Titus — „Wan kompe wrokoman gi a boen foe oenoe”

SONTRON problema ben de na ini a fosi jarihondro kresten gemeente. Den problema disi ben moesoe loesoe, èn deki-ati ben de fanowdoe foe loesoe den èn sma ben moesoe gi jesi. Wan man di nanga boen bakapisi ben kakafoetoe teige moro leki wán foe den sortoe tjalensi disi, ben de Titus. Leki wan sma di ben wroko makandra nanga na apostel Paulus, a ben doe serjoesoe moeiti foe jepi tra sma foe doe sani na Jehovah fasi. Foe dati ede Paulus ben taigi den kresten na ini Korente taki Titus ben de ’wan kompe wrokoman gi a boen foe den’. — 2 Korentesma 8:23.

Soema ben de Titus? Sortoe ròl a ben plei foe loesoe problema? Èn sortoe wini a kan abi gi wi te wi e loekoe a fasi fa a ben tjari ensrefi?

A tori foe a besnijdenis

Titus ben de wan Grikisma di no ben besnij (Galasiasma 2:3).a Foe di Paulus e kari en „wan troetroe pikin akroederi a bribi di wi abi makandra”, dan a ben kan, taki Titus ben de wan foe den jeje pikin foe na apostel (Titus 1:4; teki gersi 1 Timoteus 1:2). Titus ben de nanga Paulus, Barnabas, nanga tra sma foe Antiokia, Siria, di den ben go na Jerusalem pikinmoro na ini a jari 49 G.T. foe taki foe na aksi foe a besnijdenis. — Tori foe den Apostel 15:1, 2; Galasiasma 2:1.

A denki de taki foe di a tori foe den heiden di no ben besnij, ben taki na ini Jerusalem, meki den ben tjari Titus toe foe sori taki djoe nanga den sma di no ben de djoe ben kan feni a boen-ati foe Gado baka, awansi den ben besnij noso den no ben besnij. Wan toe memre foe a gemeente na ini Jerusalem di ben de Fariseiman bifo den ben teki krestendom, ben taki dati den heiden di ben drai den libi ben de froeplekti foe besnij èn foe hori a Wet, ma trawan ben weigri foe teki a froeklari disi. Te den ben sa dwengi Titus nanga den tra heiden foe besnij, ben o wani taki dati froeloesoe no e anga foe a no-froedini boen-ati foe Jehovah èn foe a bribi na ini Jesus Krestes, ma na presi foe dati a ben o anga foe den wroko foe a Wet. A ben o wani taki toe dati den ben trowe den boeweisi taki den heiden, noso den sma foe den nâsi, ben kisi a santa jeje foe Gado. — Tori foe den Apostel 15:5-12.

Seni go na Korente

Di a tori foe a besnijdenis ben seti, dan Paulus nanga Barnabas ben kisi ala makti foe preiki gi den nâsi. Na a srefi ten den ben doe moeiti toe foe prakseri den pôti sma (Galasiasma 2:9, 10). Ija, te den e taki foe Titus baka na ini den tori di skrifi nanga Gado santa jeje, pikinmoro siksi jari na baka, dan Titus ben de na ini Korente na presi foe Paulus foe orga sani foe piki moni gi den santawan. Ma di Titus ben e doe a wroko disi foe en, a ben kon miti wan tra span situwâsi.

A brifi di Paulus ben skrifi den Korentesma e sori taki a ben skrifi den fosi foe „stòp de ini a kompani foe hoeroeman”. A ben moesoe taigi den foe poeroe wan hoeroeman di no ben abi berow komoto na den mindri. Ija, Paulus ben skrifi den wan krakti brifi, èn a ben doe dati „nanga foeroe watra-ai” (1 Korentesma 5:9-13; 2 Korentesma 2:4). Na a ten dati, den ben seni Titus go na Korente foe jepi piki moni drape gi den kresten na ini Judea di ben de na ini nowtoe. A ben kan toe taki den ben seni en go foe loekoe san den Korentesma ben doe na tapoe a brifi foe Paulus. — 2 Korentesma 8:1-6.

San den Korentesma ben o doe nanga a rai foe Paulus? Foe di Paulus ben wani sabi srefisrefi san den ben o doe, meki kande a ben seni Titus komoto foe Efeise foe abra na Age-ise Se go na Korente, nanga a komando taki a ben moesoe froeteri en baka so esi leki a kan. Efoe so wan wroko ben klari kaba bifo boto no ben waka na tapoe watra moro foe a winter ede (na ini pikinmoro a mindri foe a moen november), dan Titus ben kan go na Troas nanga sipi noso a ben sa teki a moro langa pasi na gron pasa a Hellespont. Kande Paulus ben doro froekoe na ini Troas na wan presi pe den ben meki mofo foe miti, foe di na oproeroe di den solfroesmeti ben soetoe faja gi, ben meki Paulus gowe libi Efeise moro esi leki a ben froewakti. Baka di Paulus ben e wakti nanga senwe na ini Troas, dan a ben kon froestan taki Titus no ben o kon nanga boto. Foe dati ede Paulus ben teki waka nanga a howpoe taki a ben sa miti en na ondro pasi. Di Paulus ben doro kaba na Europa, dan a ben o teki a Via Egnatia, èn te foe kaba a ben miti Titus na ini Macedonia. Paulus ati ben sidon srefisrefi èn ben prisiri di a ben jere boen njoensoe foe Korente. A gemeente ben handri boen na tapoe a rai foe na apostel. — 2 Korentesma 2:12, 13; 7:5-7.

Ala di Paulus ben broko en ede nanga a sortoe fasi fa den sma ben o ontfanga a man disi di ben e teki presi gi en, tokoe Gado ben jepi Titus foe doe a wroko foe en. Den ben ontfanga Titus nanga „frede èn nanga beifi” (2 Korentesma 7:8-15). Te wi e gebroiki den wortoe foe W. D. Thomas di e froeklari: „Dan wi kan bribi, sondro foe swaki a tranga kroetoe di Paulus ben gi, taki Titus nanga koni èn nanga takt ben aksi den Korentesma tranga; èn ben gi den a djaranti taki Paulus, nanga a fasi fa a ben taki, ben abi soso a boen foe den na jejefasi na prakseri”. Na ini a pisi ten dati, Titus ben kon lobi den kresten foe Korente bika den ben gi jesi èn ben tjari boen kenki kon. A fasi fa den ben tjari densrefi èn di ben warti foe kisi prèise, ben de wan deki-ati gi en.

Fa a de nanga a tra afersi foe a wroko di Titus ben seni go doe na Korente — foe orga sani foe piki moni gi den santawan na ini Judea? Titus ben doe wan sani nanga dati toe, soleki fa wi kan si na a bodoi di wi e feni na ini 2 Korentesma. A brifi dati kande ben skrifi na ini Macedonia na ini a herfst foe 55 G.T., sjatoe baka di Titus nanga Paulus ben miti. Paulus ben skrifi taki Titus di ben bigin piki moni, ben seni go baka nanga toe jepiman di no kari na nen so taki den ben kan klari a wroko. Foe di Titus ben abi troetroe belangstelling gi den Korentesma, meki a ben wani foe go baka srefisrefi. Di Titus ben go baka na Korente, dan soleki fa a sori, a ben e tjari a di foe toe brifi foe Paulus di skrifi nanga santa jeje go na den Korentesma. — 2 Korentesma 8:6, 17, 18, 22.

Titus no ben de wan boen orgaman wawan, ma a ben de so srefi wan man di ben kan kisi serjoesoe wroko foe doe na ini moeilek situwâsi. A ben abi deki-ati, a ben lepi, èn a ben tanapoe kánkan. Soleki fa a sori dan Paulus ben si Titus leki wan man di ben sabi san foe doe nanga den kefar di ben kon foe den „toemoesi boen apostel” foe Korente dorodoro (2 Korentesma 11:5). A fasi disi fa a ben prakseri foe Titus de a srefi fasi fa tra presi foe den Boekoe foe bijbel e taki foe en baka dati, na ini wan tra toewijzing di ben aksi foeroe foe en.

Na a èilanti Kreta

A de kande wan ten na mindri 61 nanga 64 G.T., taki Paulus ben skrifi Titus di ben e dini na a ten dati na a èilanti Kreta foe a Mindrikondre Se. Paulus ben libi en drape foe „meki den sani kon reti baka, di no ben boen” èn foe „poti owroeman na wroko na ini a wán foto baka a trawan”. Moro foeroe, den Kretasma ben abi a nen taki den na ’leiman, werdri meti di e doe ogri, nanga akanswari di no e wroko’. Foe dati ede a ben de fanowdoe taki Titus ben sa moesoe handri nanga deki-ati èn tanapoe kánkan na ini Kreta (Titus 1:5, 10-12). Dati ben de wan bigi frantiwortoe, foe di, soleki fa a sori, dan dati ben o bepaal fa a tamara foe krestendom ben o de na a èilanti. Na ondro a krakti foe Gado en santa jeje, Paulus ben jepi Titus foe di a ben taigi en finifini san a ben moesoe soekoe na man di ben kan tron opziener. Te now ete wi e gebroiki den markitiki disi te kresten owroeman e poti na wroko.

Den Boekoe foe bijbel no e sori o ten Titus ben gowe libi Kreta. A ben de drape langa nofo foe Paulus aksi en foe sorgoe gi den sani di Senas nanga Apolos ben abi fanowdoe, di den ben stòp drape di den ben rèis na wan ten di sma no sabi. Ma Titus no ben o de toemoesi langa na tapoe na èilanti. Paulus ben meki plan foe seni Artemas noso kande Tigikus go drape, èn dan Titus ben o miti en na ini Nicopolis, di soleki fa a sori, ben de a nen foe a prenspari foto na a noordwestsei foe Grikikondre. — Titus 3:12, 13.

A lasti leisi di bijbel e taki sjatoe foe Titus e sori wi taki kande na ini a jari 65 G.T., Paulus ben seni en go na wan tra toewijzing. A ben go na Dalmatia, wan kontren na a owstoesei foe na Adriatis Se na ini a disiten Krowâsia (2 Timoteus 4:10). Bijbel no e taigi wi san Titus ben moesoe doe drape, ma na idea ben de taki a ben seni go drape foe seti gemeente tori èn foe doe zending wroko. Efoe dati de so, dan Titus ben o wroko na ini a posisi di de a srefi leki a wan di a ben dini na ini Kreta.

Wi de tangi srefisrefi taki wi abi lepi kresten opziener leki Titus! A froestan di den e froestan den gronprakseri foe den Boekoe foe bijbel heri boen èn a gebroiki di den e gebroiki den na wan deki-atifasi, e jepi foe kibri a jejefasi foe a gemeente. Meki wi waka na baka a bribi foe den èn de leki Titus foe di wi e horibaka gi den jeje afersi foe wi kompe bribiman. — Hebrewsma 13:7.

[Foetoewortoe]

[Prenki na tapoe bladzijde 31]

Titus ben de wan kompe wrokoman di ben abi deki-ati gi a boen foe den kresten na Korente èn na tra presi