Joe sa doe wan sani tapoe a lobi foe Jesus?
„Na lobi di na Krestes abi, e poesoe wi.” — 2 KORENTESMA 5:14.
1. San wi kan taki foe a lobi foe Jesus?
A LOBI foe Krestes de troetroe wan moi sani! Te wi e go loekoe fa a pina pasa marki, di a ben e gi na loesoe-paiman, na wan enkri seti nanga jepi foe san wi ben sa man kisi têgo libi, dan seiker wi ati e foeroe nanga warderi gi en! Jehovah Gado nanga Jesus densrefi ben doe na fosi stap. Den fosi ben lobi wi, ala di wi ben de sondari ete (Romesma 5:6-8; 1 Johanes 4:9-11). A sabi di wi kon sabi „a lobi foe Krestes”, na so na apostel Paulus e skrifi, ’e pasa sabi’ (Efeisesma 3:19). Ija, a lobi foe Jesus e pasa na moro hei akademia sabi, di sma abi na ede, krinkrin. A e pasa ala sani san sma oiti ben si ofoe san den oiti ben ondrofeni.
2. San no kan tapoe Jesus foe lobi wi?
2 Di a ben skrifi den kresten foe Rome, Paulus ben aksi: „Soema sa prati wi foe a lobi foe Krestes? Rampoe, noso banawtoe noso froefolgoe noso angri noso soso skin noso kefar noso feti-owroe?” No wan foe den sani disi kan tapoe Jesus foe no lobi wi. „Mi abi na overtoigi”, Paulus e go moro fara, „taki no dede no libi, no engel no makti, no den sani foe disi ten no den sani foe a ten di e kon, no den krakti, no hei no dipi, no wan tra mekisani sa man prati wi foe a lobi foe Gado, di de ini Krestes Jesus, wi Masra.” — Romesma 8:35-39.
3. San wawan kan meki Jesus nanga en Tata lobi oenoe?
3 So tranga na lobi de di Jehovah nanga Jesus abi gi joe. Soso wan sani kan tapoe den foe no lobi joe, èn dati na a espresi trowe di joesrefi e trowe a lobi foe den, foe di joe e weigri foe doe san den aksi. Wan leisi wan profeiti foe Gado ben froeklari gi wan kownoe foe Juda: „Jehovah de nanga joe so langa joe sori taki joe de nanga en; èn efoe joe e soekoe en, a sa meki joe feni en, ma efoe joe libi en, dan a sa libi joe” (2 Kroniki 15:2). Soema foe wi ben sa wani drai baka wan ten gi den sortoe kefarlek, boen, waran ati kompe disi so leki Jehovah Gado nanga en Manpikin, Jesus Krestes?
Na joisti fasi foe doe wan sani tapoe a lobi foe Jesus
4, 5. (a) Fa a lobi foe Jesus gi wi moesoe abi krakti tapoe wi matifasi nanga wi kompe libisma? (b) A lobi di Jesus ben lobi wi moesoe boeweigi wi foe lobi soema moro ete?
4 Fa a kefarlek bigi lobi foe Jesus e wroko persoonlijk tapoe joe? Fa a ben sa moesoe wroko tapoe joe? We, Jesus ben sori fa na sori di a e sori lobi moesoe abi krakti tapoe wi demakandra nanga wi kompe libisma. Baka di Jesus ben dini den apostel foe en na wan sakafasi, foe di a ben wasi den foetoe foe den, Jesus ben taki: „Mi gi oenoe na eksempel, so taki oenoe ben sa doe toe, so leki mi ben doe gi oenoe.” Èn a ben taki so srefi toe: „Mi e gi oenoe wan njoen gebod, dati oenoe moesoe lobi makandra; neleki fa mi sori lobi gi oenoe, dati oenoe lobi makandra toe” (Johanes 13:15, 34). Den disipel foe en ben leri disi, èn dati ben boeweigi den foe proeberi foe doe neleki fa en ben doe. „Nanga disi wi kon leri sabi lobi”, na apostel Johanes ben skrifi „dati a ben gi en sili abra gi wi; èn wi abi na froeplekti foe gi wi sili abra foe na boen foe den brada foe wi.” — 1 Johanes 3:16.
5 Tokoe, wi ben sa misi na marki foe Jesus libi nanga diniwroko efoe na eksempel foe en e boeweigi wi soso foe lobi èn dini den afersi foe wi kompe libisma. A lobi di Jesus, abi gi wi, no moesoe boeweigi wi toe foe lobi en baka èn spesroetoe foe lobi en Tata, di ben leri en ala sani san a sabi? Joe sa doe wan sani tapoe a lobi foe Krestes èn dini en Tata neleki fa en ben doe dati? — Efeisesma 5:1, 2; 1 Petrus 1:8, 9.
6. Fa a lobi di Jesus ben sori na apostel Paulus ben wroko na Paulus tapoe?
6 Loekoe a kefal foe Saulus pikinso, di baka ten sma ben kon sabi leki Paulus. Wan ten ben de di a ben froefolgoe Jesus èn „ben bro tapoe skreki nanga kiri kontrari den disipel” (Tori foe den Apostel 9:1-5; Mateus 25:37-40). Di Paulus ben kon sabi Jesus troetroe, a ben de so grantangi taki a ben kisi pardon, dati a no ben de klariklari nomo foe njanpina foe na boen foe Jesus, ma taki a ben de klariklari toe foe dede gi en. „Den anga mi na a postoe makandra nanga Krestes”, a ben skrifi. „A no mi na a sma moro langa di e libi . . . Ija, a libi di mi e libi now ini a skin, mi e libi nanga jepi foe a bribi gi na Manpikin foe Gado, di sori lobi gi mi èn di ben gi ensrefi abra gi mi.” — Galasiasma 2:20.
7. San na lobi foe Jesus moesoe froeplekti wi foe doe?
7 Fa a lobi di Jesus abi gi wi moesoe de wan krakti ini wi libi di e poesoe wi! „Na lobi di na Krestes abi, e poesoe wi”, Paulus ben skrifi den Korentesma, ’foe no libi moro langa gi wisrefi, ma gi en di dede gi wi èn di ben opobaka” (2 Korentesma 5:14, 15). Ija, grantangi foe Jesus taki a gi en libi foe na boen foe wi, moesoe boeweigi wi foe doe ala sani san a e aksi. Soso na a fasi disi wi kan sori taki wi lobi en troetroe. „Efoe oenoe lobi mi, oenoe sa hori mi komando”, Jesus ben taki. „A sma di abi den komando foe mi èn di e hori den, dati na a sma di lobi mi.” — Johanes 14:15, 21; Teki gersi 1 Johanes 2:3-5.
8. Fa na lobi foe Jesus ben abi makti tapoe a lobi foe foeroe ogridoe man?
8 Di den soetadoeman, hoeroeman, tantaman, foefoeroeman, droengoeman nanga sma di na wan bidrigifasi ben teki moni foe tra sma ini na owroe Korente, ben kon leri foe sabi den komando foe Jesus, den ben doe wan sani tapoe a lobi foe Krestes foe di den ben drai baka gi den sortoe wroko disi. Paulus ben skrifi foe den: „Den ben wasi oenoe kon krin, . . . den ben froeklari oenoe kon regtfardiki ini a nen foe wi Masra Jesus Krestes” (1 Korentesma 6:9-11). Na so, ini a ten disi toe, na lobi foe Krestes ben poesoe foeroe sma foe tjari bigi kenki kon na ini den libi. „Den troe wini foe a krestendom ben de foe si foe di sma di ben taki dati den e bribi den leri foe na krestendom, ben meki kon tron boen sma”, a historia skrifiman John Lord ben skrifi. „Wi abi den boeweisi foe a libi foe den di de sondro flaka, foe a sondro fowtoe krinfasi nanga gwenti foe den, foe na boen fasi fa den e tjari densrefi leki borgroe foe wan kondre èn foe den kresten boenfasi foe den.” Fa den leri foe Jesus ben de wan bigi difrenti!
9. San de ini a tori foe arki na Jesus?
9 Foetroe, no wan enkri studie di wan sma e teki na en tapoe ini a ten disi, kan de moro prenspari leki na studie foe a libi nanga diniwroko foe Jesus Krestes. „Hori joe ai soifri tapoe Jesus”, na apostel Paulus e gi tranga. „Ija, loekoe en finifini” (Hebrewsma 12:2, 3). Na a ten foe Jesus en transfiguratie, Gado ensrefi ben taki foe en Manpikin: „Arki na en” (Mateus 17:5). Ma, wi sa poti krakti a tapoe taki foe arki Jesus wani taki moro leki soso jere san a e taki. A wani taki poti prakseri a tapoe den bodoi foe en, ija, foe waka na en baka foe di wi e doe san en ben doe èn e doe disi toe na a fasi fa en ben e doe dati. Wi e doe wan sani tapoe a lobi foe Jesus foe di wi e teki en leki wi model, foe di wi e waka so soifri leki a kan ini en foetoemarki.
San Jesus wani foe wi doe
10. Soema Jesus ben gi skoro èn nanga san ini prakseri?
10 A komando di Jesus ben kisi foe Gado ben de, foe preiki foe a Kownoekondre foe en Tata, èn a ben leri en bakaman foe doe a srefi wroko. „Meki wi go na wan tra presi”, so a ben taigi den fosi disipel foe en, „so taki mi kan preiki drape so toe, bikasi nanga disi na prakseri mi go na doro” (Markus 1:38; Lukas 4:43). Baka ten, baka di a ben skoro den 12 apostel foe en finifini, Jesus ben gi den bodoi: „Preiki te joe de na pasi taki: ’A kownoekondre foe hemel kon krosibei’”(Mateus 10:7). Baka wan toe moen, di a ben kaba skoro 70 trawan, a ben seni den go nanga a komando: „Tan taigi den: ’A kownoekondre foe Gado kon krosibei foe joe’” (Lukas 10:9). A de krin, taki Jesus ben wani dati den bakaman foe en ben sa de preikiman èn leriman.
11. (a) Na sortoe fasi den disipel foe Jesus ben o doe moro bigi wroko leki en doe? (b) San ben pasa nanga den disipel baka di den ben kiri Jesus?
11 Jesus ben go doro foe skoro den disipel foe en foe doe wroko disi. Na lasti neti bifo a dede foe en, a ben gi den deki-ati nanga den wortoe: „A sma di e bribi ini mi, sa doe srefi den wroko di mi e doe; èn a sa doe moro bigi wroko leki den disi (Johanes 14:12). Den bakaman foe en ben sa doe moro bigi wroko leki en, bikasi a diniwroko foe den ben sa doe wan moro langa pisi ten èn den ben sa miti boen foeroe sma moro na ini wan krinkrin moro bigi gebied. Ma, tokoe baka di den ben kiri Jesus den disipel foe en ben kon lan foe frede ede. Den ben go kibri densrefi èn den no ben e doe a wroko di a ben skoro den foe doe. Son wan ben drai go baka srefi na a fisi bisnis. Ma, na wan fasi di den no ben sa frigiti, a ben poti go boen na ini den seibi disi san a ben wani, dati den èn ala den tra bakaman foe en, ben sa doe.
12. (a) Sortoe wondroe Jesus ben doe na a se foe Galilea? (b) San Jesus ben kan wani taki di a ben aksi Petrus efoe a ben lobi en „moro leki den disi”?
12 Jesus ben teki wan libisma skin èn ben sori ensrefi na a Se foe Galilea. Den seibi apostel ben go na se ini wan boto ma a heri neti den no ben kisi no wan fisi. Foe na sjoro pe Jesus ben de a ben bari taki: „Iti joe srepi na a retisei foe a boto èn joe sa feni wan toe”. Di na wan froewondroe fasi a srepi ben foeroe nanga fisi te foe priti srefi, den wan di ben de ini a boto ben kon froestan taki a ben de Jesus di ben e tanapoe na a sjoro, èn den ben e hasti densrefi go na a presi pe a ben e wakti. Baka di Jesus ben gi den a mamanten njanjan, dan kande a ben loekoe go na a sei pe den ben kisi den foeroe fisi èn ben aksi Petrus: „Simon manpikin foe Johanes, joe lobi mi moro leki den disi?” (Johanes 21:1-15). Seiker Jesus ben wani taki, ’Joe tai moro na a fisiwroko leki na a preikiwroko gi san mi ben sreka joe foe doe?’
13. Fa Jesus ben beri go dipi ini den bakaman foe en a fasi fa den moesoe doe tapoe a lobi foe en?
13 Petrus ben piki: „Ija, Masra, joe sabi taki mi lobi joe”. Jesus ben piki: „Wei mi skapoe”. Wan di foe toe tron Jesus ben aksi: „Simon, manpikin foe Johanes, joe lobi mi?” Agen Petrus ben piki, sondro tweifri nanga moro bigi seikerfasi: „Ija, Masra, joe sabi taki mi lobi joe.” Agen Jesus ben komanderi: „Wei mi pikin skapoe”. Wan di foe dri tron Jesus ben aksi: „Simon manpikin foe Johanes, joe lobi mi?” Now Petrus ben sari foetroe. Soso wan toe dei a fesi, a ben taki dri tron dati a no ben sabi Jesus, so boen a ben kan aksi ensrefi heri boen efoe Jesus ben tweifri na a loyaalfasi foe en. Dati ede Petrus ben piki foe a di foe dri tron èn kande a sten foe en ben piki neleki a ben begi tangitangi: „Masra, joe sabi ala sani; joe sabi boen taki mi lobi joe.” Jesus ben pikin nomo taki: „Gi den pikin skapoe foe mi njanjan” (Johanes 21:15-17). Tweifri kan de foe san Jesus wani taki Petrus nanga den kompe foe en ben sa doe? Fa na wan krakti fasi a ben meki den — èn ala sma di ben sa de en disipel ini a ten disi — kon froestan boen taki efoe den lobi en, den ben sa teki prati na a wroko foe meki disipel!
14. Fa Jesus ben sori krin na tra okasi fa den disipel foe en moesoe doe tapoe a lobi foe en?
14 Wan toe dei na baka a takimakandra na a se sjoro, Jesus ben de foe si na a bergi ini Galilea èn a ben e gi wan kolokoe konmakandra, foe pikinmoro 500 bakaman foe en, bodoi: „Go foe dati ede èn meki disipel foe sma foe ala nâsi, . . . èn leri den foe ondrow ala den sani di mi ben komanderi oenoe” (Mateus 28:19, 20; 1 Korentesma 15:6). Prakseri disi pikinso! Man, oema nanga pikin alamala ben kisi a srefi ordroe. Moro baka ten, leti bifo Jesus ben go na hemel, a ben taigi en disipel: „Oenoe sa de kotoigi foe mi . . . te na a moro farawe pisi kondre foe grontapoe” (Tori foe den Apostel 1:8). Baka ala den deki-ati disi, dan a no de foe froewondroe taki jari na baka Petrus ben taki: „[Jesus] komanderi wi foe preiki gi a pipel èn foe gi wan finifini kotoigi.” — Tori foe den Apostel 10:42.
15. Foe san degedege no kan de?
15 No wan degedege kan de foe a fasi fa wi moesoe doe wan sani tapoe a lobi foe Krestes. So leki a ben taigi den apostel foe en: „Efoe oenoe hori mi komando, dan oenoe sa tan ini a lobi foe mi . . . Oenoe na mi mati efoe oenoe e doe san mi e komanderi oenoe” (Johanes 15:10-14). Na aksi de. Joe sa sori warderi gi na lobi foe Krestes foe di joe e gi jesi na a komando foe en foe abi wan prati na a meki foe disipel? A de troe taki foe difrenti reide ede disi no sa de makriki gi joe. Ma so srefi gi Jesus a no ben de makriki. Loekoe pikinso den kenki di ben de ini a tori gi en.
Waka baka na eksempel foe Jesus
16. Sortoe toemoesi moi eksempel Jesus gi?
16 Gado en wan enkri gebore Manpikin ben e njanboen foe wan prenspari posisi foe hemel glori di ben de moro hei leki di foe ala den engel. A ben goedoe troetroe! Tokoe a ben lagi ensrefi nanga friwani, ben gebore leki memre foe wan pôti famiri, èn ben gro na mindri foe siki sma di ben e dede. A ben doe disi foe a boen foe wi, so leki na apostel Paulus e tjari kon a krin: „Joe sabi na no-froedini boenfasi foe wi Masra Jesus Krestes, taki ala di a ben goedoe, a ben kon pôti foe oenoe ede, so taki nanga jepi foe a pina foe en oenoe ben kan kon goedoe” (2 Korentesma 8:9; Filipisma 2:5-8). Fa disi ben de wan moi eksempel! Fa disi ben de wan demonstrâsi foe lobi! No wan sma ben gi moro abra noso ben pina moro foe a boen foe trawan. Èn no wan sma ben meki a kan gi trawan foe njanboen foe moro bigi goedoe, ija, foe têgo libi ini volmaaktifasi.
17. Sortoe pasi den e poti a wi fesi, èn san sa de a bakapisi te wi e waka na pasi dati?
17 Wi kan waka baka na eksempel foe Jesus èn de so wan sortoe blesi gi trawan. Foeroe tron, Jesus ben gi sma tranga foe tron disipel foe en (Markus 2:14; Lukas 9:59; 18:22). Te joe loekoe leti, dan Petrus ben skrifi: „Den ben kari oenoe foe a libi pasi disi, bikasi Krestes ben pina so srefi toe gi oenoe, a libi wan model na baka gi oenoe, so taki joe kan waka na ini en foetoe marki” (1 Petrus 2:21). Joe sa doe wan sani tapoe a lobi foe Krestes, srefi efoe a ben sa wani taki dati joe ben sa moesoe njan pina foe dini en Tata so leki en ben doe? Fa so wan fasi foe handri kan abi wini gi trawan! Ija, te joe waka baka na eksempel foe Jesus, foe di joe e doe na den leri di joe ben kisi foe en Tata dorodoro, „joe sa froeloesoe joesrefi nanga trawan di e arki na joe.” — 1 Timoteus 4:16.
18. (a) Sortoe eksempel Jesus ben gi ini a tori foe a fasi foe en nanga sma? (b) Fa sma ben doe wan sani tapoe na sma di Jesus ben de?
18 Foe kan jepi sma so foeroe leki a kan, wi moesoe firi gi den na a fasi fa Krestes ben firi gi den. Wan profeititaki ben taki foe en: „A sa firi sari-ati nanga den mofinawan èn den pôtiwan” (Psalm 72:13). Den bakaman foe en ben kan si taki Jesus ben „abi lobi” gi den sma nanga soema a ben e taki èn taki troetroe a ben wani jepi den (Markus 1:40-42; 10:21). „Di den ben si a ipi sma” na so bijbel e taki „a ben sari den, bikasi den ben foefoeroe den [leki fa den e foefoeroe boesimeti] èn den ben drifi den go kon leki skapoe sondro herder” (Mateus 9:36). Srefi den bigi sondari ben si a lobi foe en èn den ben e firi gi en. Nanga a fasi fa en sten ben e piki, en fasi foe doe, èn en fasi foe gi leri, a ben meki den e firi densrefi boen. Leki bakapisi foe dati, dan srefi den froe-akti belastingman nanga den motjo ben e kon na en. — Mateus 9:9-13; Lukas 7:36-38; 19:1-10.
19. Fa Paulus ben waka baka Jesus, èn san sa de na bakapisi efoe wi e doe a srefi?
19 Den fosi jarihondro disipel foe Jesus ben waka baka na lobi fasi eksempel foe en. Paulus ben skrifi go na sonwan gi soema a ben doe dienst „Wi kon de nanga switifasi na oenoe mindri, so leki te wan mama di abi pikin na bobi e boboi en eigi pikin . . . Leki fa wan papa a doe nanga en pikin, na so wi ben tan froemane ibriwan foe oenoe èn tan gi oenoe deki-ati èn ben tan gi oenoe kotoigi” (1 Tesalonikasma 2:7-11). Joe e firi a srefi leti broko ede gi den sma ini joe gebied so leki fa lobi papa nanga mama e firi gi den lobi pikin foe den? Te joe e demo a sortoe broko ede disi ini a fasi fa joe sten e piki, a fasi fa joe e poti joe fesi èn den doe foe joe, dan dati sa meki a Kownoekondreboskopoe de wan toemoesi moi sani gi den sma di gersi skapoe.
20, 21. San na wan toe njoen modoten kefal foe sma di e waka na baka Jesus eksempel foe lobi?
20 Tapoe wan kowroe dei na Spanjorokondre, toe kotoigi ben miti wan owroe oema di ben waka lontoe nanga krokoe ini na oso foe en, pe a ben kowroe leki ijs foe di a bron oedoe ini a fajapresi ben kaba. A ben e wakti en manpikin, di ben o drai komoto a wroko, foe koti moro oedoe. Den Kotoigi ben koti a oedoe èn den ben libi so srefi wan toe tijdschrift na baka foe a leisi. Di a manpikin drai kon baka na oso, a lobifasi fa den Kotoigi ben handri nanga en mama ben go na en ati so te dati a ben leisi den tijdschrift, ben bigin wan bijbelstudie, ben dopoe, èn heri esi a ben go ini a pionierdienst.
21 Ini Australia wan man nanga en oema ben froeteri Kotoigi di ben go fisiti den taki den no abi moni foe gi den famiri njanjan. A Kotoigi-trowpaar ben gowe èn ben bai wan toe njansani, nanga so srefi switisani gi den pikin. Na papa nanga mama ben krei watra-ai èn ben taki, dati den ben lasi-ati so krinkrin taki den ben prakseri foe kiri densrefi. Ala toe ben bigin foe studeri bijbel èn no so langa pasa a wefi ben dopoe. Na ini Amerkankondre wan oema di ben e kroetoe sani a fesi teige Jehovah Kotoigi, ben taki, baka di a ben miti wan foe den: „Foe troe mi no kan memre foe san wi ben taki, ma san mi kan memre na a switifasi di a ben sori mi èn fa a ben lobi jepi sma èn fa a ben de nanga sakafasi. Leki sma mi ben e firi gi en srefisrefi. Te na a dei disi, mi e si na matifasi foe en leki wan bigi sani.”
22. Baka di wi ondrosoekoe a libi foe Jesus, dan san a bosroiti foe wi di abi foe doe nanga en de?
22 Te wi e doe wan sani tapoe a lobi foe Jesus, foe di wi e doe a wroko di en ben e doe èn na a fasi fa en ben doe en, dan fa wi sa kan njanboen foe bigi blesi! A bigi di Jesus ben bigi, de foe si krin èn de pasa marki. A e boeweigi wi foe taki den wortoe foe na Romen granman Pontius Pilatus: „Loekoe! A libisma!” Ija, foe troe, „a libisma”, a moro bigi libisma di oiti ben libi. — Johanes 19:5.
Fa joe ben sa piki?
◻ O bigi a lobi foe Jesus de?
◻ Soema wi moesoe lobi foe di Jesus lobi wi èn san a lobi foe en moesoe poesoe wi foe doe?
◻ Sortoe wroko foe Jesus wi wani foe doe?
◻ Fa Jesus ben goedoe, èn foe san ede a ben kon pôti?
◻ Fa wi moesoe waka na Jesus baka ini a fasi fa a ben dini sma
[Prenki na tapoe bladzijde 29]
Jesus gi na eksempel ini a tori foe lobi
[Prenki na tapoe bladzijde 31]
Jesus ben sori na wan krakti fasi fa en disipel ben moesoe sori lobi gi en