Kresten nanga a grontapoe foe libisma
„Tan waka nanga koni te a abi foe doe nanga den wan di de na dorosei.” — KOLOSESMA 4:5.
1. San Jesus ben taki ini a tori foe den bakaman foe en nanga grontapoe?
INI wan begi foe Jesus na en hemel Tata, a ben taki foe den bakaman foe en: „Grontapoe no ben wani si den na ai, bika den no de wan pisi foe grontapoe, neleki fa mi no de wan pisi foe grontapoe.” Dan a ben taki moro fara: „Mi e begi joe, foe no teki den poeroe na grontapoe, ma foe hori wakti na den foe a godelowsoewan ede” (Johanes 17:14, 15). Kresten no ben moesoe de aparti foe grontapoe na skin sei — foe eksempre, foe di den ben sa libi aparti na ini klooster. Na presi foe dati, Krestes „ben seni den go na grontapoe” foe de den kotoigi foe en „te na a moro farawe pisi foe grontapoe” (Johanes 17:18; Tori foe den Apostel 1:8). Tokoe a ben aksi Gado foe hori wakti na den, bika Satan, „a tiriman foe a grontapoe disi”, ben sa gi sma deki-ati foe no wani si den na ai foe a nen foe Krestes ede. — Johanes 12:31; Mateus 24:9.
2. (a) Fa bijbel e gebroiki a wortoe „grontapoe”? (b) Sortoe balansi fasi foe denki Jehovah e sori gi grontapoe?
2 Na ini bijbel a wortoe „grontapoe” (Grikitongo, koʹsmos) foeroetron e sori go na a onregtfardiki libisma libimakandra, di „e didon na ini a makti foe a godelowsoe wan” (1 Johanes 5:19). Foe di kresten e libi akroederi den markitiki foe Jehovah èn e gi jesi na a komando foe preiki a boen njoensoe foe Gado en Kownoekondre, meki sontron a fasi fa den de nanga grontapoe, kon moeilek (2 Timoteus 3:12; 1 Johanes 3:1, 13). Ma bijbel e gebroiki koʹsmos toe foe sori go na a heri libisma famiri. Di Jesus ben taki foe grontapoe na a fasi disi, a ben taki: „Gado ben lobi grontapoe sote, taki a ben gi en wan-enkri gebore Manpikin, so taki ibriwan sma di e sori bribi na ini en, no ben sa kisi pori, ma ben sa abi têgo libi. Bika Gado no ben seni en Manpikin kon na grontapoe foe a kroetoe grontapoe, ma foe grontapoe ben sa kisi froeloesoe nanga jepi foe en” (Johanes 3:16, 17; 2 Korentesma 5:19; 1 Johanes 4:14). So boen, ala di Jehovah no wani si den sani na ai di de eigifasi foe a godelowsoe seti foe Satan, tokoe Jehovah ben sori en lobi gi a libisma famiri foe di a ben seni en Manpikin kon na grontapoe, so taki a kan froeloesoe ala sma di ben sa „abi berow” (2 Petrus 3:9; Odo 6:16-19). A balansi fasi fa Jehovah e denki foe grontapoe moesoe tiri den anbegiman foe en.
Na eksempre foe Jesus
3, 4. (a) Sortoe posisi Jesus ben teki ini a tori foe tirimakti? (b) Fa Jesus ben si a grontapoe foe libisma?
3 Sjatoe bifo Jesus ben dede, a ben taigi Pontius Pilatus: „Mi kownoekondre no de wan pisi foe a grontapoe disi” (Johanes 18:36). Akroederi den wortoe disi, Jesus ben weigri na fesi kaba foe teki a makti tapoe den kownoekondre foe grontapoe di Satan ben pristeri en, èn a no ben gi den djoe pasi foe meki en tron wan kownoe (Lukas 4:5-8; Johanes 6:14, 15). Tokoe Jesus ben sori foeroe lobi gi a grontapoe foe libisma. Na apostel Mateus ben froeteri foe wan eksempre foe a sani dati: „Di a ben si na ipi a ben firi sari nanga den, bika den ben kisi kwinsi èn den ben panja leki skapoe sondro skapoeman.” Lobi ben boeweigi en foe go preiki gi sma na ini den foto nanga den dorpoe foe den. A ben gi den leri èn ben dresi den siki foe den (Mateus 9:36). A ben abi firi toe gi den sani di sma di ben kon foe kisi leri foe en, ben abi fanowdoe na skinfasi. Wi e leisi: „Jesus ben kari den disipel foe en kon na en èn a ben taki: ’Mi e sari na ipi sma, bika dri dei kaba den tan nanga mi èn den no abi noti foe njan; èn mi no wani seni den gowe sondro den njan wan sani fosi. Den kan fadon flaw na pasi’” (Mateus 15:32). Dati na troetroe wan lobi-ati fasi foe broko-ede nanga sma!
4 Den djoe ben desko den Samariasma kefalek, ma Jesus ben taki wan heri pisi ten nanga wan Samaria oema èn ben tan toe dei èn ben gi kotoigi finifini na ini wan foto foe Samaria (Johanes 4:5-42). Ala di Gado ben seni en kon na „den lasi skapoe foe na oso foe Israèl”, tokoe sontron Jesus ben doe wan sani na tapoe te tra sma di no de djoe ben sori bribi (Mateus 8:5-13; 15:21-28). Ija, Jesus ben sori taki a kan foe „no de wan pisi foe grontapoe” èn na a srefi ten foe sori lobi gi a grontapoe foe libisma, gi sma. Wi e sori sari-ati na a srefi fasi gi sma pe wi e libi, e wroko noso pe wi e go na wenkri foe go bai sani? Wi e sori taki wi e broko wi ede nanga a boen foe den — no soso nanga den sani di den abi fanowdoe na jejefasi, ma so srefi nanga tra sani di den abi fanowdoe nanga san wi man jepi den? Jesus ben doe dati, èn foe di a ben doe dati, dan a ben opo a pasi foe leri sma foe a Kownoekondre. A troe taki wi no kan doe troetroe wondroe neleki fa Jesus ben doe. Ma efoe wi e doe wan sani nanga switifasi, dan dati foeroetron, foe taki en so, e doe wondroe foe poeroe a fowtoe denki di sma abi foe Jehovah Kotoigi.
A fasi fa Paulus ben denki foe sma di de „na dorosei”
5, 6. Fa na apostel Paulus ben handri nanga den djoe di ben de „na dorosei”?
5 Na ini difrenti foe den brifi foe en, na apostel Paulus e sori go na sma di de „dorosei” noso „na dorosei”, dati wani taki, sma di no de kresten, awansi na djoe noso heiden (1 Korentesma 5:12; 1 Tesalonikasma 4:12; 1 Timoteus 3:7). Fa a ben handri nanga den sma dati? A ’ben tron ala sani gi ala sortoe sma, so taki tokoe a ben sa kan froeloesoe wan toe foe den’ (1 Korentesma 9:20-22). Te a ben doro na ini wan foto, dan a fasi fa a ben gwenti foe preiki ben de foe go na den djoe fosi di ben libi drape. Fa a ben taki nanga den? Nanga takt èn na wan lespeki fasi a ben sori den sma boeweisi foe bijbel di e overtoigi den taki a Mesias ben kon, ben dede wan ofrandi dede, èn ben kisi wan opobaka. — Tori foe den Apostel 13:5, 14-16, 43; 17:1-3, 10.
6 Na a fasi disi Paulus ben bow na tapoe a sabi di den djoe ben abi foe a Wet nanga den profeiti, so taki a ben kan leri den foe a Mesias nanga a Kownoekondre foe Gado. Èn a ben abi boen bakapisi foe overtoigi son wan foe den (Tori foe den Apostel 14:1; 17:4). Ala di Paulus ben kisi gens foe den djoe fesiman, tokoe a ben sori lobi gi kompe djoe di a ben skrifi: „Brada, a boen-wani foe mi ati èn den tranga begi di mi e begi Gado gi den [den djoe], de troetroe gi a froeloesoe foe den. Bika mi e kotoigi gi den taki den abi faja gi Gado, ma no akroederi soifri sabi.” — Romesma 10:1, 2.
Jepi bribiman di no de djoe
7. Fa foeroe proselietsma ben doe wan sani na tapoe a boen njoensoe di Paulus ben preiki gi den?
7 Proselietsma ben de sma di no de djoe èn di ben tron sma foe a djoe bribi èn ben besnij. Soleki fa a sori, dan djoe proselietsma ben de na ini Rome, Antiòkia foe Siria, Etiopia, èn na ini Antiòkia na Pisidia — ija, na a heri djoe Diaspora (Tori foe den Apostel 2:8-10; 6:5; 8:27; 13:14, 43; teki gersi Mateus 23:15.). Tra fasi leki foeroe foe den djoe tiriman, kande den proselietsma no ben abi heimemre, èn den no ben kan djaf nanga bigifasi taki den na bakapikin foe Abraham (Mateus 3:9; Johanes 8:33). Na presi foe dati, den ben gowe libi den heiden gado èn ben drai go na Jehovah nanga sakafasi, èn ben kisi sabi foe en nanga den wet foe en. Èn den ben teki a howpoe di den djoe ben abi taki wan Mesias ben o kon. Foe di foeroe foe den ben sori kaba, taki na ini a soekoe di den ben soekoe a waarheid den ben de klariklari foe kenki a fasi foe libi foe den èn den sani di den ben e bribi na ini, meki den ben de klari foe tjari moro kenki kon èn doe wan sani na tapoe a preikiwroko foe na apostel Paulus (Tori foe den Apostel 13:42, 43). Te wan proselietsma, di ben anbegi heiden gado fosi, ben teki a kresten bribi, dan a ben abi toemoesi aparti sani di de fanowdoe foe gi kotoigi na den tra heiden di ben anbegi den gado dati ete.
8, 9. (a) Sortoe tra groepoe foe heiden a djoe relisi ben hari, boiti den proselietsma? (b) Fa foeroe sma di ben frede Gado èn di no ben besnij, ben doe wan sani na tapoe a boen njoensoe?
8 Boiti taki a relisi foe den djoe ben hari proselietsma di ben besnij, a ben hari tra sma toe di no ben de djoe. A fosiwan foe den sma disi di ben tron kresten, ben de Cornelius di, ala di a no ben de wan proselietsma, ben de „wan man di e gi ensrefi na ini a dini foe Gado èn wan sma di . . . e frede Gado” (Tori foe den Apostel 10:2). Na ini den froeklari di profesor F. F. Bruce ben gi foe Tori foe den Apostel, a ben skrifi: „Foeroetron sma e kari den heiden dati ’sma di e frede Gado’; ala di dati no de den spesroetoe wortoe, tokoe a fiti foe gebroiki den. Foeroe heiden foe a ten dati ben meki a sempel bribi di den djoe ben abi taki wán Gado de di den ben anbegi na ini a snoga, èn den moreel markitiki foe a fasi foe libi foe den djoe, hari den, ala di den no ben de klari foe teki a djoe bribi dorodoro (foe di a besnij di den mansma ben moesoe besnij ben de wan spesroetoe sani foe naki foetoe gi mansma). Son wan foe den ben go na a snoga èn ben kon sabi den begi nanga den leri di den kisi komoto foe den boekoe, di den ben jere sma leisi na ini a Griki vertaling.”
9 Na apostel Paulus ben miti foeroe sma di ben frede Gado, di a ben preiki na ini den snoga na Pikin Asia nanga Grikikondre. Na Antiòkia foe Pisidia a ben kari den wan di ben kon makandra na ini a snoga „oen man, oen Israèlsma èn oen trawan di e frede Gado” (Tori foe den Apostel 13:16, 26). Lukas e skrifi taki, baka di Paulus preiki dri sabadei na ini a snoga na ini Tesalonika, „son wan foe den [den djoe] ben tron bribiman [kresten] èn ben moksi densrefi nanga Paulus èn nanga Silas, èn so srefi wan bigi ipi foe den Grikisma di ben anbegi Gado, èn no pikinso foe den prenspari oemasma” (Tori foe den Apostel 17:4). Kande son wan foe den Grikisma ben de sma di ben frede Gado èn di no ben besnij. Boeweisi de di e sori taki foeroe foe den heiden dati ben moksi densrefi nanga den djoe libimakandra.
Preiki na mindri „sma di no e bribi”
10. Fa Paulus ben preiki gi den heiden di no ben abi sabi foe den Boekoe foe bijbel, èn san ben de a bakapisi?
10 Na ini den kresten Griki Boekoe foe bijbel, den wortoe „sma di no e bribi” kan sori go na ala sma dorosei foe a kresten gemeente. Foeroetron den wortoe e sori go na heiden (Romesma 15:31; 1 Korentesma 14:22, 23; 2 Korentesma 4:4; 6:14). Na ini Athene, foeroe sma di no e bribi ben kisi leri na ini a Griki filosofia èn den no ben sabi noti foe den Boekoe foe bijbel. A sani dati ben meki Paulus lasi-ati foe gi den kotoigi? Nôno. Ma a ben fiti a fasi fa a ben taki na den. Na wan bekwaam fasi a ben sori bijbel prakseri sondro foe kari den tekst langalanga foe den Hebrew Boekoe foe bijbel, di den Athenesma no ben sabi. Na wan koni fasi a ben sori den sani foe bijbel waarheid di ben de a srefi nanga son prakseri di Stoicijn poewema skrifiman foe owroeten ben taki. Èn a ben taki foe na idea foe wán troe Gado gi a heri libisma famiri, wan Gado di sa kroetoe sma ini regtfardikifasi nanga jepi foe wan sma di ben dede èn di ben kisi wan opobaka. Na so Paulus ben preiki nanga takt foe Krestes gi den Athenesma. San ben de a bakapisi? Ala di moro foeroe foe den sma ben spotoe en langalanga noso ben tweifri na den sani di a ben taki, tokoe „son wan foe den man ben moksi densrefi nanga en èn ben tron bribiman, di na mindri den joe ben abi Dionisius toe, wan kroetoeman foe a kroetoe-oso foe na Areopagus, èn wan oema di nen Damaris, èn trawan ete boiti den”. — Tori foe den Apostel 17:18, 21-34.
11. Sortoe foto Korente ben de, èn san ben de a bakapisi foe a preikiwroko di Paulus ben doe drape?
11 Wan bigi libimakandra foe djoe ben de na ini Korente, dati meki Paulus ben bigin nanga en diniwroko drape, foe di a ben preiki na ini a snoga. Ma di a ben kon krin taki den djoe ben gens en, dan Paulus ben go na den heiden pipel (Tori foe den Apostel 18:1-6). Èn dati ben de wan pipel! Korente ben de wan druk bisnis foto, di ben foeroe nanga sma foe difrenti tra kondre nanga koeltoeroe èn di ben abi a takroe nen na ini a heri Griki-Romeini grontapoe foe a loesoe fasi foe libi foe den sma foe en. Ija, „foe tjari joesrefi leki wan Korentesma” ben wani taki foe doe hoeroedoe. Ma a ben de so taki, baka di den djoe weigri foe arki na a preiki di Paulus ben preiki, Krestes ben sori ensrefi na en èn ben taki: „No frede, ma tan taki . . . , bika mi abi foeroe sma na ini a foto disi” (Tori foe den Apostel 18:9, 10). A ben pasa soleki fa Krestes ben taki èn Paulus ben opo wan gemeente na ini Korente, ala di son wan foe den memre foe en, fosi ben libi na a fasi „foe Korente”. — 1 Korentesma 6:9-11.
Proeberi foe froeloesoe „ala sortoe sma” na ini a ten disi
12, 13. (a) Fa a kontren foe wi na ini a ten disi de a srefi leki di foe den dei foe Paulus? (b) Sortoe fasi foe denki wi e sori na ini kontren pe langa ten kaba den relisi foe krestenhèit opo noso pe foeroe sma lasi bribi na ini relisi organisâsi?
12 Na ini a ten disi, „a no-froedini boen-atifasi foe Gado . . . e tjari froeloesoe kon gi ala sortoe sma”, neleki fa a ben de na ini a fosi jarihondro (Titus 2:11). A kontren foe preiki a boen njoensoe kon moro bigi na ala den bigi presi foe grontapoe èn a moro bigi pisi foe den èilanti foe a se. Èn neleki fa a ben de na ini a ten foe Paulus, wi e miti troetroe „ala sortoe sma”. Foe eksempre, son wan foe wi e preiki na ini kondre pe den kerki foe krestenhèit opo foeroe hondro jari kaba. Kande den memre foe den abi tranga relisi gwenti, neleki fa a ben de nanga den djoe foe a fosi jarihondro. Tokoe wi breiti foe soekoe den wan di abi wan boen ati èn bow na tapoe awansi sortoe sabi den abi foe bijbel. Wi no e taki na so wan fasi taki wi e lagi den noso e wisiwasi den, srefi efoe sontron den relisi fesiman foe den e gens wi èn e froefolgoe wi. Na presi foe dati, wi sabi taki son wan na mindri den kan abi „faja gi Gado” ala di den no abi soifri sabi. Neleki Jesus nanga Paulus, wi e sori opregti lobi gi sma, èn wi wani fajafaja taki den kisi froeloesoe. — Romesma 10:2.
13 Te wi e preiki, dan foeroe foe wi e miti sma di lasi bribi na ini relisi organisâsi. Ma kande den de sma di e frede Gado ete èn e bribi pikinso na ini Gado, èn e proeberi foe libi wan boen libi. Na ini a kroeka geslakti disi di godelowsoe moro nanga moro, wi no moesoe breiti dan foe miti sma di e bribi pikinso na ini Gado? Èn wi no de fajafaja foe tjari den go na wan fasi foe anbegi di no abi hoigrifasi nanga lei leki marki? — Filipisma 2:15.
14, 15. Fa wan bigi kontren kon de foe preiki a boen njoensoe?
14 Na ini en agersitori foe a fisinèt, Jesus ben taki na fesi taki wan bigi kontren ben sa de gi a preikiwroko (Mateus 13:47-49). A Waktitoren foe 1 juni 1992, bladzijde 20, ben tjari na agersitori disi kon na krin èn ben taki: ’Na ini ala den foeroe hondro jari, memre foe a krestenhèit ben plèi wan bigi ròl ini a vertaal, a skrifi abra èn a prati foe Gado Wortoe. Baka ten den kerki ben opo èn ben horibaka gi bijbel genootschap, di ben vertaal bijbel na ini tongo foe farawe kondre. Den ben seni datra zendeling nanga leriman go na doro toe, di ben meki aleisi-kresten. Den disi ben tjari bigi nomroe foe fisi, di no ben boen, kon makandra, di Gado no ben feni boen. Ma tokoe a ben meki miljoenmiljoen sma di no ben de kresten kon sabi bijbel èn wan fasi foe krestendom, ala di disi ben kroektoe.’
15 A meki di krestenhèit ben meki proselietsma abi boen bakapisi spesroetoe na Zuid-Amerika, na Afrika, èn na son èilanti foe a se. Na ini a ten foe wi, wi feni foeroe safri-ati sma na ini den kontren disi, èn wi kan go doro foe doe foeroe boen sani efoe wi abi wan positief èn lobi-ati fasi foe denki foe den sma disi di abi sakafasi, neleki fa Paulus ben abi dati gi den djoe proselietsma. Na mindri den wan disi di abi a jepi foe wi fanowdoe, de so srefi den miljoenmiljoen sma di wi ben sa kan kari „sma di lobi” Jehovah Kotoigi. Ala ten den e prisiri foe si wi te wi e fisiti den. Son wan studeri bijbel nanga wi èn go na den konmakandra foe wi, spesroetoe na a alajari Memrefesa foe a dede foe Krestes. Den sma dati no de wan bigi veld foe preiki a boen njoensoe foe a Kownoekondre?
16, 17. (a) Nanga sortoe sma wi e taki foe a boen njoensoe? (b) Fa wi e waka baka na eksempre foe Paulus ini a preiki di wi e preiki gi difrenti sortoe sma?
16 Boiti dati, fa a de nanga den wan di komoto foe koeltoeroe di no de foe krestenhèit — awansi wi e miti den na ini a mamakondre foe den noso den na sma di libi a kondre foe den èn go libi na den Westsei kondre? Èn fa a de nanga den foeroe miljoenmiljoen sma di drai den baka krinkrin gi relisi èn kon tron atheistsma noso agnostis-sma? Boiti dati, fa a de nanga den wan di e gi jesi na wan fasi di pikinmoro gersi a faja di wan sma abi gi relisi, na disiten filosofia noso pôpi psychologie, di sma tjari kon na doro na ini den foeroe boekoe di e sori fa sma kan doe sani densrefi, èn di de foe feni na ini den boekoewenkri? Wi no moesoe ke nanga iniwan foe den sma dati èn si den leki sma di no kan kisi froeloesoe? No efoe wi e waka baka na eksempre foe na apostel Paulus.
17 Di Paulus ben preiki na ini Athene, a no ben fadon na ini a trapoe foe go haritaki foe filosofia nanga den sma di ben arki en. Ma a ben fiti a fasi fa a ben taki-go-taki-kon na den sma nanga soema a ben e taki èn ben pristeri bijbel waarheid na wan krin èn logis fasi. Na a srefi fasi a de so, taki wi no abi foe tron sabiman foe den relisi noso den filosofia foe den sma gi soema wi e preiki. Ma wi e fiti a fasi fa wi e taki na den sma, foe abi boen bakapisi te wi e gi kotoigi, èn na a fasi dati wi e tron „ala sani gi ala sortoe sma” (1 Korentesma 9:22). Di Paulus ben skrifi kresten na ini Kolose, a ben taki: „Tan waka nanga koni te a abi foe doe nanga den wan di de na dorosei, foe di oenoe e bai a joisti ten gi oensrefi. Meki a taki foe oenoe de switi ala ten, a moesoe abi sowtoe leki spesrei, so taki oenoe sabi fa oenoe moesoe gi ibriwan sma wan piki.” — Kolosesma 4:5, 6.
18. Sortoe frantiwortoe wi abi, èn san wi no moesoe frigiti noiti?
18 Meki a de so, taki neleki Jesus nanga na apostel Paulus, wi e sori lobi gi ala sortoe sma. Meki a de so, taki wi e span wisrefi spesroetoe foe prati a boen njoensoe foe a Kownoekondre nanga tra sma. Na a tra sei, no frigiti noiti taki Jesus ben taki foe den disipel foe en: „Den no de wan pisi foe grontapoe” (Johanes 17:16). Na ini a tra artikel wi sa go loekoe moro fara san dati wani taki gi wi.
Foe loekoe sani sjatoe baka
◻ Taki foe a balansi fasi fa Jesus ben denki foe grontapoe.
◻ Fa na apostel Paulus ben preiki gi djoe nanga proselietsma?
◻ Fa Paulus ben taki nanga sma di e frede Gado èn nanga sma di no e bribi?
◻ Fa wi kan de „ala sani gi ala sortoe sma” na ini wi preikiwroko?
[Prenki na tapoe bladzijde 10]
Te kresten e doe sani nanga switifasi gi den sma na den sei, dan dati foeroetron kan poeroe a fowtoe denki di sma abi foe den