Joe abi bribi leki di foe Abraham?

„Te a Manpikin foe libisma e doro, a sa feni troetroe a bribi na grontapoe?” — LUKAS 18:8.

1. Foe san ede a moeilek foe tan abi wan tranga bribi na ini a ten disi?

A NO makriki foe tan abi wan tranga bribi na ini a ten disi. Grontapoe e poti hebi druk tapoe kresten foe poeroe den prakseri foe jeje sani (Lukas 21:34; 1 Johanes 2:15, 16). Foeroe sma moesoe feti foe horidoro ala di orlokoe, rampoe, siki, noso angri de (Lukas 21:10, 11). Na ini foeroe kondre, sma no abi foeroe belangstelling gi sani di abi foe doe nanga relisi èn den e si iniwan sma di e libi akroederi a bribi foe den, leki onreidelek sma, srefi leki sma di serjoesoe toemoesi. Boiti dati, foeroe kresten e kisi froefolgoe foe den bribi ede (Mateus 24:9). Na aksi di Jesus ben poti so wan 2000 jari pasa kaba, e fiti srefisrefi: „Te a Manpikin foe libisma e doro, a sa feni troetroe a bribi na grontapoe?” — Lukas 18:8.

2. (a) Foe san ede wan tranga bribi de toemoesi prenspari gi wan kresten? (b) A boen foe loekoe na eksempre foe sortoe sma?

² Ma a troetori na taki wan tranga bribi de toemoesi prenspari efoe wi wani abi boen bakapisi na ini wi libi nownow èn kisi a pramisi têgo libi na ini a ten di e kon. Na apostel Paulus ben kari den wortoe di Jehovah ben taigi Habakuk: „’A regtfardikiwan foe mi sa libi foe bribi ede’, èn ’efoe a drai baka, dan mi sili no abi prisiri nanga en’. . . . Sondro bribi wan sma no man plisi [Gado] na wan boen fasi” (Hebrewsma 10:38–11:6; Habakuk 2:4). Paulus ben taigi Timoteus: „Feti a toemoesi boen feti foe a bribi, graboe a têgo libi boen steifi, di oenoe ben kisi kari foe en” (1 Timoteus 6:12). Fa wi kan abi wan bribi dan di no man broko? Te wi e loekoe na aksi dati, dan a ben sa boen foe loekoe wan man di ben libi so wan 4000 jari pasa, ma di abi wan bribi di sma e lespeki srefisrefi na ini dri bigi relisi — Islam, Djoe-bribi nanga krestendom. A man dati na Abraham. Foe san ede en bribi ben de so aparti? Wi kan waka na baka en eksempre na ini a ten disi?

A gi jesi na a tiri foe Gado

3, 4. Foe san ede Tera ben froisi en famiri komoto na Ur go na Haran?

³ Abraham (di ben nen Abram na ini a bigin) kari boen froekoe kaba na ini bijbel. Wi e leisi na ini Genesis 11:26: „Tera . . . ben tron papa foe Abram, Nahor nanga Haran.” Tera nanga en famiri ben libi na ini Ur foe den Kaldewsma, wan goedoe foto na a zuidsei foe Mesopotamia. Ma den no ben tan drape. „Tera ben teki en manpikin Abram, nanga Lot, a manpikin foe Haran, en granpikin, nanga Sarai [Sara], a wefi foe en manpikin, a wefi foe en manpikin Abram, èn den ben komoto nanga en na Ur foe den Kaldewsma go na a kondre Kanan. Baka ten den ben doro Haran èn ben libi drape” (Genesis 11:31). Abraham en brada Nahor ben froisi toe nanga en famiri go na Haran (Genesis 24:10, 15; 28:1, 2; 29:4). Ma foe san ede Tera ben froisi gowe foe a goedoe Ur go na a farawe Haran?

⁴ So wan 2000 jari na baka a ten foe Abraham, a getrow man Stefanus ben e taki na fesi a djoe Kroetoebangi, èn ben taki foe na aparti froisi disi di Tera en famiri ben froisi. A ben taki: „A Gado foe glori ben sori ensrefi na wi fositen tata Abraham ala di a ben de na Mesopotamia, bifo a ben go libi na Haran, èn a ben taigi en: ’Gowe libi joe kondre nanga joe famiri èn kon na a kondre di mi sa sori joe.’ Dan a ben gowe foe a kondre foe den Kaldewsma èn ben go libi na ini Haran” (Tori foe den Apostel 7:2-4). Tera ben doe san Jehovah ben wani Abraham foe doe, di a ben froisi nanga en krosibei osofamiri go na Haran.

5. Pe Abraham ben go baka di en papa dede? Foe san ede?

⁵ A famiri foe Tera ben seti densrefi na ini a njoen foto foe den. Foeroe jari na baka, di Abraham ben taki „mi kondre”, dan a ben taki foe Haran, no foe Ur (Genesis 24:4). Ma tokoe Haran no ben moesoe de na oso pe Abraham ben moesoe tan ala ten. Soleki fa Stefanus ben taki, „baka di [Abraham en] papa dede, Gado ben meki a kenki en tanpresi go na a kondre disi pe oenoe e libi now” (Tori foe den Apostel 7:4). Abraham ben gi jesi na a tiri foe Jehovah èn makandra nanga Lot, a ben koti na Eufraat abra go na ini a kondre Kanan.a

6. Sortoe pramisi Jehovah ben doe Abraham?

⁶ Foe san ede Jehovah ben meki Abraham froisi go na Kanan? A reide ben abi foe doe nanga a prakseri di Gado ben abi gi a getrow man dati. Jehovah ben taigi Abraham: „Komoto na joe kondre èn na joe famiri èn na a oso foe joe papa, go na a kondre di mi sa sori joe; èn mi sa meki joe tron wan bigi nâsi èn mi sa blesi joe èn mi wani meki joe nen kon bigi; èn sori foe de wan blesi. Èn mi sa blesi den wan di e blesi joe, èn a sma di e kari ogri na joe tapoe, mi sa floekoe, èn nanga jepi foe joe ala famiri foe grontapoe foe troe sa blesi densrefi” (Genesis 12:1-3). Abraham ben o tron papa foe wan bigi nâsi di ben sa abi a kibri foe Jehovah èn di ben sa kisi a kondre Kanan. Dati ben de wan kefalek moi pramisi! Ma Abraham ben moesoe tjari bigi kenki kon na ini en libi so taki a ben sa kan kisi a kondre dati.

7. Sortoe kenki Abraham ben moesoe de klariklari foe tjari kon, so taki a kan kisi a pramisi foe Jehovah?

⁷ Di Abraham ben gowe libi Ur, dan a ben gowe libi wan goedoe foto èn kande den farawe famiri foe en papa — prenspari presi pe a ben kan feni seikerfasi na ini den ten dati foe den famiri-edeman. Di a ben gowe libi Haran, a ben gowe libi na osofamiri foe en papa, so srefi a famiri foe en brada Nahor, èn ben froisi go na wan kondre di a no ben sabi. Na ini Kanan a no ben soekoe kibri na ini den skotoe foe wan foto. Foe san ede a no ben doe dati? Sjatoe na baka di Abraham ben go na ini a kondre, Jehovah ben taigi en: „Waka na ini a kondre na a langa foe en èn na a bradi foe en, bika na joe mi sa gi en” (Genesis 13:17). Abraham di ben abi 75 jari èn en wefi Sara di ben abi 65 jari, ben waka na baka den rai disi. „Nanga bribi a ben tan leki wan freimdesma na ini a kondre foe a pramisi leki na ini wan freimde kondre èn a ben libi na ini tenti.” — Hebrewsma 11:9; Genesis 12:4.

Bribi leki di foe Abraham na ini a ten disi

8. Te wi e prakseri na eksempre foe Abraham nanga tra fositen kotoigi, dan san wi moesoe kweki?

⁸ Abraham nanga en famiri kari na mindri a bigi „wolkoe foe kotoigi [bifo a pisi ten foe den kresten]” di kari na Hebrewsma kapitel 11. Nanga a bribi foe den fosi foetoeboi foe Gado na prakseri, Paulus e gi kresten a deki-ati foe „poeroe so srefi ibri hebi nanga a sondoe [a mankeri di bribi e mankeri] di e kisi wi makriki” (Hebrewsma 12:1). Ija, a mankeri di bribi e mankeri, kan „kisi wi makriki”. Ma na ini a ten foe Paulus nanga a ten foe wi, troetroe kresten ben man kweki wan tranga bribi di joe kan gersi nanga di foe Abraham èn nanga di foe tra sma foe fositen. Te Paulus e taki foe ensrefi nanga kompe kresten, a e taki: „Wi no de den sortoe sma di e drai baka èn e kisi pori, ma den sortoe sma di abi bribi, meki a sili tan na libi.” — Hebrewsma 10:39.

9, 10. Sortoe boeweisi de taki foeroe sma de na ini a ten disi di abi wan bribi leki di foe Abraham?

⁹ A troe taki grontapoe kenki foe sensi a ten foe Abraham. Ma tokoe wi e dini a srefi „Gado foe Abraham”, èn en no e kenki (Tori foe den Apostel 3:13; Maleaki 3:6). Jehovah e froedini en taki wi e anbegi en na ini a ten disi neleki fa a ben froedini dati na ini a ten foe Abraham (Openbaring 4:11). Foeroe sma e gi densrefi abra dorodoro na Jehovah èn, leki Abraham, den e tjari iniwan kenki kon di de fanowdoe na ini den libi so taki den kan doe a wani foe Gado. A jari di pasa 316.092 sma ben sori na poebliki taki den gi densrefi abra na Gado di den ben teki dopoe „na ini a nen foe a Tata èn foe a Manpikin èn foe a santa jeje”. — Mateus 28:19.

¹⁰ Moro foeroe foe den njoen kresten disi no ben abi foe waka go na farawe freimde kondre foe gi densrefi abra na Gado. Ma na wan jeje fasi, foeroe foe den ben waka wan langa pasi. Foe eksempre, na ini Mauritius, Elsie ben de wan towfroe-oema. Ala sma ben frede en. Wan spesroetoe pionier ben abi wan bijbelstudie nanga na oemapikin foe Elsie, èn disi ben opo a pasi gi Elsie ’foe drai komoto na doengroe go na leti’ (Tori foe den Apostel 26:18). Foe di en oemapikin ben abi belangstelling, meki Elsie ben agri foe studeri Mi boekoe nanga bijbel tori. A ben studeri dri tron na ini wan wiki bika a ben abi doronomo deki-ati fanowdoe. Den towfroewroko foe en no ben gi en kolokoe, èn a ben abi foeroe problema. Ma te foe kaba, a ben man doro a kaba foe a langa pasi, foe tapoe foe anbegi ogri jeje go na a troe anbegi. Te sma ben kon foe soekoe a jepi foe en, dan a ben sa taigi den taki Jehovah wawan ben kan kibri den teige ogri. Now Elsie na wan dopoe Kotoigi, èn 14 sma foe en eigi famiri nanga mati teki a waarheid.

11. Sortoe kenki den sma di gi densrefi abra na Jehovah de klariklari foe tjari kon?

¹¹ Moro foeroe foe den sma disi di ben gi densrefi abra na Gado foe dini en a jari di pasa, no ben abi foe tjari den bigi kenki disi kon. Ma den alamala ben kenki foe a dede di den ben dede na jejefasi kon na libi na jejefasi (Efeisesma 2:1). Ala di den de na ini grontapoe leki libisma, tokoe den no de wan pisi foe en (Johanes 17:15, 16). A srefi leki den salfoe kresten di a „tanpresi [foe den] leki borgoe, de na hemel”, na so den de leki „freimdesma èn leki sma di e libi dja foe wan sjatoe pisi ten nomo” (Filipisma 3:20; 1 Petrus 2:11). Den ben tjari den libi akroederi den markitiki foe Gado, foe di na a fosi presi lobi gi Gado èn lobi gi a sma na den sei, ben boeweigi den (Mateus 22:37-39). Den no e feti na baka materia goedoe gi densrefi nomo noso den no e firi taki a de fanowdoe foe satisferi den lostoe foe den na ini a grontapoe disi. Na presi foe dati, den e tan hori den ai tapoe a pramisi ’njoen hemel nanga njoen grontapoe pe regtfardikifasi sa de’. — 2 Petrus 3:13; 2 Korentesma 4:18.

12. Sortoe wroko di ben doe a jari di pasa, e sori taki Jesus ben feni „bribi na grontapoe” na ini a ten foe en denoja?

¹² Di Abraham ben froisi go na Kanan, dan en nanga en famiri ben de den wawan drape nanga soso Jehovah di kan jepi èn kibri den. Ma den 316.092 njoen dopoe kresten no de den wawan kwetikweti. A troe, Jehovah e jepi den èn e kibri den nanga en jeje, soleki fa a ben jepi Abraham (Odo 18:10). Ma boiti dati, A e jepi den nanga wan fajafaja internationaal „nâsi” di abi moro sma leki wan toe foe den grontapoe nâsi na ini a ten disi abi (Jesaja 66:8). A jari di pasa, wan heimarki foe 5.888.650 borgoe foe a nâsi dati ben sori taki den abi wan fajafaja bribi foe di den ben taki foe den pramisi foe Gado nanga den sma na den sei (Markus 13:10). Den ben gebroiki wan kefalek bigi nomroe foe 1.186.666.708 joeroe na ini a wroko disi, foe soekoe sma di abi belangstelling. Leki wan bakapisi foe dati, 4.302.852 bijbelstudie ben hori nanga tra sma di wani kweki bribi. Ete wan sani di e sori a faja foe den, na den 698.781 sma na ini a „nâsi” disi di ben de na ini a pionierwroko, foeroeten noso gi wán moen noso moro. Finifini tori foe a wroko di den Kotoigi foe Jehovah doe a jari di pasa, de foe feni na tapoe bladzijde 12 te go miti 15. Na aparti heimarki disi na wan positief èn libilibi piki na tapoe na aksi foe Jesus: „Te a Manpikin foe libisma e doro, a sa feni troetroe a bribi na grontapoe?”

Getrow, ala di tesi de

13, 14. Kari wan toe foe den problema di Abraham nanga en famiri ben miti na ini Kanan.

¹³ Nofotron sani ben moeilek gi Abraham nanga en osofamiri na ini Kanan. Seiker na wán okasi, wan serjoesoe angriten ben de di ben jagi den poeroe foe Kanan go na Egipti. Boiti dati, a tiriman foe Egipti èn so srefi a tiriman foe Gerar (krosibei Gaza) ben proeberi foe teki a wefi foe Abraham, Sara, gi densrefi (Genesis 12:10-20; 20:1-18). Trobi ben de toe na mindri den skapoeman foe den meti foe Abraham nanga den skapoeman foe den meti foe Lot, èn disi ben meki taki wan prati ben kon na mindri den toe osofamiri disi. Sondro foe prakseri ensrefi wawan, Abraham ben gi Lot a fosi okasi foe teki sortoe kondre a wani, èn Lot ben bosroiti foe go libi na ini a distrikt Jordaan di ben gersi Eden foe di a gron ben fatoe èn a presi ben moi. — Genesis 13:5-13.

¹⁴ Dan Lot ben kon de na ini wan feti na mindri a kownoe foe a farawe Elam nanga den kompe foe en, èn den kownoe foe den feifi foto na ini a lagipresi foe Siddim. Den doroseikondre kownoe ben wini den kownoe foe a presi drape èn ben teki foeroe goedoe, so srefi Lot nanga den goedoe foe en. Di Abraham ben jere san ben pasa, dan nanga deki-ati a ben hari go na baka den doroseikondre kownoe èn ben man wini Lot nanga en osofamiri baka, èn so srefi den goedoe foe den kownoe foe a kontren (Genesis 14:1-16). Ma dati no ben de a moro takroe ondrofeni foe Lot na ini Kanan. Wan sani ben meki a ben go libi na ini Sodom, ala di a foto ben abi wan takroe nen leki wan foto pe sma no ben libi akroederi boen gwenti nanga wetb (2 Petrus 2:6-8). Di den toe engel ben warskow en taki a foto ben o pori, dan Lot ben lowe gowe nanga en wefi èn nanga den oemapikin foe en. Ma a wefi foe Lot no ben gi jesi na den finifini rai foe den engel èn, leki wan bakapisi foe dati, a ben tron wan sowtoe popki. Lot ben kon moro lagi di a ben moesoe libi na ini wan bergi-olo na ini Zoar nanga den toe oemapikin foe en (Genesis 19:1-30). Den sani disi di ben pasa ben moesoe broeja Abraham srefisrefi, spesroetoe foe di Lot ben kon na ini Kanan leki wan pisi foe na osofamiri foe Abraham.

15. Ala di Abraham ben miti problema di a ben libi na ini tenti na ini wan freimde kondre, sortoe fowtoe denki a no ben abi, soleki fa a sori?

¹⁵ Oiti Abraham ben aksi ensrefi efoe en nanga Lot ben moesoe tan na ini a seikerfasi foe Ur nanga den tra famiriman foe en papa, noso na ini Haran nanga en brada Nahor? Oiti a ben winsi taki a ben kan seti ensrefi na ini den skotoe foe a foto pe a man feni kibri, na presi foe libi na ini tenti? A ben de so, taki kande a ben tweifri efoe a ben de wan koni sani foe òfer ensrefi na a fasi disi, di a ben waka lontoe na ini wan freimde kondre? Di na apostel Paulus ben taki foe Abraham nanga en famiri, dan a ben taki: „Efoe troetroe den ben tan prakseri a presi dati pe den ben komoto, dan den ben sa abi na okasi foe drai go baka” (Hebrewsma 11:15). Tokoe den no ben drai go baka. Sondro taki den problema ben meki den lasi-ati, den ben tan pe Jehovah ben wani taki den moesoe de.

Horidoro na ini a ten disi

16, 17. (a) Sortoe problema foeroe kresten e miti na ini a ten disi? (b) Sortoe boen denki den kresten abi? Foe san ede?

¹⁶ A srefi horidoro de foe si na ini den kresten na ini a ten disi. Ala di a dini foe Jehovah e gi den foeroe prisiri, tokoe a libi no makriki gi den troe kresten na ini den lasti dei disi. Ala di den e libi na ini wan jeje paradijs, tokoe den e pina na ondro den srefi sortoe ekonomia druk leki den birtisma foe den (Jesaja 11:6-9). Foeroe foe den tron sma di ondrofeni pina foe den orlokoe foe den nâsi, sondro foe abi fowtoe, èn son wan foe den ben kon pôti srefisrefi sondro taki a ben de den eigi fowtoe. Boiti dati, den e horidoro na ondro problema foe di den de wan pikin groepoe di sma no lobi. Na ini foeroe kondre den e preiki a boen njoensoe ala di sma abi mi-no-ke fasi srefisrefi. Na ini tra kondre den e ondrofeni den trikifasi foe den sma di wani doe ogri èn di „e seti problema nanga jepi foe wet” èn „den e taki dati a broedoe foe den wan di no abi fowtoe na ogri” (Psalm 94:20, 21). Srefi na ini kondre pe sma no e opo kon foe doe den ogri èn pe son sma e prèise den foe den hei markitiki foe den ede, tokoe den kresten sabi taki den de tra fasi leki den skoromati nanga wroko kompe foe den — neleki Abraham di ben libi na ini tenti ala di moro foeroe sma lontoe en ben libi na ini foto. Ija, a no makriki foe libi na ini grontapoe èn tokoe no de „wan pisi” foe en. — Johanes 17:14.

¹⁷ Wi e sari dan taki wi gi wisrefi abra na Gado? Wi e winsi taki wi ben tan wan pisi foe grontapoe, foe de leki ibri tra sma? Wi e kragi taki wi tjari ofrandi na ini a diniwroko foe Jehovah? Kwetikweti! Na presi foe prakseri foe fositen nanga lostoe, wi e froestan taki iniwan sani di wi ben òfer kande no warti troetroe te joe teki en gersi den blesi di wi abi now èn den wan di wi sa kisi na ini a ten di e kon (Lukas 9:62; Filipisma 3:8). Boiti dati, den sma na ini grontapoe de kolokoe? A de troetroe so, taki foeroe foe den piki di den e soekoe, na piki di wi abi kaba. Den e pina foe di den no e gebroiki den tirilin di wi e gebroiki foe Gado èn di de na ini bijbel (Psalm 119:105). Èn foeroe foe den e angri foe abi a kresten matifasi nanga switi matifasi di wi abi nanga wi kompe bribiman. — Psalm 133:1; Kolosesma 3:14.

18. San sa de a bakapisi te foe kaba te kresten e sori deki-ati leki di foe Abraham?

¹⁸ A troe, son tron wi moesoe abi deki-ati leki Abraham di a ben hari go na baka den man di ben hori Lot. Ma te wi abi deki-ati, dan Jehovah sa blesi a bakapisi foe dati. Foe eksempre, na ini Noord Ierland a si di sma no wani si makandra na ai kon moro faja leki wan bakapisi foe na ogridoe na mindri difrenti sekte, èn deki-ati de fanowdoe foe no teki sei. Ma getrow kresten doe den wortoe di Jehovah ben taigi Josua: „Abi deki-ati èn de tranga. No skreki noso frede, bika Jehovah, joe Gado, de nanga joe awansi pe joe e go” (Josua 1:9; Psalm 27:14). A tanapoe di den tanapoe sondro frede na ini ala den jari, meki taki den kisi a lespeki foe sma, èn nownowde den kan preiki fri na ini ala libimakandra foe a kondre dati.

19. Pe kresten breiti foe de, èn sortoe bakapisi den e froewakti nanga froetrow te den e gebroiki den tirilin foe Jehovah?

¹⁹ Noiti wi moesoe tweifri, awansi na ini sortoe situwâsi wi de, efoe wi e gebroiki den tirilin foe Jehovah, dan a bakapisi sa de te foe kaba taki wi sa tjari glori gi en èn winimarki gi wi gi wan langa pisiten. Ala di tjalensi de èn wi moesoe tjari ofrandi, tokoe no wan tra presi de pe wi ben sa wani de leki na ini a diniwroko foe Jehovah, èn e njan boen foe a matifasi nanga wi kresten brada èn e froewakti nanga froetrow a têgo tamara di Gado pramisi gi a ten di e kon.

[Foetoewortoe]

Joe e memre disi ete?

◻ Foe san ede wan tranga bribi de toemoesi prenspari?

◻ Fa Abraham ben sori taki a ben abi wan tranga bribi?

◻ Fa a gi di wan sma e gi ensrefi abra na Gado abi foe doe toe nanga kenki di a moesoe tjari kon na ini en libi?

◻ Foe san ede wi e prisiri foe dini Gado ala di wi e miti awansi sortoe problema?

[Prenki na tapoe bladzijde 7]

Abraham ben de klariklari foe tjari bigi kenki kon na ini en libi, so taki a ben sa kan kisi a pramisi

[Prenki na tapoe bladzijde 9]

Den boeweisi e sori taki Jesus feni „a bribi na grontapoe” na a ten foe en denoja