San e kon na a fosi presi na ini joe libi?

„Meki mi kon sabi a pasi di mi moesoe waka.” — PSALM 143:8.

1. Na sortoe bosroiti kownoe Salomo ben kon ini a tori foe wroko foe libisma èn den sani di den ben doe?

KANDE joe sabi taki libi foeroe nanga sani di sma e doe èn nanga broko-ede. Te joe e prakseri foe disi, dan joe kan si taki wan toe foe den na prenspari sani. Tra sani di sma e doe èn tra broko-ede no de so prenspari noso den de foe soso srefi. Taki joe e froestan disi, wani taki dati joe e agri nanga wan foe den moro koni sma di oiti ben de, kownoe Salomo. Baka di a ben ondrosoekoe finifini baka san na den sani di sma e doe na ini libi, a ben kon na a bosroiti: „Frede a troe Gado èn hori den komando foe en. Bika disi na a heri plekti foe libisma” (Preikiman 2:4-9, 11; 12:13). O prenspari disi de gi wi na ini a ten disi?

2. Sortoe prenspari aksi a pipel di e frede Gado moesoe poti gi densrefi, èn na sortoe tra aksi di abi foe doe nanga dati, e kon foe disi?

² Efoe joe wani „frede a troe Gado èn hori den komando foe en”, dan aksi joesrefi a moeilek sani disi: ’San e kon na a fosi presi na ini mi libi?’ A troe, taki joe no ben sa prakseri foe na aksi dati ala dei, ma foe san ede joe no e loekoe en now? Foe taki en leti, a e meki sma denki foe wan toe tra aksi soleki: ’A ben sa kan taki mi e poti toemoesi foeroe prakseri na tapoe a wroko foe mi noso na tapoe materia goedoe? O prenspari mi oso, mi osofamiri, èn den lobiwan foe mi de gi mi?’ Wan jongoesma kan aksi: ’Omeni ten nanga prakseri a leri di mi e kisi, e teki foe mi? Troetroe, wan hobby, sport, noso a wan noso tra sortoe ontspanning, noso tèknologie de a moro prenspari sani gi mi?’ Awansi o owroe wi de noso sortoe situwâsi wi de na ini, a fiti taki wi e aksi: ’Sortoe presi a dini di mi e dini Gado e teki na ini mi libi?’ Kande joe ben o agri taki a de fanowdoe foe abi sani di de moro prenspari. Ma fa èn pe wi kan kisi jepi foe loekoe na wan koni fasi san na den moro prenspari sani gi wi?

3. San a loekoe di wan kresten e loekoe san na den moro prenspari sani gi en, wani taki?

³ „Na a fosi presi” wani taki moro foeroe wan sani di e kon fosi ala tra sani noso wan sani di wan sma moesoe prakseri foe dati fosi. Awansi joe na wan Kotoigi foe Jehovah noso joe na wan foe den miljoenmiljoen opregti studenti foe Gado Wortoe di abi demakandra nanga den, loekoe a troe tori disi: „Gi ala sani wan fasti ten de, ija, wan ten gi ibri afersi na ondro hemel” (Preikiman 3:1). A fiti taki a abi na ini toe, dati joe e sori na wan lobi-ati fasi taki joe e broko joe ede nanga a banti di de na ini na osofamiri (Kolosesma 3:18-21). A wani taki toe foe sorgoe na wan eerlijk fasi gi joe osofamiri, foe di joe e doe grontapoe wroko (2 Tesalonikasma 3:10-12; 1 Timoteus 5:8). Èn wanwan leisi, joe kan teki ten gi wan hobby noso gi prisiriten noso ontspanning te na okasi de. (Teki gersi Markus 6:31.) Ma te joe e prakseri serjoesoe foe sani, dan joe no e si taki no wan foe den sani disi e kon na a fosi presi na ini libi? Wan tra sani de moro prenspari.

4. Fa Filipisma 1:9, 10 abi foe doe nanga a loekoe di wi moesoe loekoe san na den moro prenspari sani?

⁴ Kande joe e erken taki a tiri di bijbel gronprakseri e gi, na boen jepisani foe loekoe san na den moro prenspari sani èn foe teki koni bosroiti. Foe eksempre, na Filipisma 1:9, 10, den e gi kresten tranga foe meki ’a lobi foe den kon moro nanga moro nanga a soifri sabi èn nanga ala a koni foe man si sani krin’. Foe san ede? Na apostel Paulus ben taki moro fara: „So taki oenoe kan kon sabi seiker san na den moro prenspari sani”. Joe e froestan disi? Tapoe a gron foe soifri sabi, wan kresten di abi a koni foe man si sani krin, kan kon sabi san moesoe de a moro prenspari sani — san e kon na a fosi presi — na ini libi.

Wan eksempre di e sori san e kon na a fosi presi

5. Fa den Boekoe foe bijbel e sori san ben de a moro prenspari sani na ini Jesus libi, te den e taki foe na eksempre di a ben libi gi kresten?

⁵ Na ini den wortoe foe na apostel Petrus wi e si wan warti sani di abi foe doe nanga sabi: „Foe taki en leti, foe a sani disi ede den ben kari oenoe, bika srefi Krestes ben pina foe oenoe ede, èn ben libi gi oenoe wan eksempre foe waka soifri na ini en foetoestap” (1 Petrus 2:21). Ija, efoe wi wani kon sabi san e kon na a fosi presi na ini libi, dan wi kan ondrosoekoe san Jesus Krestes ben prakseri foe disi. Psalm 40:8 ben taki na wan profeitis fasi foe en: „Mi prisiri foe doe joe wani, o mi Gado, èn joe wet de na ini den inisei pisi foe mi.” Disi na fa a ben taki a srefi prakseri: „Mi njanjan de, foe mi doe a wani foe en di ben seni mi kon èn foe kaba a wroko foe en.” — Johanes 4:34; Hebrewsma 12:2.

6. Fa wi kan abi den srefi bakapisi di Jesus ben abi di a ben poti Gado wani na a fosi presi?

⁶ Loekoe san na a moro prenspari sani — a doe di wi e doe Gado wani. Na eksempre foe Jesus e poti foeroe prakseri na tapoe san fiti gi den disipel foe en foe den poti dati na a fosi presi na ini a libi foe den, bika a ben taki dati „ala sma di kisi volmaakti leri, sa de leki a leriman foe en” (Lukas 6:40). Èn di Jesus ben waka na a pasi di en Tata ben abi na prakseri, a ben sori taki ’prisiri ben de pasa marki’ te wan sma ben poti Gado wani na a fosi presi (Psalm 16:11; Tori foe den Apostel 2:28). Joe e si san dati wani taki? Te den bakaman foe Jesus e bosroiti foe poti a doe foe Gado wani na a fosi presi na ini a libi foe den, dan den sa njan boen foe „prisiri pasa marki” èn foe a troetroe libi (1 Timoteus 6:19). So boen, moro leki wán reide de foe poti a doe foe Gado wani na a fosi presi na ini wi libi.

7, 8. Nanga sortoe tesi Jesus ben kisi foe doe, èn san wi kan leri foe disi?

⁷ Leti baka di Jesus ben sori sma taki a ben pristeri ensrefi foe doe foe Gado wani, Didibri ben soekoe foe drai Jesus poeroe foe Gado. Fa? Foe di a ben tesi en na tapoe dri kontren. Ibri leisi Jesus ben piki nanga krin wortoe di komoto na bijbel (Mateus 4:1-10). Ma moro tesi ben e wakti en — froefolgoe, spotoe, a tori di Judas ben o tori en, falsi kragi, èn baka dati a dede di a ben o dede na wan pina-oedoe. Tokoe no wan foe den tesi disi ben meki a loyaal manpikin foe Gado gowe libi a pasi foe en. Na wan toemoesi moeilek momenti, Jesus ben begi: „No soleki fa mi wani, ma soleki fa joe wani. . . . Joe wani moesoe pasa” (Mateus 26:39, 42). Na eksempre disi di a libi gi wi, no moesoe boeweigi ibriwan foe wi troetroe, èn meki taki wi e „horidoro na ini begi”? — Romesma 12:12.

⁸ Ija, te wi wani loekoe san na den moro prenspari sani na ini libi gi wi, dan a tiri foe Gado de wan heri boen jepi, spesroetoe te wi e kisi foe doe nanga feanti foe waarheid èn nanga sma di e gens Gado wani. Memre di a getrow kownoe David ben begi tranga foe kisi tiri di feanti ben gens en. Wi sa si disi te wi e loekoe wan pisi foe Psalm 143. Disi moesoe jepi wi foe si krin fa wi kan tranga a persoonlijk matifasi di wi abi nanga Jehovah èn kon tranga foe tan si a doe foe Gado wani leki a moro prenspari sani na ini wi libi.

Jehovah e jere èn e piki den begi foe wi

9. (a) San den wortoe èn doe foe David e sori, ala di a ben de wan sondari? (b) Foe san ede wi no moesoe tapoe foe doe san boen?

⁹ Ala di David ben de wan sondoe sma di ben man dede, tokoe a ben bribi taki Jehovah ben o arki a tranga begi foe en. Na wan sakafasi a ben begi: „O Jehovah, jere a begi foe mi; poti jesi arki a tranga begi foe mi. Piki mi na ini joe getrowfasi, na ini joe regtfardikifasi. Èn no kon na ini wan kroetoe afersi nanga joe foetoeboi; bika na joe fesi no wan sma di de na libi kan de regtfardiki” (Psalm 143:1, 2). David ben sabi heri boen taki a no ben de volmaakti, ma tokoe na ati foe en ben de dorodoro nanga Gado. So boen, a ben froetrow taki a ben o kisi wan piki na ini regtfardikifasi. Disi no e gi wi deki-ati? Ala di wi no man doro a regtfardikifasi foe Gado, tokoe wi kan de seiker taki a e arki wi efoe wi ati de dorodoro nanga en (Preikiman 7:20; 1 Johanes 5:14). Te wi e horidoro na ini begi, dan wi moesoe abi na prakseri foe „wini ogri nanga boen” na ini den godelowsoe dei disi. — Romesma 12:20, 21; Jakobus 4:7.

10. Foe san ede David ben abi pisi ten pe a ben broko en ede nanga sani?

¹⁰ David ben abi feanti, neleki fa wi abi feanti. Awansi David ben de wan sma di ben moesoe lowe gi Saul, èn ben moesoe soekoe kibri na ini tiri presi pe sma no ben man go, noso leki wan kownoe di feanti ben soekoe foe doe ogri, tokoe a ben abi momenti pe a ben broko en ede nanga sani. A ben taki fa disi ben abi krakti na en tapoe: „A feanti froefolgoe a sili foe mi . . . A meki mi tan na ini doengroe presi . . . Èn a jeje foe mi e kon swaki na ini mi; na inisei foe mi, mi ati sori leki a no abi firi moro” (Psalm 143:3, 4). Joe ben abi reide foe firi so toe?

11. Sortoe pisi ten den disiten foetoeboi foe Gado abi, pe den e broko den ede nanga sani?

¹¹ A druk foe feanti, tesi di e kon foe di bigi problema de na ekonomia sei, tranga siki, noso tra problema di e gi broko-ede meki taki son wan foe Gado pipel firi taki den ben o lasi-ati. Son leisi, na ati foe den so srefi ben de leki a no ben abi firi. A de neleki ibriwan foe den bari: „Bika joe meki mi si foeroe banawtoe nanga rampoe, meki a de so taki joe gi mi libi baka . . . Èn taki joe e lontoe mi èn e gi mi trowstoe” (Psalm 71:20, 21). Fa den kisi jepi?

Fa foe kakafoetoe gi den moeiti di feanti e meki

12. Fa kownoe David ben kakafoetoe gi kefar nanga tesi?

¹² Psalm 143:5 e sori san David ben doe di kefar nanga bigi tesi ben lontoe en: „Mi memre den dei foe granwe; mi prakseri dipi foe ala den sani di joe e doe; nanga prisiri mi ben prakseri foe a wroko foe joe eigi anoe.” David ben memre a fasi fa Gado ben doe nanga den foetoeboi foe En èn fa en srefi ben ondrofeni taki a ben kisi froeloesoe. A ben prakseri dipi foe san Jehovah ben doe foe En bigi nen ede. Ija, David ben sorgoe taki a ben tan broko en ede nanga den wroko foe Gado.

13. Fa a sa jepi wi foe froedrage tesi, te wi e loekoe den owroeten nanga disiten eksempre foe den getrow foetoeboi?

¹³ Wi no memre nofo tron fa Gado ben doe nanga a pipel foe en? Seiker! Disi wani taki toe a nen di a ’bigi ipi foe kotoigi’ ben meki bifo a ten foe den kresten (Hebrewsma 11:32-38; 12:1). Den ben gi salfoe kresten na ini a fosi jarihondro deki-ati toe foe „tan memre den dei foe fositen” èn den sani di den ben moesoe froedrage (Hebrewsma 10:32-34). San wi kan taki foe den sani di Gado en foetoeboi ondrofeni na ini a ten disi, soleki den wan di den froeteri na ini Jehovah’s Getuigen — Verkondigers van Gods Koninkrijk (Jehovah Kotoigi — Preikiman foe Gado Kownoekondre)?a Den tori di skrifi drape èn na ini tra boekoe e jepi wi foe memre fa Jehovah jepi a pipel foe en foe horidoro te a wroko ben tapoe, te sma ben poti den na strafoe-oso, so srefi te den ben horidoro na ondro den sani di ogri-ati groepoe sma ben doe, èn strafoeman kampoe nanga kampoe pe sma ben wroko leki srafoe. Tesi ben de na kondre pe feti de, soleki Boeroendi, Liberia, Rwanda, nanga san ben de Joegoslafia fosi. Te den foetoeboi foe Gado ben kisi foe doe nanga gens, dan den ben froedrage dati, foe di den ben tan abi wan tranga matifasi nanga Jehovah. Na anoe foe en ben jepi den wan di ben poti a doe foe en wani na a fosi presi na ini den libi.

14. (a) San na wan eksempre fa Gado jepi wan sma na ini wan situwâsi di ben sa kan de a srefi leki di foe wi? (b) San joe e leri foe na eksempre dati?

¹⁴ Ma joe kan piki taki joe no ondrofeni den sortoe ogri-ati fasi dati fa sma e meshandri trawan, èn joe kan denki taki a no sori taki wan ten o kon taki joe sa ondrofeni disi. Ma a no alaten Gado ben jepi a pipel foe en te situwâsi ben de di sma ben sa kan si leki boen takroe situwâsi. A jepi foeroe „gewoon” sma na ini „aladei” situwâsi. Dja na soso wán foe den foeroe eksempre: Joe e herken a fowtow djaso na tapoesei, èn a e jepi joe foe memre a fasi fa Gado e doe nanga a pipel foe en? A ben kon na ini De Wachttoren foe 1 december 1996. Joe ben leisi a tori di Penelope Makris ben froeteri? Fa dati na wan toemoesi moi eksempre foe wan sma di hori en kresten soifri retifasi! Joe kan memre san a ben moesoe froedrage foe birtisma, fa a ben feti nanga tranga siki, èn sortoe moeiti a ben doe foe tan na ini a foeroeten diniwroko? San wi kan taki foe a moi sani di a ben ondrofeni na Mitileine? A sani de: Joe e si den sortoe eksempre dati leki wan jepi gi wi alamala foe loekoe san na den moro prenspari sani, èn foe poti a doe di wi moesoe doe a wani foe Gado na a fosi presi na ini wi libi?

15. San na wan toe foe den sani di Jehovah doe di wi moesoe prakseri dipi foe dati?

¹⁵ A e tranga wi foe prakseri dipi foe den sani di Jehovah e doe, neleki fa a ben de nanga David. Foe meki en prakseri kon troe, Jehovah ben seti sani foe sma kan kisi froeloesoe, nanga a dede, opobaka èn glori foe en manpikin. (1 Timoteus 3:16). A seti en hemel Kownoekondre, èn ben krin hemel foe di a poeroe Satan nanga den ogri jeje foe en, èn ben poti a troe anbegi baka, djaso na grontapoe (Openbaring 12:7-12). A bow wan jeje paradijs èn a blesi en pipel foe di den gro kon moro foeroe (Jesaja 35:1-10; 60:22). A pipel foe en e gi a lasti kotoigi now fosi a bigi banawtoe e broko loesoe (Openbaring 14:6, 7). Ija, wi abi foeroe sani foe prakseri dipi foe dati.

16. Foe san wi e kisi deki-ati foe broko wi ede nanga dati, èn san disi e sori wi krin?

¹⁶ Te wi e tan broko wi ede nanga a wroko foe Gado anoe na presi taki wi e meki den moeiti di libisma e doe, njan wi ten, dan dati e sori wi krin taki no wan sma man kakafoetoe gi a krakti di Jehovah gi. Ma den wroko dati, no de soso den froewondroe mekisani di wi kan si na hemel èn djaso na grontapoe (Job 37:14; Psalm 19:1; 104:24). Den toemoesi moi wroko foe en abi den sani na ini toe di a doe foe fri en pipel foe feanti di e kwinsi sma, soleki fa dati ben de foe si na den sani di na owroeten pipel di a ben froekisi, ben ondrofeni. — Exodus 14:31; 15:6.

Sabi a pasi di wi moesoe waka

17. O troetroe Jehovah ben de gi David, èn fa disi kan de wan djaranti gi wi?

¹⁷ David ben begi foe kisi jepi so taki a watra foe en libi no ben o drei gowe na ini en: „Mi bradi den anoe foe mi go na joe; mi sili angri gi joe leki wan drei kondre. O meki esi, piki mi, o Jehovah. Mi jeje kon na wan kaba. No kibri joe fesi gi mi, noso mi moesoe tron leki den wan di e saka go na ini a peti” (Psalm 143:6, 7). David, wan sondari, ben sabi taki Gado ben froestan a situwâsi foe en (Psalm 31:7). Son leisi wi kan denki toe taki a jejefasi foe wi kon swaki srefisrefi. Ma a situwâsi no de sondro howpoe. Jehovah, di e jere den begi foe wi, kan sorgoe taki wi e kon betre moro esi, foe di a e gi wi kowroe-ati nanga jepi foe lobi-ati owroeman, artikel na ini A Waktitoren, noso pisi foe den konmakandra di gersi taki den meki den spesroetoe gi wi. — Jesaja 32:1, 2.

18, 19. (a) San moesoe de a moro opregti sani di wi e begi Jehovah? (b) Foe sortoe sani wi kan de seiker?

¹⁸ A froetrow di wi abi na ini Jehovah e boeweigi wi foe begi en tranga: ’Meki mi jere joe lobi boen-atifasi, bika na ini joe mi poti mi froetrow. Meki mi kon sabi a pasi di mi moesoe waka’ (Psalm 143:8). A ben meki sisa Makris lasi-ati, di ben de en wawan na tapoe wan Griki tabiki? So boen, a sa meki joe lasi-ati te joe e poti a doe foe en wani, na a fosi presi na ini joe libi? Didibri nanga den wrokoman foe en ben sa wani hendri noso tapoe wi wroko di wi e doe krinkrin foe meki Gado Kownoekondre bekènti. Awansi wi e dini na ini kondre pe moro foeroe den e gi pasi taki a troe anbegi de noso wi e dini pe den tapoe a wroko, tokoe ala den begi foe wi makandra de akroederi a tranga begi foe David: „Froeloesoe mi foe den feanti foe mi, o Jehovah. Na joe mi soekoe kibri” (Psalm 143:9). A djaranti di wi abi taki wi kan kakafoetoe gi rampoe na jejefasi e anga foe a de di wi de na ini a kibripresi foe a Moro Heiwan. — Psalm 91:1.

¹⁹ Na overtoigi di wi abi foe san e kon na a fosi presi, abi wan krakti fondamenti (Romesma 12:1, 2). Foe dati ede, kakafoetoe gi den moeiti di grontapoe e doe foe poti gi joe san en denki de prenspari ini a libisma seti foe sani. Go doro foe meki ibri sani na ini joe libi sori san joe sabi de a moro prenspari sani — a doe foe Gado wani. — Mateus 6:10; 7:21.

20. (a) San wi leri foe David na Psalm 143:1-9? (b) Fa kresten na ini a ten disi e sori a fasi di David ben abi?

²⁰ Den fosi neigi vers foe Psalm 143 e sori boen, sortoe krosibei matifasi David ben abi nanga Jehovah. Di feanti ben lontoe en, dan na wan fri fasi a ben begi Gado tranga foe kan kisi tiri. A ben lekti en ati, èn ben soekoe jepi foe kan waka na a joisti pasi. Na so a de toe na ini a ten disi nanga a fikapisi foe den salfoewan na grontapoe nanga den kompe foe den. Den e si a matifasi di den abi nanga Jehovah leki wan warti sani foe di den e begi en tranga foe kisi tiri. Den e tan poti a doe foe Gado wani na a fosi presi, awansi Didibri nanga grontapoe e kwinsi den.

21. Foe san ede a de prenspari gi wi foe de wan boen eksempre efoe wi moesoe leri trawan san moesoe kon na a fosi presi na ini a libi foe den?

²¹ Miljoenmiljoen sma di e studeri bijbel nanga Jehovah Kotoigi moesoe erken taki a doe foe Gado wani e kon na a fosi presi. Wi kan jepi den foe froestan disi te wi e taki nanga den foe kapitel 13 na ini a boekoe Sabi di e tjari joe go na têgo libi, di e poti krakti na tapoe den gronprakseri di de ini a tori te wi de sma di e gi jesi na a Wortoe.b A no de foe taki, dati na ini wi den moesoe si na eksempre foe san wi e leri den. Baka wan sjatoe pisi ten, den srefi sa kon sabi a pasi di den moesoe waka. Te den miljoenmiljoen sma disi e kon si densrefi san moesoe de a moro prenspari sani na ini a libi foe den, dan foeroe foe den sa firi foe doe wan sani foe gi densrefi abra èn teki dopoe. Baka dati, a gemeente kan jepi den foe tan waka na ini a pasi foe libi.

22. Sortoe aksi wi sa loekoe na ini a tra artikel?

²² Foeroe sma e erken wantenwanten taki Gado wani moesoe de a moro prenspari sani na ini a libi foe den. Ma fa Jehovah e leri den foetoeboi foe en safrisafri foe doe en wani? Sortoe wini disi e tjari kon gi den? Na ini a tra artikel wi sa loekoe den aksi disi, makandra nanga wan takimakandra foe wan prenspari vers, Psalm 143:10.

[Foetoewortoe]

San joe e piki?

◻ Fa wi kan loekoe san na den moro prenspari sani, te wi e doe san Filipisma 1:9, 10 e taki?

◻ Fa Jesus ben sori san ben kon na a fosi presi na ini en libi?

◻ San wi kan leri foe den sani di David ben doe di en ben kisi foe doe nanga tesi?

◻ Na sortoe fasi Psalm 143:1-9 e jepi wi na ini a ten disi?

◻ San moesoe kon na a fosi presi na ini wi libi?

[Prenki na tapoe bladzijde 20]

Den sani di David ben doe, ben sori taki a ben froetrow tapoe Jehovah

[Sma di abi a reti foe a prenki]

Den teki en skrifi abra foe Illustrirte Pracht - Bibel/Heilige Schrift des Alten und Neuen Testaments, nach der deutschen Uebersetzung D. Martin Luther’s