Na soifri-reti-fasi foe Job — Foe san-ede a de so aparti?
„Te leki mi bro na laatste bro, mi no sa meki mi soifri-reti-fasi komoto gwe foe mi!” — JOB 27:5.
1. Soema ben de Job, èn fa wi sabi taki a ben libi troetroe?
JOB ben de na ini na historia foe a libismafamiri wan sma di ben kon aparti na fesi. No wawan dati a ben abi foeroe goedoe na skinfasi, ma a ben abi toe na respeki leki wan kroetoeman nanga tiriman di ben abi sari-ati. Na bijbel e taki dati en ’ben tron a moro bigiwan foe ala den oostsésma’ (Job 1:3; 29:12-25). Makandra nanga Job nanga Daniël den e kari en leki wan toemsi regtvaardiki man (Ezechiël 14:14, 20). Na bijbel e poti Job ooktoe leki wan eksempre gi kristensma foe waka na en baka, e sori nanga dati taki a ben de wan troetroe sma di ben de. — Jakobus 5:11.
2. Fa wi kan kon sabi oten Job ben ondrofeni den tesi di Satan ben tjari kon tapoe en?
2 Job ben libi na ini a kondre Uz, na ini na Arabië foe a ten disi. Aladi Job no ben de wan Israëlsma, a ben anbegi Jehovah, wan sani pe Jehovah ben poti a prakseri foe Satan a tapoe. Na ferklari foe Gado dati „no wan sma no de na grontapoe leki en, wan man sondro fowtoe èn opregti”, e sori dati na ini a ten dati no wan tra dienstknegti foe Gado ben e libi di ben kon so aparti a fesi (Job 1:8). Na tesi di Satan tesi Job ben moe feni presi foe dat’ede, aladi den farawe neef foe en, den Israëlsma, ben de srafoe na ini Egypte — wan pisten baka di na man Jozef di ben kibri en soifri-reti-fasi ben dede ini 1657 bifo G.T. èn bifo Mozes ben bigin en pasi foe soifri-reti-fasi.
3. Soema ben skrifi a boekoe Job, èn fa a ben kan kisi den bodoi?
3 A de krin dati na Mozes ben skrifi na boekoe Job. Ma fa a ben kan jere foe a tesi foe Job? We, baka di den ben dwengi Mozes na ini 1553 bifo G.T. foe gwe libi Egypte, a ben go libi na ini Midian, no fara foe a kondre Uz (Exodus 2:15-25; Tori foe den Apostel 7:23-30). Job ben de na ini den laatste 140 libijari di Jehovah ben blesi en (Job 42:16). Bakaten, di den Israëlsma na a kaba foe a waka foe den psa na sabana ben de na ini na birti foe Uz, dan Mozes ben sa kan jere foe den laatste jari foe Job libi nanga en dede.
Na sabi foe Job di ben skotoe
4. (a) San ben de soleki a ben kon a krin na fonten foe a sabi foe Job di a ben sabi foe Jehovah èn foe san-ede sondro degedege a ben abi kontakti nanga den bakapikin foe Abraham nanga Isaäk? (b) Fa Job ben de wan man foe aparti soifri-retifasi?
4 Di Job ben kisi tesi, en sabi foe Gado nanga a prakseri foe en ben skotoe, foe di no wan enkri pisi foe na bijbel ben skrifi poti a tapoe papira ete. Ma Job ben sa moesoe ben sabi pikinso foe Jehovah doe nanga Abraham, Isaäk, Jakob nanga Jozef, foe di a de krin dati a ben de wan bakapikin foe na brada foe Abraham Nahor via na fosi gebore manpikin foe Nahor Uz. Boiti foe dati, Bethuël, na tata foe Isaäk oema Rebekka èn na afo foe Jozef, ben de wan brada foe Uz (Genesis 22:20-23). A no de foe taki dati Job ben warderi na sabi di a ben kisi foe na kommunikatie di Jehovah ben abi nanga Abraham èn den bakapikin foe en èn o pikinso ofoe o foeroe a sabi dati ben mag de ooktoe, èn a ben broko ede foe plisi Jehovah. Na so Job ben tron wan man foe aparti soifri-reti-fasi, wan sondro fowtoe man di ben gi ensrefi krinkrin na ini a dini foe Jehovah.
5. San spesroetoe e meki na soifri-reti-fasi foe Job so aparti?
5 No langa baka di Jozef ben dede na ini Egypte, dan na soifri-reti-fasi foe Job ben tron a tori foe wan kesekese a mindri Jehovah Gado nanga Satan na ini hemel di no de foe si nanga ai. Ma Job no ben sabi noti foe na kesekese disi di ben abi foe doe nanga en soifri-reti-fasi èn joisti foe di Job no ben sabi na réde foe na pina foe en meki en soifri-reti-fasi di no ben kan broko ben de so aparti. Ma foe na boen foe ala den bakaten dienstknegti foe Gado, Jehovah ben meki Mozes skrifi den finifini tori foe na kesekese disi di ben abi foe doe nanga na soifri-reti-fasi foe Job.
Na stré-aksi di ben abi foe doe nanga na soifri-reti-fasi foe Job
6. (a) Fa wan bigi komakandra na ini hemel ben tjari kon na krin a de foe wan stré-aksi na mindri Gado nanga Satan? (b) Oten na stré-aksi disi ben doe kon, èn san a wani taki?
6 Na boekoe Job e opo na garden pikinso foe den sani di wi no kan si èn e gi wi pasi foe loekoe ini wan komakandra foe engel di ben feni presi na ini hemel na fesi foe Jehovah Gado. Dape Jehovah e memre ooktoe Satan di ben de drape dati „no wan sma de na grontapoe leki [Job], wan man sondro fowtoe èn opregti, di e frede Gado èn e wai komoto gi ogri” (Job 1:8). A de krin dati wan stré-aksi de pe na soifri-reti-fasi foe Job de na ini a tori. Ma na stré-aksi disi no de njoen. Prakseri ben poti na tapoe na stré-aksi disi di Satan ben drai Adam nanga Eva poeroe foe Gado, èn te i loekoe en boen ben taki: ’Efoe joe gi mi nomo na okasi, dan ibriwan sma mi kan kisi so fara dati a no e dini joe moro.’ — Genesis 3:1-6.
7. Fa Satan ben de ferplekti foe tjari boewijsi kon foe na soifri-reti-fasi foe Job, èn fa Didibri ben tjalansi Gado?
7 Now, na joeroeten foe na officieel komakandra disi na ini hemel, Satan ben de ferplekti now foe en sé foe gi réde foe na soifri-reti-fasi foe Job. „A no foe wan sani, meki Job e frede Gado?” a e aksi. „Joesrefi no ben lobi en èn ben poti wan skotoe lontoe en oso èn ala sani di a abi? . . . Ma langa grantangi leki wan kenki joe anoe pikinso”, Satan e tjalansi, „èn fasi ala san a abi èn loekoe pikinso ofoe a no sa floekoe joe leti na ini joe mindri fesi.” — Job 1:9-11.
8. (a) Fa Jehovah ben doe tapoe na tjalansi foe Satan? (b) Sortoe kefarlek naki Satan ben tjari kon tapoe Job?
8 Jehovah e teki a tjalansi foe Satan. A abi fertrow dorodoro na ini na soifri-reti-fasi foe Job. Èn ai gi leki piki na Satan: „Loekoe! Ala san a abi, de na ini joe anoe. Soso no langa joe anoe tége enrefi!” (Job 1:12). Es’esi Satan e fadon go tapoe Job. Sabeeërsma e fadon kon foefoeroe den doesoendoesoen kaw foe Job èn de féfi hondro oemaboeriki èn e kiri ala den knegti boiti wan. Moro fara Satan e seni wan hebi winti kon, di e broko a oso pe den tin pikin foe Job ben e hori wan fesa-njanjan, èn den alamala e dede. Baka dati den sma di tan a libi foe den rampoe disi e kon es’esi baka makandra foe ferteri Job a takroe njoensoe. — Job 1:13-19.
9. Spesroetoe nanga sortoe sani meki den rampoe foe Job ben de moeilek foe tjari, ma fa Job ben doe tokoe ete?
9 Fa disi de wan rampoe! Srefi efoe Job ben sa ferstan soema ben meki den kon, dan tokoe a boo de moeilek foe tjari en. Ma a no ben sabi pe a ben komoto! A no ben sabi dati a bende na prenspari sani foe wan kesekese na ini hemel èn dati Jehovah ben gebroiki en foe sori dati libisma de di sa hori tranga na den soifri-reti-fasi aladi Satan kande sa tjari ala na onregtvaardiki pina di de kon tapoe den. Tokoe Job di sari ben teki en abra èn di ben prakseri srefi dati Gado tapoe wan ofoe tra fasi ben de frantwortoe foe den lasi foe en, ben taki: „Jehovah srefi ben gi, èn Jehovah srefi ben teki. Na nen foe Jehovah moe tan kisi blesi”. Ija, „na ini ala disi Job no ben sondoe èn a no ben poti no wan sani di no ben fiti na tapoe Gado nen”. — Job 1:20-22.
10. (a) Foe sortoe primisi moro ete a tori foe Job Satan ben aksi, èn foe san-ede Jehovah ben de klari foe doe disi? (b) San ben de gi Job den bakapisi foe na sari toestand di a ben kan de na ini?
10 Fa disi ben de wan brokosaka gi Satan di Jehovah tapoe wan tra komakandra foe engel ben memre en na san e kon now na ini a tori foe Job: „Srefi now ete a e hori tranga na en soifri-reti-fasi”! Ma Satan no e weri. Now a e tjari a tjalansi kon a fesi dati efoe a ben kisi na okasi foe naki Job na skinfasi, Job ben sa floekoe Gado leti na ’ini en fesi’. Na fertrow di Jehovah ben poti na ini na soifri-reti-fasi foe Job, e go so fara dati a gi Satan pasi, ma e warskow en soso dati a no mag teki a libi foe Job. Foe dat’ede ’Satan e naki Job nanga wan takroe ogri sweri foe en foetoe go te na en ede’ (Job 2:1-8). Job e kon na ini so wan tegoe èn ogri toestand, dati en famiri nanga mati e komoto na en pasi èn fosten sabiman e spotoe en. — Job 12:4; 17:6; 19:13-19; 30:1, 10-12.
11. Sortoe njoen slag Job ben moe ferdrage, èn foe san-ede a ben de so aparti dati a ben kibri en soifri-reti-fasi na ondro ala den naki disi?
11 Èn agen wan njoen slag e kon! Na bribi foe na oema foe Job e kon swaki. A e taigi en: „Joe e hori te now na joe soifri-reti-fasi? Floekoe Gado èn dede!” Mi a e piki na oema: „Soleki wan foe den oema di lasi en ferstan e taki, a so joe e taki ooktoe. Wi sa teki soso na boen foe na troe Gado èn no teki ooktoe na ogri?” Soleki a tori e taki: „Na ini ala disi Job no ben sondoe nanga en mofo-boeba” (Job 2:9, 10). Te joe e prakseri dati a réde foe na pina foe Job ben de wan sani di ben kibri gi en, dan en soifri-retifasi ben de troetroe aparti!
Wan tra methode foe val aan
12. (a) Soema ben de den man di ben kon foe trowstoe Job? (b) Fa Sata ben gebroiki den man disi foe tesi Job moro fara?
12 Ma a no sari Satan ete. A e meki dri so-kari koniman kon a fesi, di kande sabi Job persoonlek ofoe ben jere foe a boen nen foe en leki „na moro bigi-wan foe ala oostsésma”. A de krin dati den de boen owroe moro leki Job (Job 1:3; 15:10; 32:6). Toe foe den de farawe famiri foe en. Na Themaniet Elifaz de wan bakapikin foe Abraham via Theman, wan granpikin foe Esau èn na Suhiet Bildad de wan bakapikin foe Abraham manpikin Suah (Job 2:11; Genesis 36:15; 25:2). A roetoe foe Sofar no de krin pe a komoto. A gersi leki den dri man e kon foe trowstoe Job, ma te joe loekoe en boen, Satan e gebroiki den ini wan moeiti foe broko a soifri-reti-fasi foe Job. Joisti soleki politikman di e aksi sani èn di e sori densrefi leki mati, e broko na loyaliteit foe straf’man èn e meki den opo densrefi tége den égi rigeri, na so Satan ben howpoe dati den „trowstoeman” foe Job ben sa meki a opo ensrefi tége Gado. — Job 16:2, 3.
13. (a) San den fisitiman foe Job ben doe baka di den doro? (b) Den takmakandra ben tjari san kon na fasi di den bigin taki?
13 Te den dri fisitiman doro, den e tan pi sébi dé nanga sébi neti e loekoe den hebi pen èn a moro dipi afrontoe foe Job (Job 2:12, 13). Elifaz di de soleki fa ai sori a moro owroewan, te foe kaba e teki a wortoe leki a fosiwan, èn e bepaal nanga dati na sfeer èn na algemene ferteriman foe na takmakandra, di e kon tron wan debat na ini dri ronde. Na taki foe Elifaz, netleki den tak-go-tak-kon foe en kompe baka dati, de moro foeroe fowtoe di ai feni. Alaten te wan foe den kragiman foe Job kaba foe taki, Job e piki en foe en sé èn e sori taki den boewijsi foe den no boen. Zofar na ini na di foe dri ronde no e taki moro na ini na debat foe di a de krin datia a e feni dati a no abi noti moro foe taki a tapoe. Sofar soboen e hori soso toe tak-go-tak-kon, aladi Elifaz nanga Bildad e hori ibriwan dri.
14. Sortoe argument den dri man ben gebroiki tége Job, èn fa Satan ben gebroiki a srefi tak-tik ini en aanval tége Jezus?
14 Den taki foe Elifaz de moro langa èn a tongo di ai gebroiki de moro safoe. A tongo foe Bildad e beti moro èn di foe Sofar moro ogri ete. A tak-go-tak-kon foe den nanga triki de nanga a méne foe doro a marki foe Satan, foe broko na soifri-reti-fasi foe Job. Foeroe tron den e ferteri troetroe tori ma a verband nanga fa foe si a tori fowtoe. Satan ben gebroiki na srefi tak-tik di a ben de a fesi Jezus. Satan ben teki wan tekst pe tanapoe dati na engel foe Gado ben sa kibri en dienstknegti foe ogri èn ben kari Jezus foe boewijsi dati a ben de na Manpikin foe Gado foedi a moe trowe ensrefi foe na tempel go na ondro (Mattéus 4:5-7; Psalm 91:11, 12). Den sortoe tak-go-tak-kon disi foe Satan wan heri pisten ben kon na tapoe Job.
15. San ben de leki fa Elifaz ben tak-go-tak-kon na oorzaak foe den rampoe foe Job?
15 Na ini a bigin-taki foe en Elifaz e taki dati den moeilekheid foe Job de na bakapisi foe a paiman foe Gado foe den sondoe foe en. „Sortoe sma dede oiti sondro a ben doe fowtoe?” so al aksi. „Leki fa mi ben si, dan den di e prakseri takroe sani èn den di e sai moeiti sa koti en ooktoe” (Job 4:7, 8). Dan Elifaz e taki moro fara dati Gado no e fertrow en dienstknegti. „A no abi bribi na ini en dienstknegti,” Elifaz e taki, „èn en [engel] a e sori tapoe fowtoe. Omeni moro dan den di e libi na ini tokotoko oso.” — Job 4:18, 19.
16. Fa Bildad ben go moro fara nanga na aanval foe Elifaz èn sortoe onregtvaardiki eksempre a ben gebroiki?
16 Bildad e go moro fara nanga na aanval nanga wortoe. „Efoe joe ben de soifri èn opregti” so ai taki, „dan [Gado] ben sa wiki now gi joe èn séker a ben sa meki na regtvaardiki tanpe foe joe kon boen baka.” Bildad e taki dati sondro watra papirus nanga ken e dré èn e dede èn e meki na waarheid getrow bosroiti dati so a sa go nanga „ala sma di frigiti Gado”. Ma fa ai lasi pasi efoe a tjari na eksempre dati kon a tapoe Job èn e taki moro fara: „Srefi a howpoe foe wan sma di fadon komoto a bribi sa broko saka te na gron”! — Job 8:6, 11-13.
17. Sortoe hebi wortoe Sofar ben gebroiki?
17 Den taki foe Sofar ben moro krakti srefi. A e kon tapoe disi dati ai taki: ’O efoe Gado ben sa taki nomo èn ben sa ferteri, joe san ai denki. Gado sabi san a ben doe. Ai strafoe joe foeroe moro mendri leki joe ben ferdini. Poeroe joe sondoe poti farawe foe joe èn libi ala joe takroedoe na joe baka dan joe sa abi sékerfasi èn foeroe mati.’ — Job 11:4-6, 14-20.
18. Fa den dri man na ini na tweede ronde foe na debat ben go doro nanga na aanval foe den tapoe Job?
18 Na ini na tweede ronde foe na debat Elifaz e go doro nanga aanval na tapoe Job soifri-reti-fasi. ’Gado no e fertrow srefi den engel, omeni moro mendri dan wan sma leki joe! Wan godelowsoe man de alaten na ini moeilekheid’ (Job 15:14-16, 20). Bildad, di ati e bron foe na kaka di Job e kakafoetoe gi den boewijsi foe den, e taki someni leki disi: ’A faja foe joe sa kiri. Ibri memre dati joe ben de sa lasi gwe. Dati e psa nanga den sma di frgiti Gado’ (Job 18:5, 12, 13, 17-21). Sofar e aksi, te ai taki moro fara foe na fosten tanboen foe Job: ’Joe no sabi dati na prisiri babari foe den godelowsoewan de foe wan sjatoe ten è na prisiri foe wan sma di fadon komoto foe bribi foe wan moment? Na hemel e tjari den fowtoedoe foe den godelowsoewan kon na krin’. — Job 20:4, 5, 26-29.
19. (a) Sortoe waarde Gado e gi leki Elifaz e taki na a soifri-reti-asi foe sma? (b) Fa Bildad leki a laatste wan ben taki na ini na aanval tapoe Job nanga wortoe?
19 Elifaz e bigin na di foe dri ronde foe na debat nanga na aksi: ’Wan sma kan abi ooktoe waarde gi Gado? Gado ben sa kon moro betre foe dati, srefi efoe a ben sa de sondro fowtoe? Drai go baka na Gado’, ai taki, ’èn tjari den afersi foe joe kon a krin. Dan joe sa kon boen baka’ (Job 22:2, 3, 21-23). Bildad e taki leki a laatste man na ini na aanval nanga wortoe: ’Soema na grontapoe kan meki bigi dati a de krin?’ So ai aksi. ’Na glori foe Gado de so bigi dati srefi na moenkenki èn den stari de moro mendri leki noti gi en. O moro mendri wan sma de di de soso wan woron ini en ai!’ — Job 25:2-6.
Job e opo taki èn e kisi pir’ai
20. (a) Fa Job ben piki na tapoe na argument taki pina de wan strafoe foe Gado foe sondoe ede? (b) Job ben teki a faste bosroiti foe doe san, èn fa wi sabi taki en soifri-reti-fasi na fesi foe Gado ben de troetroe prenspari?
20 Aladi Job e pina kefarlek tokoe a no e broko kindi no wan momenti gi den pori bewijsi foe den sma di e pina en. Efoe pina de wan strafoe foe Gado foe sondoe ede, so ai aksi, „foe san-ede dan den godelowsoe sma e tan joisti a libi, den e kon owroe, ija, kon moro hé na ini goedoe?” (Job 21:7-13) Èn ini kontrari nanga san den kragiman foe Job e taki, Jehovah e warderi wel na den sma di e kibri den soifri-reti-fasi, èn di nanga na libifasi disi e gi wan piki tapoe den wortoe foe Satan foe spotoe Gado, dati ibri wan sma a kan drai poeroe foe a dini foe Gado (Odo 27:11; Psalm 41:12). Foeroe nanga fertrow na ini en égi soifri-retifasi, Job e bari taki: „Teleki mi hari na laatste bro, ml no sa wai komoto foe mi soifri-reti-fasi” (Job 27:5) Nono, a no ben doe noti di ben meki a ferdini san ben kon en abra.
21. San Elihu ben taki gi den falsi trowstoe-man foe Job, èn sortoe fanowdoe pir’ai a ben gi Job?
21 Na jongoe man Elihu e arki boen na ibri wortoe foe den langa debat. Now ai teki a wortoe èn e meki den falsi trowstoeman foe Job ferstan taki nanga noti san den ben taki boewijsi ben gi dati Job de wan sondari (Job 37:1, 12). Dan Elihu e taki nanga Job taki: „Mi ben tan arki den wortoe foe joe: ’Mi de soifri, èn sondro foe psa wan wet; krin mi de, èn mi no abi fowtoe. Loekoe! Sani foe gens a e feni tége mi, a e hori mi foe wan féjanti foe en.’ Na ini disi joe no ben abi leti” (Job 33:8-13; 6:29; 13:24, 27; 19:6-8). Ija, Job ben meki sma si dati a ben broko en ede srefsrefi foe krin ensrefi. Ma tokoe a no ben kroetoe nanga dati Gado noiti èn a no ben lasi noiti na fertrow dati Gado ben sa doe san ben de joisti.
22. (a) Fa Job ben doe baka di aj1 ben arki na Jehovah? (b) San Jehovah ben aksi foe den falsi trowstoeman foe Job èn fa a ben waka nanga Job te foe kaba?
22 Efoe Elihu klari nanga en taki, dan wan bigi winti e opo kon èn Jehovah srefi e taki komoto foe na bigi winti: „Soema de drape bezig foe doengroe rai nanga wortoe sondro sabi? Tai joe mindri . . . meki mi aksi joe sani èn gi mi bodoi.” Baka di Job ben arki na Jehovah, a e erken dati a ben taki sondro ferstan, sondro foe sabi sani dorodoro èn dati a ben abi berow na ini stof nanga asisi. Dan Jehovah ben sori dati a no e agri nanga Elifaz nanga en toe kompe èn ai gi Job na komando foe opo doe wroko gi den leki mindriman. Baka dati Job e kon boen baka èn ai kisi blesi nanga sébi manpikin èn dri moi oemapikin èn toetron someni meti leki san a ben abi fosten ai kisi. Bakadi Job ben libi ete 140 jari, a e dede, „owroe èn en bere foeroe foe dé”. — Job 38:1-4; 42:1-17.
23. Sortoe krakti a soifri-retifasi foe Job moe abi tapoe wi?
23 Ija, Job ben de troetroe wan man foe soema na soifri-reti-fasi foe en ben de aparti! Tapoe nowan tra fasi a ben kan sabi taki en ben de na sani di Satan ben meki de a godelowsoe tjalansi foe en. Nanga disi na soifri-reti-fasi foe en e kon moro boen na fesi, bika awasi a ben bribi dati ala en pina ben kon foe Gado, tokoe a ben wégri drai baka gi Gado ofoe foe floekoe en. Fa disi de wan leri gi wi, foe di wi sabi wel den oorzaak foe den tesi na tapoe wi soifri-reti-fasi! Séker a moesoe boewégi oenoe foe waka baka na eksempre foe Job èn foe go doro nanga na wroko foe Jehovah, awinsi ala sani san na gensman foe Jehovah mag trowe kon tapoe wi na ini na stré.
Joe kan piki disi?
◻ Sortoe sani e meki na soifri-reti-fasi foe Job de so aparti?
◻ Soema ben go fisiti Job, èn san Satan ben howpoe dati den ben sa doe?
◻ Sortoe argument den dri man ben gebroiki tégen Job?
◻ Fa Job ben opo taki gi ensrefi, ma fa a ben kisi pir’ai?
◻ Fa a ben waka, èn sortoe krakti disi moe abi tapoe wi?
[Prenki na tapoe bladzijde 3]
Satan ben seni dri trowstoeman