YONGUSMA E AKSI
Orale seks na seks trutru?
Soleki fa a Amerikaanse Centrum voor Ziektebestrijding en -preventie e fruteri, dan sowan afu fu ala den yonguwan di abi 15 te go miti 19 yari ben taki dati den ben abi orale seks. Dati na te sma abi seks nanga den mofo. „Efu yu e taki nanga yonguwan fu orale seks, dan den e taki dati a sani dati no fout srefisrefi,” Na so Sharlene Azam e taki, di skrifi a buku Oral Sex Is the New Goodnight Kiss. „Den e taki srefi taki den no e si a sani dati leki seks.”
San yu e denki?
Piki den aksi disi nanga iya noso nôno.
Wan meisje kan kon de nanga bere efu a abi orale seks?
Iya
Nôno
Wan sma kan kon siki efu a abi orale seks?
Iya
Nôno
Te wan sma abi orale seks, dan dati na trutru seks?
Iya
Nôno
Fa sani de trutru?
Luku efu den piki fu yu na a srefi leki den wan di wi kari dyaso.
Wan meisje kan kon de nanga bere efu a abi orale seks?
A piki: Nôno. Disi e meki taki furu sma abi a fowtu denki taki orale seks a no wan ogri sani.
Wan sma kan kon siki efu a abi orale seks?
A piki: Iya. Wan sma di abi orale seks kan kisi hepatitis (A noso B), genitale wratten, Droipi, herpes, HIV, nanga syfilis.
Te sma abi orale seks, dan dati na trutru seks?
A piki: Iya. Iniwan sani di wan sma e du di abi fu du nanga a syenpresi fu wan tra sma na seks. Disi na sani soleki trutru seks, orale seks, anale seks, nanga a prei di wan sma e prei nanga a syenpresi fu wan tra sma.
Fu san ede a prenspari fu sabi?
Luku wan tu Bijbel tekst di e taki fu a tori disi.
Bijbel e taki: „Bika disi na san Gado wani: . . . un no musu du hurudu.”—1 Tesalonikasma 4:3.
A wortu di vertaal nanga „hurudu” abi fu du nanga ala fasi fa sma di no trow e abi seks nanga makandra. Disi abi fu du sosrefi nanga orale seks, anale seks, a prei di wan sma e prei nanga a syenpresi fu wan tra sma. Wan sma di e du hurudu kan kisi den takru bakapisi fu dati, ma a moro sari sani na taki a e pori a matifasi di a abi nanga Gado.—1 Petrus 3:12.
Bijbel e taki: „A sma di e du hurudu, e sondu teige en eigi skin.”—1 Korentesma 6:18.
Orale seks kan abi takru bakapisi gi a gosontu fu wan sma èn sosrefi gi a matifasi di a sma abi nanga Gado. A kan meki wan sma firi sari tu. A buku Talking Sex With Your Kids e taki: „A no soso te wan sma abi seks na a syenpresi fu wan umasma dan dati kan meki wan sma firi sari noso meki a firi taki wan sma meki misbruik fu en.” ’Den takru firi di wan sma e kisi kan kon tu te a abi seks na wan fasi di no fiti. Seks tan seks.”
Bijbel e taki: „Mi, Yehovah, na yu Gado. Mi na a sma di e leri yu fu kisi wini.”—Yesaya 48:17.
Yu e bribi taki den wet di Gado poti èn di abi fu du nanga seks, na sani di e tyari wini kon gi yu? Noso yu e denki taki den e tapu yu fu du san yu wani? Fu yepi yu fu piki den aksi disi, dan a bun fu prakseri na eksempre disi: prakseri wan druk pasi pe bord skrifi o tranga yu no mag rèi èn pe verkeerslicht de, nanga tra stop bord. Yu feni taki den bord disi e tapu yu fu du san yu wani, noso yu feni taki den e yepi meki ogri no miti yu? San ben o pasa efu yu noso wan tra sma di e rèi ini a verkeer no e du san den wet ini a verkeer e taki?
Den wet na ini a verkeer e meki taki yu no man du san yu wani, ma den e sorgu tu taki ogri no e miti yu. Na so a de tu nanga den wet fu Gado. Den e tapu yu fu du san yu wani, ma den e kibri yu
Na so a de tu nanga den wet fu Gado. Efu yu no e du san den e taki, dan yu o koti san yu sai (Galasiasma 6:7). A buku Sex Smart e taki. „O moro yu no e hori yusrefi na den sani di yu e bribi èn na den bun gwenti fu yu èn o moro yu e du sani di yu sabi taki den no bun, o moro yu no o lespeki yusrefi.” Ma na a tra sei, efu yu e hori yusrefi na den wet fu Gado, dan o moro yu e sori taki yu abi a krakti fu du san bun. Ma san moro prenspari, na taki yu o abi wan krin konsensi.—1 Petrus 3:16.