San na dopu?
A piki fu Bijbel
Te wan sma e dopu dan a e saka go helemaal na ini a watra.a Na furu presi na ini Bijbel den e taki dati sma ben e dopu (Tori fu den apostel 2:41). Wan fu den leisi dati na di Yesus ben dopu di a ben saka go na ini a Yordanliba (Mateyus 3:13, 16). Furu yari baka dati, dan wan Etiopaman ben dopu na „wan presi pe watra ben de” na sei a pasi pe a ben e waka.—Tori fu den apostel 8:36-40.
Yesus ben taki dati den bakaman fu en ben musu dopu (Mateyus 28:19, 20). Na apostel Petrus ben tyari dati kon na krin tu.—1 Petrus 3:21.
Na ini na artikel disi wi o taki
San dopu wani taki?
Wan sma e dopu fu sori trawan taki a abi berow fu den sondu fu en èn taki a pramisi Gado taki a o du san Gado e aksi fu en awinsi san e pasa. Dati wani taki dati a sma o gi yesi na Gado èn na Yesus. Den sma di e dopu e bigin libi na wan fasi di o meki taki Gado o gi den tego libi.
Te wan sma e saka go na ondro watra, dan dati e sori taki a kenki en libi. Fa so? Bijbel e agersi dopu nanga beri (Romesma 6:4; Kolosesma 2:12). Te wan sma e go ondro watra, dan a e sori taki a dede noso taki a tapu nanga a fasi fa a ben libi fosi. Te a e opo komoto na ini a watra, dan yu kan taki dati a e bigin nanga wan nyun libi leki wan dopu Kresten.
Bijbel e taki dati beibi musu dopu fu tron wan Kresten?
Bijbel no e taki dati beibi musu dopu fu tron wan Kresten. Son kerki e dropu watra tapu a beibi ede èn dan den e gi a beibi wan nen.
Bijbel e leri taki wan sma di wani dopu musu du son sani fosi. Fu eksempre, a musu frustan wan tu prenspari leri fu Gado Wortu èn a musu du den sani di a leri. A musu abi berow fu den sondu di a ben du. Èn na ini begi a musu gi en libi abra na Gado (Tori fu den apostel 2:38, 41; 8:12). Wan beibi no man du den sani disi.
San a wani taki fu dopu na ini a nen fu a Tata, a Manpikin, èn a santa yeye?
Yesus ben taigi den bakaman fu en san den musu du di a taki: „Meki den tron disipel. Dopu den na ini a nen fu a Tata, fu a Manpikin, èn fu a santa yeye.Leri den fu du ala san mi taigi unu fu du” (Mateyus 28:19, 20). Den wortu „na ini a nen fu” wani taki dati a sma di o dopu e erken a makti nanga a posisi fu a Tata èn fu a Manpikin, èn sosrefi san Gado man du nanga en santa yeye. Fu eksempre, na apostel Petrus ben taigi wan man di ben lan sensi di a gebore taki: „Ini a nen fu Yesus Krestes fu Nasaret, mi e taigi yu: Opo, dan yu waka!” (Tori fu den apostel 3:6) A de krin san disi wani taki. A wani sori taki Petrus ben erken taki Krestes abi makti èn taki na Krestes meki a man kon betre na wan wondru fasi.
„A Tata” na Yehovahb Gado. Na en meki ala sani, a gi wi libi, èn en abi ala makti fu di nowan sma abi moro makti leki en.—Genesis 17:1; Openbaring 4:11.
„A Manpikin” na Yesus Krestes di ben dede gi wi (Romesma 6:23). Wi no man kisi frulusu efu wi no e erken a prenspari frantwortu di Yesus abi na ini den sani di Gado o du gi libisma.—Yohanes 14:6; 20:31; Tori fu den apostel 4:8-12.
„A santa yeye” na a krakti di Gado e gebroiki fu du sani.c Gado gebroiki a santa yeye fu en fu meki sani, fu gi sma libi, fu tyari boskopu gi den profeiti fu en èn gi tra sma, èn a gi den a makti fu du a wani fu en (Genesis 1:2; Yob 33:4; Romesma 15:18, 19). Gado gebroiki en santa yeye tu fu meki den Bijbel skrifiman skrifi den prakseri fu en.—2 Petrus 1:21.
A de wan sondu efu wan sma e dopu ete wan tron?
Furu sma e teki a bosroiti fu go na wan tra kerki. Ma fa a de efu den ben dopu kaba na ini wan fosi kerki fu den? Na wan sondu den du efu den e dopu ete wan tro? Son sma e piki iya, kande fu di den e denki san skrifi na Efeisesma 4:5, pe skrifi: „Wán Masra, wán bribi, nanga wán dopu de.” Ma a vers disi no e taki dati wan sma no man dopu ete wan tron. Fu san ede wi e taki so?
Den tra tekst na en lontu. Den tra tekst lontu Efeisesma 4:5 e sori taki na apostel Paulus ben taki o prenspari a de taki tru Kresten abi wánfasi na ini den sani di den e bribi (Efeisesma 4:1-3, 16). Den kan abi a wánfasi disi soso te den e teki na eksempre fu a srefi Masra, Yesus Krestes; te den abi a srefi bribi noso e frustan den srefi sani di Bijbel e leri; èn te den e du den srefi sani di de fanowdu fu man teki dopu.
Na apostel Paulus ben gi son wan fu den sma di ben dopu kaba a deki-ati fu dopu baka. Disi ben de so fu di den ben dopu sondro fu sabi bun san den Kresten leri wani taki.—Tori fu den apostel 19:1-5.
San wan sma musu du fu man teki dopu. Efu wan sma wani taki Gado feni en bun, dan a musu abi soifri sabi fu Bijbel efu a wani teki dopu (1 Timoteyus 2:3, 4). Efu den sani di wan sma ben leri na kerki no ben agri nanga Bijbel èn a sma dati ben teki dopu, dan Gado no ben o feni a dopu fu en bun (Yohanes 4:23, 24). Awinsi a sma ben bribi trutru taki a sani di a du de bun, toku a dopu sondro fu „abi soifri sabi” (Romesma 10:2). Efu a sma wani meki Gado feni en bun, dan a musu leri den tru tori fu Bijbel, a musu du san a leri, a musu gi en libi abra na Gado, èn a musu dopu ete wan tron. Te a e du den sani disi èn a e dopu baka, dan dati no de wan sondu. Na presi fu dati, a e du wan bun sani.
Bijbel e taki fu tra sortu dopu
Bijbel e taki fu tra sortu dopu di wani taki wan tra sani leki a dopu fu den bakaman fu Yesus. Luku wan tu eksempre.
Yohanes a Dopuman ben e dopu sma.d Den Dyu nanga den sma di ben teki a Dyu bribi ben meki Yohanes dopu den fu sori taki den ben abi berow te den ben du sani di ben de teige a wet fu Moses, dati wani taki den wet di Gado ben meki Moses gi den Israelsma. A dopu fu Yohanes ben yepi sma fu de srekasreka fu teki a Mesias, Yesus fu Nasaret.—Lukas 1:13-17; 3:2, 3; Tori fu den apostel 19:4.
Di Yesus srefi ben dopu. A dopu fu Yesus ben de tra fasi leki den tra dopu. Yesus ben de wan volmaakti sma èn a no ben du nowan sondu (1 Petrus 2:21, 22). Fu dati ede, di Yesus dopu dan dati no wani taki dati a ben abi berow èn taki a ben „begi Gado fu kisi wan bun konsensi” (1 Petrus 3:21). Ma na presi fu dati a ben sori taki a ben gi ensrefi fu du a wani fu Gado leki a Mesias noso a Krestes. Disi ben wani taki tu taki a ben o dede gi wi.—Hebrewsma 10:7-10.
Dopu nanga santa yeye. Yohanes a Dopuman èn sosrefi Yesus Krestes ben e taki fu a dopu nanga santa yeye (Mateyus 3:11; Lukas 3:16; Tori fu den apostel 1:1-5). A dopu dati no de a srefi leki te wan sma e dopu na ini a nen fu a santa yeye (Mateyus 28:19). Fu san ede dati de so?
A no furu bakaman fu Yesus e dopu nanga santa yeye. Den wan disi salfu nanga santa yeye fu di Gado kari den fu dini makandra nanga Krestes na ini hemel leki kownu nanga priester gi grontapue (1 Petrus 1:3, 4; Openbaring 5:9, 10). Den o tiri abra furu milyun bakaman fu Yesus di abi a howpu fu libi gi ala ten na ini a Paradijs na grontapu.—Mateyus 5:5; Lukas 23:43.
De wán nanga Krestes èn dopu fu dede tu neleki en. Den sma di dopu nanga santa yeye, dopu sosrefi neleki Krestes fu di den de wàn nanga en (Romesma 6:3). Sobun, na den salfu bakaman fu Yesus e dopu na a fasi disi èn den sa tiri makandra nanga en na ini hemel. Te wan sma e dopu fu di a de wàn nanga Yesus, dan den e tron memre fu a salfu gemeente fu en. En na a Ede, èn den na a skin.—1 Korentesma 12:12, 13, 27; Kolosesma 1:18.
Den salfu Kresten e „dopu fu dede neleki [Yesus]” tu (Romesma 6:3, 4). Neleki Yesus a moro prenspari gi den fu gi yesi na Gado na presi fu du san densrefi wani, èn neleki Yesus den sabi taki den no o libi fu ala ten dya na grontapu. Wi kan taki dati den e kaba a dopu disi te den dede èn e kisi wan opobaka fu libi na ini hemel leki yeye.—Romesma 6:5; 1 Korentesma 15:42-44.
Dopu nanga faya. Yohanes a Dopuman ben taigi den sma di ben arki en: „A sma dati [Yesus] o dopu unu nanga santa yeye èn nanga faya. En skopu fu wai aleisi de na ini en anu èn a o krin a heri gron pe a e fon aleisi. A o poti en aleisi na ini a maksin, ma a o bron na aleisibuba nanga faya di nowan sma kan kiri” (Mateyus 3:11, 12). Yu si taki wan difrenti de na mindri dopu nanga faya èn dopu nanga santa yeye. San Yohanes ben wani taki nanga disi?
Na aleisi na den sma di ben o arki Yesus èn ben o du san a taigi den. Den sma disi kisi na okasi fu dopu nanga santa yeye. Na aleisibuba na den sma di no wani arki Yesus. Den o dopu nanga faya èn dati wani taki dati den o kisi pori fu ala ten.—Mateyus 3:7-12; Lukas 3:16, 17.
a A Griki wortu di vertaal nanga „dopu” wani taki dati „wan sma e saka go na ini a watra èn taki a e komoto na ondro a watra,” soleki fa a buku Vine’s Complete Expository Dictionary of Old and New Testament Words e taki.
b Yehovah na a nen fu Gado (Psalm 83:18). Luku na artikel di nen „Suma na Yehovah?”
c Luku na artikel „San na a santa yeye?”
d Luku na artikel „Wie was Johannes de Doper?”
e Luku na artikel „Suma e go na hemel?”
f Bijbel e gebroiki a wortu „dopu” tu fu sori fa sma ben e meki den wrokosani di den ben e gebroiki na ini na anbegi kon krin. Disi den ben du fu di den ben e sungu den wrokosani go na ini watra (Hebrewsma 9:10). A no de fu taki dati disi no de a srefi kwetikweti nanga a dopu fu Yesus nanga den bakaman fu en di ben saka go na ini a watra.