Kapitel 12
Joe de na ini wan toemoesi prenspari strei
1, 2. (a) Foe san ede a fasi fa joe e libi, abi trobi troetroe gi joe? (b) Gi soema moro a abi trobi, èn foe san ede?
A ABI TROBI troetroe fa joe e libi. A sa wani taki gi joe wan kolokoe ten di o kon noso wan sariwan. Te foe kaba, a sa bepaal efoe joe sa lasi gowe nanga a grontapoe disi efoe joe sa pasa a kaba foe grontapoe libilibi go na ini Gado regtfardiki njoen grontapoe pe joe kan libi foe têgo. — 1 Johanes 2:17; 2 Petrus 3:13.
2 Ma a fasi fa joe e libi no abi krakti tapoe soso joe wawan. Trawan de ini a tori toe. San joe e doe abi krakti tapoe den toe. Foe eksempre, efoe joe papa nanga mama e libi ete, dan den sani di joe e doe, kan tjari grani noso sjen kon tapoe den. Bijbel e taki: „Wan koni manpikin na en di e meki wan papa prisiri, èn wan manpikin sondro froestan na a sari gi en mama” (Odo 10:1). San moro prenspari, na, taki a fasi fa joe e libi abi krakti na tapoe Jehovah Gado. A kan meki taki a e prisiri noso taki a e sari. Fa so? Foe di wan toemoesi prenspari strei de pe joe de na ini.
LIBISMA SA DE GETROW NA GADO?
3. San na a tjalensi di Satan ben tjalensi Jehovah?
3 Satan Didibri ben tjari a strei disi kon na fesi. A ben doe disi di a ben man foe tjari Adam nanga Eva go so fara, taki den ben pasa a wet foe Gado èn na a fasi disi den ben teki a sei foe Satan ini na opo di a ben opo ensrefi teige Gado (Genesis 3:1-6). Now Satan ben abi reide, na so a ben denki, foe tjalensi Jehovah nanga den wortoe: ’Den sma e dini joe soso foe den sani di den e kisi foe joe. Gi mi na okasi nomo èn mi kan drai ala sma poeroe na joe.’ Ala di den wortoe disi no skrifi so na ini bijbel, tokoe a de krin taki Satan ben taigi Gado so wan sortoe sani. Disi e kon na krin ini a bijbel boekoe Job.
4, 5. (a) Soema Job ben de? (b) San ben pasa na hemel na ini den dei foe Job?
4 Job ben de wan man di ben libi foeroe jarihondro baka na opo di sma ben opo densrefi teige Gado na ini a djari foe Eden. A ben de wan regtfardiki èn getrow foetoeboi foe Gado. Ma a ben abi trobi troetroe gi Gado noso gi Satan taki Job ben de getrow? Bijbel e sori taki na so a ben de. A e froeteri wi fa Satan ben kon na fesi Jehovah na ini hemel. Loekoe pikinso foe san a takimakandra foe den ben go:
5 „Now a dei ben doro di den manpikin foe a troe Gado ben kon foe tanapoe na fesi Jehovah, èn srefi Satan ben kon drape na den mindri toe. Ne Jehovah ben taigi Satan: ’Pe joe komoto?’ Tapoe dati Satan ben piki Jehovah, taki: ’Foe a waka di mi waka lontoe grontapoe èn a koiri di mi koiri lontoe en.’ Jehovah ben taigi Satan moro fara: ’Joe poti joe ati na tapoe mi foetoeboi Job, taki no wan sma de leki en na grontapoe, wan man sondro fowtoe èn opregti, di e frede Gado èn e tan fara foe ogri?’” — Job 1:6-8.
6. Sortoe strei ben de na ini a ten foe Job soleki fa bijbel e taki?
6 Foe san ede Jehovah ben taigi Satan taki Job ben de wan opregti man? A de krin taki wan strei ben de efoe Job ben sa tan getrow na Jehovah noso no ben sa tan getrow. Denki pikinso foe na aksi foe Gado: „Pe joe komoto?” èn a piki foe Satan: „Foe a waka di mi waka lontoe grontapoe èn a koiri di mi koiri lontoe en.” Na aksi disi nanga a piki foe Satan ben sori taki Jehovah ben gi Satan pasi foe a meki a tjalensi foe en kon troe, taki a ben kan drai ala sma poeroe na Gado. We, san Satan ben piki tapoe na aksi foe Jehovah di ben abi foe doe nanga a getrowfasi foe Job?
7, 8. (a) San ben de a sani foe san ede Job ben dini Gado, soleki fa Satan ben taki? (b) San Jehovah ben doe foe loesoe a strei?
7 „Tapoe dati Satan ben piki Jehovah, taki: ’Na foe soso taki Job frede Gado? A no joesrefi poti wan skotoe lontoe en èn lontoe en oso èn lontoe ala sani san a abi? A wroko foe en anoe joe blesi, èn den meti foe en srefi kon foeroe na grontapoe. Ma, leki wan kenki, langa joe anoe, grantangi, èn fasi ala sani san a abi èn loekoe efoe a no sa floekoe joe leti na joe fesi.’” — Job 1:9-11.
8 Nanga a piki di Satan ben gi Gado, a ben tjari kon na fesi, taki na foe wan sani ede meki Job ben de getrow na Gado. ’Job e dini joe’, na so Satan ben taki, ’foe den sani ede di joe e gi en, no foe di a lobi joe.’ Satan ben kragi toe taki Jehovah ben gebroiki en moro bigi makti na wan fasi di no reti. ’Joe kibri en ala ten’, a ben taki. Foe loesoe a strei dan Jehovah ben piki, taki: „Loekoe! Ala sani san a abi de na ini joe anoe. Ma na en nomo, joe no moesoe langa joe anoe go!” — Job 1:12.
9. Sortoe problema Satan ben meki Job kisi, èn nanga sortoe bakapisi?
9 Wantewante Satan ben bigin meki Job kisi problema. A ben meki ala den meti foe Job dede noso ben meki sma foefoeroe den. Dan a ben sorgoe taki den 10 pikin foe Job ben lasi libi. Job ben lasi pikinmoro ala sani èn tokoe a ben tan getrow na Jehovah. A no ben floekoe Gado (Job 1:2, 13-22). Ma dati no ben de a kaba foe a tori.
10. San e sori taki Satan no ben libi a tori?
10 Agen Satan nanga den tra engel ben kon na fesi Jehovah. Ete wan tron Jehovah ben aksi Satan efoe a ben si a getrowfasi foe Job èn Jehovah ben taki: „Srefi te now ete a e hori tranga na en soifri retifasi.” Na tapoe disi Satan ben piki: „Boeba foe a boen foe boeba, èn ala sani san wan sma abi a sa gi foe a boen foe en sili. Leki wan kenki, langa joe anoe, grantangi, èn fasi en te na en bonjo nanga en meti èn loekoe efoe a no sa floekoe joe leti na joe fesi.” — Job 2:1-5.
11. (a) Sortoe tra tesi Satan ben tjari kon na tapoe Job? (b) San ben de a bakapisi?
11 Leki piki na tapoe dati, Jehovah ben gi Satan pasi foe doe ala sani san a ben kan doe nanga Job, ma Gado ben taki: ’Joe no mag kiri en’ (Job 2:6). Na so Satan ben naki Job nanga wan kefalek takroe siki. A pina di Job ben pina ben de so hebi, taki a ben begi foe dede (Job 2:7; 14:13, 14). En eigi wefi ben kakafoetoe gi en èn ben taki: „Floekoe Gado èn dede!” (Job 2:9) Ma Job ben weigri foe floekoe Gado. „Te leki mi lasti bro, mi no sa libi mi soifri retifasi!” a ben taki (Job 27:5). Job ben tan getrow na Gado. Na a fasi disi a boeweisi ben gi, taki Satan no ben abi leti ini a tjalensi foe en, taki Job ben dini Gado soso foe kisi wini na skinfasi èn no foe di a ben lobi Gado. A boeweisi ben gi toe, taki Satan no ben kan drai ibri sma poeroe foe a dini foe Gado.
12. (a) Sortoe piki Job ben meki taki Gado ben kan gi na tapoe a tjalensi foe Satan? (b) San a getrowfasi foe Jesus na Gado ben boeweisi?
12 Fa joe denki taki Jehovah ben firi ensrefi di Job ben tan getrow? A ben meki en toemoesi kolokoe! A Wortoe foe Gado e gi tranga: „Sori taki joe koni, mi manpikin, èn prisiri mi ati, so taki mi kan gi wan piki na a sma di e spotoe mi” (Odo 27:11). Satan na a sma di e spotoe Jehovah. Èn foe di Job ben tan getrow, a ben prisiri na ati foe Gado. Disi ben meki taki Gado ben kan gi piki tapoe a bigimemre spotoe noso tjalensi foe Satan, taki libisma no ben sa dini En na ondro tesi. So srefi foeroe tra sma ben meki taki Gado ben kan gi Satan so wan piki. A moro bigi eksempre ben de a volmaakti libisma Jesus. Ala di Satan ben tjari ala sortoe tesi kon na en tapoe, tokoe a ben tan loyaal na Gado. Disi ben sori taki a volmaakti libisma Adam ben kan doe a srefi, efoe a ben wani dati, èn taki Gado no ben de onregtfardiki di a ben aksi foe libisma gi jesi na en dorodoro.
NA SOEMA SEI JOE TANAPOE?
13. (a) San a fasi fa joe e libi abi foe doe nanga a strei? (b) Fa wi kan meki Gado kolokoe noso sari?
13 Fa a de nanga a libi foe joe? Kande joe e denki taki a no abi trobi troetroe fa joe e libi. Ma a abi trobi fa joe e libi. Efoe joe e froestan en noso no e froestan en, a libi foe joe e hori baka gi Gado sei foe a strei noso gi Satan sei. Jehovah lobi joe, èn a wani taki joe dini en èn taki joe libi foe têgo na a paradijs grontapoe (Johanes 3:16). Di den Israèlsma ben opo densrefi teige Gado, dan a ben firi sari noso a ben ati en (Psalm 78:40, 41). A fasi fa joe e libi e meki Gado kolokoe noso e gi en sari? A no de foe taki, dati foe meki Gado kolokoe, joe moesoe leri sabi den wet foe en èn gi jesi na den.
14. (a) Sortoe wet di abi foe doe nanga a abi foe seks, wi moesoe gi jesi na den foe meki Gado kolokoe? (b) Foe san ede meki a pasa foe den wet dati na wan takroedoe?
14 Wan foe den moro prenspari marki foe Satan na foe kisi sma so fara foe den pasa den wet foe Gado di abi foe doe nanga a gebroiki foe a krakti foe den foe meki pikin, nanga en seti foe a trowlibi nanga na osofamiri. Den wet foe Gado, di de foe kibri a kolokoe foe wi, e taki dati sma di no trow no mag abi seks, èn taki sma di trow no mag abi seks nanga no wan tra sma di no de den trowpatna (1 Tesalonikasma 4:3-8; Hebrewsma 13:4). Te sma pasa a wet foe Gado, dan nofotron pikin e gebore sondro papa nanga mama di lobi den èn wani den. Kande mama e poeroe bere srefi, èn e kiri den pikin bifo den kan gebore. Boiti foe dati, foeroe sma di e doe hoeroedoe, e kisi kefalek takroe sjenpresi-siki, di kande kan doe ogri na den pikin di den e meki. A no de wan doe foe getrowfasi, ma wan takroedoe na Gado, foe abi seks nanga wan sma di joe no trow nanga en. Job ben taki: „Efoe wan oema ben kori mi ati, èn mi e tan loeroe na a doro foe a sma na mi sei: . . . dati ben sa de wan jajofasi foe tjari misrefi, èn wan fowtoe di moesoe kon ondro a prakseri foe den kroetoebakra!” — Job 31:1, 9, 11.
15. (a) Efoe wi doe hoeroedoe, soema wi e plisi dan? (b) Foe san ede a de wan koni sani foe gi jesi na den wet foe Gado?
15 A no moesoe froewondroe wi, taki a grontapoe disi, di Didibri e tiri, e meki a gersi leki a de wan normaal sani èn wan boen sani foe abi seks nanga wan sma di joe no trow nanga en. Ma efoe joe doe dati, dan soema joe e plisi? Na Satan joe e plisi, no Jehovah. Foe meki Gado kolokoe, joe moesoe „lon komoto gi hoeroedoe” (1 Korentesma 6:18). A troe, taki a no ala ten a makriki foe de getrow na Gado. A no ben makriki gi Job toe. Ma hori na prakseri, taki a de wan koni sani foe gi jesi na den wet foe Gado. Now kaba joe sa de moro kolokoe efoe joe e doe dati. Ma, moro prenspari, joe sa e hori baka gi Gado sei foe a strei èn sa meki en kolokoe. Èn a sa blesi joe nanga têgo libi ini kolokoe na grontapoe.
16. (a) Fa Job ben kisi blesi foe di a ben tan getrow? (b) San wi kan taki foe na ogri di Satan e doe, soleki a kiri di a kiri den 10 pikin foe Job?
16 A troe, taki Satan ben man foe meki Job kon pôti èn meki den 10 pikin foe en dede. A no wan sani foe degedege, taki disi ben de wan hebi lasi gi Job. Ma di Job ben sori taki a ben de getrow, dan Gado ben blesi en nanga toe tron someni sani leki a ben abi bifo Satan ben kisi pasi foe tesi en. So srefi Job ben tron papa foe ete 10 pikin (Job 42:10-17). Boiti dati, wi kan de seiker taki den 10 pikin foe Job, di Satan ben kiri, sa tjari kon na libi baka na ini na opobaka foe den dedewan. Foe troe, awinsi sortoe ogri noso sortoe pina Satan kisi pasi foe tjari kon, wi lobi-ati Tata, Jehovah, sa poti ala sani kon reti na tapoe en eigi fasti ten.
17. Foe san ede a abi trobi troetroe a fasi fa wi e libi?
17 So boen, joe sa wani hori ala ten na prakseri taki a abi trobi troetroe a fasi fa joe e libi. A abi trobi spesroetoe gi Jehovah Gado nanga gi Satan Didibri. Disi de so foe di joe de na ini a strei efoe libisma sa de getrow na Gado noso no sa de getrow.
[Prenki na tapoe bladzijde 106]
Job ben kakafoetoe gi a tjalensi foe Satan, taki no wan sma ben sa tan getrow na Gado na ondro tesi
[Prenki na tapoe bladzijde 110]
Foe abi seks nanga wan sma, di joe no trow nanga en, na wan takroedoe na Gado
[Prenki na tapoe bladzijde 111]
Jehovah ben blesi Job nanga moro foeroe sani leki a ben abi na fesi, foe di a ben de getrow