe warskow na ogri soema foe en ogri pasi foe ori en na libi, dan en, foe di a de ogri, sa dede ini en sondoe, ma en broedoe mi sa aksi baka foe joe égi anoe.” — Ezech. 3:17, 18.
5, 6. (a) Ini sortoe pisiten Ezechiël ben libi? (b) Foe sanede Gado no ben kan kisi na fowtoe dati a ben gi Ezechiël wan moeiliki wroko?
5 Foe sanede Jehovah ben taki so tranga nanga na djoe disi Ezechiël? Foe di Ezechiël ini na jari dati 613 bifo G.T. ben e libi ini den laatste dé foe na kownoekondre Juda, nanga en mamafoto Jeruzalem, di ben sa pori. A pipel foe en di ben de jana ini na kownoekondre dati, ben tjari kon ini wan nationaal froebontoe nanga jepi foe na proféti Mozes leki mindriman. Soboen, leki wan memre foe na pipel dati, Ezechiël ben abi wan verprekti en eri libi langa na fesi foe Jehovah. A ben de sosrefi toe wan priester, di ben moe dini Jehovah ini en tempel ini Jeruzalem. Soboen, a ben de wan sani foe ensrefi dati a ben moe gi Jehovah wan sani. Foe datede meki fowtoe no ben kan feni a Gado, dati no nanga reti a ben poti tapoe Ezechiël wan moeiliki wroko; Ezechiël di ben gebore ondro na nationaal froebontoe èn di den prekti foe na priesterwroko foe na famiri foe Aäron ben de na en tapoe èn di ben de ondro na épriester Seraja. — 2 Kon. 25:18.
6 Den memre foe a pipel foe Ezechiël ben de den sma di Jehovah ben taki nanga mofo foe Jesaja: „’Oenoe de mi kotoigi’, so Jehovah taki, ’ja mi knekti, di mi ben verkisi’” (Jes. 43:10-12). Ezechiël ben de foe datede wan agersifasi foe na georganiseerde skin foe den salfoe kotoigi ini disi ten, di kisi salfoe nanga Gado jeje, den jeje Israëlsma. Den salfoe kotoigi disi e libi ini wan ten di wani taki moro foeroe leki Ezechiël ten.
7. (a) Sortoe tiri ini a ten foe Ezechiël ben de ini gevaar, ma fa na situwasi de ini na ten disi? (b) O langa Ezechiël ben meki sma jere na warskow bifo na pori kon di ben taki na fesi?
7 Ini na ten dati, na soso a pikin kownoekondre Juda ben de ini gevaar. Now a sani di a kownoekondre dati foe owroeten e agersi, namkoe na kristenheid, de ini gevaar nanga ala en grontapoe kompe. Ja, na eri seti foe sani na eri grontapoe de ini na kroetoe, soleki ini den dé foe Noach na eri grontapoe ben de foe go ini pori. Wan moro tranga fanowdoe sani ben de foe Gado warskow nanga mofo foe Ezechiël, bikasi Ezechiël ben meki sma jere na warskow soso 4 jari bifo den legre foe Babylon ben fadon go ini a kondre pe a ben gebore, ofoe 6 jari bifo na foto Jeruzalem nanga en tempel di ben lontoe nanga sroedati ben fadon. Foeroe sma foe na Jeruzalem di sroedati ben lontoe ben dede foe angri, pestsiki nanga na feti-owroe. Foeroe foe den sma di ben tan na libi ben tjari go ini katibo foe dede ini na fara Babylon. Soboen, den sma foe Ezechiël ten ben de ini gevaar foe na rampoe dati ben kisi den.
8. (a) Sortoe pori di ben de ini na fosi eeuw, e jepi wi foe froestan oten Gado sa meki na aanstaande grontapoe-pori kon? (b) Soema ini a ten dati ben meki sma jere Gado warskow èn o prenspari den warskow-wroko foe den ben de?
8 O pikinso kande na ten di wi abi ete de, wi kan si ini . . . foe den sani di e pasa na grontapoe leki fa den bijbel profétitori ben taki. Ini Jezus profétitori, di skrifi ini Matteus kapitel 24 nanga 25, a ben warskow en discipel, di ben sa de den fosi memre foe na „getrow nanga koni srafoe”-klasse, foe na pori di ben sa kon tapoe Jeruzalem ini den égi ten. Na a fasi disi a ben meki en discipel froestan den frantwortoe di den abi na fesi den djoe sma di ben libi ini na district Judéa. Den ben de ini so wan bigi gevaar, foe di rampoe ben de foe kon tapoe na naatsi. Efoe den memre foe na kristen „srafoe”-klasse foe na ten dati no ben sa warskow èn gi tranga na den djoe foe a moeiliki ten dati foe gwe libi so esi leki den kan na presi foe gevaar, dan den ben sa abi frantwortoe na ini, dati den djoe di no ben kisi warskow ben lasi den libi nanga fri.
9. Fa Ezechiël de wan toemsi moi eksempre foe Gado salfoe „srafoe” ini disi ten?
9 San ben sa pasa efoe Ezechiël langa ten pasa kaba no ben doe a wroko di a ben kisi foe warskow den kondreman foe en di ben de ini gevaar ini na farawe presi pe den ben de? A no ben sa pasa libilibi na pori foe Jeruzalem ini 607 bifo G.T., bikasi Jehovah ben sa aksi en frantwortoe foe na broedoe foe den. A de krin, dati solanga communicatie ben de ete nanga na Jeruzalem di ben sa go ini pori, dati Ezechiël ben doe getrow na wroko di Gado ben gi en, bikasi a ben de wan prisiri gi Jehovah foe meki a tan na libi. A ben prisiri Jehovah sosrefi toe foe kebroiki en ini na di foe 27 jari foe en katibo ini Babylon foe taki wan profétitori. Dati ben de 16 jari baka di na ogri trowe foe broedoe ini Jeruzalem ben kon ini 607 bifo G.T. (Ezechiël 29:17; 40:1). Ini disi a ben de wan toemsi moi eksempre foe na salfoe „srafoe”-klasse ini wi ten di foeroe nanga gevaar. Efoe aparti memre foe na „srafoe”-klasse stop foe meki sma jere na warskow èn meki den ogrisma kon sabi foe na kroetoe di e kon, dan a no de foe taki dati den sa moe gi frantwortoe na Jehovah foe dati. Ma na moro bigi pisi foe a „srafoe”-klasse sa de leki Ezechiël. Den no sa kisi na frantwortoe foe broedoe-paiman.
10. (a) O prenspari na positie foe wan waktiman de? (b) Fa Gado e sori broko-ede gi den sma di moe kisi warskow èn sosrefi toe gi en waktiman?
10 A de wan sani di de krin, dati wan waktiman de ini wan toemsi frantwortoe presi. Te wan sroedati ini ten foe feti ben fadon ini sribi pe a de koti wakti, dan den e kiri en, bikasi no wawan dati a libi foe tra sma e kon ini degedege, ma na risico de toe foe lasi na feti (Recht. 7:19). Soboen, Gado no e broko-ede wawan foe na libi foe den sma di moe kisi warskow, ma sosrefi toe foe na libi foe en waktiman. Disi e kon na krin ini san a de taki moro fara gi Ezechiël: „Ma foe joe sé, efoe joe warskow wan ogrisma èn a no de drai libi troetroe na ogrifasi èn ogri pasi foe en, dan ensrefi sa dede foe en sondoe ede; ma foe joe sé, joe sa ben fri joe égi sili. Èn efoe wan regtvaardiki sma drai libi en regtvaardiki fasi èn e doe troetroe kroektoedoe èn mi moe poti wan ston foe naki foetoe na en fesi, dan ensrefi sa dede, foe di joe no ben warskow en. Foe en sondoe ede a sa dede, èn en regtvaardiki wroko di a ben doe, no sa teri, ma en égi broedoe mi sa aksi foe joe anoe baka. Èn foe joe sé, efoe joe ben warskow wan regtvaardiki soema, sodati na regtvaardiki soema no sondoe, èn ensrefi no sondoe troetroe, dan sondro mankeri a sa tan na libi, foe di a ben kisi warskow, èn joesrefi sa fri joe égi sili.” — Ezechiël 3:19-21; 33:2-9.
11. Fa na wroko foe na „getrow èn koni srafoe” e akroederi nanga di foe wan waktiman?
11 Ini Psalm 127:1 tanapoe: „Efoe Jehovah srefi no ori wakti gi na foto, na foe soso dati na waktiman ben ori wakti.” Ma tokoe a de so, dati wan waktiman tapoe wan foto-skotoe ben kisi na kibri foe na libi foe den soema di e libi ini na foto. A de verprekti foe warskow den borgroe efoe na libi nanga na fri foe den e kon ini gevaar. Nanga reti a no ben sa wani dati a broedoe foe den kon tapoe en ede. Efoe a de tan na ai èn e ori wakti, dan en sa kisi na nen dati na libi foe tra soema sili a ben kibri. Ini so wan situwasi na „getrow nanga koni srafoe”-klasse de ini disi ten, now di na owroe seti foe sani de foe komoto na pasi. Soleki a ben de ini a tori foe Ezechiël, na so Jehovah ben poti na „srafoe”-klasse leki wan „waktiman” foe ori wakti tapoe den tego belang foe ala sma di taki dati den de en pipel.
WARSKOW DI DISITEN WAKTIMAN GI
12, 13. (a) San Gado wani si foe sma foe na warskow di a de bar’wroko gi? (b) Sortoe okasi e kon opo nanga na bar’wroko foe warskow, ma fa a de nanga den sma di no e poti prakseri na tapoe?
12 Ma na soso den sma di taki dati den de kristensma de ini gevaar foe kisi pori na a kaba foe a seti foe sani? Nono, sosrefi toe, ala tra religiesma èn srefi den sma di no abi noti foe doe nanga na georganiseerde religie. Na Mekiman foe grontapoe, Jehovah Gado, sabi disi. A no ben sa wani foe pori na libisma-famiri. Na lostoe foe en de dati someni sma leki a kan kisi loesoe foe na tego pori èn sori dati den de warti foe a libi ini en regtvaardiki njoen seti foe sani. Foe na sani disi ede, meki a ben bar’wroko gi en warskow na alape.
13 Tapoe wan sari-ati fasi a ben ferteri disi fosi na a „waktiman”-klasse, di Ezechiël de wan agersi foe en. Na so fasi a ben meki na klasse disi tron en „waktiman” di abi na ini foeroe soema. Na „waktiman-”klasse disi abi spesroetoe leki wroko foe bar’wroko gi na warskow foe Gado. Foe do den gi warskow na a joisti ten, meki moro nanga moro sma e kisi na okasi foe jere na warskow èn handri akroederi nanga dati nanga na owpoe foe tan na libi pasa leti mindri na kaba foe na owroe grontapoe. Foe na sé foe den sma di e wégri foe poti prakseri tapoe na warskow di Gado ben gi, a broedoe foe den sa kon tapoe den égi ede.
14, 15. (a) Soema no ben abi winimarki nanga na tapoe foe na mofo foe den sma di e bar’wroko foe na warskow, ma soema ben arki èn ben teki na warskow boen? (b) San a sa wani taki te na ten foe „boen wani” foe Jehovah sé kon na wan kaba?
14 Sma ben kon sabi na a eri grontapoe na „waktiman”-klasse foe Jehovah. Den feanti foe den nanga prisiri ben sa wani dati na warskow sten foe den ben tapoe. Den e si na warskow leki wan sani di wani trowe na gron na seti foe sani foe den. Ma ala moeiti di den e doe, de foe soso! Spesroetoe sensi 1919, na jari pe na grontapoe ben bigin nanga den moeiti foe en foe kon boen baka foe den soro di na Fosi Grontapoefeti ben tjari kon, dan alaten na warskow ben de foe jere. Na pisi ten sensi a ten dati de wan pisi foe san e kari ini Jesaja 61:2 „na jari foe boen wani foe na sé foe Jehovah”. Disi wani taki dati en atibron no kanti trowe ete tapoe na seti foe sani di e tjalansi Gado. Sortoe marki disi ben dini? Nanga disi na profétitori foe Jezus te leki na dé foe tide ben kan kon troe: „Na boen njoensoe disi foe na kownoekondre sa préki tapoe na eri grontapoe leki wan kotoigi gi ala naatsi” (Matt. 24:14). Leki wan bakapisi foe dati meki foeroe sma di de wan pisi foe na fika-pisi foe erfgenaam foe na kownoekondre dati ben teki na Kownoekondre-boskopoe tapoe wan boen fasi. Na so fasi den ben njan boen foe na „boen wani foe na sé foe Jehovah”. Den kon de wan pisi foe na „waktiman”-klasse. Den ben teki prati na ini foe meki sma jere na warskow foe Gado.
15 Na agersi „jari” pe na „boen wani foe na sé foe Jehovah” e sori, de wan ten nanga wan kaba. Ala sani e sori dati na ten disi eri esi e kon na wan kaba. Na kaba disi no sa de wan „Kolokoe Njoen-jari!” ma a sa marki na ten pe Jehovah „boen wani” o kenki kon ini en atibron. Disi wani taki dati „na dé foe na refrensi foe na sé foe wi Gado” sa bigin (Jes. 61:1, 2). A sa de a moro doengroe dé di a grontapoe foe libisma oiti sa ondrofeni.
16. San na „waktiman”-klasse e doe foe di den e bar’wroko gi na warskow?
16 Disi e meki a de tranga fanowdoe gi na „waktiman”-klasse foe bar’wroko gi na warskow dati na „jari” foe Jehovah boen wani de foe kon na wan kaba èn en „dé foe refrensi” de foe bigin. Dati sondro trangajesi den e bar’wroko gi na warskow foe Gado no sa kibri na owroe seti foe sani disi di den e lapoe èn en faja bakaman foe no kisi pori ini na „bigi benawtoe” di e kon. Ma na sani disi no e gi na „waktiman”-klasse brokoskin. Den e kisi na djaranti dati efi den drai ogrisma poeroe foe den ogri pasi foe den èn tjari den foe doe regtvaardiki sani, den sma disi sa tan na libi èn no sa dede makandra nanga na owroe grontapoe disi. Na so fasi na „waktiman”-klasse no sa kan kisi broedoepaiman foe den sma di ben kisi na warskow foe drai baka gi den ogri foe den di e tjari dede kon. Na „waktiman”-klasse abi sosrefi toe na djaranti dati nanga na oridoro warskow-wroko foe den, disi e tapoe regtvaardiki sma foe go ini na fowtoe pasi èn waka baka na ogri grontapoe, sodati den ben sa kisi kroetoe foe go ini pori makandra nanga na grontapoe ini na „bigi benawtoe”. Disi de wan sani di e gi na „waktiman”-klasse toemsi foeroe satisfaksi. Na dienst foe den no sa de foe soso!
17. (a) Sortoe paiman na „waktiman”-klasse ben kisi? (b) Soema ben go moksi densrefi nanga den now foe bar’wroko gi na warskow?
17 Na „waktiman”-klasse no kon weri ete foe bar’wroko gi na warskow foe „na dé foe na refrensi foe wi Gado”. Sosrefi toe a no go taki moro safri, èn a abi na faste bosroiti foe no doe disi toe. Èn leki wan paiman, fa wan moi sani e kon na fesi den ai leki wan grani gi Jehovah! Wan „bigi ipi” soema di no kan teri èn di teki na warskow tapoe wan boen fasi e opo kon na fesi foe na „waktiman”-klasse (Openb. 7:9). Den ai foe na „bigi ipi” dati opo, sodati den e si na feti-owroe foe Jehovah kroetoeman, di de foe wai poeroe den ogri gensman foe en Messias kownoekondre. Fo jari bifo na Tweede Grontapoefeti na „bigi ipi” disi ben bigin seti ensrefi troetroe èn ben bigin tai ensrefi na a „waktiman”-klasse. Grantangi foe Gado dati na Tweede Grontapoefeti no ben go abra ini na „dé foe refrensi foe na sé foe wi Gado”. So srefi toe wan kaba no ben kon ofoe wan go safri safri foe na kon moro foeroe foe na „bigi ipi” ini na ten foe na Tweede Grontapoefeti nanga na bakapisi foe en, na „bigi ipi” di na mindri na ferfolgoe ini na eri grontapoe ben poti ensrefi na a sé foe na „waktiman”-klasse. Nanga disi ben kon sosrefi toe tapoe den skowroe na verprekti, makandra nanga a „waktiman”-klasse foe meki bekenti sondro frede nanga wan tranga sten na warskow foe Gado. Den no ben frede foe teki na frantwortoe disi na den tapoe. Nanga na fasi disi den no wani sori wawan na gi jesi na Jehovah Gado tapoe wan lobifasi, ma den wani sori sosrefi toe na lobi foe den gi den naaste, tra sma leki densrefi.
18, 19. (a) Sortoe wroko de now toemsi tranga fanowdoe, èn di de akroederi nanga den wortoe foe Jesaja 52:8? (b) San moe bewégi wi foe abi wan prati na a warskow foe Gado?
18 Tapoe na lati pisi ten disi, now di den dé e kon na wan kaba gi na kristenheid nanga na seti foe sani disi di e go ini pori, dan a de tranga fanowdoe foe doe wroko ini wanfasi. Langa ten pasa kaba, na proféti Ezechiël nanga a proféti Jeremia foe en ten, aladi den ben de ondro-ondro kilometer fara foe makandra, ben bar’wroko makandra foe warskow na tranga-ede naatsi foe den foe na „dé foe refrensi” di ben kan kon ibri momenti gi den. Now ini wi eeuw, sensi na kaba foe na Fosi Grontapoefeti, dan den wortoe foe Jesaja 52:8 e kon troe tapoe a pipel foe Jehovah di gi densrefi abra na en: „Arki! Oen égi waktiman ben opo den sten. Ini wanfasi den e tan bari nanga prisiri; bikasi fesi nanga fesi den sa si te Jehovah e tjari Sion kon baka.” Ala sma di ben tjari kon ondro na „hemel Sion”, ben si na srefi visioen ini na leti foe bijbel profétitori di ben kon troe ini na ten dati; makandra den ben si fa Jehovah anoe ben wroko foe na boen foe den. Den ben opo den sten foe meki wan wanfasi boskopoe bekenti gi na eri grontapoe. Now, moro leki 60 jari na baka, den moe tan gi den wanfasi kotoigi, soso den moe meki sma jere now na tranga fanowdoe warskow foe Jehovah „dé foe refrensi”. Na „bigi ipi” di komoto foe foeroe naatsi èn foe foeroe tongo, moesoe opo makandra nanga na „waktiman”-klasse den sten.
19 Foe datede, go ini wanfasi na fesi èn meki sma jere na warskow foe „na dé foe refrensi foe na sé foe wi Gado”! Meki wi ori wisrefi fri foe broedoe-paiman, bikasi wi wani tan na libi ini „na dé dati foe refrensi”. Foeroe foe wi naaste ben sa wani prisiri densrefi sote ini na srefi ferloesoe. Meki na toemsi bigi lobi foe wi gi Jehovah nanga Jezus Kristus nanga na lobi foe wi gi wi naaste, sma na oen sé, bewégi wi sondro foe stop foe meki sma jere na warskow di e gi libi. A sa gi oen toemsi foeroe prisiri! Ma a moro prenspari wan foe ala sani de, dati nanga dati Jehovah e kisi reti leki na Sma di broko-ede nanga wi tapoe wan lobi fasi!