Tan na libi na ini wan ten foe angriten
1. Jozef ben waka na baka sortoe koni libifasi ini ala den jari foe foeroe njanjan psa marki èn nanga sortoe bakapisi?
WANTEWANTE baka di Jozef ben kisi a wroko leki edeman foe njanjan a ben reis lontoe kondre Egypte. Na a ten di den jari foe foeroe njanjan psa marki ben doro, a ben orga ala sani heri boen. Now a kondre ben bigin gi njanjan bogobogo! Jozef ben tan tjari den njanjan foe den gron lontoe ibri foto konmakandra èn a ben poti den ini maksin ini a foto. A ben tan „poti karoe ipi tapoe ipi ini so wan bigi hoeveelheid, leki a santi foe na se, te leki te foe kaba den tapoe foe teri foedi a no ben de foe teri”. — Genesis 41:46-49.
2. Sortoe persoonlijk offer den sma ben tjari foe kisi den sani di de fanowdoe foe tan a libi?
2 Den sébi jari foe foeroe njanjan psa marki ben kon na wan kaba èn na angriten ben doro — soleki Jehovah ben taki a fesi — wan angriten di no ben de soso na ini Egypte, ma ai ben bradi ensrefi go „abra na heri fesi foe na grontapoe”. Di na pipel di ben abi angri na ini Egypte ben bigin bari na Farao foe kisi brede, Farao ben taigi den: „Go na Jozef. Ala san ai taigi oenoe, oenoe moesoe doe.” Jozef ben seri njanjan gi den Egypte sma te leki a moni foe den ben klari. Moro fara a ben teki den libi sani foe den leki paiman. Te foe kaba den sma ben kon na Jozef èn ben taki: „Bai wi èn wi kondre foe brede, èn séker wi sa tron nanga wi kondre srafoe foe Farao.” Foe dat’ede Jozef ben bai ala kondre foe den Egyptesma gi Farao. — Genesis 41:53-57; 47:13-20.
Seti foe jeje njanjan
3. Nanga jepi foe soema soleki Jezus ben taki a fesi njanjan na a reti ten ben o de foe kisi?
3 Netleki na karoe di Jozef ben gi ben wani taki libi gi den Egyptesma, na so jeje njanjan di de waarheid èn getrow de wan sani di wi no kan tan sondro en foe hori wi libi leki kristensma di tron srafoe foe Jehovah foedi wi gi wisrefi abra na en nanga jepi foe na moro bigi Jozef, Jezus Kristus. Na ini a heri ten foe en grontapoe diniwroko Jezus ben taki a fesi dati en salfoe bakaman ben sa kisi na frantwortoe foe prati den voorraad disi foe njanjan. A ben aksi: „Soema na troetroe na getrow èn koni srafoe, di en masra ben poti abra en osoknegti foe gi den na a reti ten njanjan? Kolokoe na srafoe dati de te en masra e feni en te a kon baka bezig nanga dati. — Mattéus 24:45, 46.
4. Fa na seti di na „srafoe”-klasse seti sani e kroederi nanga den sani di ben orga na den dé foe Jozef?
4 Na getrow fikapisi foe na koni srafoe-klasse dati ini a ten disi e doe ibri moeiti foe doe a frantwortoe foe den di a bijbel gi foe sorgoe dati Jehovah Kotoigi di gi densrefi abra èn sma na ini na grontapoe lontoe den di abi belangstelling, e kisi jeje njanjan foe tan a libi. A wroko disi den e si leki wan santa plekti èn den e doe en leki wan santa dienst gi Jehovah. Boiti foe dati, na „Srafoe” orga gemeente èn sorgoe dati den abi someni bijbellektuur dati den abi moro leki nofo kownoekondre siri foe strooi na alape ini a gebied di den kisi foe wroko. Disi e kroederi nanga den dé foe Jozef di a ben tjari den sma kon makandra ini foto èn ben sorgoe dati den kisi karoe, no wawan foe sorgoe taki den tan a libi, ma ooktoe karoe foe sai nanga ini prakseri foe koti njanjan ini a ten di bô kon. — Genesis 47:21-25; Markus 4:14, 20; Mattéus 28:19, 20.
5. (a) Sortoe spesroetoe prakseri na „srafoe” e poti tapoe den fanowdoe foe den osofamiri na ini a ten foe wan nowtoe situatie? (b) Fa wi kan teki den jeje seti psa marki na ini 1986 gersi nanga den njanjanvoorraad na a ten dati ini den dé foe Jozef?
5 Srefi ten a publiki prékiwroko tapoe èn Jehovah Kotoigi kisi ferfolgoe, èn tokoe ete na ’getrow srafoe’ disi e si na gi foe jeje njanjan leki wan santawroko (Tori foe den Apostel 5:29, 41, 42; 14:19-22). Te rampoe e sori densrefi, soleki bigi winti, bigi watra èn aardbefi, dan na „srafoe” e loekoe a tapoe dati sorgoe e gi na den skin èn jeje fanowdoe foe na osofamiri foe Gado. Srefi ini den concentratiekampoe den strafman ben kisi geregeld a wortoe di ben druk tapoe papira. Nationaal grens no e kisi wan kans foe tapoe na liba foe jeje njanjan sodati den sma di abi en fanowdoe no ben sa tan kisi en. A e aksi dekati, bribi ini Jehovah èn nofotron boen foeroe koni foe feni njoen sani foe meki na geregeld doro foe jeje njanjan kan feni presi. Soso wawan na ini 1986 a „srafoe” ben sorgoe dati na a heri grontapoe wan bigi ipi psa marki foe 43.958.303 bijbel nanga boekoe èn ooktoe 550.216.455 tijdschrift ben meki, foetroe wan bigi hoeveelheid, leki na santi foe na se”.
Wraak, strafoe ofoe sar’ati?
6, 7. (a) Fa na angriten ben meki dati den tin afoe-brada ben trowe densrefi a doti na fesi Jozef? (b) Na sortoe fasi Jozef srefi ben kon ini tesi?
6 Te foe kaba ooktoe na kondre Kanaän ben kisi foe doe nanga angriten. Jakob ben seni tin foe den afoe brada foe Jozef go na Egypte foe bai karoe. Ma Benjamin, Jozef wan enkri brada foe wan mama nanga papa, a no ben seni go nanga den, foedi a ben frede dati wan „dede ongolokoe ben sa kon en abra” soleki a ben taki. Foedi Jozef ben de a sma di ben seri a karoe, meki den brada foe en ben kon na en èn ben trowe densrefi a fesi en na gron. Aladi den no ben herken den brada, Jozef ben si wel soema den ben de. — Genesis 42:1-7.
7 Now Jozef e memre den dren di a ben kisi fosten foe den. Ma san a ben moesoe doe? A ben moesoe teki wraak? A ben moesoe frigiti na behandeling di a ben ondrofeni foe den, now di den ben de na ini sowan bigi nowtoe? Èn na sari di ben priti na ati foe den papa? A ben moesoe frigiti dati? Fa den brada foe en ben prakseri now foe na serjoesoe ogri di den ben doe? Ooktoe Jozef ben poti tapoe tesi na ini na afersi disi. Den doe foe en ben sa de ini akroederi nanga na fasi fa na Moro Bigi Jozef, Jezus Kristus, bakaten ben sa sori, soleki den skrifi disi na ini 1 Petrus 2:22, 23: „A no ben doe sondoe, èn ooktoe bedrigifasi no ben feni ini en mofo. Te den ben skempi en a no ben skempi baka, te a ben pina a no ben go krasi, ma a ben tan fertrow ensrefi na a Sma di e kroetoe sani regtvaardiki,
8. Jozef ben meki san tjari en alaten, èn san disi e agersi ini a tori foe Jezus en discipel?
8 Foedi Jozef ben kan herken na anoe foe Jehovah ini na kon foe den sani di ben e psa, meki moro nanga moro a ben hori soifri den wet nanga gronprakseri foe Gado ini prakseri. Tapoe asrefi fasi Jezus ben e soekoe foe doe ’na wani foe en Tata’ aladi a ben poti gi ibriwan sma ’di e sori bribi’ tego libi a den fesi (Johannes 6:37-40). Leki „boskopoeman” di e doe wroko ini a presi foe Kristus, en salfoe discipel e doe ooktoe a santa wroko foe den foedi den e taki „ala wortoe foe a libi disi gi a pipel”. — 2 Korinte 5:20; Tori 5:20.
9, 10. (a) Fa Jozef ben doe now, èn foe san-ede? (b) Fa Jozef ben sori net sowan sari-ati leki Jezus ben sa sori bakaten?
9 Jozef no ben sori ensrefi wantewante na en brada. Na presi foe dati, nanga jepi foe wan tolk a ben taki tranga wortoe gi den èn a ben taki: „Oenoe na spion!” Foedi den ben taki dati den abi ete wan jongoe brada meki Jozef ben aksi dati den ben tjari na brada disi kon na Egypte foe bewijsi taki den ben e taki na waarheid. Jozef ben jere den foeroe nanga berow e taki nanga makandra dati na drai disi foe den sani di psa ben moe de a paiman foedi den ben seri en, Jozef, leki srafoe go na Egypte. Nanga kré den ben drai taki nanga Jozef. Ma ete a meki den kisi Simeon hori te leki den ben sa drai kon bakananga Benjamin. — Genesis 42:9-24.
10 Jozef no ben teki wraak foe na ogri di den ben doe en. A ben wani si ofoe den ben abi opregti berow di ben komoto foe na dipi foe den ati, sodati a ben kan sori den sar’ati (Maleachi 3:7; Jakobus 4:8). Jozef ben sori nanga en doe net so wan sari-ati leki Jezus ben sa sori bakaten, bika no wawan a ben foeroe a saka fee den nanga karoe, ma a ben meki den poti a moni foe den baka ini na mofo foe ibri foe wan foe den saka. Boiti foe dati a ben gi den njanjan foe njan gi a reis. — Genesis 42:25-35; teki gersi nanga Mattéus 11:28-30.
11. (a) Jakob baka wan piston ben si a fanowdoe foe san, èn foe san-ede a ben agri te foe kaba? (b) Fa Romeini 8:32 èn 1 Johannes 4:10 e djaranti wi ooktoe na lobi foe Gado?
11 Baka wan pisten na njanjan di den ben bai ben klari. Jakob ben aksi en négi manpikin foe drai baka foe bai moro ete. Afesi a ben taki tranga foe Benjamin: „Mi manpikin no sa go nanga oenoe, bika en brada dede èn en wawan tan abra. Efoe wan dede ongolokoe miti en tapoe a pasi di a ben sa go, dan séker oenoe sa meki mi weti wiwiri go nanga sari ini Sjeool.” Ma nanga foeroe overtoigi èn baka di Juda ben poti ensrefi persoonlijk frantwortoe foe Benjamin, ne Jakob agri nanga tegenzin dati den teki a boi go nanga den. — Genesis 42:36-43:14.
12, 13. (a) Fa Jozef ben tesi en brada foe tjari na ati toestand foe den kon a krin? (b) Foe san-ede na bakapisi ben gi Jozef wan fundamenti foe sori sari-ati?,
12 Di Jozef ben si dati Benjamin ben kon nanga den brada foe en, a ben kari den kon na ini a oso foe den, pe a ben seti wan fesa njanjan. A ben meki den gi Benjamin wan porsi di ben bigi féfitron moro foeroe leki na porsi foe ibriwan foe den tra brada. Morofara Jozef ben tesi den brada foe en ete wan laatste tron. A ben meki den poti ala a moni foe den go baka ini ibri wan ègi saka, ma en ègi spesroetoe solfroe beker ben poti go ini na mofo foe na saka foe Benjamin. Baka di den ben hari gwe, Jozef ben seni a man di ben go abra en oso go a den baka foe kragi den foe foefoeroe èn foe go soekoe den saka foe den foe a beker foe en. Di den ben feni dati na ini na saka foe Benjamin den brada ben priti den djakti foe den. Den ben teki den go baka èn tjari den go fesi Jozef. Juda ben begi srefsrefi foe sar’ati èn a ben pristeri ensrefi leki srafoe ini na presi foe Benjamin sodati a boi ben kan drai go baka na en papa. — Genesis 43:15—44:34.
13 Jozef di ben abi now na overtoigi foe na kenki foe ati di en brada ben tjari kon, no ben kan dwengi en firi moro. Bakadi a ben seni ala tra sma di ben de ini na kamra gwe, Jozef ben bari: „Mi na Jozef, oen brada di oenoe ben seri go na Egypte. Ma oenoe no firi now dipi sari èn oenoe no atibron tapoe oen srefi dati oenoe ben seri mi kon djaso, bika na foe hori oenoe a libi Jehovah ben seni mi go na oen fesi . . . foe poti wan fika pisi foe oenoe dja na grontapoe èn foe hori oenoe na libi nanga jepi foe wan bigi ferloesoe.” Morofara a ben taigi en brada: „Hari go esesi na mi papa, èn oenoe moe taigi en: ’ . . . Kon na mi. No draidrai. Èn oenoe moe libi na ini na kondre Gosen,. . . èn seker mi sa sorgoe foe njanjan gi oenoe, bika féfi jari ete foe angriten e kon, sodati oenoe nanga oen oso nanga ala sani san oen abi, no fadon go ini na pina.’” — Genesis 45:4-15.
14. Sortoe prisiri njoensoe ben tjari go na Jakob?
14 Di Farao ben jere a njoensoe foe den brada foe Jozef, a ben komanderi Jozef foe teki wagi foe na kondre foe Egypte foe meki en heri famiri kon na Egypte, bika den ben sa kisi a moro boen pisi foe a kondre. Di Jakob ben jere alamala san ben psa, dan en jeje ben kon a libi èn a ben bari: „A nofo! MI manpikin Jozef e libi ete! Ah, meki mi go èn si en bifo mi dede!” — Genesis 45:16-28.
Jeje njanjan psa marki
15. Wi e loekoe na soema foe kisi den jeje jepisani foe tan a libi, èn fa wi kan de séker foe wan bogobogo foe njanjan?
15 San ala disi wani taki gi wi ini a ten disi? Ini na ferstan foe wi jeje nowtoe alaten wi e si go na a Sma di de moro bigi leki a boenati Farao foe na ten foe Jozef, dati wani taki na Soeverein Masra Jehovah, di e sorgoe ini den jeje jepisani foe tan a libi èn ini tiri sodati wi e kisi jepi foe psa den doengroe dé disi foe wan grontapoe di e angri foe bijbel waarheid. Wi span oensrefi krakti gi den belang foe na Kownoekondre èn foe taki en leti wi tjari wi tiende go ini en maksin. Fa a ben opo sondro gridi den „sroisi foe na hemel” gi wi foe kanti wan blesi „te leki mankeri no de moro”! — Maleachi 3:10.
16. (a) Pe wawan na ini a ten disi „njanjan” de foe feni foe ferloesoe wi libi? (b) Fa na sai foe „karoe” foe a boen foe a libismafamiri di abi angri kon moro bigi?
16 Na a reti-anoesé foe Jehovah sidon en Edeman foe njanjan, na kownoe di poti now na tapoe na troon, na glori Jezus (Tori foe den Apostel 2:34-36). Soleki den sma ben moesoe seri densrefi leki srafoe foe tan a libi, na so ala sma na ini a ten disi di wani tan a libi moe kon na Jezus foe tron en bakaman di gi densrefi abra na Gado (Lukas 9:23, 24). Soleki Jakob ben komanderi en manpikin foe go na Jozef foe njanjan, na so Jehovah e tjari sma di abi berow go na en lobi Manpikin, Jezus Kristus (Johannes 6:44, 48-51). Jezus e tjari en bakaman kon makandra ini gemeente di joe kan teki gersi nanga foto — èn foe den dati now joe abi na ini na heri grontapoe moro leki 52.000 — pe den e njan switi foe na jeje njanjan psa marki èn moro leki nofo (karoe) de foe kan sai en leki „siri” ini na gron (Genesis 27:23, 24; Mattéus 13:4-9, 18-23). Fa den kotoigi foe Jehovah disi de wrokoman di de klarklari foe wroko! Moro nanga moro foe den teki nanga den friwani prati na a foeroeten dienst leki pionier. A jari di psa wan hémarki ben doro di ini wan moen moro leki 595.896 ben abi wan prati na a grani pisi foe a dienst disi. Dati na wan gemiddelde foe moro leki elf pionier ini ibri gemeente!
17. (a) Na tjari kon makandra foe den tin afoe-brada nanga Jozef e meki wi denki na sortoe tra profétis tori?
17 A de wan aparti sani dati ala tin afoe-brada foe Jozef now di den ben abi berow foe den fosten fasi nanga libi èn waka ben kon de wan nanga en ini Egypte di, makandra nanga Sodom, de wan prenki foe na grontapoe na ini san Jezus ben anga na wan postoe (Openbaring 11:8). Disi e memre wi na Zacharia 8:20-23, wan pisi foe bijbel di e doro en hémarki ini a skrifi foe „tin man” di e taki. „Wi wani go nanga oenoe”, dati wani taki nanga Jehovah salfoe pipel, foe soema wan fika pisi e dini ete dja na grontapoe.
18. Nanga soema ini a ten disi na spesroetoe boenati di Benjamin ben kisi e akroederi?
18 Ma san de foe taki foe Jozef wan brada foe wan mama nanga papa, Benjamin, foe soema a moeilijk gebortoe foe en ben meki Jakob lobi oema Rachel lasi libi? Jozef ben sori na wan apartifasi boenati gi Benjamin, sondro degedege foedi Jozef ben firi ensrefi moro krosbé na a manpikin disi foe en égi mama. Disi e ferklari nanga ala sekerfasi foe san-ede Benjamin ben kisi wan porsi di ben de féfitron moro foeroe di ala twarfoe brada na a ten foe na fesa njanjan ini Jozef oso ben kon foe a fositron wán baka. Benjamin no de wan moi prenki foe salfoe kotoigi ini a ten disi, foe soema a moro bigi pisi foe den di de ete ini libi, foe sensi 1919 tjari kon makandra na a sé foe Masra? Na „Benjamin”-klasse disi kisi troetroe wan spesroetoe porsi, soleki e kon de foe si nanga a kotoigi di En ’jeje e gi nanga a jeje foe den’ (Romeini 8:16). Ooktoe den kisi tesi tapoe den soifri-retifasi, aladi den „skapoe” foe Masra e doe dienst gi den. — Mattéus 25:34-40.
19. Sortoe akroederi de foe si a mindri a sani dati Israël nanga en heri osofamiri ben hari go na Gosen èn na tjari kon makandra foe na pipel foe Gado ini a ten disi?
19 Na wan sani di e wiki belangstelling dati di Farao ben seti sani foe meki Jakob nanga en heri osofamiri kon na Egypte, dati ala „sili” di ben de manengre di ben kon libi drape, ben de sébitenti, ofoe sébitron tin (Genesis 46:26, 27). Den toe getal disi a bijbel e gebroiki na wan fasi di wani taki wan sani, èn dati wani taki „sébi” e sori tapoe hemel èn „tin” tapoe grontapoe volledigheid (Openbaring 1:4, 12, 16; 2:10; 17:12). Disi e akroederi nanga na situatie ini disi ten, now di wi kan ferwakti dati Jehovah e tjari en famiri foe kotoigi kon makandra te na a laatste man ini en „kondre”, na jeje paradijs na ini san wi e prisiri now. (Teki gersi nanga Efese 1:10.) „Jehovah sabi den wan di de foe en”, èn srefi now kaba ai meki den libi ini na moro boen pisi foe na kondre”, di joe kan teki gersi nanga Gosen ini a ten dati tapoe a grondgebied foe Farao. — Genesis 47:5, 6; 2 Timóteus 2:19.
20. Foe san-ede wi moe prisiri, aladi jeje angriten de ini a ten disi?
20 Na ini a ten foe Jozef den jari foe angriten ben waka baka den jari foe njanjan psa marki. Ini a ten disi den e de na a srefi ten makandra. Ini kontrari nanga den angriten ini a kondre di de dorosé foe na boenati foe Jehovah, dan tapoe a presi pe Jehovah e kisi anbegi, jeje njanjan de psa marki (Jesaja 26:6-9). Ija, aladi, soleki Amos ben taki a fesi, ini na kristenheid angri de foe jere wortoe foe Jehovah, tokoe a wortoe foe Jehovah troetroe e komoto foe a hemel Jerusalem go a doro. Fa disi e gi wi prisiri! — Amos 8:11; Jesaja 2:2, 3; 65:17, 18.
21. (a) Sortoe bigi grani wi abi now? (b) Wi moe de grantangi foe san, èn fa wi kan sori na tangi disi?
21 Ini a ten disi wi abi a bigi grani foe den tjari wi konmakandra ondro na tiri foe na Moro Bigi Jozef, Jezus Kristus, ini gemeente di wi kan teki gersi nanga foto. Drape joe kan njan boen foe no wawan foe wan fatoe jeje njanjan psa marki, ma ooktoe sai waarheid èn panja na boen njoensoe dati jeje njanjan de foe kisi. Disi wi e doe foe a boen foe ala sma di e teki den lobi kondisi èn seti di na Soeverein Tiriman Jehovah ben poti. Fa wi kan de wi Gado grantangi dati a ben gi en Manpikin, na Moro Bigi Jozef, di e doe wroko leki wan koni Edeman foe jeje njanjan. En de a Sma di Jehovah gi makti foe doe wroko ini a ten disi foe jeje angriten. Meki ibriwan foe wi doe santa dienst fajafaja ondro na tiri foe en èn foedi wi e waka na en baka!
Joe e si na akroederi?
◻ Sortoe akroederi de a mindri Jozef nanga Jezus leki a Edeman foe njanjan?
◻ Fa a drama foe Jozef e agersi dati wan sma e tron wan srafoe foe Gado foedi ai gi en libi abra na en?
◻ Sortoe égifasi Jozef èn Jezus ben sori leki wan eksempre gi libi ini a ten disi?
◻ Sortoe seti ben orga boen foe na prati foe njanjan ini a ten disi de wan sani di joe kan teki gersi nanga di foe den dé foe Jozef?
◻ Te wi loekoe a drama disi dan pe a moesoe poesoe wi go?
[Prenki na tapoe bladzijde 7, 8]
Ini wan grontapoe di jeje angriten teki en abra a moro Bigi Jozef e gi ala sma di e kon ini bribi na en njanjan psa marki
Neleki den tin afoe brada ben saka densrefi na ondro Jozef, na so wan bigi ipi e erken Kristus ini a ten disi
Neleki den 70 sili foe na osofamiri foe Jakob na so na eri nomroe foe Jehovah „skapoe” e go ini wan boen „kondre” — na jeje paradijs na ini san wi e prisiri wisrefi nownow
[Prenki na tapoe bladzijde 9]
Na disiten Benjamingroepoe abi na spesroetoe boen-ati foe Kristus, foedi den kisi toemsi foeroe „njanjan na a reti ten”