1, 2. San o miti Paulus te a o teki waka èn nanga sortu sani a e broko en ede now?

GRANMAN Festus ben taigi Paulus: „Na Grankownu yu o go.” Na den wortu disi Paulus e tan prakseri, fu di den kan kenki a fasi fa sani o waka gi en. Tu yari langa Paulus ben de na straf’oso èn a no ben si noti, ma te a o teki a langa waka go na Rome, a o si furu sani now (Tori 25:12). Ma te Paulus e prakseri den tra leisi di a ben e teki waka nanga sipi, dan a no e memre a switi winti nomo nanga a bigi se. Now di Paulus de na ini a sipi fu go na Grankownu, dan a kan taki a e aksi ensrefi fa a libi fu en o waka.

² Di Paulus ben de na se, dan someni sani psa di ben kan meki taki ’ogri miti en’. Dri leisi a sipi pe a ben de na ini sungu, ma a tan na libi èn a psa wan heri dei nanga neti na ini a se (2 Kor. 11:25, 26). Ma a waka disi o de heri tra fasi leki den waka di a ben teki leki zendeling di a ben de wan friman. Paulus o teki waka leki wan strafman èn a o go bun fara. Iya, a o kmoto na Sesareya go na Rome di ben de 3000 kilometer moro fara. A o man psa a waka disi sondro taki wan sani psa nanga en? Awansi noti no psa nanga en, sma o krutu en èn gi en dedestrafu te a doro Rome? No fergiti taki na a moro makti tiriman fu Satan grontapu fu a ten dati o krutu en drape.

3. San Paulus ben de klarklari fu du èn fu san wi o taki na ini a kapitel disi?

³ Now di yu leisi someni sani fu Paulus, yu denki taki a lasi howpu noso taki a bruya di a prakseri den sani di kan miti en? Kwetkweti! A ben sabi taki tranga ten ben e wakti en, ma a no ben sabi sortu problema a ben o kisi. Fu san ede a ben o bigin broko en ede nanga sani di a no ben o man kenki èn lasi en prisiri na ini a preikiwroko? (Mat. 6:27, 34) Paulus ben sabi taki Yehovah ben wani taki a musu gebroiki ibri okasi fu preiki a bun nyunsu fu Gado Kownukondre, srefi gi tiriman (Tori 9:15). Paulus ben de klarklari fu du a wroko di Gado gi en, awansi san ben o psa. A no so wi e denki tu? Sobun, kon meki wi go makandra nanga Paulus te a o teki a span waka disi, aladi wi e luku fa wi kan kisi wini fu na eksempre fu en.

’A winti ben e wai kon tranga na den tapu’ (Tori fu den apostel 27:1-7a)

4. Nanga sortu sipi Paulus bigin a waka fu en èn suma ben go nanga en?

⁴ A sma di ben musu luku Paulus nanga ete wan tu strafman ben de yulius, wan legre-ofsiri fu Rome. Na en taki dati den ben musu teki wan sipi di ben doro na Sesareya èn di sma ben gebroiki fu du bisnis. A sipi disi ben kmoto na Adramitiyum, wan lanpe na a syoro na west-sei fu Pkin Asia, abrasei fu a foto Mitileine di ben de na a èilanti Lesbos. A sipi ben o seiri go na noordsei èn baka dati a ben o go na west-sei, aladi a ben o stop na difrenti presi fu puru lai èn fu teki lai. Den sortu sipi disi no ben meki fu tyari sma èn den no ben bun tu gi strafman. (Luku a faki di nen „Sipi di ben e du bisnis”.) Koloku taki Paulus no ben o de a wan-enkri Kresten na mindri den ogriman. Tu Kresten brada, Aristarkus nanga Lukas, go nanga en. A no de fu taki dati na Lukas skrifi a tori disi. Wi no sabi efu den tu bun mati disi fu Paulus pai gi a waka disi noso efu den ben go leki futuboi fu en.​—Tori 27:1, 2.

5. Suma Paulus ben man miti na Sidon èn san wi kan leri fu a sani disi?

⁵ Baka di a sipi seiri wán dei na se èn a waka sowan 110 kilometer go na noordsei, dan a doro na a lanpe fu Sidon, na a syoro fu Siria. Soleki fa a sori, dan yulius no ben e du nanga Paulus leki fa a ben gwenti du nanga tra ogriman, kande fu di Paulus ben de wan borgu fu Rome èn sma no ben bewijs ete taki a du ogri (Tori 22:27, 28; 26:31, 32). yulius gi Paulus primisi fu go na syoro fu go luku den Kresten brada nanga sisa fu en. Den ben musu fu breiti di den kisi na okasi fu sorgu gi na apostel, baka di a tan so langa na straf’oso. Prakseri na sortu okasi yu kan sori lobi nanga switifasi. Te yu e du dati, dan yu srefi o kisi dek’ati.​—Tori 27:3.

6-8. Fa sani waka gi Paulus di a sipi kmoto na Sidon go na Kenidus? Sortu okasi Paulus gebroiki kande fu preiki?

⁶ Di a sipi kmoto na Sidon, a seiri krosbei fu syoro èn a psa Silisia, di ben de na ini a birti fu Tarsus, a foto pe Paulus ben gro kon bigi. Lukas no e skrifi efu a sipi stop na tra presi, ma a e taki dati ’a winti ben e wai kon tranga na den tapu’. A pkin sani disi di a taki e sori taki problema ben o miti den bakaten (Tori 27:4, 5). Ma tòg wi kan si kba na wi fesi fa Paulus e gebroiki ibri okasi fu preiki a bun nyunsu. Iya, a preiki gi den tra strafman èn gi tra sma na a sipi soleki den botoman nanga den srudati. A preiki sosrefi gi den sma di a ben miti na den lanpe pe a sipi ben e go. Fa a de nanga wi na ini a ten disi? Wi e gebroiki ibri okasi di wi e kisi fu preiki a bun nyunsu?

⁷ Baka wan pisi ten a sipi doro na Mira, wan lanpe na a zuidsei syoro fu Pkin Asia. Drape Paulus nanga tra sma ben abi fu teki wan tra sipi di ben tyari den go doro na Rome, a presi pe den ben musu go te fu kba (Tori 27:6). Na a ten dati Rome ben e bai aleisi fu Egepte èn den aleisboto fu Egepte ben gwenti kon na a lanpe fu Mira. Di yulius si so wan sipi, dan a taigi den srudati nanga den strafman meki den go na ini. A kan taki a sipi disi ben bigi moro a fosi sipi di den teki. A ben tyari aleisi di ben warti furu moni. Boiti dati, a ben tyari den botoman, den srudati, den strafman èn kande tra sma di ben e go na Rome tu, ala nanga ala 276 sma. A de krin taki di den teki a sipi, dan Paulus ben kan preiki gi moro sma èn a no abi misi taki a teki na okasi dati tu.

⁸ A presi pe den ben o go now ben de Kenidus di ben de na a syoro na a zuidwest-sei fu Pkin Asia. Wan sipi di ben kmoto na Mira ben kan doro Kenidus na ini wán dei efu a winti no ben wai kon na den tapu. Ma Lukas e skrifi: „Wi seiri safsafri furu dei langa èn nanga furu muiti wi doro na Kenidus” (Tori 27:7a). Sobun, a weer ben kon so takru taki a ben muilek fu waka nanga sipi. (Luku a faki di nen „Den tranga winti di ben e wai abra a Mindrikondre Se”.) Prakseri fa a ben musu de gi den sma di a tranga winti nanga den bigi skwala ben e naki a sipi.

„A bigi winti ben e rigeri srefsrefi” (Tori fu den apostel 27:7b-26)

9, 10. Sortu problema den kisi na ini a birti fu Kreita?

⁹ Di den ben o kmoto na Kenidus, dan a kapten ben abi na prakseri fu go moro fara na west-sei, ma „a winti ben e wai bun tranga”, na so Lukas di ben de drape e taki (Tori 27:7b). A watra di ben e lon krosbei fu a syoro ben e tyari a sipi. Ma di den seiri go moro fara fu a syoro, dan den doro pe a watra no ben man tyari den moro. Ne wan tranga winti wai kmoto na noordwest-sei èn a pusu a sipi go na zuidsei, kande bun tranga srefi. Ma now na èilanti Kreita kibri a sipi gi a winti di ben e wai kon tranga na en tapu, neleki fa a ben psa kba na a èilanti Siprus, di a sipi ben e seiri krosbei fu a syoro. Di a sipi psa den stonbergi fu Salmona na owstusei fu Kreita, dan sani ben waka moro makelek. Fu san ede? Fu di a sipi ben kon de na a zuidsei fu na èilanti pe a winti no ben e wai so tranga. Yu kan ferstan taki den sma na ini a sipi ben e firi korostu now. Ma dati no ben o tan so. Solanga a sipi ben de na se, den botoman no ben kan fergiti taki a kowru ten fu a yari ben e doro. Sobun, den ben e broko den ede.

¹⁰ Lukas e taki soifri san e psa baka dati: „Nanga furu muiti wi seiri krosbei fu a syoro [fu Kreita] teleki wi doro na wan presi di nen Bun Lanpe.” Aladi na èilanti Kreita ben e kibri den gi a winti, tòg a ben muilek fu tyari a sipi. Te fu kba den feni wan pkin presi pe a se e koti go na ini a kondre èn na drape den ankra a sipi. Sma e denki taki a presi disi de na a pisi leti fosi a syoro fu Kreita e beni go na noordsei. O langa den tan drape? Lukas e taki dati den tan drape „wan heri pisi ten”, ma ten no ben de moro. Na ini september nanga oktober a ben de moro kfalek fu tyari sipi.​—Tori 27:8, 9.

11. Sortu rai Paulus gi den tra sma na tapu a sipi, ma sortu besroiti den teki?

¹¹ Kande son sma na tapu a sipi ben suku rai na Paulus fu di a ben teki waka nanga sipi wan tu leisi kba na tapu a Mindrikondre Se. A taigi den taki a sipi no ben musu go moro fara. Efu den ben o du dati, dan den ben o „kisi bigi problema” èn den ben o „lasi den lai nanga a sipi”. Kande sma ben o lasi den libi srefi. Ma a kapten fu a sipi nanga a sma di ben abi a sipi ben wani seiri go doro, kande fu di den ben feni taki a ben de fanowdu fu suku wan moro bun presi. Ne den taki nanga yulius èn te fu kba moro furu fu den sma na tapu a sipi ben feni taki den ben musu du muiti fu doro na Feniks, wan lanpe di ben de moro fara na syoro. A kan taki a lanpe fu Feniks ben de moro bigi èn moro bun fu psa a kowru ten fu a yari. Sobun, fu di a winti fu zuidsei no ben wai so tranga, meki dati kori den èn den lusu.​—Tori 27:10-13.

12. Sortu problema miti den, baka di a sipi gwe libi Kreita èn san den botoman pruberi fu du so taki a sipi no sungu?

¹² Ma now moro problema kon. „Wan bigi winti” wai kmoto na noord-owstusei. Wan pisi ten den ben kan kibri baka wan „pkin èilanti di nen Kawda”, sowan 65 kilometer fu Bun Lanpe. Tòg den ben frede ete taki a winti ben o wai a sipi go na zuidsei go fasi na den santibangi fu Sirtis krosbei na a syoro fu Afrika. Fu di den botoman no ben wani meki dati psa, meki den feti fu hari a pkin boto di ben tai na bakasei fu a sipi, kon na insei. A ben tranga fu du dati fu di a kan taki a pkin boto ben furu nanga watra. Ne den du ala muiti fu meki t’tei waka na ondro a bigi sipi èn den hari den t’tei kon na loktu fu tai den planga fu a sipi hori na wán. Baka dati den lusu den t’tei fu den seiri, so taki a winti ben kan tyari a sipi psa den bigi skwala. Prakseri fa den sma ben musu frede! Srefi a sani disi di den du no ben sari fu di „a bigi winti ben e rigeri srefsrefi”. Na a di fu dri dei den trowe wan tu sani fu a sipi go na ini a watra, kande fu di den no ben wani meki a sungu.​—Tori 27:14-19.

13. Fa sani ben de na tapu a sipi fu Paulus di a tranga winti ben e wai?

¹³ Den sma ben musu fu frede srefsrefi. Ma Paulus nanga den mati fu en no ben las’ati. Masra ben pramisi na apostel Paulus kba taki a ben o preiki a bun nyunsu na ini Rome (Tori 19:21; 23:11). Bakaten wan engel ben sori en taki disi ben o psa trutru. Ma tu wiki langa a tranga winti tan wai dei nanga neti. Na alen no ben wani tapu èn furu wolku ben de, so taki yu no ben man si a son nanga den stari. Dati meki a kapten no ben man si pe a sipi ben de èn na sortu sei a ben e go. Den no ben man nyan noti srefi. Nowan sma ben e prakseri n’nyan fu di den ben e kowru, alen ben e fadon, sonwan fu den ben kon siki fu di a sipi ben e sekseki èn trawan ben e frede.

14, 15. (a) Di Paulus taki nanga den sma na tapu a sipi, dan fu san ede a sori den taki a ben warskow den kba? (b) San wi kan leri fu a boskopu fu howpu di Paulus ferteri den sma?

¹⁴ Ne Paulus opo tnapu. A taigi den taki a ben warskow den kba, ma a no taki en fu sori den taki a ben bari den, ma na den no ben wani arki. Na presi fu dati, den sani di ben e psa ben sori taki Paulus ben abi leti di a warskow den. Ne a taki: „Now mi e taigi unu fu no frede, bika nowan fu unu o lasi en libi. Na soso a sipi o lasi gwe” (Tori 27:21, 22). A ben musu fu de so taki a sani di Paulus taigi den sma na ini a sipi, gi den dek’ati! Boiti dati, Paulus ben musu fu breiti srefsrefi taki a kisi wan boskopu fu Yehovah di ben o gi den trawan howpu. A bun fu hori na prakseri taki a libi fu ibri libisma de prenspari gi Yehovah. A e broko en ede nanga ala sma. Na apostel Petrus skrifi: „Yehovah . . . no wani nowan sma lasi libi. A wani taki ala sma musu kisi na okasi fu sori berow” (2 Petr. 3:9). Fu dati ede a de tumsi prenspari taki wi e du muiti fu ferteri someni sma leki wi man a boskopu fu Yehovah di o gi den howpu. Furu sma de ete di kan lasi a warti libi fu den.

¹⁵ Soleki fa a sori, dan Paulus ben taki nanga furu sma na tapu a sipi fu a ’howpu fu en taki Gado o du den sani di a pramisi’ (Tori 26:6; Kol. 1:5). Now a sipi ben de fu sungu, ma na a momenti dati Paulus ben kan gi den a howpu taki den ben o tan na libi. A taki: „Esde neti wan engel . . . , kon tnapu na mi sei, dan a taki: ’Paulus, no frede. Yu musu tnapu na fesi Grankownu. Gado o sorgu taki nowan fu den sma di de nanga yu na ini a sipi, lasi den libi.’” Paulus taigi den: „Fu dati ede, un man, no frede, bika mi e bribi taki Gado o du ala san na engel taigi mi. Ma a sipi o go fasi na a syoro fu wan èilanti.”​—Tori 27:23-26.

„Den alamala doro bun na syoro” (Tori fu den apostel 27:27-44)

16, 17. (a) Sortu okasi Paulus teki fu begi èn san ben de a bakapisi? (b) Di Paulus warskow a legre-ofsiri nanga den srudati, dan fa dati kon tru?

¹⁶ Tu wiki langa a tranga winti pusu a sipi sowan 870 kilometer moro fara èn den sma ben frede srefsrefi. Ma baka den tu wiki, den botoman si taki wan sani kon kenki. Kande den ben e yere fa bigi skwala ben e wasi go na tapu wan syoro di ben de krosbei. Den fringi den ankra di ben de na bakasei fu a sipi go na ini a watra, so taki den skwala no ben kan tyari a sipi go pe den wani. Na so fasi a fes’sei fu a sipi ben kan drai go na syorosei, so taki den ben kan meki a go fasi na a syoro. Ne den botoman pruberi fu gwe libi a sipi, ma den srudati tapu den fu du dati. Paulus taigi a legre-ofsiri nanga den srudati: „Efu den man disi gwe libi a sipi, unu no o kmoto libilibi.” Now di a sipi no ben seki so furu moro, Paulus gi ala sma dek’ati fu nyan èn ete wan leisi a gi den a dyaranti taki den ben o tan na libi. Baka dati Paulus „taki Gado tangi na fesi den alamala” (Tori 27:31, 35). Na so a gi Lukas, Aristarkus nanga Kresten na ini ten disi wan moi eksempre. Te yu e begi na fesi sma, dan dati e gi sma dek’ati nanga trowstu?

¹⁷ Di Paulus kba begi, dan dati „gi den alamala dek’ati èn den srefi bigin nyan pkinso tu” (Tori 27:36). Ne den trowe a heri lai nanga aleisi go na ini a se fu meki a sipi kon moro lekti so taki a no ben o d’don so dipi moro na ini a watra te a ben o kon moro krosbei fu a syoro. Di dei opo, den botoman koti den ankra puru èn den lusu den t’tei fu den pkin pari na bakasei fu a sipi. Ne den opo a pkin seiri na fes’sei fu meki a fanga winti, so taki den ben kan tyari a sipi go fasi na tapu a syoro. Dan a fes’sei fu a sipi go fasi, kande na tapu wan santibangi noso na ini a tokotoko. Fu di den skwala fu a se ben e naki a bakasei fu a sipi, meki a bigin broko na pispisi. Wan tu fu den srudati ben wani kiri den strafman so taki nowan fu den ben kan lowe, ma yulius tapu den srudati fu du disi. A taigi den alamala fu swen go na syoro, noso fu teki planga noso tra pisi fu a sipi fu drifi go na syoro. Na so a sani di Paulus ben taigi den, kon tru. Nowan fu den 276 sma lasi libi. Iya, „den alamala doro bun na syoro”. Ma pe den ben de?​—Tori 27:44.

„Den sori trutru switifasi” (Tori fu den apostel 28:1-10)

18-20. Fa den sma fu Malta sori „trutru switifasi” èn sortu wondru Gado meki Paulus du?

¹⁸ Soleki fa a sori, dan den sma fu a sipi di sungu ben de na tapu na èilanti Malta, zuidsei fu Sisilia. (Luku a faki di nen „Pe Malta ben de?”.) Den sma fu na èilanti di ben e taki wan tra tongo sori den „trutru switifasi” (Tori 28:2). Den sma di ben doro na a syoro fu Malta ben nati petepete èn den ben e beifi. Aladi den sma fu Malta no ben sabi den, tòg den meki wan faya gi den. A ben kowru èn alen ben fadon, ma a faya yepi den fu kon waran. Boiti dati, a faya di den leti, meki tu taki wan wondru psa.

¹⁹ Paulus ben wani du wan sani tu. Dati meki a piki wan tu tiki poti na a faya. Di a du dati, wan takru sneki kmoto na mindri den tiki èn a beti Paulus en anu hori. Den sma fu Malta prakseri taki disi ben de wan strafu fu den gado.a

²⁰ Di den sma fu na èilanti si taki a sneki beti Paulus, den prakseri taki Paulus anu „ben o sweri”. Wan buku e taki dati a Griki wortu di skrifi dyaso na „wan wortu di datra gwenti gebroiki”. A no musu ferwondru wi taki wantewante ’Lukas, a lobi brada di de wan datra’ prakseri a wortu dati (Tori 28:6; Kol. 4:14). Awansi fa a no fa, Paulus seki a takru sneki puru na en anu èn noti no psa nanga en.

21. (a) Sortu eksempre na ini a tori di Lukas e ferteri e sori taki a skrifi sani soifri noso finfini? (b) Sortu wondru Paulus du èn sortu krakti dati ben abi na tapu den sma fu Malta?

²¹ Publiyus, wan guduman di ben abi furu gron, ben libi drape. Kande a Romesma disi ben de a moro hei tiriman fu Malta. Lukas ben kari en „a granman fu na èilanti”. A gebroiki a srefi nen di skrifi na tapu tu sani di sma di e ondrosuku owruten sani, feni na Malta. Publiyus meki Paulus nanga den mati fu en tan na ini en oso èn dri dei langa a sorgu gi den. Ma a p’pa fu Publiyus ben siki. Agen Lukas e taki finfini fu wan siki. A skrifi taki a p’pa ’ben d’don na bedi nanga korsu èn nanga lusbere’. Na so a e ferteri soifri sortu siki a man ben abi. Ne Paulus begi, a poti en anu na a man tapu èn a kon betre. A wondru disi naki na ati fu den sma fu na èilanti èn den tyari tra siki sma kon tu so taki a ben kan meki den kon betre. Den gi Paulus nanga den mati fu en furu kado nanga tra sani di den ben o abi fanowdu.​—Tori 28:7-10.

22. (a) Sortu bun sani wan professor taki fu a fasi fa Lukas ferteri fu a waka di Paulus teki go na Rome? (b) San wi o luku na ini a kapitel di e kon?

²² Wi luku wan pisi fu a waka di Paulus teki èn te nanga now wi si taki Lukas e ferteri soifri fa sani ben waka. Wan professor ben taki: „A tori di Lukas skrifi . . . na wan fu den moro span pisi na ini Bijbel. A skrifi ala sani krin èn a ferteri finfini fu a koni fasi fa sma na ini a fosi yarihondro ben e tyari sipi. A e taki soifri fa a weer ben de na den kontren owstusei fu a Mindrikondre Se.” Fu dati ede a musu fu de taki Lukas puru ala den tori disi na ini wan buku pe a ben skrifi ala sani di ben miti en. A kan taki Lukas ben skrifi den sani disi di a ben teki waka nanga na apostel. Efu dati de so, dan na a lasti pisi fu a waka a ben o abi furu fu skrifi. San ben o psa nanga Paulus èn nanga den mati fu en te den ben o doro na Rome? Meki wi go luku.

1. Na tapu suma Paulus nanga den mati fu en e fertrow èn fu san ede?

NA A ede fu wan sipi yu abi wan popki di nen den „Manpkin fu Seus”. Kande a de wan bigi aleisboto di kmoto na a èilanti Malta na a Mindrikondre Se fu go na Italiakondre. A de na a ten fu a yari 59. Na ini a sipi yu abi na apostel Paulus di de wan strafman èn wan srudati e luku en. Den tu Kresten brada, Lukas nanga Aristarkus, de na ini a sipi tu (Tori 27:2). Den preikiman disi no e du leki den botoman di e suku kibri na den twelengi brada Kastor nanga Poluks di de manpkin fu a Griki gado Seus (Tori 28:11). Na presi fu dati, Paulus nanga den mati fu en e dini Yehovah di ben taigi Paulus taki a ben o ferteri sma na ini Rome san na den tru tori fu Bijbel èn taki a ben o tnapu na fesi Grankownu.​—Tori 23:11; 27:24.

2, 3. Sortu pasi a sipi fu Paulus teki èn suma horbaka gi Paulus sensi a bigin fu a waka disi?

² Dri dei baka di a sipi doro a lanpe fu Sirakusa, wan moi foto na ini Sisilia, a e hari go na Regiyum di de te na a zuidsei fu Italiakondre. Sirakusa ben de wan prenspari foto, ma a no ben de so prenspari leki Ateine nanga Rome. Ne wan winti di ben e wai kmoto na zuidsei meki taki a sipi doro na Puteyoli baka tu dei èn dati ben de moro esi leki fa sipi ben gwenti waka a pisi dati. Puteyoli di de krosbei fu a foto di den e kari Napels now, ben de wan lanpe fu Italiakondre di de sowan 320 kilometer moro fara fu Regiyum.​—Tori 28:12, 13.

³ Paulus musu waka ete pkinso fu doro Rome pe a musu go na fesi Grankownu Nero. Fu a bigin teleki a kba fu a waka fu Paulus, Yehovah, „a Gado fu ala trowstu” ben horbaka gi en (2 Kor. 1:3). Soleki fa wi o si, dan noiti Yehovah tapu fu horbaka gi Paulus èn a no lasi a faya di a ben abi leki zendeling.

„Paulus . . . taki Gado tangi èn a kisi dek’ati” (Tori fu den apostel 28:14, 15)

4, 5. (a) Fa den brada fu Puteyoli sori switifasi gi Paulus nanga den mati fu en èn fa a du kon kande taki Paulus kisi primisi fu go luku den brada fu en? (b) Fa Kresten kan kisi wini te den e tyari densrefi na wan bun fasi, srefi te den de na straf’oso?

⁴ Na Puteyoli, Paulus nanga den mati fu en ’miti den brada èn den [brada] begi den fu tan seibi dei nanga den’ (Tori 28:14). Disi na wan moi eksempre di e sori fa Kresten abi switifasi gi makandra. A no de fu taki dati den brada disi di ben e sori switifasi kisi furu wini fu di den kisi dek’ati fu Paulus nanga den mati fu en. Ma fa wan strafman di srudati ben e luku kisi primisi fu go luku den brada fu en? Kande a bun fasi fa na apostel ben tyari ensrefi meki taki den Rome srudati di ben musu luku en, ben fertrow en.

⁵ Na so a de tu na ini a ten disi taki futuboi fu Yehovah di ben tyari densrefi leki tru Kresten aladi den ben de na straf’oso noso na strafman-kampu, ben kisi grani di tra strafman no ben kisi. Fu eksempre, na ini Rumeinia wan man ben musu koti wan strafu fu 75 yari fu di a ben de wan fufurman. Ne a bigin studeri Gado Wortu èn a tyari bigi kenki kon na ini a fasi fa a ben tyari ensrefi. Fu dati ede den basi fu a straf’oso gi en a wroko fu go na foto fu bai sani gi a straf’oso sondro taki wan skowtu go nanga en. Na eksempre disi e sori wi fu san ede a de prenspari fu tyari wi srefi na wan bun fasi, ma a moro prenspari sani na taki Yehovah e kisi glori.​—1 Petr. 2:12.

6, 7. Fa den brada fu Rome sori taki den ben lobi Paulus srefsrefi?

⁶ Kande di Paulus nanga den mati fu en kmoto na Puteyoli, den teki Apia Pasi di e tyari sma go na Rome èn den waka sowan 50 kilometer go na a foto Kapua. A pôpi pasi disi ben meki fu bigi plata lava-ston èn te sma ben e waka a pasi, dan den ben man si moi kontren fu Italiakondre èn na son pisi fu a pasi den ben man si go te na a Mindrikondre Se. Te sma ben waka a pasi disi, dan den ben abi fu psa den Pontina-swampu tu. A kontren disi na wan swampuswampu presi di de sowan 60 kilometer fu Rome èn a W’woyo fu Apiyus de drape. Lukas e skrifi taki di den brada fu Rome ’yere taki den de na pasi e kon’, dan sonwan fu den kon te na a W’woyo fu Apiyus, aladi trawan ben e wakti na wan presi di nen Dri Oso pe sma ben kan yuru kamra. A presi disi de sowan 50 kilometer fu Rome. Disi na trutru wan moi fasi fu sori lobi!​—Tori 28:15.

⁷ A W’woyo fu Apiyus no ben de wan bun presi gi sma fu rostu te den ben teki waka èn te den ben weri. A puwema-skrifiman Horatius e taki dati a W’woyo fu Apiyus ben de wan presi di „ben lai nanga botoman èn taki den basi fu den pkin hotel ben grofu”. A skrifi taki „a watra ben doti srefsrefi”. A no ben wani nyan drape srefi! Ma aladi a w’woyo no ben de wan bun presi fu tan, tòg den brada fu Rome ben de nanga prisiri di den ben e wakti Paulus nanga den mati fu en drape fu kan horbaka gi den na a lasti pisi fu a waka fu den.

8. Fu san ede Paulus taki Gado tangi ’di a si den’ brada fu en?

⁸ A tori e taki dati „di Paulus si den” brada fu en, dan „a taki Gado tangi èn a kisi dek’ati” (Tori 28:15). Iya, a si di Paulus si den lobi brada disi meki taki a kisi dek’ati nanga trowstu. Na apostel ben sabi wan tu fu den brada disi bun. Fu san ede Paulus taki Gado tangi? A ben sabi taki trutru lobi na wan fu den fasi di a yeye e meki sma kisi (Gal. 5:22). Na ini a ten disi a santa yeye e meki tu taki Kresten e du furu gi makandra èn taki den e trowstu den wan di de na nowtu.​—1 Tes. 5:11, 14.

9. Fa wi kan teki na eksempre fu den brada di ben miti nanga Paulus?

⁹ Fu eksempre, a santa yeye e meki taki brada nanga sisa di abi switifasi e yepi den kring-owruman nanga tra furuten dinari nanga den sani di den abi fanowdu. Furu fu den furuten dinari disi libi furu sani na baka fu man du moro gi Yehovah na ini a diniwroko. Aksi yusrefi: ’Mi kan du moro fu horbaka gi a kring-owruman te a e kon na a gemeente? Mi kan kari en nanga en frow (efu a trow) kon na mi oso? Mi kan seti sani so, taki mi kan wroko nanga den na ini a preikiwroko?’ Efu wi e du dati, dan wi kan kisi furu blesi. Prakseri fu eksempre fa den brada fu Rome ben e prisiri di den ben arki den moi ondrofenitori di Paulus nanga den mati fu en ferteri den.​—Tori 15:3, 4.

„Na ala presi sma e taki takru fu a bribi disi” (Tori fu den apostel 28:16-22)

10. Na ini sortu situwâsi na apostel Paulus kon de na ini Rome èn san a du syatu baka di a doro drape?

¹⁰ Di den sma di ben teki a waka doro Rome, „Paulus kisi primisi fu tan en w’wan nanga a srudati di ben e hori wakti na en” (Tori 28:16). Te den ben e hori wan sma leki strafman na ini wan oso, dan den ben tai en nanga wan keti na a srudati di ben e luku en, so taki a no ben man lowe. Aladi dati ben de so nanga Paulus, tòg a ben de wan Kownukondre preikiman di no ben meki wan keti tapu en fu preiki. Sobun, baka di a teki dri dei fu kisi ensrefi, a kari den fesiman fu den Dyu di ben de na Rome kon makandra fu ferteri den suma na en èn fu preiki gi den.

11, 12. Di Paulus ben taki nanga den Dyu brada fu en, dan fa a pruberi fu no meki den denki takru fu en?

¹¹ Paulus taki: „Brada, mi no du noti teige a pipel èn mi no wiswasi den gwenti fu wi afo. Tòg sma sroto mi na ini Yerusalem èn den tyari mi gi den Romesma. Di den Romesma poti aksi gi mi, den ben wani lusu mi, bika mi no du noti fu kisi dedestrafu. Ma fu di den Dyu no ben agri nanga disi srefsrefi, meki mi ben musu aksi efu Grankownu ben kan krutu mi. Ma a no de so taki mi wani tyari mi pipel na fesi krutu.”​—Tori 28:17-19.

¹² Di Paulus kari den Dyu arkiman fu en „brada”, dan a ben wani sori den taki a ben de wan Dyu neleki den. Dati ben o meki taki den Dyu no ben o denki takru fu en (1 Kor. 9:20). Boiti dati, a sori den krin taki a no ben kon drape fu sori finga na tapu den Dyu brada fu en, ma a ben de drape fu di a ben aksi efu Grankownu ben kan krutu en. Ma den Dyu fu Rome no ben sabi taki Paulus ben aksi fu go na fesi Grankownu (Tori 28:21). Fa a du kon taki den Dyu fu Rome no ben sabi a tori disi? Den Dyu fu Yudea no ben taigi den? Wan buku e taki: „A musu fu de so taki a sipi fu Paulus ben de a foswan di ben doro na Italiakondre baka a kowru ten fu a yari. Sobun, a kan taki den heihei man di den Dyu fu Yerusalem ben seni go na Rome, no ben doro drape ete èn a kan tu taki nowan brifi di ben taki fu a tori ben doro drape.”

13, 14. Fa Paulus bigin taki fu a Kownukondre boskopu? Fa wi kan teki na eksempre fu en?

¹³ Ne Paulus bigin taki fu a Kownukondre boskopu èn a taki wan sani di seiker ben o hari a prakseri fu den Dyu di ben kon na en. A taigi den: „Dati meki mi aksi fu si unu èn fu taki nanga unu, bika na fu di mi abi a howpu di Israel abi, meki sma tai mi nanga a keti disi” (Tori 28:20). A no de fu taki dati a howpu disi ben abi fu du nanga a Mesias nanga a Kownukondre fu en, di a Kresten gemeente ben preiki. Den Dyu owruman piki en: „Ma wi wani yere fa yu e denki, bika wi sabi seiker taki na ala presi sma e taki takru fu a bribi disi.”​—Tori 28:22.

¹⁴ Te wi abi na okasi fu preiki a bun nyunsu, dan wi kan teki na eksempre fu Paulus fu di wi e taki sani di e meki den arkiman denki noso fu di wi e poti aksi di e hari den prakseri. Na ini buku soleki „Fa foe bigin èn go doro nanga bijbel takimakandra” èn „Kisi wini fu a Theokrasia Diniwroko-skoro nanga a „Meki muiti fu leisi bun èn fu gi leri”-brochure, yu kan feni moi sani di yu kan taki fu hari sma prakseri. Yu e gebroiki den buku disi bun?

Wan eksempre gi wi fu „preiki finfini” (Tori fu den apostel 28:23-29)

15. Sortu fo prenspari sani kon na krin di Paulus preiki gi den Dyu fu Rome?

¹⁵ A dei di den Dyu fu Rome meki mofo nanga Paulus fu miti en, den „kon nanga wan moro bigi grupu” na a presi pe Paulus ben e tan. Fu tyari a heri tori kon na krin gi den, Paulus „preiki finfini fu Gado Kownukondre a heri dei dati. A gebroiki a Wet di Gado gi Moses nanga den buku fu den Profeiti fu sori den taki den sani di abi fu du nanga Yesus, tru” (Tori 28:23). Te wi luku a fasi fa Paulus ben preiki, dan fo prenspari sani e kon na krin. A fosi sani na taki a ben e poti prakseri na Gado Kownukondre. A di fu tu sani na taki a ben e pruberi fu doro na ati fu den arkiman fu en, fu di a kon nanga bewijs fu „sori den taki den sani” di a ferteri den, tru. A di fu dri sani na taki a ben taki-go-taki-kon nanga den nanga yepi fu Bijbel. A di fu fo sani na taki a no ben prakseri ensrefi nomo, ma a preiki gi den „a heri dei dati”. Disi na trutru wan moi eksempre gi wi! San ben de a bakapisi? „Wan tu fu den bigin bribi”, ma trawan no ben e bribi. Fu di den sma no ben e agri nanga makandra, meki den bigin „gwe”, na so Lukas e taki.​—Tori 28:24, 25a.

16-18. Fu san ede Paulus no ferwondru di den Dyu fu Rome no ben wani arki a bun nyunsu? San wi musu du te sma no wani arki a boskopu fu wi?

¹⁶ A fasi fa den Dyu du, no ferwondru Paulus fu di a ben si disi kba na tra okasi èn Bijbel profeititori ben taki na fesi taki sma ben o du so (Tori 13:42-47; 18:5, 6; 19:8, 9). Sobun, den sma di ben kon luku Paulus no ben wani arki, èn den bigin gwe. Ne a taigi den: „A sani di a santa yeye meki a profeiti Yesaya taigi den afo fu unu, tru. A ben taki: ’Go na a pipel disi èn taigi den: „Unu o yere, ma unu no o ferstan noti. Unu o luku, ma unu no o si noti. Bika a pipel disi kon tranga-ede”’” (Tori 28:25b-27). A wortu „tranga-ede” e sori taki den sma no ben wani arki a Kownukondre boskopu kwetkweti. Sobun, na ati fu den ben kon tranga, noso soleki fa Grikitongo e taki en, dan na ati fu den ben kon „deki” noso „fatu” (Tori 28:27). Dati ben de wan sari tori!

¹⁷ Na a kba Paulus ben taki dati den „tra pipel” ben de tra fasi leki den Dyu arkiman, fu di den ben ’o arki a boskopu’ (Tori 28:28; Ps. 67:2; Yes. 11:10). Iya, na apostel ben de seiker taki a sani disi tru, fu di ensrefi ben si fa furu trakondre sma ben gi yesi na a Kownukondre boskopu.​—Tori 13:48; 14:27.

¹⁸ Neleki fa a ben de nanga Paulus, na so wi no musu firi wan fasi tu te sma no wani arki a bun nyunsu. Te yu luku en bun, dan wi sabi taki wan tu sma nomo ben o feni a pasi di e tyari sma go na libi (Mat. 7:13, 14). Boiti dati, te ret’ati sma e sori taki den e teki a tru anbegi, dan wi musu prisiri èn gi den wan switikon nanga wi heri ati.​—Luk. 15:7.

„Ferteri den fu a Kownukondre fu Gado” (Tori fu den apostel 28:30, 31)

19. Fa Paulus gebroiki a ten di a ben de leki strafman na ini en eigi oso?

¹⁹ A lasti sani di Lukas e taki te a e tapu a tori fu en, na den moi wortu disi di e gi wi dek’ati: „[Paulus] tan tu yari langa drape na ini na oso di a ben yuru. A ben sori switifasi gi ala den sma di ben kon na en. Sondro frede a ben e ferteri den fu a Kownukondre fu Gado èn a ben e leri den sani di abi fu du nanga Masra Yesus Krestes. Nowan sma ben tapu en fu du dati” (Tori 28:30, 31). Iya, Paulus ben gi wi wan moi eksempre fu di a ben e sori switifasi nanga bribi èn fu di a ben e preiki fayafaya.

20, 21. Ferteri suma kisi wini fu a preikiwroko di Paulus du na ini Rome.

²⁰ Wan fu den sma di Paulus ben gi wan switikon na ini en oso ben de Oneisimus, wan srafu di ben lowe èn di ben de fu Kolose. Paulus yepi Oneisimus fu tron wan Kresten èn a ben kon si Oneisimus leki wan ’lobi brada . . . di ben e gi yesi na Gado ala ten’ (Kol. 4:9; Fileim. 10-12). A ben musu fu de so taki Oneisimus gi Paulus furu dek’ati!a

²¹ Tra sma ben kisi wini tu fu a moi eksempre fu Paulus. A ben skrifi den Filipisma a sani disi: „Den sani di miti mi, ben meki a bun nyunsu go na fesi. Na so fasi ala den waktiman fu Grankownu nanga ala tra sma kon sabi taki mi de na strafu, fu di mi na wan bakaman fu Krestes. We, furu fu den brada di e dini Masra kisi moro frutrow, fu di mi de na strafu. Den kon abi moro deki-ati fu taki fu a wortu fu Gado sondro frede.”​—Fil. 1:12-14.

22. Fa Paulus gebroiki a ten di a ben de na strafu na Rome na wan bun fasi?

²² Di Paulus ben de na strafu na ini Rome, dan a teki na okasi fu skrifi prenspari brifi di de wan pisi now fu den Kresten Griki Buku fu Bijbel.b Den Kresten na ini a ten dati ben kisi furu wini fu den brifi disi èn teleki now wisrefi e kisi wini fu den rai di de na ini.

23, 24. Fa furu Kresten na ini a ten disi tan prisiri èn tan preiki neleki Paulus di sma poti den na strafu sondro taki den du wan ogri?

²³ Tori fu den apostel no e taki o ten Paulus kmoto na strafu, ma na a ten di den lusu en, a ben de na strafu fo yari kba: tu yari na ini Sesareya èn tu yari na ini Rome (Tori 23:35; 24:27).c Ma a du ala san a man na ini a diniwroko fu Gado èn noiti a las’ati. Na dati psa tu nanga furu futuboi fu Yehovah na ini a ten disi. Sma ben poti den na straf’oso fu a bribi fu den ede aladi den no ben du nowan ogri. Ma tòg den ben tan abi prisiri èn den ben tan preiki. Luku na eksempre fu Adolfo. A no ben wani go na ini a legre fu di a ben de wan Kresten èn dati meki den poti en na strafu na ini Spanyorokondre. Wan srudati taigi en: „Wi e ferwondru fu a fasi fa yu e tyari yusrefi. Wi meki en muilek gi yu dyaso na straf’oso. Ma o moro wi e du dati, o moro yu e lafu nanga wi èn e taki nanga wi na wan switifasi.”

²⁴ Baka wan pisi ten, den ben fertrow Adolfo so furu taki den ben libi a doro fu en cel opo. Srudati ben kon na en fu aksi en sani fu Bijbel. Wan fu den srudati di ben e hori wakti gi Adolfo, ben e go srefi na ini a cel fu en fu leisi Bijbel, aladi Adolfo ben e luku gi en efu tra srudati ben e kon. Sobun, a strafman ben e „koti wakti” gi a waktiman! Meki a moi eksempre fu den Kotoigi disi di no ben lasi bribi, yepi wi fu „kon abi moro dek’ati fu taki fu a wortu fu Gado sondro frede”, srefi te wi de na ini muilek situwâsi.

25, 26. Sortu moi profeititori kon tru na ini pkinmoro 30 yari, soleki fa Paulus srefi ben si? Fa wan srefi sortu sani e psa na ini a ten fu wi?

²⁵ A span buku Tori fu den apostel e tapu nanga wan moi tori di e gi wi furu dek’ati! Wi e leisi fa wan apostel fu Krestes di de na strafu na ini en eigi oso e ferteri ala sma di e kon luku en „fu a Kownukondre fu Gado”. Na ini a fosi kapitel, wi e leisi sortu wroko Yesus gi den bakaman fu en di a taigi den: „Unu o kisi krakti te a santa yeye kon na un tapu èn unu o de kotoigi fu mi na ini Yerusalem, na ini heri Yudea nanga Samaria èn te na den moro farawe presi fu grontapu” (Tori 1:8). A no kisi 30 yari srefi di a Kownukondre boskopu „preiki gi ala sma na grontapu” (Kol. 1:23).d Disi e sori na wan kfalek moi fasi o tranga a yeye fu Gado de!​—Sak. 4:6.

²⁶ Na ini a ten disi, a srefi yeye gi den salfu brada fu Krestes di de na grontapu ete nanga den kompe fu den, den „tra skapu”, a krakti fu tan „preiki finfini fu Gado Kownukondre” na ini moro leki 240 kondre (Yoh. 10:16; Tori 28:23). Yu e gi ala yu krakti fu du a wroko dati?