Gado de trutru?
A piki fu Bijbel
Iya, Bijbel e sori krin taki Gado de trutru. Bijbel e gi wi deki-ati fu bribi na ini en. Wi no musu du disi soso fu di kerki e leri sma son sani, ma wi musu gebroiki ’wi frustan’ so taki wi kan kon sabi en (Romesma 12:1; 1 Yohanes 5:20). Luku wan tu sani di kan yepi wi fu bribi na ini Gado:
A tumusi moi fasi fa sani orga na ini na universum e sori taki na wan sma meki en. Bijbel e taki: „Iya, ibri oso abi wan sma di meki en, ma a sma di meki ala sani na Gado” (Hebrewsma 3:4). A sani disi makriki fu frustan èn furu sma di kisi hei skoro-leri e agri nanga a prakseri disi.a
Libisma abi na angri fu kon sabi fu san ede den de na libi. Wi no man tapu na angri disi nanga trutru nyanyan. Bijbel e taki fu na agersi angri disi. Dati na a tranga firi di wi abi fu kon sabi Gado èn fu anbegi en (Mateyus 4:4; Openbaring 4:11). A firi disi no e sori wi nomo taki Gado de. Ma a e sori tu taki a lobi wi fu di a e gi wi na okasi fu tapu na angri disi èn fu kon sabi en leki a Mekiman fu wi.
Den profeititori di skrifi na ini Bijbel omeni yari na fesi, kon tru finifini baka ten. A fasi fa den tori disi skrifi èn fa den kon tru e sori krin taki den komopo fu wan moro hei krakti.—2 Petrus 1:21.
Den sma di skrifi Bijbel ben sabi sani fu grontapu di tra sma fu a ten dati no ben sabi. Fu eksempre, furu sma na ini owruten ben e bribi taki grontapu de tapu wan bigi meti, kande wan olifant, wan busi-agu noso wan mankaw. Ma Bijbel e sori taki Gado „anga grontapu na noti” (Yob 26:7). Bijbel e taki tu fu a fasi fa grontapu de. A e taki dati grontapu „lontu” (Yesaya 40:22). Furu sma e agri taki den Bijbel skrifiman ben kan taki den sani disi fu di na Gado ben taigi den.
Bijbel e gi piki tapu furu muilek aksi. Te wan sma no kisi den yoisti piki tapu den aksi disi, dan a kan bigin denki taki wan Gado no de. Fu eksempre: Efu Gado abi so furu lobi nanga krakti, dan fu san ede so furu pina nanga ogri de na grontapu? Fu san ede kerki e meki taki so furu ogri e pasa na presi fu du bun?—Titus 1:16.
a Fu eksempre, Allan Sandage, di e ondrosuku den stari nanga planeiti ben taki disi fu na universum: „A no kan de so taki a fasi fa na universum orga, kon fu ensrefi. Wan sani musu de di poti ala sani na en presi. Mi no man frustan taki wan Gado de, ma a wondrufasi fa na universum meki e sori taki na wan sani meki den.”