MWBR17 04 Verwijzing gi Wi Kresten libi nanga a preikiwroko studie-buku
3-9 APRIL
it-2 776 ¶4
Berow
Wan patu-bakriman kan bigin meki wan spesrutu sortu prapi. Ma efu „a pori a prapi dati”, dan a kan bosroiti fu meki wan tra sortu prapi nanga a srefi klèidoti (Yer 18:3, 4). Yehovah no gebroiki na agersitori disi fu sori taki a de leki wan libisma patu-bakriman di ’pori wan prapi’. Ma a fruteri en fu sori taki a abi a makti fu du san a wani nanga libisma. A abi a makti fu du wan tra sani nanga den efu den no e du san a feni bun èn efu den no e sori warderi gi a sari-ati fu en. (Luku sosrefi Yes 45:9; Ro 9:19-21.) Dati meki efu wan pipel tapu fu du ogri, dan Yehovah kan ’kenki prakseri, so taki a no tyari rampu kon na den tapu moro’. Noso efu den e du sani di Yehovah no feni bun èn den trangayesi en, dan a o kenki prakseri èn a no o du bun gi den moro soleki fa a ben taki (Yer 18:5-10). Sobun, a fowtu no de na a Bigi Patu-bakriman Yehovah. Ma na libisma di de leki „klèidoti” e kenki na ini en ati. Disi kan meki taki Yehovah kenki prakseri.
24-30 APRIL
it-1 524 ¶3,4
Frubontu
Nyun frubontu. Na a ten fu den yari 700-600 Fosi Krestes, Yehovah meki a profeiti Yeremia tyari kon na krin taki a ben o seti wan nyun frubontu. A ben taki dati a nyun frubontu no ben o de leki a Wetfrubontu di den Israelsma broko (Yer 31:31-34). A neti fosi Yesus Krestes dede, dati na 14 Nisan fu a yari 33, a seti na Avondmaal fu Masra. A neti dati Yesus taki dati a nyun frubontu o bigin wroko te a dede leki wan ofrandi (Lu 22:20). Feifitenti dei baka na opobaka fu en èn 10 dei baka di a opo go na en Tata na hemel, Yesus salfu den disipel fu en nanga santa yeye di a kisi fu Yehovah. Den disipel disi ben de na ini wan sodro-kamra na ini Yerusalem.—Tor 2:1-4, 17, 33; 2Kor 3:6, 8, 9; Heb 2:3, 4.
Den sma di de na ini a nyun frubontu na Yehovah nanga „na Israel fu Gado”. Disi na den sma di salfu nanga santa yeye èn di de wán nanga Krestes. Den na a gemeente fu en (Heb 8:10; 12:22-24; Ga 6:15, 16; 3:26-28; Ro 2:28, 29). Na ofrandi fu Yesus (a dede di a dede leki libisma) meki taki a nyun frubontu ben man seti. Baka di Yesus opo go na hemel, a gi a waarde fu na ofrandi disi na Yehovah (Mt 26:28). Te Gado bosroiti taki wan sma o kisi libi na hemel (Heb 3:1), dan a e tyari a sma disi kon na ini a frubontu nanga yepi fu na ofrandi fu Krestes (Ps 50:5; Heb 9:14, 15, 26). Yesus Krestes na a Mindriman fu a nyun frubontu (Heb 8:6; 9:15) èn en na a moro prenspari Pikin fu Abraham (Ga 3:16). Fu di Yesus na a mindriman fu a nyun frubontu, meki a man yepi den wan di de na ini a frubontu fu kisi pardon fu den sondu fu den èn fu tron trutru pikin fu Abraham (Heb 2:16; Ga 3:29). Yehovah e taki dati den na reti-ati sma.—Ro 5:1, 2; 8:33; Heb 10:16, 17.
g 6/12 14 ¶1-2
Bijbel—Wan buku di abi profeititori di kon tru, Pisi 2
Kon tru: Den Dyu ben de na ini katibo 70 yari langa, fu 607 te go miti 537 Fosi Krestes. Kownu Sirus fu Persia fri den Dyu katiboman èn a meki den drai go baka na den kondre fu bow a tempel baka na ini Yerusalem.—Esra 1:2-4.
San historia sori:
● A de so taki den Israelsma tan na ini katibo na Babilon 70 yari langa soleki fa Bijbel taki na fesi? Luku san Ephraim Stern, wan prenspari sabiman fu Israel, taki: „Fu 604 Fosi Krestes te go miti 538 Fosi Krestes nowan buweisi de taki sma ben e libi na ini a kondre fu den Dyu. A heri pisi ten dati, sma no ben e libi na ini nowan fu den foto di den Babilonsma pori.” A pisi ten disi di a sabiman e taki fu en, e kruderi nanga a ten di den Israelsma ben de na ini katibo na Babilon fu 607 te go miti 537 Fosi Krestes.—2 Kroniki 36:20, 21.