San Bijbel e taki fu a sorgu di wi musu sorgu wi papa nanga mama di kon owru kaba?

A piki fu Bijbel

Pikin di kon bigi kaba abi a prenspari frantwortu fu sorgu den papa nanga mama di kon owru kaba. Bijbel e taki dati pikin di kon bigi kaba musu ’sorgu gi den wan na ini den eigi osofamiri, soleki fa a bribi fu den e leri. Na so den e gi den papa nanga mama san den abi reti na tapu, bika na dati Gado feni bun’ (1 Timoteyus 5:4). Te pikin di kon bigi kaba e sreka sani fu sorgu den papa nanga mama di kon owru kaba, dan den e gi yesi na a komando na ini Bijbel di e taki dati den musu lespeki den papa nanga mama.​—Efeisesma 6:2, 3.

Bijbel no e taki finifini fa wi musu sorgu wi papa nanga mama te den kon owru. Ma wi kan leisi tori fu man nanga uma di ben abi bribi èn di ben sorgu den owrusma fu den. Bijbel e gi moi rai tu di kan yepi den wan di musu sorgu den sortu sma disi.

• Fa son sma na ini Bijbel ten ben sorgu den papa nanga mama di ben kon owru kaba?

• Sortu moi rai Bijbel e gi sma di musu sorgu gi den owrusma fu den?

• Bijbel e taki dati wi musu sorgu gi wi owru papa nanga mama na den eigi oso, noso taki den musu kon tan nanga wi?

Fa son sma na ini Bijbel ten ben sorgu den papa nanga mama di ben kon owru kaba?

Den du dati na difrenti fasi, soleki fa den ben man na ini a situwâsi fu den.

• Yosef ben tan fara fu en owru papa Yakob. Di Yosef ben abi na okasi, a seti sani so, taki Yakob ben kan froisi kon tan moro krosibei fu en. A sorgu taki en papa ben abi wan presi fu tan, taki a ben abi nofo nyanyan èn taki ogri no ben o miti en.​—Genesis 45:9-11; 47:11, 12.

• Rut froisi go tan na ini a kondre fu a mama fu en masra, èn a du ala san a man fu sorgu en.​—Rut 1:16; 2:2, 17, 18, 23.

• Yesus seti sani syatu fosi a dede, so taki wan sma ben o sorgu en mama Maria. Soleki fa a sori, dan Maria masra ben dede kaba.​—Yohanes 19:26, 27.a

Sortu moi rai Bijbel e gi sma di musu sorgu den owrusma fu den?

Son leisi, den wan di musu sorgu den papa nanga mama di kon owru kaba, kan kon weri noso den kan lasi-ati. Bijbel abi moi rai di kan yepi den fu no gi abra.

• Lespeki yu papa nanga mama.

  San Bijbel e taki: „Lespeki un papa nanga un mama.”​—Eksodes 20:12.

  Fa wi kan fiti a rai disi? Yu e sori lespeki gi yu papa nanga mama te yu e meki den du sani soleki fa den srefi wani, solanga den man du dati ete. Efu a kan, meki den srefi taki na sortu fasi den wani taki yu yepi den. Na a srefi ten yu kan du muiti fu yepi den so furu leki yu man.

• Pruberi fu frustan fa den e firi èn gi pardon.

  San Bijbel e taki: „Koni fu man si sani krin e meki taki wan man en ati no e bron esi èn a moi te wan sma no e prakseri den fowtu fu trawan moro.”​—Odo 19:11.

  Fa wi kan fiti a rai disi? Efu yu papa noso mama taigi yu wan hati sani, noso efu a gersi leki a no e warderi a muiti di yu e meki fu sorgu en, dan aksi yusrefi: ’Fa mi ben o firi efu mi no ben man du sani moro leki fosi fu di mi de na ini a situwâsi fu den?’ Te yu e pruberi fu frustan fa den e firi èn te yu no e hori den na ati, dan a no o hebi so gi yu fu sorgu gi den.

• Suku rai na trawan.

  San Bijbel e taki: „Te sma no e taki krin nanga makandra, ala sani e bruya, ma te furu raiman de, sani e waka bun.”​—Odo 15:22.

  Fa wi kan fiti a rai disi? Ondrosuku fa yu kan yepi yu papa nanga mama nanga den problema di den abi nanga a gosontu fu den. Presi de ini yu kontren pe den e sorgu sma di abi a problema fu yu papa nanga mama? Taki nanga trawan di ben musu sorgu den owrusma fu den tu. Efu yu abi brada nanga sisa, dan kande unu kan kon makandra fu taki fu den sani di un papa nanga mama abi fanowdu. Dan un kan luku fa unu o sorgu den èn fa un kan wroko makandra fu du dati so taki a no furu tumusi gi wan sma.

  

• No fruwakti tumusi furu fu yusrefi.

  San Bijbel e taki: „Koni de nanga den sma di abi sakafasi.”​—Odo 11:2.

  Fa wi kan fiti a rai disi? Hori na prakseri taki yu no man du ala sani. Wi no abi a ten nanga a krakti fu du ala sani, èn dati meki yu no o man du ala san yu wani gi yu papa nanga mama. Efu yu e firi leki a hebi tumusi gi yu fu sorgu yu owru papa noso mama, dan kande yu kan suku yepi na tra famiriman, noso na sma di abi a wroko fu sorgu gi owrusma.

• Sorgu yusrefi bun.

  San Bijbel e taki: „Nowan man abi bita-ati gi en eigi skin. Na presi fu dati, a e gi en nyanyan èn a lobi en.”​—Efeisesma 5:29.

  Fa wi kan fiti a rai disi? Boiti a frantwortu di yu abi fu sorgu yu papa nanga mama, yu abi tra frantwortu tu. Efu yu trow, yu musu sorgu bun gi yusrefi èn gi yu eigi osofamiri. Dati meki yu musu nyan bun, yu musu rostu bun èn yu musu sribi bun tu (Preikiman 4:6). Ten na ten a de fanowdu fu meki ten gi yusrefi. Te yu e du den sani disi dan yu no o lasi-ati, yu no o bruya, èn a no o hebi tumusi gi yu fu sorgu yu papa nanga mama.

Bijbel e taki dati wi musu sorgu gi wi owru papa nanga mama na den eigi oso, noso taki den musu kon tan nanga wi?

Bijbel no e taki krin taki pikin di kon bigi kaba musu sorgu den papa nanga mama na den eigi oso. Son famiri e bosroiti fu du dati so langa leki den man. Ma a kan taki baka wan pisi ten, den feni taki a moro bun fu meki a papa noso a mama go tan na wan presi pe den e sorgu owrusma. A ben o bun efu a famiri kon makandra nanga den owrusma fu den fu luku san moro bun gi ala sma na ini a situwâsi disi.​—Galasiasma 6:4, 5.