Gi tranga foe sori lobi èn foe doe toemoesi boen wroko — Fa?
„Meki wi poti prakseri na tapoe makandra foe gi makandra tranga foe sori lobi èn foe doe toemoesi boen wroko, . . gi makandra deki-ati, èn dati o moro oenoe e si a dei e kon moro krosibei.” — HEBREWSMA 10:24, 25.
1, 2. (a) Foe san ede a ben de prenspari taki den fositen kresten ben moesoe feni trowstoe nanga deki-ati te den ben e kon makandra? (b) Sortoe rai di Paulus ben gi, ben taki foe a fanowdoe di a de fanowdoe foe kon makandra?
DEN ben miti na wan kibri fasi, èn den ben de krosibei makandra na baka den doro di sroto. Na dorosei foe den, kefar ben loeroe na ala presi. No langa pasa, sma ben kiri a fesiman foe den, Jesus, na poebliki, èn Jesus ben warskow den bakaman foe en taki sma no ben sa handri na wan moro betre fasi nanga den dan den ben handri nanga en (Johanes 15:20; 20:19). Ma di den ben taki safri foe a lobiwan foe den, Jesus, den ben moesoe firi taki den no ben de ini kefar te den ben de nanga makandra.
2 Ala di den jari ben pasa, kresten ben miti ala sortoe tesi nanga froefolgoe. Neleki den fosi disipel dati, den ben kisi trowstoe nanga deki-ati te den e kon makandra. Foe dati ede, na apostel Paulus ben skrifi na Hebrewsma 10:24, 25: „Meki wi poti prakseri na tapoe makandra foe gi makandra tranga foe sori lobi èn foe doe toemoesi boen wroko, foe no libi den konmakandra, soleki a de a gwenti foe son wan, ma gi makandra deki-ati, èn dati o moro oenoe e si a dei e kon moro krosibei.”
3. Foe san ede joe ben sa taki dati Hebrewsma 10:24, 25 de moro leki wan komando nomo taki kresten moesoe kon makandra?
3 Den wortoe dati de moro leki wan komando nomo foe tan kon makandra. Den e gi wan markitiki di gi nanga jepi foe a santa jeje foe Gado gi ala kresten konmakandra — èn foe troe, gi ibri okasi te kresten abi demakandra. Na ini a ten disi, moro leki oiti, ala di wi e si krin taki a dei foe Jehovah e kon moro krosibei, den kwinsi nanga a kefar foe na ogri sistema disi, e meki en fanowdoe taki den konmakandra foe wi moesoe de wan kibripresi gi wi, wan fonten gi ala sma foe kisi tranga nanga deki-ati. San wi kan doe, foe abi a djaranti taki disi de so? We, meki wi ondrosoekoe den wortoe foe Paulus finifini, ala di wi e poti dri prenspari aksi: San a wani taki foe „poti prakseri na tapoe makandra”? San a wani taki foe „gi makandra tranga foe sori lobi èn foe doe toemoesi boen wroko”? Èn leki lasti, fa wi kan „gi makandra deki-ati” na ini den moeilek ten disi?
„Poti prakseri na tapoe makandra”
4. San a wani taki foe „poti prakseri na tapoe makandra”?
4 Di Paulus ben gi den kresten tranga foe „poti prakseri na tapoe makandra”, a ben gebroiki a Griki werkwortoe ka·ta·no·eʹo, wan moro tranga fasi foe taki „kon sabi”. A Theological Dictionary of the New Testament e taki dati ka·ta·no·eʹo wani taki „foe poti a heri prakseri foe wi na tapoe wan afersi”. Soleki fa W. E. Vine e taki, dan a kan wani taki toe „foe froestan dorodoro, foe poti prakseri finifini”. So boen, te kresten e „poti prakseri na tapoe makandra”, dan den no e froestan makandra so frafra nomo, ma den e gebroiki ala den froestan foe proeberi foe froestan makandra moro dipi. — Teki gersi Hebrewsma 3:1.
5. San na wan toe fasi di joe no ben sa man si so wantewante na wan sma, èn foe san ede wi moesoe poti prakseri na tapoe den?
5 Wi moesoe hori na prakseri taki wan sma de moro leki san a e sori na dorosei nomo, san den sani di a e doe e sori, noso san den eigifasi foe en kande e tjari kon na krin (1 Samuèl 16:7). Te wan sma abi wan tirifasi, dan nofotron dati e kibri den dipi firi di a sma abi troetroe, noso a e kibri a switifasi di a sma abi. Boiti dati, so srefi den background foe sma e difrenti srefisrefi. Son sma ondrofeni takroe èn tranga tesi na ini den libi foe den; trawan e horidoro na ondro situwâsi nownow, di wi no ben sa man prakseri foe den srefisrefi. O foeroetron a e pasa taki wi no e atibron moro foe wan freimde sani di wan brada noso sisa doe, te wi e kon sabi a background nanga a situwâsi foe a sma. — Odo 19:11.
6. San na wan toe fasi fa wi kan kon sabi makandra moro boen, èn san ben kan de wan boen bakapisi foe dati?
6 A no de foe taki, dati disi no wani taki dati wi moesoe boemoei na ini afersi foe tra sma, sondro taki a sma aksi wi (1 Tesalonikasma 4:11). Ma tokoe wi kan sori persoonlijk belangstelling gi makandra. Disi wani taki moro leki foe gi odi nomo na a Kownoekondre zaal. Foe san ede joe no e soekoe wan sma di joe ben sa wani sabi moro boen, èn teki wan toe miniti foe taki makandra bifo a konmakandra èn baka a konmakandra? A ben sa gi moro wini foe „waka a pasi foe lobi foe teki sma na oso”, foe di joe e kari wán noso toe mati kon na joe oso foe njan wan pikin sani (Romesma 12:13). Sori belangstelling. Arki. Foeroe sani kan kon na krin efoe wi e aksi nomo fa wan sma ben kon sabi èn ben kon lobi Jehovah. Ma joe kan leri moro ete te joe e wroko makandra na ini na oso-foe-oso diniwroko. Te wi e poti prakseri na tapoe makandra na den sortoe fasi disi, dan dati sa jepi wi foe kweki troetroe firi gi makandra, noso wi sa man froestan a fasi fa den e denki èn e firi. — Filipisma 2:4; 1 Petrus 3:8.
’Gi makandra tranga’
7. (a) Fa a leri foe Jesus ben abi krakti na tapoe sma? (b) San ben meki taki a leri di a ben gi, ben abi so foeroe krakti?
7 Te wi e poti prakseri na tapoe makandra, dan wi sreka moro boen foe gi makandra tranga èn foe gi makandra deki-ati foe doe wan sani. Spesroetoe kresten owroeman e prei wan prenspari ròl na ini a tori disi. Wi e leisi foe wan ten di Jesus ben taki na poebliki: „A bakapisi ben de taki den ipi sma ben froewondroe foe a fasi fa a e gi leri” (Mateus 7:28). Na wan tra okasi, srefi wan toe sroedati di den ben seni go foe teki Jesus foe go sroto en, ben gowe foe Jesus èn den ben e taki: „Noiti wan tra man taki na a fasi disi” (Johanes 7:46). San ben meki taki den leri di Jesus ben gi, ben abi so foeroe krakti? A ben de a sori di a ben sori toemoesi firi te a ben gi leri? Nôno; Jesus ben taki nanga lespeki. Tokoe, ala ten a marki foe en ben de foe doro na ati foe den arkiman foe en. Bikasi a ben poti prakseri na tapoe sma, meki a ben sabi soifri fa foe boeweigi na ati foe den. A ben gebroiki libilibi èn eenvoudig agersitori di ben sori fa a libi de troetroe (Mateus 13:34). Na so a moesoe de toe, taki den wan di e kisi toewijzing na den konmakandra foe wi, moesoe waka na baka na eksempre foe Jesus foe gi waran èn fajafaja lezing di e boeweigi sma. Neleki Jesus, wi kan doe moeiti foe feni agersitori di e fiti den arkiman foe wi èn di e doro na ati foe den.
8. Fa Jesus ben gi sma tranga nanga na eksempre foe en, èn fa wi ben sa kan waka na baka na eksempre foe en na ini a tori disi?
8 Te wi e dini Gado, wi alamala kan gi makandra tranga nanga na eksempre foe wi. Jesus ben gi den arkiman foe en tranga troetroe. A ben lobi a kresten diniwroko èn a ben hei a diniwroko. A ben taki dati a ben de leki njanjan gi en (Johanes 4:34; Romesma 11:13). So wan faja kan panja esi-esi go na tra sma. Joe kan meki taki tra sma e si a prisiri di joe abi na ini a diniwroko, na a srefi fasi? Prati den boen ondrofenitori foe joe nanga tra sma ini a gemeente, ala di joe e loekoe boen foe no taki na wan skepi fasi. Te joe e gi trawan a kari foe wroko nanga joe, dan loekoe efoe joe kan jepi den foe feni troetroe prisiri foe taki nanga tra sma foe wi Gran Mekiman, Jehovah. — Odo 25:25.
9. (a) Gi sortoe fasi foe gi trawan tranga wi wani foe wai pasi, èn foe san ede? (b) San moesoe boeweigi wi foe gi wisrefi na ini a diniwroko foe Jehovah?
9 Ma loekoe boen taki joe no e gi tra sma tranga na wan fowtoe fasi. Foe eksempre, sondro taki wi wani dati srefisrefi, wi ben sa kan meki den sma firi taki den fowtoe, foe di den no e doe moro. Sondro taki wi wani dati srefisrefi, wi ben sa kan meki den firi sjen, foe di na wan negatief fasi wi e teki den gersi trawan di abi wan moro bigi prati na ini a kresten diniwroko, noso kande wi e poti strak markitiki èn e kroetoe den wan di no e doro den markitiki. Ibri wan foe den fasi disi, ben sa kan gi wan sma tranga wan pisi ten foe meki den doe wan sani, ma Paulus no ben skrifi, ’gi tranga foe sma firi taki den fowtoe èn foe doe toemoesi boen wroko’. Nôno, wi moesoe gi tranga foe sori lobi, èn dan den wroko sa waka na baka dati, te wan sma abi wan boen reide foe dati. No wan sma moesoe doe wan sani moro foeroe nanga a prakseri san trawan na ini a gemeente sa denki foe en, efoe a no e doe san den e froewakti foe en. — Teki gersi 2 Korentesma 9:6, 7.
10. Foe san ede wi moesoe hori na prakseri taki wi a no basi foe a bribi foe trawan?
10 A gi di wi e gi trawan tranga, no wani taki dati wi moesoe basi makandra. Ala di Gado ben gi Paulus foeroe makti, tokoe na apostel ben memre a gemeente foe Korente, na wan sakafasi: ’Wi a no den basi foe den bribi foe oenoe’ (2 Korentesma 1:24). Efoe neleki en, wi toe e erken na wan sakafasi taki a no de a wroko foe wi foe taki omeni trawan moesoe doe ini a diniwroko gi Jehovah, èn so srefi foe seti a konsensi foe den ini den tra persoonlijk bosroiti di den moesoe teki, dan wi no sa tron sma di de „toemoesi regtfardiki”, sondro prisiri, strak, negatief, noso lobi foe poti toemoesi prakseri na tapoe wet (Preikiman 7:16). Den sortoe eigifasi disi no e gi tranga; den e kwinsi sma.
11. Sortoe sani ben boeweigi den sma foe gi bijdrage na ini den dei di den ben bow a tabernakel foe Israèl, èn fa dati kan de so na ini den dei foe wi?
11 Wi wani, taki ala moeiti di wi e doe ini Jehovah en diniwroko, moesoe doe nanga a srefi jejefasi leki na ini na Israèl foe fositen, di bijdrage ben de fanowdoe foe bow a tabernakel. Exodus 35:21 e taki: „Dan den ben kon, ibri wan foe den di na ati foe en ben poesoe en, èn ibri wan foe den di a jeje foe en ben gi en tranga, èn den ben tjari bijdrage kon gi Jehovah gi a wroko.” A no ben de krakti foe dorosei di ben poesoe den, ma foe na inisei foe den, foe na ati. Foe taki en leti, ini a Hebrewtongo a skrifi djaso troetroe taki „ibri sma di en ati ben opo en”, ben gi den sortoe presenti disi. (Na wi skrifi den wortoe skoinsi.) Foe go doro, meki wi doe moeiti foe opo na ati foe makandra awinsi o ten wi de makandra. A jeje foe Jehovah kan doe ala tra sani di de fanowdoe foe gi sma tranga.
„Gi makandra deki-ati”
12. (a) San na wan toe sani di a Grikiwortoe di den vertaal nanga „gi deki-ati” wani taki? (b) Fa den kompe foe Job ben misi foe gi en deki-ati? (c) Foe san ede meki wi no moesoe kroetoe makandra?
12 Di Paulus ben skrifi taki wi moesoe „gi makandra deki-ati”, a ben gebroiki wan fasi foe a Griki wortoe pa·ra·ka·leʹo, di wani taki toe ’gi krakti, trowstoe’. Ini a Griki Septuaginta vertaling, den gebroiki a srefi wortoe disi na Job 29:25, pe den e taki foe Job leki wan sma di ben trowstoe den sma di ben de nanga sari. A de wan sani di e gi foe lafoe taki, di Job ensrefi ben de na ondro tranga tesi, a no ben kisi so wan deki-ati. Den dri „trowstoeman” ben kroetoe en so foeroe èn ben piri-ai gi en, taki den ben misi foe froestan en, noso foe abi firi gi en. Foe taki en leti, ala di den ben taki so foeroe, no wán leisi srefi den ben kari Job na en nen. (Teki gersi Job 33:1, 31.) A de krin taki den ben si en moro leki wan problema dan leki wan sma. A no de foe froewondroe taki a ben froeklari ala di a ben broeja: „Efoe a ben de so nomo taki oen sili ben de pe mi sili de!” (Job 16:4) Na so a de na ini a ten disi toe, efoe joe wani gi wan sma deki-ati, froestan a fasi fa den e denki èn e firi! No kroetoe a sma. Soleki fa Romesma 14:4 e taki: „Soema na oenoe foe kroetoe na oso foetoeboi foe wan tra sma? Na fesi foe en eigi basi a e tanapoe noso a e fadon. Foe troe, den sa meki a tanapoe, bikasi Jehovah kan meki en tanapoe.”
13, 14. (a) Foe sortoe prenspari troetori wi moesoe overtoigi wi brada nanga sisa, so taki wi kan trowstoe den? (b) Fa wan engel ben gi Danièl tranga?
13 Na 2 Tesalonikasma 2:16, 17 den e vertaal a wortoe pa·ra·ka·leʹo nanga a zelfstandig naamwortoe foe en leki „trowstoe”: „Boiti dati, meki wi Masra Jesus Krestes srefi nanga wi Gado èn Tata, di ben lobi wi èn ben gi wi wan têgo trowstoe nanga wan boen howpoe nanga jepi foe no-froedini boen-atifasi, trowstoe den ati foe oenoe èn meki oenoe kon tranga ini ibri boen wroko èn ibri boen wortoe.” Loekoe taki Paulus e hari wan lin na mindri a prakseri taki na ati foe wi kan kisi trowstoe, nanga a prenspari troe tori taki Jehovah lobi wi. So boen, wi kan gi makandra deki-ati èn wi kan trowstoe makandra foe di wi e overtoigi makandra foe a prenspari waarheid dati.
14 Na wan okasi, a profeiti Danièl ben de so broeja, baka di a ben e si wan fisjoen di e gi frede, dati a ben taki: „Mi eigi lespeki ben kenki kon tron pori na mi tapoe, èn mi no ben abi no wan krakti moro.” Jehovah ben seni wan engel di ben memre Danièl difrenti leisi taki a ben de wan sma di Gado ben „wani srefisrefi”. San ben de a bakapisi? Danièl ben taigi na engel: „Joe gi mi tranga.” — Danièl 10:8, 11, 19.
15. Fa den owroeman nanga den opziener di e rèis moesoe hori balansi na mindri a prèise di den e prèise wan sma nanga a poti di den e poti wan sma kon reti?
15 Foe dati ede, disi na wan tra fasi foe gi makandra deki-ati. Prèise den! A de toemoesi makriki foe handri na wan fasi foe kroetoe sma nomo èn foe abi wan strak fasi foe handri. A troe, sontron a de fanowdoe foe poti wan sma kon reti, spesroetoe den owroeman nanga den opziener di e rèis moesoe doe dati. Ma a sa boen gi den efoe wi e si den leki sma di e gi wi waran deki-ati, na presi taki wi e si den leki sma di abi wan kroetoe fasi foe handri nomo.
16. (a) Te wi e gi deki-ati na den wan di depressief, foe san ede a no de nofo foeroetron foe gi den tranga nomo taki den moesoe doe moro na ini a diniwroko foe Jehovah? (b) Fa Jehovah ben jepi Elia di a ben depressief?
16 Spesroetoe den wan di depressief abi deki-ati fanowdoe, èn Jehovah e froewakti foe wi leki kompe kresten foe de wan fonten foe jepi — spesroetoe efoe wi de owroeman (Odo 21:13). San wi kan doe? A piki no de so makriki, leki foe taigi den nomo taki den moesoe doe moro na ini a diniwroko foe Jehovah. Foe san ede? Bikasi dati kan sori taki a depressief di den de depressief, na foe di den no e doe nofo. Moro foeroe dati a no a situwâsi. Wan leisi a profeiti Elia ben de depressief srefisrefi, taki a ben wani foe dede; ma tokoe disi ben de na wan ten di a ben abi toemoesi foeroe foe doe na ini a diniwroko foe Jehovah. Fa Jehovah ben handri nanga en? A ben seni wan engel foe gi en praktis jepi. Elia ben taigi Jehovah foe den moro dipi firi foe en, èn a ben e sori taki a ben firi taki a no ben warti noti neleki den dede fositen tata foe en, taki den wroko foe en ben de foe soso, èn taki a ben de en wawan. Jehovah ben arki èn a ben trowstoe en nanga wan demo foe a krakti foe En, di ben de wan froewondroe sani, èn a ben gi en a djaranti taki a no ben de en wawan srefisrefi èn taki a ben o kaba a wroko di a ben bigin. Jehovah ben pramisi Elia taki a ben sa gi en wan kompe foe a kan leri en, èn te foe kaba, a sma disi ben sa teki a presi foe en. — 1 Kownoe 19:1-21.
17. Fa wan owroeman ben sa kan gi deki-ati na wan sma di e kroetoe ensrefi toemoesi?
17 Dati na wan sani di e gi sma deki-ati srefisrefi! Meki a de so taki wi e gi deki-ati na den wan na wi mindri di abi problema na emotioneel sei. Proeberi foe froestan den, foe di joe e arki den! (Jakobus 1:19) Gi trowstoe di gron na tapoe den Boekoe foe bijbel èn di fiti gi den sani di ibri wan foe den abi fanowdoe (Odo 25:11; 1 Tesalonikasma 5:14). Foe gi deki-ati na den wan di e kroetoe densrefi toemoesi, dan na wan switifasi owroeman kan gi den boeweisi di gron na tapoe den Boekoe foe bijbel, taki Jehovah lobi den èn taki den warti gi en.a Foe abi wan takimakandra foe a loesoe-ofrandi, kan de wan krakti jepi gi den wan di e firi taki den no warti noti. A kan de fanowdoe foe sori wan sma di e sari foe wan sondoe di a ben doe na ini a ten di pasa, taki a loesoe-ofrandi krin en, efoe a ben abi berow troetroe èn efoe a ben drai en baka krinkrin gi ibri wan foe den sortoe sondoe dati. — Jesaja 1:18.
18. Fa wi moesoe gebroiki a leri foe a loesoe-ofrandi, foe gi deki-ati na wan sma di ben pina foe trawan ede, soleki a dwengi di sma ben dwengi en foe abi seks nanga en?
18 A no de foe taki, dati wan owroeman moesoe denki foe a spesroetoe kefal dati, so taki a kan gebroiki a leri dati na wan joistifasi. Loekoe wan eksempre: A meti di sma ben moesoe òfer, di ben de wan sani di a Wet foe Moses ben aksi foe den foe verzoen ala sondoe, ben de wan prenki foe a loesoe-ofrandi foe Krestes (Lefitikus 4:27, 28). Ma no wan wet ben de taki wan sma di den ben dwengi foe abi seks nanga en, ben moesoe òfer so wan sondoe òfer. A wet ben taki dati den ’no moesoe doe noti’ foe strafoe na oema (Deuteronomium 22:25-27). Na so a de na ini a ten disi toe. Efoe sma ben ròs wan sisa èn ben dwengi en foe abi seks nanga en, èn disi ben meki taki a sisa e firi ensrefi fisti èn taki a no warti noti, a ben sa fiti dan foe poti krakti na tapoe taki a abi a loesoe-ofrandi fanowdoe foe krin en foe a sondoe dati? Kwetikweti. A sisa no ben sondoe foe di wan tra sma ben ròs en. Na a sma di ben dwengi en foe abi seks nanga en, ben sondoe èn na en moesoe kon krin. Ma wi kan gebroiki a lobi di Jehovah nanga Krestes ben sori foe di den ben gi a loesoe-ofrandi, foe boeweisi taki na oema disi no flaka na ini den ai foe Gado soso foe di wan tra sma ben sondoe, ma taki a warti gi Jehovah èn taki a e tan na ini a lobi foe en. — Teki gersi Markus 7:18-23; 1 Johanes 4:16.
19. Foe san ede wi no moesoe froewakti taki ala demakandra di wi abi nanga den brada nanga sisa foe wi, sa gi wi deki-ati, ma san moesoe de wi tranga bosroiti?
19 Ija, awinsi san a situwâsi na ini a libi foe wan sma kan de toe, awinsi sortoe omstandigheid di e hati en, ben doengroe a libi di a ben abi fosi, a moesoe man feni deki-ati na ini a gemeente foe a pipel foe Jehovah. Èn dati a sa feni toe, efoe ibri wan foe wi e doe moeiti foe poti prakseri na tapoe makandra, foe gi makandra tranga, èn foe gi makandra deki-ati awinsi o ten wi abi demakandra. Ma foe di wi de onvolmaakti, wi alamala e misi foe doe disi sontron. Ma foe di wi no man doe tra fasi, meki wi e sari makandra èn wi e hati makandra srefi sontron. Proeberi foe no poti prakseri na tapoe den fowtoe foe trawan na ini a tori disi. Efoe joe e poti prakseri na tapoe den sani na ini san trawan e misi, dan joe kan tron wan sma di e kroetoe a gemeente toemoesi, èn sondro taki joe sabi dati srefi, joe kan fadon na ini a srefi trapoe di Paulus ben angri foe jepi wi foe no doe dati, namkoe, foe no libi a kon di wi e kon makandra. Meki dati no pasa noiti! Ala di na owroe sistema disi e kon moro kefarlek èn e kwinsi sma moro, meki wi abi a tranga bosroiti foe doe ala san wi man foe meki a de di wi de makandra na den konmakandra, de wan sani di e bow wi — èn dati o moro wi e si a dei foe Jehovah e kon moro krosibei!
[Foetoewortoe]
a Wan owroeman kan froekisi foe studeri artikel foe Waktitoren nanga Ontwaakt! nanga so wan sma — foe eksempre, „Zult u voordeel trekken van onverdiende goedheid?” nanga „De strijd tegen depressiviteit winnen”. — De Wachttoren foe 15 februari nanga 1 maart 1990.
Fa joe ben sa piki?
◻ Foe san ede a de prenspari taki den konmakandra foe wi nanga a demakandra di wi abi moesoe de wan deki-ati gi wi na ini den lasti dei disi?
◻ San a wani taki foe poti prakseri na tapoe makandra?
◻ San a wani taki foe gi makandra tranga?
◻ San a gi di wi e gi makandra deki-ati, abi na ini?
◻ Fa wi ben sa kan gi deki-ati na den wan di depressief èn di brokosaka?
[Prenki na tapoe bladzijde 15]
A lobi di wi lobi foe teki sma na oso e jepi wi foe kon sabi makandra moro boen
[Prenki na tapoe bladzijde 17]
Di Elia ben depressief, Jehovah ben trowstoe en na wan switifasi