MWBR19 12 Verwijzing gi Wi Kresten libi nanga a preikiwroko studie-buku

2-8 DECEMBER

GUDU NA INI GADO WORTU | OPENBARING 7-9

„Yehovah e blesi wan bigi ipi sma di nowan sma man teri”

it-1-O 901 ¶3

Bigi ipi

Na aksi di e opo kon na disi: Efu a „bigi ipi” na sma di e kisi frulusu èn di o tan na grontapu, dan fu san ede Bijbel e taki dati den e ’tanapu na fesi a kownusturu fu Gado èn na fesi a Pikin Skapu’? (Opb 7:9) Son leisi Bijbel e gebroiki a wortu „tanapu” fu sori taki wan sma noso wan grupu abi wan bun nen na a sma di a e tanapu na fesi (Ps 1:5; 5:5; Odo 22:29; Lu 1:19). Fu taki en leti, kapitel 6 fu Openbaring e taki dati „den kownu fu grontapu, den heihei man, den legre-edeman, den guduman, den tranga man èn ibri srafu nanga ibri fri sma” go kibri „so taki a sma di e sidon na tapu a kownusturu no man si [den]”. Den e taki sosrefi: „Kibri wi tu gi a bigi atibron fu a Pikin Skapu, bika a bigi dei fu a bigi atibron fu den doro. Suma o man tan na libi?” (Opb 6:15-17; luku Lu 21:36.) Disi e sori taki „a bigi ipi” na den sma di pasa a bigi atibron libilibi èn di ben man „tanapu” leki sma di Gado nanga a Pikin Skapu feni bun.

it-2-O 1098 ¶4

Banawtu

Sowan dritenti yari baka di Yerusalem kisi pori, wan engel ben taki nanga na apostel Yohanes fu wan bigi ipi sma di komoto fu ala kondre, lo, nanga pipel. Na engel ben taigi en: „Den wan disi na den sma di komoto na ini a bigi banawtu” (Opb 7:13, 14). Te a tekst e taki dati a bigi ipi e „komoto na ini a bigi banawtu”, dan dati e sori taki den e pasa a bigi banawtu libilibi. Wi kan bribi dati fu di wan srefi sortu sani skrifi na Tori fu den apostel 7:9, 10: „Gado ben de nanga [Yosef], èn a puru en na ini ala den banawtu fu en.” Disi no wani taki nomo taki a horidoro di problema miti en, ma taki a pasa den sani dati libilibi.

it-1-O 901

Bigi ipi

Suma na den. Openbaring kapitel 7 nanga tra pisi fu Bijbel di abi fu du nanga a srefi tori, e yepi wi fu kon sabi suma na „a bigi ipi”. Openbaring 7:15-17 e taki dati Gado e „bradi en tenti abra den”, taki a Pikin Skapu e „tyari den go na den peti di abi watra di e gi libi” èn taki Gado „figi ala watra puru na den ai”. Openbaring 21:2-4 e taki fu den srefi sortu sani disi soleki: „A tenti fu Gado de na libisma”, taki a e „figi ala watra puru na den ai”, èn taki „dede no o de moro”. A fisyun disi no abi fu du nanga sma na hemel, fu pe a ’Nyun Yerusalem ben saka komopo’, ma a abi fu du nanga sma na grontapu.

Diki moro dipi

re-O 113 ¶4

Den e poti wan marki gi na Israel fu Gado

⁴ A de krin taki den fo engel disi e prenki fo grupu fu engel di Yehovah e gebroiki fu hori den fo winti di o tyari pori kon, teleki a ten doro fu lusu den. Te den engel lusu den winti fu Gado en atibron na a srefi ten, dan den winti o wai komoto fu noordsei, zuidsei, owstusei, èn westsei, èn disi o tyari bigi pori kon. A o de neleki a ten di Yehovah meki den fo winti panya den Elamsma fu owruten go na ala sei èn kiri den alamala. Ma a pori di Yehovah o tyari kon now o bigi moro leki dati (Yeremia 49:36-38). A bigi winti o tyari moro bigi pori kon leki a „draiwinti” di Yehovah gebroiki fu kiri a pipel fu Amon (Amos 1:13-15). Nowan enkri pisi fu Satan en organisâsi na grontapu o man tan tanapu na a dei fu Yehovah en bigi atibron, te a o sori taki fu ala ten en na a Moro Heiwan fu hemel nanga grontapu.​—Psalm 83:15, 18; Yesaya 29:5, 6.

it-1-O 23

Abadon

Abadon, na engel fu a dipi peti. Suma na dati?

Na Openbaring 9:11, a wortu „Abadon” na a nen fu na „engel fu a dipi peti”. Na ini Grikitongo, na engel disi nen Apolion, èn dati wani taki „kiriman”. Na ini den yari baka 1800, sma pruberi fu sori taki a tekst disi na wan profeititori di abi fu du nanga sma soleki Grankownu Vespasianus, Mohammed, nanga Napoleon srefi, èn den ben e si na engel leki wan engel fu Satan. Ma soleki fa Openbaring 20:1-3 e sori, na engel di abi „a sroto fu a dipi peti di no abi gron”, na a engel di Gado seni komoto fu hemel fu teki presi gi en. A no de wan engel fu Satan, ma na presi fu dati, a e tai Satan èn a e fringi en go na ini a dipi peti. Wan tra Bijbel e taki fu Openbaring 9:11: „Abadon a no wan engel fu Satan, ma wan engel fu Gado di e tyari pori kon te Gado seni en fu du dati” (The Interpreter’s Bible).

Soleki fa den Hebrew buku fu Bijbel e sori, a de krin taki avadon na a srefi leki Syeol nanga dede. Na Openbaring 1:18 Krestes Yesus e taki: „Mi e libi fu têgo, iya, fu ala ten èn mi abi den sroto fu dede èn fu Grebi.” Lukas 8:31 e sori taki a abi a makti fu bosroiti suma e go na ini a dipi peti. Hebrewsma 2:14 e sori taki Yesus abi a makti fu kiri sma èn a makti fu pori Satan. A tekst disi e taki dati Yesus tron libisma so taki „nanga a dede fu en a ben kan meki Didibri, a wan di man kiri sma, kon tron noti”. Openbaring 19:11-16 e sori krin taki en na a sma di Gado o gebroiki fu kiri ogrisma.

9-15 DECEMBER

GUDU NA INI GADO WORTU | OPENBARING 10-12

„Na ogri meti kiri den ’tu kotoigi’, ma den kon na libi baka”

Diki moro dipi

it-1-O 370

Bukulolo

San a e prenki. Bijbel e gebroiki a wortu „bukulolo” difrenti leisi na wan agersi fasi. Esekièl nanga Sakaria ben si wan bukulolo pe sani ben skrifi na ala tu sei fu en. Nofo tron sma ben e skrifi wán sei nomo fu wan bukulolo. Ma fu di ala tu sei fu a bukulolo ben skrifi, meki a kan taki a krutuboskopu di ben skrifi na tapu ben de wan hebi èn seryusu boskopu (Ese 2:9–3:3; Sak 5:1-4). Na ini a fisyun fu Openbaring, a sma di ben e sidon na tapu a kownusturu, ben e hori wan bukulolo na ini en reti-anu èn a bukulolo dati ben abi seibi lakstampu. Den lakstampu ben meki taki sma no ben man kon sabi san skrifi na ini a bukulolo, teleki a Pikin Skapu fu Gado ben e puru den (Opb 5:1, 12; 6:1, 12-14). Moro lati na ini a fisyun, Yohanes srefi kisi wan bukulolo èn a kisi a komando fu nyan en. A bukulolo ben switi na ini Yohanes en mofo, ma a meki en bere kon bita. Fu di a bukulolo ben opo, meki a de krin taki sma ben musu kon sabi a boskopu na ini. A ben „switi” gi Yohanes fu kon sabi a boskopu di ben skrifi na ini, ma a de krin taki a boskopu di a ben musu fruteri sma ben bita (Opb 10:1-11). Esekièl ben ondrofeni wan srefi sortu sani nanga a bukulolo di a ben kisi pe „sari singi nanga tra tori ben skrifi di ben meki sma geme èn krei”.​—Ese 2:10.

it-1-O 236 ¶4-6

A pen di wan uma e kisi te a musu meki en pikin

Na ini a fisyun di na apostel Yohanes kisi, soleki fa a buku Openbaring e sori, a e si wan uma na hemel di e bari „bika a ben abi furu pen èn a ben e pina srefisrefi fu di a ben de fu meki wan pikin”. A pikin di gebore ben de „wan boi, wan manpikin di o tiri ala pipel nanga wan isri tiki”. A bigi kaiman ben e suku fu swari a pikin disi, ma „den tyari a pikin esi-esi go na Gado èn na a kownusturu fu en” (Opb 12:1, 2, 4-6). Te Bijbel e taki dati Gado tyari a pikin gowe esi-esi, dan disi e sori taki Gado teki a pikin leki en eigi pikin. Na ini owruten sma ben abi a gwenti fu tyari wan nyunyun pikin gi en papa. Bijbel e sori tu taki na „uma” na Gado en „wefi”, „a Yerusalem di de na tapusei”, noso a „mama” fu Krestes nanga den salfu brada fu en.​—Ga 4:26; Heb 2:11, 12, 17.

A no de fu taki dati na „uma” fu Gado na hemel no ben o abi sondu, èn a no ben o abi trutru pen te a ben o meki en pikin. Sobun te Bijbel e taki dati na „uma” ben o kisi furu pen, dan dati e sori taki a ben de fu meki a pikin èn a no ben o teki langa moro.​—Opb 12:2.

Suma ben o de a ’boi, noso a manpikin’ disi? A ben musu „tiri ala pipel nanga wan isri tiki”. Na dati Gado en Mesias Kownu ben o du soleki fa Psalm 2:6-9 e taki. Ma Yohanes ben si a fisyun disi langaten baka di Krestes gebore na grontapu, dede, èn kisi wan opobaka. Dati meki a fisyun abi fu du nanga a Mesias Kownukondre di seti èn di abi Gado en Manpikin Yesus Krestes leki kownu. Bijbel e taki dati a Manpikin disi ben kisi wan opobaka èn baka dati, „a go sidon na a reti-anusei fu Gado. Sensi a ten dati, a e wakti teleki Gado meki den feanti fu en tron leki wan bangi gi en futu.”​—Heb 10:12, 13; Ps 110:1; Opb 12:10.

16-22 DECEMBER

GUDU NA INI GADO WORTU | OPENBARING 13-16

„No frede den ogri meti”

re-O 194 ¶26

No frede den tu ogri meti

²⁶ San na a ogri meti? Disi na a Grontapumakti fu Ingrisikondre nanga Amerkankondre. A de a srefi leki a di fu seibi ede fu a fosi ogri meti, ma a o du wan prenspari sani! Fu di a fisyun e sori en leki wan aparti ogri meti, meki wi man frustan moro krin fa a e du san en srefi wani. Na agersi ogri meti disi di abi tu tutu, na tu aparti politiek makti di e wroko makandra. Den tu tutu di a abi „leki di fu wan pikin skapu”, e sori taki a e du neleki a abi safri-ati èn taki a no e du ogri. A e du tu neleki a tiri fu en na a moro bunwan di ala sma fu grontapu musu saka densrefi na ondro. Ma a e taki „leki wan bigi kaiman” fu di a e dwengi sma èn a e tapu skreki gi den. A e du ogri srefi nanga den wan di no wani saka densrefi na ondro a tiri fu en. A no gi sma deki-ati fu saka densrefi na ondro Gado Kownukondre di de na ondro a tiri fu a Pikin Skapu fu Gado, ma a gi sma deki-ati fu horibaka gi Satan, a bigi kaiman. A tyari prati kon na mindri kondre èn a meki taki sma no lobi makandra srefisrefi. Na so a e meki sma anbegi a fosi ogri meti.

re-O 195 ¶30-31

No frede den tu ogri meti

³⁰ Na ini den yari di pasa, a kon na krin taki a popki disi na a organisâsi di Ingrisikondre nanga Amerkankondre seti, èn den gi sma deki-ati fu horibaka gi en. Biginbigin a ben nen a Volkenbond. Bakaten, soleki fa Openbaring kapitel 17 e sori, a de leki wan redi ogri meti di e du san en srefi wani. A meti disi, noso na organisâsi pe furu kondre de na ini e ’taki’ noso e meki bigi taki na en wawan man sorgu taki freide de èn taki sani e waka bun nanga libisma. Ma fu taki en leti den kondre di de memre fu na organisâsi disi e gebroiki en fu meki trobi èn fu kosi makandra. Te wan kondre noso wan pipel no wani du san a e taki, dan a e tapu skreki gi den taki a o kiri den na agersi fasi, noso taki a o tapu tra kondre fu wroko makandra nanga den. Fu taki en leti, a Volkenbond puru kondre leki memre te den no ben e horibaka gi den denki fu en. Na a bigin fu a bigi banawtu, den „tutu” fu na ogri meti disi di e prenki wan legre, o tyari bigi pori kon.​—Openbaring 7:14; 17:8, 16.

³¹ Sensi a Di Fu Tu Grontapufeti, a popki di den meki fu na ogri meti èn di wi sabi now leki na organisâsi fu den Verenigde Naties, kiri furu sma kaba. Na ini 1950 a legre fu a VN go yepi di Noord-Korea ben e feti nanga Zuid-Korea. Makandra nanga a legre fu Zuid-Korea, a legre fu a VN kiri sowan 1.420.000 sma fu Noord-Korea nanga China. Na so a de tu taki fu 1960 te go miti 1964, den legre fu a VN ben e yepi nanga den feti na ini Kongo (Kinsyasa). Boiti dati, prenspari man soleki Paus Paulus VI nanga Johanes Paulus II, tan taigi sma taki na a popki disi wawan man tyari freide kon gi libisma. Den de nomonomo taki efu libisma no e saka densrefi na en ondro, dan den o tyari pori kon tapu densrefi. Den e sorgu taki na agersi fasi iniwan sma di e weigri fu horibaka gi a popki èn fu anbegi en, e lasi en libi.​—Deuteronomium 5:8, 9.

23-29 DECEMBER

GUDU NA INI GADO WORTU | OPENBARING 17-19

„A feti fu Gado di o tyari wan kaba kon na ala tra feti”

it-2-O 558 ¶1

Asi

Na ini a fisyun di Yohanes kisi, Yesus di kisi glori e rèi na tapu wan weti asi èn wan legre e kon na en baka na tapu weti asi. Yohanes kisi a fisyun disi fu sori taki a feti di Krestes ben o feti na ini a nen fu en Gado nanga en Papa Yehovah, ben o de fu krutu ala den feanti fu en na wan reti fasi (Opb 19:11, 14). A fisyun fosi a wan disi e taki fu Yesus di tron kownu èn fu den rampu di e pasa baka dati. Na den sani disi den sma tapu den asi e prenki.​—Opb 6:2-8.

re-O 285 ¶24

A Kownu e wini a feti na Armagedon

²⁴ Na ogri meti di seibi ede nanga tin tutu èn di opo komoto na ini a se e prenki den politiek organisâsi fu Satan. A meti disi nanga a falsi profeiti di e prenki a di fu seibi grontapumakti, e lasi a makti fu den (Openbaring 13:1, 11-13; 16:13). Den de „libilibi” ete, noso den e wroko makandra ete fu gens a pipel fu Gado na grontapu te Yesus fringi den go na ini „a se di e bron nanga faya”. Disi na wan trutru se di e bron nanga faya? Nôno, neleki fa a de nanga na ogri meti nanga a falsi profeiti di no de trutru meti. Na presi fu dati, a e prenki têgo pori, noso wan presi fu pe sani no man drai kon baka. Na drape Yesus o fringi dede, Grebi (Hades), nanga Didibri srefi (Openbaring 20:10, 14). A no de fu taki dati disi a no wan faya di o bron ogri sma fu têgo, fu di Yehovah noiti no prakseri srefi fu du so wan tegu sani.​—Yeremia 19:5; 32:35; 1 Yohanes 4:8, 16.

re-O 286 ¶25

A Kownu e wini a feti na Armagedon

²⁵ „A sma di ben e sidon na tapu na asi, kiri” ala den trawan di no ben de wan pisi fu wan regering ma di ben abi fu du nanga a takru grontapu disi, èn a e du dati „nanga a langa feti-owru di ben e komoto na ini en mofo”. Yesus o taki dati den musu dede. Ma Bijbel no e taki dati Yesus e fringi den go na ini a se di e bron nanga faya. Disi wani taki dati den o kisi wan opobaka? Nowan presi na ini Bijbel a skrifi taki den wan di a Krutuman fu Yehovah kiri na a ten dati o kisi wan opobaka. Soleki fa Yesus srefi ben taki, ala den sma di no de „skapu” o go „na ini a têgo faya di sreka gi Didibri nanga den engel fu en”, èn dati wani taki dati den „o dede fu têgo” (Mateyus 25:33, 41, 46). Disi o pasa te „a dei doro taki a o krutu den ogri sma èn pori den”.​—2 Petrus 3:7; Nahum 1:2, 7-9; Maleaki 4:1.

Diki moro dipi

re-O 247-248 ¶5-6

Wan tumusi moi kibritori e kon na krin

⁵ „Na ogri meti . . . ben de kaba.” Iya, a ben de kaba leki a Volkenbond sensi 10 yanuari 1920, èn 63 kondre ben de memre fu en. Ma dan Yapan, Doisrikondre, nanga Italiakondre puru densrefi leki memre, èn a Volkenbond puru a Sovyet Unie leki memre. Na ini september 1939, na ogri-ati Nazi tiriman fu Doisrikondre bigin a Di Fu Tu Grontapufeti. Fu di a Volkenbond no ben man tyari freide kon na grontapu, meki te fu kaba a fadon na ini wan agersi dipi peti pe a no ben man du noti moro. Na a ten fu 1942, a no ben e wroko moro. Yehovah meki a pipel fu en kon sabi finifini san a fisyun wani taki, èn a du dati na a yoisti ten, a no ben fruku èn a no ben lati tumusi! Na a Theocratische Nieuwe-Wereldcongres, Brada N. H. Knorr ben kan fruklari taki „na ogri meti  . . no de moro”, soleki fa a profeitori e taki. Ne a poti na aksi disi: „A Volkenbond o tan na ini a peti?” A leisi Openbaring 17:8, dan a piki: „Na organisasi fu den kondre na grontapu o opo komoto na ini a peti.” Na dati pasa tu, èn disi sori taki a profeiti Wortu fu Yehovah tru!

A e opo komoto na ini a dipi peti di no abi gron

⁶ A redi ogri meti opo komoto na ini a dipi peti trutru. Tapu 26 yuni 1945, na organisâsi fu den Verenigde Naties seti nanga wan lo pranpran na ini San Francisco, Amerkankondre, èn 50 kondre ben poti den sten fu sori taki den e agri. Na organisâsi disi ben musu „sorgu taki freide de na mindri den difrenti kondre na grontapu èn taki sani e waka bun nanga den”. Furu fasi ben de fa a Volkenbond ben gersi a VN. Wan buku e taki: „Difrenti fasi ben de fa a VN ben gersi a Volkenbond di ben seti baka a Fosi Grontapufeti . . . Furu fu den kondre di ben seti a Volkenbond seti a VN tu. Neleki a Volkenbond, a VN ben seti tu fu yepi sorgu taki freide tan na mindri den difrenti kondre. Den moro prenspari komte fu a VN ben gersi den di fu a Volkenbond” (The World Book Encyclopedia). Sobun, a VN na a redi ogri meti di opo baka. Now a abi 190 memre èn dati na omeni leisi moro den 63 memre di a Volkenbond ben abi. Boiti dati a VN teki moro frantwortu na en tapu leki a Volkenbond.

30 DECEMBER–5 YANUARI

GUDU NA INI GADO WORTU | OPENBARING 20-22

„Luku, mi e meki ala sani kon nyun”

re-O 301 ¶2

Wan nyun hemel nanga wan nyun grontapu

² Hondrohondro yari fosi a ten fu Yohanes, Yehovah ben taigi Yesaya: „Bika luku, mi o meki nyun hemel nanga wan nyun grontapu. Sma no o memre den fositen sani moro èn den sani dati no o abi krakti na den tapu moro” (Yesaya 65:17; 66:22). A fosi leisi di a profeititori disi kon tru, na di den Dyu ben drai go baka na Yerusalem na ini a yari 537 Fosi Krestes, baka di den ben de na ini katibo 70 yari langa. Na so den ben tron wan krin libimakandra, noso „wan nyun grontapu” di ben abi wan nyun tirimakti, noso „nyun hemel”. Ma na apostel Petrus ben sori taki a profeititori ben abi fu du nanga ete wan sani. A taki: „Ma wi e fruwakti nyun hemel nanga wan nyun grontapu, soleki fa a ben pramisi èn na drape retidu o de” (2 Petrus 3:13). Dan Yohanes e sori taki a pramisi disi kon tru na ini a dei fu Masra. „A fosi hemel nanga a fosi grontapu”, dati wani taki a seti fu Satan nanga den difrenti fasi fu tiri di de ondro a makti fu Satan nanga den ogri yeye fu en, o pasa gowe. A krasi „se” fu ogri sma di e opo densrefi teige Gado no o de moro. Na presi fu dati, „wan nyun hemel nanga wan nyun grontapu” o kon. Dati wani taki wan nyun libimakandra na grontapu na ondro wan nyun tirimakti, Gado Kownukondre.​—Luku Openbaring 20:11.

it-2-O 183 ¶1

Libi

Gado ben taigi Adam taki efu a ben gi yesi na a komando di a ben gi en, dan a no ben o dede (Ge 2:17). Na dati o pasa tu nanga libisma di e gi yesi. Te dede, a lasti feanti fu libisma, kon na wan kaba, dan sma no o dede moro fu di sondu no o abi krakti moro na den tapu. Den no o dede noiti moro (1Kor 15:26). Krestes o puru dede na pasi na a kaba fu a tiri fu en di o teki 1000 yari, soleki fa a buku Openbaring e sori. A buku disi e taki dati den sma di ben o tron kownu nanga priester makandra nanga Krestes „kon na libi èn wán dusun yari langa den ben tiri leki kownu makandra nanga Krestes”. A musu de so taki „den tra dede sma” di no ben o kon na libi „solanga den wán dusun yari no ben pasa”, na den wan di de na libi na a kaba fu den dusun yari. Ma disi ben o pasa fosi a ten te Yesus lusu Satan komoto na ini a dipi peti so taki a kan tesi libisma fu a lasti leisi. Na a kaba fu den dusun yari, sma na grontapu no o abi sondu moro, neleki fa a ben de nanga Adam nanga Eva fosi den ben sondu. Now den sma disi o libi trutru leki sma di no abi sondu. Bakaten, den sma di pasa a tesi te Yesus lusu Satan fu a peti fu wan syatu pisi ten, o man libi fu têgo na grontapu.​—Opb 20:4-10.

it-2-O 280

A se di e bron nanga faya

Den wortu disi de fu feni soso na ini a buku Openbaring èn a de krin taki den e prenki wan sani. Bijbel srefi e sori san a se disi e prenki: „Disi na a di fu tu dede: a se di e bron nanga faya.”​—Opb 20:14; 21:8.

A buku Openbaring e yepi wi moro fara fu kon sabi san a se disi e prenki. A buku disi e taki dati Yesus e fringi dede go na ini a se di e bron nanga faya (Opb 19:20; 20:14). A de krin taki dede no man bron trutru. Boiti dati, Yesus e fringi Didibri, wan yeye di wi no man si, go na ini a se. Fu di a de wan yeye, meki trutru faya no man bron en.​—Opb 20:10; Luku Eks 3:2 nanga Kru 13:20.

Fu di a se di e bron nanga faya e prenki „a di fu tu dede” èn fu di Openbaring 20:14 e taki dati „dede nanga Grebi” o fringi go na ini, meki a de krin taki a se no kan prenki a dede di libisma kisi fu Adam (Ro 5:12), èn a no abi fu du tu nanga Grebi (Syeol). Dati meki a musu fu prenki wan tra sortu dede, noso wan dede fu pe sma no man wiki moro. Disi de so fu di Bijbel no e taki fu wan „se” di e lusu den dede sma di ben de na ini, neleki fa a dede di wi kisi fu Adam, nanga Grebi (Syeol) e du dati (Opb 20:13). Sobun, Bijbel e sori san o pasa nanga den wan di nen no skrifi „na ini a buku fu libi”, noso den wan di e weigri fu sori berow èn di e gens a tiri fu Gado, a Moro Heiwan. Yesus o fringi den go na ini a se di e bron nanga faya, èn dati na têgo pori, noso a di fu tu dede.​—Opb 20:15.