Fa Gado e si na anbegi foe krestenhèit?

„A NO ala sma di e taigi mi, taki: ’Masra, Masra’, sa go na ini a kownoekondre foe hemel”, na so Jesus Krestes ben taki, „ma na a sma di e doe a wani foe mi Tata, di de na hemel. Foeroe sma sa taigi mi na a dei dati taki: ’Masra, Masra, a no na ini joe nen wi ben . . . doe foeroe krakti wroko?’ Èn tokoe mi sa taigi den na poebliki taki: Mi no ben sabi oenoe noiti! Oen komoto na mi fesi, oen wrokoman foe kroektoedoe.” — Mateus 7:21-23.

Gado sori krin, nanga jepi foe en Santa Wortoe, bijbel, san na en wani. Den kerki foe krestenhèit e doe a wani foe Gado? Noso den de san Jesus ben kari „wrokoman foe kroektoedoe”?

A kiri foe sma

A neti bifo a Masra foe Petrus dede, dan pikinmoro a ben bigin wan feti nanga a groepoe sroedati di sma ben seni kon foe teki Jesus go sroto (Johanes 18:3, 10). Ma Jesus no ben lasi ensrefi èn a ben warskow Petrus: „Ala den wan di e teki a feti-owroe, sa lasi den libi nanga a feti-owroe” (Mateus 26:52). A krin warskow disi e taki ete wan tron na ini Openbaring 13:10. Den kerki foe krestenhèit poti prakseri na disi tapoe? Noso den de frantiwortoe toe foe feti di e feti now na difrenti pisi foe grontapoe?

Na ini a di foe Toe Grontapoefeti, sma ben kiri hondrohondro doesoen Serfiasma nanga Krowâsiasma na ini a nen foe relisi. „Na Krowâsia”, na so The New Encyclopædia Britannica e froeteri, „a fasist tiri foe a kondre ben kon nanga wan gronprakseri foe ’soifri a ras’ èn disi ben de moro takroe srefi leki san den Nazisma ben doe. . . . Den ben meki bekènti taki den ben o seni wan di foe dri pisi foe den Serfiasma go na wan tra presi, wan di foe dri pisi den ben o meki kon tron Lomsoe, èn wan di foe dri pisi den ben o kiri. . . . Baka a feti, a matifasi na mindri kerki nanga lanti ben pori serjoesoe, foe di Katolik kerki tiriman ben abi wan prati na den sani disi.” Den ben dwengi heri ipi sma foe tron Katoliksma noso foe dede; doesoendoesoen trawan no ben kisi tra okasi srefi. Den ben dwengi heriheri dorpoe — mansma, oemasma nanga pikin-nengre — foe go na ini den Ortodòks kerki foe den èn den ben kiri den. San de foe taki foe den communist legre di ben feti na a tra sei? Relisi ben horibaka gi den so srefi?

„Son wan foe den priester ben teki prati na a feti na a sei foe den revo legre”, na so a boekoe History of Yugoslavia e froeteri. „Den guerilla legre srefi ben abi priester foe den Serfia Ortodòks kerki èn so srefi foe den Lomsoe kerki”, na so a boekoe Yugoslavia and the New Communism e taki. Trobi na relisi sei e tan soetoe faja gi feti na ini den Balkan Staten.

Èn fa a de nanga Rwanda? Na ini a tijdschrift The Month, na algemeen sekretarsi foe a Katolik Organisâsi foe Internationaal Matifasi, Ian Linden, ben erken a sani di e kon now: „Den ondrosoekoe di African Rights na Londen doe, e gi wán noso toe eksempre foe Katolik, Anglikan nanga Baptist Kerki fesiman foe drape srefi di ben abi wan mi-no-kefasi noso di ben gi pasi taki den sroedati kiri sma. . . . Tweifri no de kwetikweti taki heri ipi kresten nanga bigi nen na ini den gemeente foe den kerki, ben abi foe doe nanga a kiri foe sma.” A de wan sari, taki den feti di de na mindri den sma di e kari densrefi kresten, e tan gi centraal Afrika foeroe broko-ede.

Hoeroedoe nanga soetadoe

Soleki fa a Wortoe foe Gado e taki, dan soso wán krin seti de nomo gi seks, èn dati de na ini a trowlibi. „Meki a trowlibi de krin na mindri ala sma”, na so bijbel e taki, „èn a trowbedi sondro flaka, bika Gado sa kroetoe hoeroeman nanga soetaman” (Hebrewsma 13:4). Den kerki fesiman e hori a leri disi foe Gado hei?

Na ini 1989, na Anglikan Kerki na Australia ben tjari wan officieel papira kon na doro ini a tori foe seks, di ben gi leki rai taki seks bifo a trow no de wan fowtoe sani efoe wan paar pramisi serjoesoe foe tan nanga makandra. No so langa pasa ete, wan fesiman foe na Anglikan Kerki na Scotland ben taki: „Kerki no moesoe kroetoe a soetadoe libi foe sma leki wan sondoe sani di no boen. Kerki moesoe erken taki soetadoe na wan sondoefasi di wi gebore nanga en.”

Na Zuid-Afrika, wan toe kerki tiriman taki sani pe den e sori taki den feni homo-sekslibi boen. Foe eksempre, na ini 1990 a Zuid-afrikan tijdschrift You ben skrifi san wan prenspari Anglikan domri ben taki: „Joe no de froeplekti foe hori joe na bijbel ala ten. . . . Mi denki taki kenki sa kon ini a fasi fa kerki e si sani èn den gronprakseri ini a tori foe homosma.” — Teki disi gersi Romesma 1:26, 27.

Soleki fa a 1994 Britannica Book of the Year e taki, dan seks tron wan prenspari tori na ini Amerkan kerki, spesroetoe den afersi soleki „foe poti homosma nanga lesbis-sma na wroko leki kerki tiriman, a froestan di relisi moesoe froestan den reti foe homosma, a blesi di den e blesi ’a trow foe homosma’, èn foe erken noso foe kroetoe a libi di abi foe doe nanga homoseks-libi”. Moro foeroe foe den bigi kerki organisâsi e froedrage kerki tiriman di e feti foe kisi moro fri na seks sei. Soleki fa a 1995 Britannica Book of the Year e taki, dan 55 Episkopaal biskopoe ben skrifi den nen na ondro wan froeklari „foe sori taki den e erken den doe foe homosma èn taki den e poti den na wroko leki kerki tiriman”.

Son kerki tiriman e haritaki nanga sma foe a boen foe homoseks-libi, foe di den e taki dati Jesus noiti no ben taki dati a no feni disi boen. Ma dati de troetroe so? Jesus Krestes ben froeklari taki Gado Wortoe na waarheid (Johanes 17:17). Dati wani taki, dati a ben horibaka gi a fasi fa Gado e denki foe homoseks-libi soleki fa dati skrifi na ini Lefitikus 18:22, pe skrifi: „Joe no moesoe didon na wan mansma leki fa joe e didon na wan oemasma. A de wan tegoe sani.” Boiti dati, Jesus ben kari hoeroedoe nanga soetadoe makandra nanga den „godelowsoe sani [di] e komoto na inisei èn e doti wan sma” (Markus 7:21-23). A Griki wortoe gi hoeroedoe na wan wortoe di abi moro na ini leki a wortoe foe soetadoe. A e taki foe ala fasi foe seks demakandra di sma abi sondro foe den trow na wet, so srefi homoseks-libi (Judas 7). Jesus Krestes ben warskow den bakaman foe en toe foe no froedrage no wan sma di e kari ensrefi wan kresten leriman èn di no e si hoeroedoe leki wan serjoesoe sani. — Openbaring 1:1; 2:14, 20.

Te relisi fesiman e feti foe den poti homosma nanga lesbis-sma na wroko leki kerki tiriman, dan sortoe bakapisi disi abi na tapoe memre foe den kerki foe den, spesroetoe jongoe sma? A no de wan sani di e meki den go proeberi seks sondro foe den trow? Kontrari foe dati, Gado Wortoe e gi kresten tranga foe „lowe gi hoeroedoe” (1 Korentesma 6:18). Efoe wan kompe bribiman e doe so wan sondoe, dan a e kisi lobi-ati jepi foe meki a sma kisi a boen-ati foe Gado baka (Jakobus 5:16, 19, 20). San e pasa te a sma e weigri a jepi dati? Bijbel e taki dati efoe den sma dati no abi berow, dan den ’no sa kisi a kownoekondre foe Gado’. — 1 Korentesma 6:9, 10.

„No e gi sma pasi foe trow”

Foe di „someni hoeroedoe de” meki bijbel e taki dati „a moro betre foe trow leki foe bron foe sekslostoe ede” (1 Korentesma 7:2, 9). Ala di a koni rai disi gi, tokoe den e froeplekti foeroe foe den kerki tiriman foe tan sondro foe trow. „A sweri di meki foe tan sondro foe trow no e broko”, na so Nino Lo Bello e tjari kon na krin na ini en boekoe The Vatican Papers, „te wan priester, moniki noso nòn abi seks demakandra nanga trawan. . . . Den kan kisi pardon foe seks demakandra di den ben abi, efoe den e gi wan opregti froeklari na ini a biktikamra, ala di Kerki kwetikweti no ben sa erken en te wan priester ben o trow.” A leri disi meki boen noso takroe froktoe? — Mateus 7:15-19.

A no de foe taki, dati foeroe priester e libi wan krin libi na moreel sei, ma foeroe no e doe dati. Soleki fa a 1992 Britannica Book of the Year, e taki dan „den ben froeteri taki Lomsoe Kerki pai 300 miljoen Amerkan dala foe loesoe afersi di ben abi foe doe nanga a gebroiki di kerki tiriman gebroiki seks na wan fasi di no fiti”. Baka ten, na uitgave foe 1994 ben taki: „A dede di wan lo kerki tiriman e dede foe AIDS ede, ben sori krin taki homo priester de èn taki sma ben kon si taki den ben aksi wan heri ipi . . . homosma foe tron priester.” A no de foe froewondroe taki bijbel e taki, dati a gi di den „no e gi sma pasi foe trow”, na wan ’leri di e kon foe den ogri jeje’ (1 Timoteus 4:1-3). „Soleki fa son historia skrifiman e taki”, na so Peter de Rosa e skrifi na ini en boekoe Vicars of Christ, „dan [a froeplekti di priester abi foe tan sondro foe trow] kande doe moro ogri na boen gwenti nanga wet leki iniwan tra seti na a Westsei foe grontapoe, pe motjolibi de na ini toe. . . . [A] de moro foeroe wan flaka na tapoe a nen krestenhèit. . . . Foe di relisi tiriman no e kisi pasi foe trow, meki ala ten hoigri de na ondro den . . . Wan priester kan fadon na ini hoeroedoe wan doesoen tron, ma a skrifi wet foe kerki no e gi en pasi foe trow wan leisi.”

Baka te wi loekoe a fasi fa Gado e denki foe na anbegi foe Ba-al, dan a no moeilek foe si krin fa a moesoe denki foe den kerki foe krestenhèit di prati. A lasti boekoe foe bijbel e poti ala den fasi foe falsi anbegi makandra na ondro a nen „Babilon a Bigiwan, a mama foe den hoeroe èn foe den tegoe sani foe grontapoe”. „Na ini en”, bijbel e taki moro fara, „den ben feni a broedoe foe den profeiti èn foe den santawan èn foe ala den wan di den kiri na grontapoe.” — Openbaring 17:5; 18:24.

Dati meki, Gado e gi ala sma tranga di wani de den troe anbegiman foe en: „Komoto na en, mi pipel, efoe oenoe no wan abi wan prati nanga en na ini den sondoe foe en, èn efoe oenoe no wan kisi wan pisi foe den plaag foe en. . . . Na ini wán dei den plaag foe en sa kon, dede nanga sari nanga angriten, èn den sa bron en krinkrin nanga faja, foe di Jehovah Gado, di ben kroetoe en, de tranga.” — Openbaring 18:4, 8.

Na aksi di e kon now: Baka te wan sma komoto na falsi relisi, dan pe a moesoe go? Sortoe fasi foe anbegi Gado feni boen?

[Faki/Prenki na tapoe bladzijde 4]

Na anbegi foe kroektoe gado

Na ini a Ba-al anbegi den ben gebroiki popki toe. Den Israèlsma ben proeberi foe moksi na anbegi foe Jehovah nanga di foe Ba-al. Den ben tjari popki srefi go na ini a tempel foe Jehovah. Gado ben sori krin fa a e denki foe na anbegi foe popki di a ben tjari pori kon na tapoe Jerusalem nanga en tempel.

Someni kerki foe krestenhèit foeroe nanga popki, efoe a de leki wan kroisi, wan prenki, noso wan popki foe Maria. Boiti dati, den e leri foeroe kerkisma foe boigi, kindi, noso meki a marki foe a kroisi na fesi foe den popki disi. Na a tra sei, troe kresten e kisi a komando foe „lowe gi na anbegi foe kroektoe gado” (1 Korentesma 10:14). Den no e proeberi foe anbegi Gado nanga a jepi foe materia sani. — Johanes 4:24.

[Sma di abi a reti foe a prenki]

Musée du Louvre, Paris

[Faki na tapoe bladzijde 5]

„A kerki fesiman moesoe de sondro fowtoe”

DEN wortoe disi teki foe Titus 1:7, soleki fa Today’s English Version e taki en. Wi e leisi na ini a King James Version: „Wan biskopoe moesoe de sondro fowtoe.” A wortoe „biskopoe” e kon foe wan Griki wortoe di wani taki „opziener”. So boen, den man di den e poti na wroko foe teki fesi na ini a troe kresten gemeente moesoe libi akroederi den fondamenti bijbel markitiki. Efoe den no e doe dati, dan den moesoe poeroe den foe a posisi di den abi leki opziener foe di den no de „eksempre gi na ipi” moro (1 Petrus 5:2, 3). O serjoesoe den kerki foe krestenhèit e teki a markitiki disi?

Na ini en boekoe I Care About Your Marriage, Dr. Everett Worthington e sori go na wan ondrosoekoe di ben doe na ondro 100 pastoroe na ini a staat Virginia, Amerkankondre. Moro leki 40 procent foe den ben erken taki nanga wan sma di no ben de a trowpatna foe den, den ben doe wan sani foe wiki a seks lostoe. Wan heri ipi foe den ben doe soetadoe.

„Na ini den tin jari di pasa”, na so Christianity Today e taki, „den seki a kerki ibri tron baka, te a ben kon na krin taki son wan foe den moro lespeki fesiman foe den, ben libi wan hoeroedoe libi.” Na artikel „Foe san ede den no moesoe poti pastoroe di doe soetadoe, na ini den posisi foe den baka”, ben tweifri na a gwenti di krestenhèit abi foe poti kerki fesiman esi-esi na ini a posisi foe den baka di den ben abi fosi, baka te „den kroetoe den foe seks sondoe ede”.