Yehovah e pai bribi nanga dek’ati
„Wi Gado di wi e dini, [kan] ferlusu wi. Komoto fu na faya onfu di hati èn komoto fu yu anu, o kownu, a sa ferlusu wi.” — DANIËL 3:17.
1. Sortu les krakti ben poti a tapu na ini na artikel dya a fesi, èn fu san-ede wan luku nyun baka fu den sani di ben psa kan de bun?
YEHOVAH GADO, na Universele Soeverein, ben leri grontapu tiriman prenspari les di e go fu en heimakti. Na ini na artikel dya a fesi wi ben si fa disi de so ini den sani di ben psa èn di ben srifi na ini den fosi siksi kapitel fu a buku Daniël. Den srefi tori disi wi kan luku nyun baka fu si san wi kan leri fu dati ini akruderi nanga den wortu fu na apostel Paulus di skrifi na ondro krakti fu santa yeye: „Ala sani di ben skrifi fosten, ben skrifi fu leri wi, sodati wi ben sa abi howpu nanga yepi fu wi horidoro èn nanga yepi fu na fertrowstu fu den Buku.” — Romeini 15:4.
2, 3. Suma ben de a mindri den sma di kownu Nebukadnezar ben kisi èn na sortu bosroiti wi kan kon ini san den nen fu den ben wani taki?
2 A ben de na ini a yari 617 bifo G.T., ini a ten fu na syatu tiri fu Yoyachin, na manpikin fu kownu Yoyakim, taki kownu Nebukadnezar ben gi komando fu tyari wantu yonguwan di ben de aparti koni èn moi na skin kon na Babylon. A mindri den yu ben abi Daniël, Hananya Misaël nanga Azarya. — Daniël 1:3, 4, 6.
3 Te yu sa luku san den nen fu den wani taki dan a de krin taki den fo Hebrew yonguman disi aladi goddelowsu toestand ben de na a ten dati na ini Yuda ben abi papa nanga nama di ben e frede Gado. „Daniël” wani taki „mi krutuman na Gado”, Hananya nen wani taki „Yehovah ben sori bunati; Yehovah ben sori taki a bun”. Misaël nen wani taki kande „suma de leki Gado?” Ofu „Suma de Gado speri” Èn Azarya nen wani taki „Yehovah ben yepi”. Sondro degedege soso den nen fu den kaba de wan dek’ati gi den fu tan getrow na a wan tru Gado. Na presi fu den nen disi den Chaldewsma ben kari den fo Hebrew yongu man Beltsazar, Sadrach, Mesach nanga Abednego, èn leki srafu fu wan freemde kownukondre dan a de krin taki den no ben kan du tra fasi nanga den nen di den meester fu den ben kari den. — Daniël 1:7.
Bribi nanga dek’ati e kon tapu tesi
4. San e sori taki Yehovah ben wani taki en pipel ben teki en wet seryusu ini a tori fu krin meti èn meti di no krin?
4 Den papa nanga mama di ben e bribi Gado fu den fo Hebrewman no ben gi den wawan wan bun bigin na ini a libi nanga den nen di den ben abi ma den ben mu kweki den ooktu soifri akruderi a wet fu Mozes èn ooktu ini akruderi nanga den nyanyanwet fu dati. Yehovah Gado srefi ben feni disi so prenspari taki bakadi a ben kari baka makandra furu fu den sortu wet disi ben ferklari: „Unu mu sori taki un de santa bika mi de santa.” — Leviticus 11:44, 45.
5. Fa na tumsi bun kweki fu den fo Hebrew yonguman ben kon tapu tesi?
5 Na tumsi bun kweki disi fu den fo yonguwan disi her’esi kaba ben kon tapu tesi. Fa so? Fudi den ben poti gi den „wan aladei porsi . . . fu den switisani fu na kownu èn fu na win di a ben dringi” (Daniël 1:5). Den ben sabi taki na wet fu Mozes fu eksempre ben tapu fu nyan agumeti ofu konkoni, pakro ofu snekfisi. Srefi meti di a Wet ben gi pasi fu nyan ben de na a kownuoso fu Babylon wan degedege sani bika wan sma noiti ben sabi seiker taki a ben lasi brudu tapu a yoisti fasi. Boiti fu dati a no ben de onmogelek taki a sortu meti dati ben lasi en santafasi nanga den heiden ritueel. — Leviticus 3:6.
6. Fa den fo Hebrewsma ben du tapu na tesi?
6 San den dri Hebrewsma ben kan du? Wi e leisi taki Daniël, èn sondro degedege a ben de ooktu nanga den tra dri boi, na ini den ati ben teki a bosroiti no fu doti densrefi nanga a sortu nyanyan dati. Fu dat’ede dati a ’ben tan aksi’ fu kisi gewoon pikin gruntu na presi fu den switisani fu na kowu èn watra na presi fu win. Sn ben de moro switi no ben kon srefi na ini den prakseri. Bribi èn dek’ati seiker ben de fanowdu fu aksi sani na ini na kwestie disi. We, fudi Yehovah Gado ben abi belangstelling na ini den fo yonguman disi, meki a ben sorgu taki na edeman fu den man fu na oso fu kownu ben abi switifasi gi Daniël. Ma na edeman disi ben frede fu du san Daniël ben aksi fudi a ben frede fu na bakapisi di sowan sortu nyanyan ben sa abi na tapu a gesontu fu Daniël. Daniël ben aksi en sobun fu kisi pasi fu proberi na dieet disi tin dei. A ben abi seiker na overtoigi taki na gi yesi na a wet fu Gado no wawan ben sa gi den wan bun konsensi, ma ooktu ben sa sori taki a de bun tapu a kontren fu a gesontu. Leki wan bakapisi fu na bosroiti fu den dan den fo Hebrewsma sondro degedege ben abi fu ferdrage furu spotu. — Daniël 1:8-14; Yesaya 48:17, 18.
7. Fa den fo yonguwan ben kisi pai fu na dek’ati bosroiti fu den?
7 Bribi nanga dek’ati ben de fanowdu fu a sei fu den fo Hebrew boi fu teki ini a tori fu a nyanyan fu den wan krakti bosroiti. Ma fa den ben kisi paiman fu dati, bika na a kaba fu den tin dei den ben luku moi èn moro gesontu leki suma tu fu den trawan. Yehovah ben gi den sabi, inzicht nanga koni sodati di den ben kon na a fesi fu kownu na a kaba fu a dri yari leri di den ben kisi, a ben feni taki den „ben de tin tron moro bun leki ala magie-beoefenende priester nanga towfruman di ben de na ini heri en kownukondre. — Daniël 1:20.
8. Sortu les de gi Yehovah dienstknegti ini a ten disi na ini a tori disi?
8 Na ini disi wan les de gi ala dienstknegti fu Yehovah Gado na ini a ten disi. Den Hebrew yonguwan dati ben kan go tak-kon-tak-go taki den restriktie na ini a wet fu Mozes tapu a kontren fu nyanyan no ben de so prenspari, spesrutu efu yu ben teki den gersi nanga den tin komando ofu den wet di ben e go fu ofrandi ofu den ala yari fesa. Ma nono, den loyaal Hebrewman ben broko den ede fu libi akruderi ala pisi fu na wet fu Gado. Disi e kari na gron-prakseri kon na ini prakseri di Yesus ben tyari kon ondro wortu, soleki skrifi na ini Lukas 16:10: „A sma di de getrow na ini a moro mendri sani, de ooktu getrow na ini furu, èn a sma di de onregtvaardiki na ini na moro mendri sani, de ooktu onregtvaardiki na ini furu.” — Teki gersi nanga Mattéus 23:23.
9. Fa son kotoigi na ini a ten disi ben sori net sowan srefi sortu dek’ati?
9 Furutron Yehovah Kotoigi e sori net so wan bribi nanga dek’ati, soleki te den e aksi den pasi fu de fri fu go fisiti wan distriktkongres, èn someni tron baka den e meki wan uitzondering na ini den geval. Kotoigi di wani sote fu de na ini a grupu fu pionierdienst, ofu na ini na yepi pioniersdienst, ben tyari na winsi fu den fu kisi afudei wroko kon a fesi nanga krakti èn nofotron na grani disi den ben gi den.
10. Sortu les de na ini ala disi gi ala kotoigi di de papa nanga mama?
10 Fa papa nanga mama di e frede Gado kan leri wan tumsi moi les na ini a ten disi fu na kweki di den fo Hebrew yonguwan ben kisi kande! Te papa nanga mama trutru abi den yeye belang fu den pikin a prakseri, dan den sa poti disi na ini den eigi libi tapu a fosi presi, ini akruderi nanga Mattéus 6:32. Dan den kan fruwakti taki den pikin fu den sa man fu kakafutu gi den kori nanga druk fu den yonguwan fu den yari fu den èn fu den meester fu den fu nyan friyari-oso ofu bepaalde fesa ofu tapu tra fasi pasa gronprakseri fu na bijbel. Den papa nanga mama disi di e frede Gado e bewijsi nanga dati taki Odo 22:6 de tru.
Tyari den dren fu Nebukadnezar kon na krin sondro frede
11. Fa wi kan waka now na baka na eksempre fu Daniël nanga en dri mati?
11 Na di fu tu kapitel fu Daniël e gi wi ete wan eksempre fu bribi nanga dek’ati. Di Daniël ben yere fu na komando fu na kownu fu kiri ala koniman fu Babylon fudi den no ben kan ferteri en a dren fu en èn san a wani taki, dan Daniël nanga en dri kompe ben kon ini bruya kwetkweti. Nanga na seiker bribi taki Yehovah ben sa gi en na bodoi di na kownu ben angri fu en, Daniël na presi fu dati ben kon na fesi na tiriman dati èn ben aksi ten fu gi piki. A kownu ben teki na aksi dati. Ne Daniël nanga den dri mati ben meki na afersi tron wan afersi fu opregti begi. Yehovah ben pai a bribi fu den fudi a ben gi den na fanowdu bodoi. Tapu dati Daniël ben begi komoto fu en ati èn gi tangi na Yehovah (Daniël 2:23). Èn fu ferteri san a dren fu kapitel 4 ben wani taki, dan Daniël ben ferteri kownu Nebukadnezar taki a ben sa libi seibi yari leki wan meti ondro den busmeti. Disi ben aksi bribi nanga dek’ati fu na sortu di Gado pipel na ini a ten disi mu sori fu meki na krakti boskopu fu en refensi teige Satan grontapu bekenti.
’Tapu na krakti fu na faya’
12, 13. Sortu tesi pe Daniël dri mati ben kon tanapu a fesi Daniël kapitel 3 e ferteri fu en?
12 Daniël kapitel 3 de wan aparti bijbeltori, pe e sori fa Yehovah ben pai wan fruwondru sori fu bribi nanga dek’ati fu na sei fu dri Hebrew dienstknegti. Tyari na tafereel kon pikinso na fesi. Ala hei lantiman fu Babylon kon makandra tapu na lagi presi fu Dura. Fesi den wan gowtu popki de fu sowan 27 meter hei èn 2.7 meter bradi. Fu prei nanga a firi fu den meki na kownu ben sorgu fu wan orkest fu pokuman. Tapu a babari fu na poku den sma di tyari kon drape makandra, ’mu fadon na gron èn anbegi na gowtu popki di kownu Nebukadnezar ben opo. Èn ala sma di no fadon na gron èn e anbegi, sa iti tapu asrefi momenti go na ini na faya onfu di hati.’ — Daniël 3:5, 6.
13 Sondro degedege: Wan weigri fu gi yesi na a komando dati e aksi wan bigi marki fu bribi nanga dek’ati. Ma dati den ’ben de getrow na ini na moro mendri sani’ ben sreka den a tapu ’fu de getrow na ini furu’. Dati na bosroiti fu den ben kan tyari tra dyu kon na ini kefar, no ben de a punt. Den no ben sa boigi fu anbegi a popki. Sonwan fu den dyarusu kompe-wrokoman fu den ben si na weigri di den ben weigri èn di ben de krin fu si, èn den no ben meki a psa fu ferteri a kownu disi.
14. Fa Nebukadnezar ben du tapu a weigri fu den fu boigi èn fa den ben piki tapu en laste kondisi?
14 Na ini „atibron èn faya ati” Nebukadnezar ben gi komando fu tyari den dri Hebrewsma kon na en fesi. Na aksi fu en „a de trutru so?” e meki wi si taki a de gi en wan raitori taki den ben weigri fu boigi èn fu anbegi na gowtu popki. A ben de klarklari fu gi den wan di fu tu kans ma efu den ben tan weigri ete, den ben sa trowe den go na ini na faya onfu di hati. „Èn”, na heimemre Babylon tiriman ben taki, „suma na a gado dati di kan ferlusu unu puru fu mi anu?” Nanga trutru dek’ati nanga bribi ini Yehovah den dri Hebrewman ben piki na kownu tapu wan respeki fasi: „O Nebukadnezar, a no de fanowdu gi wi fu taigi yu tapu disi wan wortu baka. Efu a musu, dan wi Gado di wi e dini, kan ferlusu wi. Komoto fu na faya onfu di hati . . . , o kownu a sa ferlusu wi. Ma efu a no de so, a mu de bekenti gi yu, o kownu, taki wi no sa dini yu gado, èn na gowu popki di yu ben meki, wi seiker no sa anbegi.” — Daniël 3:13-16.
15. Sortu maatregel Nebukadnezar ben teki?
15 Nebukadnezar mag fu ben de nanga atibron kaba a fesi fu dati, ma now a ben kisi moro atibron, bika wi e leisi „srefi na luku fu en fesi ben kenki gi” den dri Hebrewman (Daniël 3:19). Wan marki gi en atibron ben de taki a ben gi komando fu hati na onfu seibi tron moro leki normaal. Ne seiker tranga man ini en legre ben teki den dri Hebrewman èn ben trowe den go na ini na faya onfu. Den flam ben de so tranga taki den man di ben du a sani disi ben dede.
16. Fa na bribi fu den dri Hebrewman ben kisi pai?
16 Ma fa a sa ben de wan fruwondru sani gi na kownu di a no ben si soso dri ma fo e waka lontu na ini na mindri fu na faya sondro taki wan sani psa nanga den! Di na kownu ben gi komando na den dri Hebrewsma fu kon na dorosei a ben si taki nowan wiwiri fu a ede fu den srefi ben bron èn dati srefi nowan smoko loktu ben de na den krosi. Fa Yehovah ben pai na bribi èn na dek’ati fu den tapu wan tumsi bigi fasi! A no de fu taki taki a ben de na eksempre fu den di na apostel Paulus ben abi na prakseri di a ben kari den sma ooktu di ben de a mindri a bigi wolku fu kotoigi den „di ben tapu na krakti fu na faya” (Hebrewsma 11:34). Fa fu sensi a ten dati den de wan tumsi moi eksempre gi ala dienstknegti fu Yehovah!
17. Sortu tumsi moi eksempre fu asrefi sortu wi abi now?
17 Na ini a ten disi Yehovah dienstknegti no e kon tanapu na fesi na kefar fu wan letterlek faya onfu. Ma gi bun furu sma na soifri-retifasi kon a tapu tesi ini situwasi di e go fu na sori fu wan respeki gi nationaal symbool di de na a lanki fu na anbegi fu wan sani. Trawan ben kisi tesi tapu a loyaliteit fu den tapu na tori fu na bai fu politiek karta ofu a go ini srudatiwroko. Yehovah ben horibaka gi ala den sortu sma disi èn a sofasi den ben man fu psa a tesi tapu den soifri-retifasi èn bewijsi na sowan fasi taki Didibri de wan leiman èn Yehovah na tru Gado.
Ete wan eksempre fu bribi nanga dek’ati
18. Fa Belsazar ben sa aksi Yehovah, na Gado fu den dyu, soleki fa skrifi na Daniël kapitel 5 vers 3 nanga 4?
18 Ete wan eksempre de fu bribi nanga dek’ati na ini na buku Daniël èn dati de na ini kapitel 5. Belsazar, kownu fu Babylon, ben abi wan bigi èn diri fesa di e pori santafasi makandra nanga dusun fu den bigiman fu en kondre, konkubine nanga tweederang uma. Wantronso wan freemde anuskrifi ben sori ensrefi tapu na skotu. Disi ben bruya na kownu sote, taki en skrufu fu en dyonku ben kon slap èn en kindi ben naki na makandra. Èn agen den ben meki Daniël, na dienstknegti fu na tru Gado kon fu ferteri san a wani taki, fudi ala den koniman fu Babylon no ben sabi fa fu du nanga a sani.
19. San ben de aparti di Daniël ben ferteri san na anuskrifi tapu na skotu ben wani taki?
19 En wawan drape kodo na ini na glori èn feianti kontren, no ben tapu skreki gi Daniël èn no ben tyari en go sofara fu watra en boskopu ofu fu lasi na ai na afersi pe a tori ben e go fu en. Nanga ala en firi na ondro dwengi èn bedari nanga wan krin èn warti tongo a ben gi kotoigi fu en Gado. Fudi a no ben de tefreide nanga soso fu ferteri san na anu skrifi wani taki, meki Daniël ben memre na kownu taki Yehovah Gado ben lagi en granpapa fudi a ben meki taki a ben libi leki wan busmeti teleki a ben go erken taki a Moro hei Tiriman de na ini na kownukondre fu den libisma. „Aladi yu ben sabi ala disi”, Daniël ben taigi Belsazar, ’toku yu no ben saka yu srefi ma ben doti den patu nanga kan fu Yehovah tempel èn ben gafa den gado fu gowtu, solfru, kopro, isri, udu nanga ston, di no e si, no e yere ofu no e sabi noti. Ma na Gado di ala den pasi fu yu de fu en, yu no ben gi grani. Fu dat’ede meki na bosroiti disi ben kon fu en. A ben weigi yu tapu na weigi èn ben feni yu lekti, èn yu kownukondre prati èn ben gi na den Mediasma èn den Persiasma.’ Iya, agen Daniël ben gi Gado dienstknegti na ini a ten disi wan tumsi moi eksemre fu bribi nanga dek’ati. — Daniël 5:22-28.
20. Sortu eksempre moro fu bigi bribi Daniël ben gi morofara ini a ten fu a tiri fu Darius?
20 Na ini kapitel siksi fu Daniël wi e feni ete wan laste tumsi moi eksempre fu bribi èn dek’ati. Kownu Darius ben de now na tiriman èn a ben meki Daniël tron wan fu den dri moro prenspari tiriman fu na kownukondre. Dyarusu tapu Daniël ben pusu trawan fu overtoigi na tiriman fu meki wan wet taki dritenti dei langa nowan sma mu begi wan sma leki soso na kownu. Den ben frustan taki disi ben de na wanenkri fasi fa den ben kan feni wan sani teige Daniël. Daniël ben poti a wet a wan sei èn ben tan begi na ini en dakkamra nanga opo fensre na a sei fu Yerusalem. Fudi den ben kisi Daniël taki a e psa na bosroiti fu a kownu meki den ben krutu taki ini akruderi nanga na strafu di na wet e gi ben mu iti go na ini a lewolo. Ma Gado ben pai Daniël fu en bribi nanga dek ati. Fa? Soleki Hebrewsma 11:33 e taki en, dan Yehovah ’ben tapu na mofo fu den lew’.
21. San mu de na faste bosroiti fu wi te wi luku den tumsi moi eksempre fu bribi nanga dek’ati di skrifi na ini den fosi siksi kapitel fu Daniël?
21 Fa kapitel 1 te nanga 6 fu Daniël e ferteri fu sani, di e tranga yu bribi! Fa Yehovah ben pai na wan bun fasi den wan di ben sori bribi nanga dek’ati! Na a wan sei disi ben psa fudi a ben hei den èn na a tra sei fudi den ben ondrofeni tapu wondru fasi ferlusu. Yu kan kisi trutru fertrowstu èn feni howpu ini den ondrofeni tori fu den getrow kotoigi disi te wi kon tanapu na fesi tesi. Nanga disi na ini prakseri meki den sani disi ben skrifi poti! Meki fu dat’ede wi teki na besroiti fu waka baka sowan bribi nanga dek’ati tapu wan tumsi moi fasi. — Romeinisma 15:4; Hebrewsma 6:12.
Aksi fu luku san wi ben leri
◻ San den nen fu den fo yonguman ben sori fu na kweki fu den?
◻ Sortu les de gi wi ini na fasi fa den Hebrewman ben psa a tesi ini a tori fu nyanan?
◻ Fa Yehovah dienstknegti na ini a ten disi ben ondrofeni net soleki den dri Hebrewman wan tesi tapu den soifri-retifasi?
◻ Fa Daniël ben sori bribi nanga dek’ati di a ben gi kotoigi na Belsazar?
[Prenki na tapu bladzijde 8]
Daniël nanga en kompe ben leri fu taki nono