Sortoe tamara gi wi grontapoe?

„No wan tra jarihondro di sma sabi e doro a di foe 20 jarihondro nanga takroe sortoe ogri di e doe nanga tranga na mindri borgoe, nanga a nomroe foe feti di broko, den bigi ipi loweman di den meki kon de, den miljoenmiljoen sma di den kiri na ini orlokoe, èn den foeroe moni di moesoe pai gi ’fetisani foe man feti’ ”, na so World Military and Social Expenditures 1996 e taki. A situwâsi disi sa kenki oiti?

Na apostel Petrus ben memre kresten na wan pramisi di Gado ben doe foeroe jarihondro na fesi: „Njoen hemel nanga wan njoen grontapoe de di wi e froewakti akroederi [Gado] en pramisi, èn na ini den disi, regtfardikifasi sa de” (2 Petrus 3:13). Den wortoe dati ben de biginbigin pisi foe a profeititori foe Jesaja (Jesaja 65:17; 66:22). Owroeten Israèl ben ondrofeni wan fosi kontroe di a nâsi ben drai kon baka na a pramisi kondre foe den baka di den ben de na ini katibo na Babilon 70 jari langa. Foe di Petrus ben taki ete wan leisi foe a pramisi foe „njoen hemel nanga wan njoen grontapoe”, dan a ben sori taki a profeititori ben sa kisi wan moro bigi kontroe srefi ete — na heri grontapoe!

A seti foe regtfardiki situwâsi na heri grontapoe na a wani foe Gado, èn a sa kon troe nanga jepi foe en hemel Kownoekondre nanga Krestes leki Kownoe. „Nâsi no sa opo feti-owroe teige nâsi, so srefi den no sa leri orlokoe moro” (Jesaja 2:4). So wan doronomo vrede nanga seikerfasi na grontapoe na san Jesus ben leri den bakaman foe en foe froewakti èn foe begi gi, ini a begi di den e kari moro foeroe a Wi Tata begi noso a Begi foe Masra, pe a e taki: „Meki joe kownoekondre kon. Meki joe wani pasa, soleki na hemel, so toe na grontapoe.” — Mateus 6:9, 10.

Joe ben sa feni en switi foe libi na ini wan grontapoe di de regtfardiki neleki fa hemel de? Dati na a howpoe di bijbel e gi ibriwan sma di e soekoe foe kon sabi Gado nanga en heri ati èn foe libi akroederi den regtfardiki pasi foe en.