Frede gi Gado — A kan de wan wini gi yu
„Frede na tru Gado èn hori en gebod. Bika disi na a heri ferplekti fu libisma.” — PREIKIMAN 12:13.
1, 2. (a) Na anbegi fu wi fu Yehovah mu abi sortu sani leki fondamenti? (b) Ma sortu tra vereiste Gado e poti? (Deuteronomium 10:12)
DEN wortu „frede gi Gado” de wan freemde sani ini yu yesi? Furu sma kande e feni dati, efu den lobi Gado trutru, den no a fu frede en ooktu. Wi musu du ala den tu sani trutru? Èn efu dati do so, fa na frede gi Gado de leki wan wini gi wi?
2 Den Buku e sori dati na anbegi fu wi fu Gado èn wi dienst gi en musu abi lobi leki fondamenti. Jesus ben meki disi kon krin di a ben taki dati wi musu lobi Yehovah nanga heri wi ati, heri wi sili, heri wi frustan èn heri wi krakti (Markus 12:30). Ma ini a Wortu fu Gado krakti e poti ooktu dati a de prenspari fu frede en. Ini Preikiman 12:13 den e taigi wi disi nanga wan tu wortu: „Frede na tru Gado èn hori en gebod. Bika disi de na heri ferplekti fu libisma.” A de wan onlogis sani dati Yehovah e aksi wi fu frede en èn na asrefi ten fu lobi en?
3. San wi mu abi ini prakseri ini a tori fu frede?
3 Nono — efu wi hori na ini prakseri dati wi abi difrenti sortu fu frede. Efu sma e denki na frede, dan gewoonlek den prakseri e go na a sei fu wan siki firi di e pori howpu èn di e meki wi lasi ati. A no de fu taki dati Yehovah no wani dati wi abi den sortu firi dati gi en! Wi hemel Tata wani dati wi kon na en soleki wan pikin sa kon na en tata, nanga na overtolgi fu na lobi di en tata abi gi en èn toku na asrefi ten e frede fu en ati kon bron. Sowan frede sa yepi wi fu tan gi yesi na wi hemel Tata te sani wani kori unu fu du fowtu sani. Disi de na yoisti „Gado frede” di kristensma mu abi. — Hebrewsma 5:7; 11:7.
4. Sortu frede lobi e puru?
4 Yehovah no de leki wan krutuman di no abi firi, di alaten baka e strafu en dienstknegti efu den du wan fowtu. Na a tra sei a lobi den èn abi na tanbun fu den na prakseri. Sobun, efu wi meki wan fowtu ofu du wan sondu, dan frede fu Gado no mag tapu wi fu taki nanga en (1 Yohannes 1:9; 2:1). Na respeki frede fu wi gi Yehovah no de wan frede fu a handri nanga wi tapu wan fasi di no fiti ofu fu trowe wi. Soleki wi e leisi na ini 1 Yohannes 4:18: „Na ini lobi no wan frede de, ma volmaakti lobi e trowe frede na doro, bika frede e poti wan skotu.” Ma „volmaakti lobi” no sa puru na dipi respeki èn a yoisti frede di wi mu abi gi Yehovah leki yepiman èn a Sma di gi wi libi. — Psalm 25:14.
Luku den winimarki
5. (a) Fa wawan wi kan kisi koni? (b) San ben buweigi wan sma di fosten ben de wan srafu fu drugs fu tyari wan kenki kon ini en waka nanga libi di no ben de ferstandiki?
5 Meki wi luku pikinso wantu fu den winimarki di e kon fu „na frede gi Yehovah”. A e yepi fu eksempre dati wi kisi tru koni. Libisma pruberi langa ala sortu fasi fu kisi na koni dati, èn den e du ala sortu muiti fu dati, ma den no ben man fu di den ben poti wan gronprakseri a wan sei: „Na frede fu Yehovah de na bigin fu koni” (Psalm 111:10; Odo 9:10). Luku pikinso fa na frede disi ben yepi wan sma di ben de fosten wan srafu fu drugs fu handri koni. A e tyari kon a krin: „O moro mi ben e kisi sabi fu Gado ini mi, o moro mi ben meki na frede gro fu no gi en sari ofu meki en ati bron. Mi sabi dati a ben e luku èn mi ben abi a lostu fu a feni mi bun. A frede fu en buweigi mi fu pori den drug di mi ben abi na mi fu di mi wasi den ini a toilet gwe.” Na man disi ben wini den takru gwenti fu en, ben gi en libi abra na Yehovah èn a de now wan bedinari ini Yohannesburg (Zuid-Afrika).
6. Fa na „frede gi Yehovah” sa kibri wi teige den sani di ogri, èn a sa pusu wi fu du san?
6 Yu ben sa wani komoto na a pasi fu san de takru? „Na frede gi Yehovah wani taki fu no wani si ogri na ai” (Odo 8:13). Iya, na yoisti frede sa tapu yu fu furu takru gwenti di Yehovah no e feni bun, soleki smoko, na fowtu gebroiki fu drug, drungu èn sekshurudu. Boiti dati yu e plisi Yehovah, dan yu e kibri yusrefi ooktu teige kefarlek sani di e miti sma, pe yu abi na ini ooktu skrekisiki di sma e opo densrefi gi (Romeini 1:26, 27; 12:1, 2; 1 Korinte 6:9, 10; 1 Thessalonika 4:3-8). Frede fu Gado no wawan sa yepi yu fu kibri yu fu san de takru èn doti, ma sa pusu yu ooktu gi san de soifri èn bun, bika wi e kisi fu yere dati „na frede gi Yehovah de . . . soifri”. — Psalm 19:9.
7, 8. (a) Fa wan yongu umapikin ben ondrofeni dati „na frede gi Yehovah” e tyari koloku kon? (b) Kari wantu winimarki di den sma e kisi di e frede Gado.
7 Koloku de ete wan marki di furu sma e feti na en baka. Fa yu kan kisi en? A Wortu fu Gado e taki: „Koloku a man de di e frede Yehovah” (Psalm 112:1; 128:1). Disi e kon a krin na ini a ondrofeni fu wan tini umapikin. A ben gi ensrefi abra na ala sortu fu seksdu di a no ben abi pasi fu du, èn boiti fu dati a ben go bumui nanga ogri-yeye sani èn a ben go fufuru. Ne a ben bigin studeri a bijbel èn a ben kisi bun na en frustan na fanowdu fu arki Yehovah èn fu frede en. A e taki: „Dati mi ben leri sabi Yehovah, ben de na moro moi sani ini mi libi. Yehovah ben yepi mi kefarlek fu feni na waarheid èn koloku. Mi e firi dati mi de ini paiman furu na en fu di a ben opo mi ai èn a ben gi mi na kans fu go denki trutru èn fu feni en. Now mi wani yepi tra sma fu feni na koloku disi.”
8 Yehovah e pramisi ooktu dati a sa pai ’den sma di e frede en nen’ (Openbaring 11:18). Boiti fu dati „dan na frede fu Yehovah e tyari yu go na libi, èn nanga berefuru wan sma sa psa a neti; ogri no sa kon na yu” (Odo 19:23). Iya, a de „na frede fu Yehovah” di sa tyari ala sani gi wi di wi kan abi oiti fanowdu.Te na frede disi e go makandra nanga sakafasi dan na pisi de „gudu nanga glori èn libi”. — Odo 22:4; 10:27.
9. Fu san-ede na „frede fu Yehovah” e tyari wan sma go na a wan enkri libifasi di e sori taki a koni? (Yob 28:28; Micha 6:9)
9 Disi no e gi unu dek’ati na ala fasi fu frede na tru Gado? Futru, „Na frede fu Gado” de wan moi sani di e hari un kon srefsrefi. A e tyari un go na ala sani san e gi unu trutru satisfaksi — wan aparti ondrofeni ini a ten disi. Fa den wortu di e kon now e gi dek’ati: „Aladi wan sondari kande e du ogri wan hondro tron èn e tan langaten soleki a ferkisi, toku mi de sabisabi dati a sa waka bun nanga den di e frede na tru Gado, bika den ben frede en. Ma a no sa waka bun kwetkweti nanga den goddelowsuwan, èn ooktu a no sa meki den dei fu en kon langa, di de leki wan skaduw, fu di a no e frede Gado”! (Preikiman 8:12, 13). Suma no wani now dati a „sa waka bun gi en”? A koloku disi de wawan gi den sma di frede Gado.
10. San na wantu tumsi prenspari reide di mu buweigi wi fu frede Gado?
10 Disi no musu meki wi abi na faste bosroiti fu abi bigi repeki, iya, frede gi wi hemel Tata, Yehovah? Wi mu abi trutru wan gesontu frede fu no meki en atibron. Wi abi dipi warderi gi ala lobi bunfasi di a sori wi. Ala san wi abi kon fu en (Openbaring 4:11). Boiti fu dati a de na moro Hei Krutuman, na Almaktiwan, di abi a makti fu kiri den sma di no e gi yesi na en. „Tan nanga frede èn beifi fu wroko na yu eigi ferlusu” na apostel Paulus e fermane. — Filipi 2:12; Hosea 3:5; Lukas 12:4, 5.
11. (a) Sortu pasi kristen sma mu tan farawe fu en ini den laste dei disi? (b) Sortu yeye yu mu kweki?
11 Ini disi wi no kan si dati wi kan kisi ferlusu te wi e teki wan fasi pe krakti no de na ini, fu du so pikinso leki a kan èn fu howpu dati ala sani tapu wan ofu tra fasi sa waka bun. Disi no de a fasi di kristen mu sori di ini den lasti dei disi e feti fu hori na matifasi fu den nanga a Sma di kan luku te ini den ati èn e sabi den moro dipi prakseri èn bedoeling fu den (Yeremia 17:10). Soso den sma di abi wan yoisti warderi gi Yehovah a sa erken. A e taki: „Tapu disi dan mi sa si, tapu na mofinawan èn na wan di broko gi yeye èn di e beifi gi na wortu.” — Yesaya 66:2.
Wi mu leri fu frede Yehovah
12. (a) Na sortu fasi na natie Israël ben kisi bunati moro leki den tra natie? (b) San Yehovah ben ferwakti fu dati baka?
12 Te wi e luku den fasi fa Yehovah ben bumui nanga Israël, dan dati kan poti moro tranga go ini yu prakseri na fanowdu fu frede en. Nowan tra natie no ben kisi someni sorgu nanga prakseri fu na Soeverein fu na universum (Deuteronomium 4:7, 8, 32-36; 1 Samuël 12:24). Den Israëlsma ben si nanga den eigi ai fa Yehovah ben handri nanga den Egyptesma fu di den no ben abi frede gi en, ben hori en pipel ini katibo èn ben kwinsi den. San a ben ferwakti fu dati baka? „Kari na pipel kon makandra, den man èn den uma èn den pikinwan èn den freemdesma di e libi inisei fu yu portu, sodati den mag arki èn sodati den mag leri, fu di den mu frede Yehovah yu Gado èn mu sorgu fu du ala wortu fu na wet disi. Èn den manpikin fu den di no ben sabi disi, mu arki, èn den mu leri frede Yehovah yu Gado, ala den dei di yu e libi na tapu na gron di yu e go teki na abrasei fu a Yordaan.” — Deuteronomium 31:12, 13; 14:23.
13. Papa nanga mama mu broko den ede ini a tori fu den pikin moro furu fu san?
13 Netleki den Israëlsma na so den disi ten dienstknegti fu Gado „mu leri frede Yehovah”. Fa disi e poti wan bigi frantwortu tapu wi alamala — èn spesrutu tapu papa nanga mama! Un papa nanga mama, aksi unsrefi: ’Fa mi kan yepi mi pikin fu kisi wan ati di e frede Yehovah’ San sa de ini yeyefasi, ini frustan ofu na sei fu gudu wan moro betre kibri gi den leki na abi fu na frede disi fu Gado — te pikin dyonsro tron bigisma èn o gwe libi na oso? Yehovah srefi e poti krakti tapu a belang fu disi te a e taki: „Efu den ben sa meki na ati fu den kon so fu frede mi èn hori mi gebod sodati a sa go den nanga den manpikin bun te ten di no abi marki!” — Deuteronomium 5:29; 4:10.
14. Kari wan sani di papa nanga mama mu hori ini prakseri te den e leri den pikin fu den a frede gi Yehovah, èn tyari kon a krin fa disi mu du ini a aladei libi?
14 Ibri kristen di kweki wan osofamiri, sa piki dati disi no de wan makriki wroko. Ma ete a Wortu fu Gado di skrifi ondro krakti fu santa yeye e tyari difrenti prenspari sani kon na a prakseri fu papa nanga mama. Wan fu disi de bigin efu den pikin de yongu. O yongu? Di den Israëlsma ben kon makandra fu kisi leri fu Yehovah, dan den „pikinwan” ben de drape ooktu (Deuteronomium 29:10-13; 31:12, 13). A de seiker so dati den Israël uma ben e tyari den beibi fu den go na den okasi disi di den ben aksi fu ala sma de drape. Sobun fu „pikinnengreten kaba” den manpikin èn umapikn fu den ben leri na fanowdu fu de pi na den sortu komakandra disi èn fu arki (2 Timotéus 3:15). Teki fu dat’ede den „pikinwan” fu yu go na den komakandra. Tyari den go ooktu ini velddienst so esi leki den man fu abi wan prati. Furu yonguwan ben leri kaba bifo den go na skoro fu pristeri wan tijdschrift ofu tractaat. Bigin fu leri den „pikinwan” fu yu ini pikin sani biten kaba „na fredo gi Yehovah”.
15. San na a di fu tu sani èn fa papa nanga mama kan hori densrefi na disi?
15 Wan tra sani de fu de consequent. Wi kan hori wisrefi na disi efu wi e hori wisrefi alaten na a Wortu fu Gado na a opleiding, na tranga leri nanga a leri di wi e gi wi pikin. Srefi efu a e go fu ontspanning ofu a gebroiki fu friten yu mu meki alaten bijbelgronprakseri bepaal san mag na den sortu okasi disi (Efese 6:4). Disi sa aksi muiti, soleki a wortu fu Gado e sori krin: „Èn den wortu disi di mi e komanderi unu tide, mu sori taki den de tapu un ati; èn un spikri den go ini un manpikin èn taki fu dati te un sdon ini un oso èn te un de na pasi èn te un e didon èn te un e opo” (Deuteronomium 6:4-9; 4:9; 11:18-21). Te na tapu na fasi disi yu de consequent ini ala den yari, dan disi sa yepi yu pikin srefsrefi fu kweki wan ati di e frede Yehovah.
16. (a) San na a di fu dri sani, èn fu san-ede disi de so prenspari? (b) San papa nanga mama kan aksi densrefi?
16 Papa nanga mama mu feti ooktu a baka fu spikri go na ini na ati èn a frustan fu den pikin dati densrefi leki papa nanga mama ’e frede Yehovah’ (Psalm 22:23). Wan fasi fa den kan du disi, na fu gebroiki theokratis rai ini a kweki èn a gi tranga leri fu den pikin. Disi na di fu dri sani di den mu luku. Aksi yusrefi: ’Mi abi wan geregelde bijbelstudi nanga mi pikin?’ ’Mi e gebroiki dorodoro gi mi yongu pikin den yepi sani soleki Mi buku nanga bijbeltori èn Arki Na a Bigi Leriman?’ ’Mi e gebroiki te den kon moro bigi na buku Meki yu yongu yari waka bun èn den artikelserie „Yongu sma e aksi” ini Ontwaakt!?’ ’Mi e sorgu gi bun ontspanning èn gesontu amusement, di no sa abi wan takru wroko tapu mi pikin?’ ’Mi teki san Yehovah organisatie e taki fu hei leri?’ ’Mi e gi mi pikin leri akruderi disi?’ ’Den marki di mi poti na fesi mi pikin de bun fu yepi den fu kisi „frede gi Gado”?’ — Hebrewsma 5:7.
17. Suma a e tyari wini gi te pikin e leri frede Yehovah? Gi eksempre fu disi.
17 Den winimarki nanga prisiri no wawan sa kon gi yu pikin ma ooktu gi yu efu yu du ala sani san yu man fu leri den ini a frede gi Yehovah. Wan kotoigi fu eksempre di na a kaba fu a dei e firi ensrefi „brokosaka”, soleki ensrefi e taki en, e si dati ala sani kan go baka, te a yere en seibiyari umapikin e begi na Yehovah. Watra-ai e kon ini en ai èn ai gersi leki a e kisi wan sani ini en neki te a e yere a begi fu en umapikin: „Lobi Yehovah, mi e taki yu tangi fu ala bun sani di yu du tide gi mi. Mi e taki tangi fu a nyanyan. Yepi ala brada ini dungru-oso èn concentratiekampu fu kisi nyanyan, èn ooktu ala mangri brada nanga sisa ini tra kondre. Yepi den ooktu fu kisi nofo nyanyan, Yehovah èn yepi den sikiwan fu kon betre sodati den kan go na den komakandra. Meki den engel grantangi hori wakti abra mi efu mi e sribi tide neti, Yehovah, èn abra mi mama èn papa èn mi pikin brada èn mi oma nanga opa èn ala brada nanga sisa ini na waarheid. Nanga yepi fu yu Manpikin Yesus, Amen.”
18. Fa wi abi krakti tapu makandra ini na afersi fu a abi fu frede gi Yehovah?
18 Ini na afersi disi fu na abi fu frede gi Yehovah, wi mu prakseri dati wi e abi krakti tapu makandra nanga na eksempre di wi e gi. Papa nanga mama e abi krakti tapu den pikin fu den. Owruman nanga den dinari na ini a diniwroko e abi krakti na tapu den gemeente fu den. Opziener di e waka lontu luku gemeente e abi krakti tapu den sma gi suma den e du dienst. A de krin dati disi de a reide fu san-ede den kownu ini Israël ben kisi na komando fu leisi ala den dei fu den libi ini a wet fu Gado, sodati den ben sa ’mag leri fu frede Yehovah’ (Deuteronomium 17:18-20). Na eksempre di na kownu ben sa gi ini a frede gi Yehovah ben sa abi krakti tapu a heri natie.
19. Na historia e kotoigi fu san na ini a tori fu den Israëlsma?
19 Na historia e kotoigi dati Israël leki natie ben tapu fu frede Yehovah. Den ben prakseri dati fu di na tempel ben de ini Yerusalem den ben sa kisi kibri, leki dati ben de wan sortu „tapu”, awasi a ben de now dati den ben e gi yesi na den wet fu Gado efu no (Yeremia 7:1-4; Micha 3:11, 12). Ma ini disi den ben kori den krabyasi. Yerusalem nanga en tempel ben kisi pori. Bakaten, di leki natie den ben gi libi baka ini a kondre fu den, dan agen den ben misi fu sori na yoisti frede gi Yehovah (Maleachi 1:6). Wi kan leri furu fu na ondrofeni disi, di wi e taki fu en ini na artikel di o kon.
20. Fa wi ben sa kan taki syatu fu san-ede wi mu frede Yehovah?
20 Sobun go prakseri dati frede fu Yehovah no e swaki a lobi fu wi gi en; kontrari fu dati, a e a kon moro tranga èn moro dipi. Fu di wi e gi yesi na ala en komando, dan no wawan a bewijsi sa gi dati wi e frede Yehovah ma ooktu dati wi lobi en. Alatu abi fu du nanga wi libi. Na wan no kan sondro a trawan. Fa a de fu dat’ede prenspari dati papa nanga mama leri den pikin fu den na frede gi Yehovah èn lobi gi en! Èn fa disi e tyari wan kefarlek bigi prisiri gi yonguwan èn owruwan! Meki wi denki fu dat’ede net soleki na psalmsingiman di a ben taki: „Tyari mi ati kon na wan fu frede mi nen.” — Psalm 86:11.
Punt fu go prakseri
◻ Fa wi kan lobi Yehovah èn frede en?
◻ San na wantu winimarki fu na frede fu Yehovah?
◻ Sortu dri sani kan yepi papa nanga mama fu asisteri den pikin fu den ini na kweki fu wan ati di e frede Yehovah?
◻ Fa wi abi krakti tapu makandra ini na afersi fu abi frede gi Yehovah?
[Prenki na tapu bladzijde 3]
Frede gi Yehovah sa yepi yonguwan fu no go ini den kori fu du san takru
[Prenki na tapu bladzijde 4]
Papa nanga mama mu yepi den pikin fu den fu kweki wan gosontu frede gi Yehovah
[Prenki na tapu bladzijde 5]
„A sa waka bun nanga den sma di e frede na tru Gado.” — Preikiman 8:1