Fektori na tapoe ogridoe

„FOE SAN EDE a dede dagoe disi moesoe kari ogri kon na tapoe mi masra a kownoe? Meki mi go drape grantangi, èn koti en ede poeroe.” Na aksi disi ben kon foe Abisai, wan legre edeman foe Israèl. A ben handri nanga atibron di a ben jere taki wan Benjaminietsma di nen Simei, ben kosi en masra, Kownoe David, na wan bita-ati fasi. — 2 Samuèl 16:5-9.

Abisai ben abi wan denki di foeroe sma abi na ini a ten disi — foe teki refensi èn pai ogri nanga ogri. Ija, Abisai ben wani meki Simei pina foe a kosi di Simei ben kosi David.

Ma fa David ben handri? David ben tapoe Abisai foe doe dati, di a ben taki: „Libi en.” Ala di David no ben abi fowtoe foe den sani di Simei ben kroetoe en, tokoe nanga sakafasi David ben kakafoetoe gi a tesi foe teki refensi. Na presi foe dati, a ben libi na afersi gi Jehovah. — 2 Samuèl 16:10-13.

Di David ben teki en posisi leki kownoe baka, baka di a ben lowe gi na oproeroe foe en manpikin èn di no ben waka boen, dan wan foe den fosiwan di ben gi en odi èn ben aksi en pardon, ben de Simei. Agen Abisai ben wani kiri en, ma David no ben gi en pasi foe doe dati. — 2 Samuèl 19:15-23.

Na ini a situwâsi disi, David ben prenki Jesus Krestes na wan boen fasi, èn na apostel Petrus ben skrifi foe en: „Te den ben skempi en, a no ben skempi den baka . . . ma a ben tan saka ensrefi na ondro a wan di e kroetoe sma na wan regtfardiki fasi.” — 1 Petrus 2:23.

Na ini a ten disi Kresten e kisi a froemane foe „abi wan jeje foe sakafasi, èn no pai ogri baka nanga ogri” (1 Petrus 3:8, 9). Te wi e waka na baka na eksempre foe David nanga Jesus Krestes, dan wi toe kan „tan wini ogri nanga boen”. — Romesma 12:17-21.