Prisiri na ini Jehovah, ala di tesi de
SOLEKI FA GEORGE SCIPIO BEN FROETERI
Na ini december 1945, mi ben didon na ini wan ati-oso kamra, èn mi ben lan dorodoro, boiti mi anoe nanga mi foetoe. Mi ben prakseri taki a situwâsi foe mi ben de gi wan pisi ten nomo, ma tra sma ben tweifri efoe oiti mi ben sa waka baka. Dati ben de wan troetroe tesi gi wan sma di abi 17 jari èn di de aktief! Mi ben weigri foe bribi taki sani ben o waka na so wan fasi. Mi ben abi so foeroe plan, èn so srefi foe rèis go na Ingrisikondre nanga mi wrokobasi a jari na baka.
WAN poliomyelitis siki di e panja heri esi, ben naki mi, di a ben lon pasa na tapoe na èilanti pe wi ben tan, Sint Helena. A ben kiri 11 sma èn ben meki foeroe sma kon malengri. Ala di mi ben e didon na bedi, mi ben abi foeroe ten foe prakseri a sjatoe libi foe mi èn a tamara foe mi. Di mi ben doe dati, dan mi ben kon froestan taki, ala di mi ben abi foeroe pina, mi ben abi reide foe prisiri.
Wan pikin bigin
Na ini 1933 di mi ben abi feifi jari, dan mi papa, Tom, wan skowtoe nanga wan fesiman na ini a Baptist Kerki, ben teki wan toe boekoe foe toe Kotoigi foe Jehovah. Den ben de foeroeten preikiman, noso pionier, di ben fisiti na èilanti gi wan sjatoe pisi ten.
Wan foe den boekoe ben nen De Harp Gods. Mi papa ben gebroiki en foe studeri bijbel nanga wi osofamiri èn nanga difrenti tra sma di ben abi belangstelling. A materiaal ben moeilek foe froestan, èn mi no ben froestan foeroe foe en. Ma mi e memre taki mi ben poti wan marki na ini mi bijbel na ibri tekst di wi ben taki foe en. Heri esi mi papa ben froestan taki a sani di wi ben e studeri ben de waarheid èn taki a ben difrenti foe den sani di a ben e preiki na ini a Baptist Kerki. A ben bigin froeteri tra sma foe en èn ben preiki komoto na a kansel taki Dri-wánfasi, hèlfaja, èn wan sili di no man dede, no e bèsta. Disi ben meki taki foeroe takitaki ben de na ini a kerki.
Te foe kaba, foe seti na afersi disi, wan kerki konmakandra ben orga. Den ben aksi: „Soema e horibaka gi den Baptistsma?” A moro bigi pisi foe den sma ben horibaka gi den. A tra aksi ben de, „Soema e horibaka gi Jehovah?” Pikinmoro 10 noso 12 sma ben doe dati. Den ben aksi den foe gowe libi a kerki.
Disi ben de wan pikin bigin foe wan njoen relisi na tapoe St. Helena. Mi papa ben meki kontakti nanga na edekantoro foe a Waktitoren Genootschap na ini Amerkankondre èn a ben aksi wan transcriptie masjin foe drai bijbel lezing gi a poebliki, di den ben kopi. Den ben taigi en taki a masjin ben bigi toemoesi foe seni en go na Sint Helena. Wan moro pikin fonograaf ben seni kon, èn baka ten den brada ben bisteri ete toe fonograaf. Den ben waka lontoe a heri èilanti nanga foetoe èn nanga boeriki, ala di den ben e tjari a boskopoe gi den sma.
Ala di a boskopoe ben panja, dan gens srefi ben e panja. Tapoe mi skoro, den pikin ben e singi: „Ala sma kon, ala sma kon, kon jere a gramafon groepoe foe Tommy Scipio!” Disi ben de wan serjoesoe tesi gi mi, wan skoroboi di ben wani taki den speri foe en moesoe lobi en. San ben jepi mi foe horidoro?
A bigi osofamiri foe wi — nanga siksi pikin — ben abi wan osofamiri bijbelstudie doronomo. Wi ben leisi bijbel ibri mamanten toe bifo wi e njan wi mamanten njanjan. Disi seiker ben de wan jepi na ini wi osofamiri foe tan de getrow na ini a waarheid foeroe jari langa. Mi ben kon lobi bijbel di mi ben jongoe ete, èn na ini ala den jari, mi tan abi a gwenti foe leisi bijbel doronomo (Psalm 1:1-3). Na a ten di mi ben gowe libi skoro di mi ben abi 14 jari, dan mi ben tanapoe steifi na ini waarheid, èn mi ben abi frede gi Jehovah na ini mi ati. Disi ben jepi mi foe abi prisiri na ini Jehovah ala di mi ben abi den tesi dati.
Moro tesi nanga moro prisiri
Ala di mi ben e didon na tapoe a sikiman bedi dati èn mi e prakseri den fosi jari dati èn den froewakti di mi ben abi gi a ten di e kon, mi ben sabi nanga jepi foe bijbelstudie taki a siki disi no ben de wan tesi noso wan strafoe foe Gado (Jakobus 1:12, 13). Tokoe a polio ben de wan tesi di ben gi mi sari, èn den bakapisi foe en ben o tan na mi, mi heri libi langa.
Ala di mi ben e kon betre, mi ben moesoe leri waka baka. Mi no ben man gebroiki wan toe tetei na ini mi anoe moro toe. Mi no man teri o foeroe leisi mi ben fadon ibri dei. Ma nanga fajafaja begi èn doronomo moeiti, na ini a jari 1947, mi ben man waka nanga jepi foe wan tiki.
Na a ten dati, mi ben kon lobi wan jongoe oema, Doris, di ben abi a srefi relisi overtoigi leki mi. Wi ben jongoe toemoesi foe prakseri trow, ma mi ben abi a fasti bosroiti foe go na fesi foe leri waka. Mi ben libi mi wroko toe bika a moni di mi ben wroko no ben nofo foe trow, èn mi ben bigin mi eigi tifi-wrokope, pe mi wroko toe jari langa. Wi ben trow na ini a jari 1950. Na a ten dati mi ben abi nofo moni foe bai wan pikin oto. Now mi ben man tjari den brada go na den konmakandra èn go na ini a velddienst.
A theokrasia e gro na tapoe na èilanti
Na ini a jari 1951, a Genootschap ben seni den fosi sma di ben teki presi gi den, kon na wi. Disi ben de Jacobus van Staden, wan jonkoeman foe Zuid-Afrika. Didjonsro wi ben froisi go na ini wan bigi oso, èn foe dati ede wi ben abi tanpresi gi en wan heri jari langa. Foe di mi ben de mi eigi wrokobasi, wi ben man gebroiki foeroe ten makandra na ini a preikiwroko, èn mi ben kisi foeroe warti leri foe en.
Jakobus, noso Koos, soleki fa wi ben kari en, ben orga gemeente konmakandra di ben hori doronomo, èn wi alamala ben breiti foe fisiti den. Wi ben abi wan transport problema bika toe oto nomo ben de na mindri ala den sma di ben abi belangstelling. A pasi grofoe èn a abi foeroe pikin bergi, èn wan toe boen pasi ben de nomo na a ten dati. So boen, a ben de wan bigi wroko foe tjari ala sma go na den konmakandra. Wan toe foe den ben bigin waka froekoe mamanten. Mi ben teki dri sma na ini mi pikin oto èn ben saka den baka wan pisi ten na ondro pasi. Den ben saka èn ben waka go moro fara. Mi ben drai baka, ben teki ete dri sma na ondro pasi, ben saka den, èn ben drai baka. Te foe kaba, den alamala ben go na a konmakandra na a fasi disi. Baka a konmakandra, wi ben gebroiki a srefi fasi foe tjari ala sma go na oso.
Koos ben leri wi toe fa foe gi boen pristeri na den oso. Wi ben abi foeroe boen ondrofenitori èn wan toe foe den no ben boen so. Ma a prisiri di wi ben abi na ini a velddienst ben foeroe moro ala den tesi di den gensman foe a preikiwroko foe wi ben tjari na wi tapoe. Wan mamanten mi ben wroko nanga Koos. Ala di wi ben e waka go miti wan oso, wi ben jere wan sten na inisei. Wan man ben leisi bijbel tranga. Wi ben man jere krinkrin den wortoe di de na ini Jesaja kapitel 2. Di a ben doro vers 4, dan wi ben klopoe na a doro. Wan owroe man di ben abi switifasi ben kari wi kon na inisei, èn wi ben gebroiki Jesaja 2:4 foe froeklari a boen njoensoe foe Gado Kownoekondre gi en. Wi ben bigin wan bijbelstudie nanga en ala di a ben libi na wan presi di moeilek foe doro. Wi ben moesoe saka wan pikin bergi, ben moesoe abra wan kriki na tapoe ston, èn ben moesoe kren wan tra bergi, èn dan wi ben saka go na en oso. Ma a no ben de foe soso. A man disi di abi safrifasi ben teki waarheid èn ben dopoe. Foe man go na den konmakandra, a ben waka nanga toe tiki go na wan presi pe mi ben man teki en nanga oto èn tjari en a tra pisi foe a pasi. Baka ten a dede leki wan getrow Kotoigi.
A skowtoe komsarsi ben gens a wroko foe wi èn ibri tron baka a ben taki dati a ben o seni Koos gowe foe na èilanti. Wán leisi wan moen a ben e kari Koos kon foe poti aksi gi en. Foe di ala ten Koos ben piki en langalanga komoto na bijbel, ben meki taki a ben atibron moro nanga moro srefi. Ibri leisi a ben e warskow Koos taki a moesoe tapoe foe preiki, ma ibri tron Koos ben gi en kotoigi. A ben tan gens a wroko srefi baka di Koos ben gowe libi Sint Helena. Dan a komsarsi, wan bigi tranga man, wantronso ben kon siki èn ben kon mangri srefisrefi. Den datra no ben man feni san ben pasa nanga en. Èn foe dati ede a ben gowe libi na èilanti.
Dopoe, èn wan doronomo gro
Baka di Koos ben de na tapoe na èilanti dri moen langa, a ben kon si taki a ben fiti foe hori wan dopoe lezing. A ben de wan problema foe feni wan boen watrapresi. Wi ben bosroiti foe diki wan dipi olo, sementi en, èn tjari watra foe foeroe en. A neti bifo a dopoe, alen ben fadon èn a tra mamanten wi ben prisiri foe si taki na olo ben foeroe te na a lanki.
A sonde mamanten dati Koos ben hori a dopoe lezing. Di a ben aksi den sma di ben o teki dopoe foe opo tanapoe, dan 26 sma na wi mindri ben opo foe piki den aksi di gwenti foe poti. Wi ben abi a grani foe de den fosi Kotoigi di ben dopoe na tapoe na èilanti. Dati ben de a moro prisiri dei foe mi libi bika ala ten mi ben broko mi ede taki Armagedon ben o kon bifo mi ben o teki dopoe.
Te foe kaba, toe gemeente ben seti, wán na ini Levelwood èn wán na ini Jamestown. Ibri wiki, dri noso fo foe wi ben e rèis 13 kilometer go na wan gemeente foe hori a theokrasia diniwroko-skoro èn a diniwroko konmakandra na tapoe satra neti. Baka a velddienst na tapoe sonde mamanten, wi ben drai baka èn ben abi den srefi konmakandra, èn so srefi a Waktitoren-studie na ini wi eigi gemeente na bakadina èn na neti. So boen, den weekend foe wi ben foeroe nanga theokrasia wroko di e gi prisiri. Mi ben wani srefisrefi foe preiki foeroeten, ma mi ben abi wan osofamiri di mi ben moesoe sorgoe. Foe dati ede na ini 1952, mi ben drai go baka foe wroko gi lanti leki wan foeroeten tifidatra.
Na ini 1955, den kringopziener, brada di e teki presi gi a Genootschap èn di e rèis, ben bigin fisiti na èilanti ibri jari, èn den ben tan na ini mi oso wan pisi ten te den ben fisiti wi. Den ben abi wan boen krakti na tapoe wi osofamiri. Pikinmoro na a srefi ten, mi ben abi a grani toe foe sori den dri felem foe a Genootschap na a heri èilanti.
A span Gado Wani kongres
Na ini a jari 1958, foe man fisiti a Gado Wani Internationaal kongres na ini New York, mi ben gowe libi mi lantiwroko baka. A kongres dati ben de wan heimarki na ini mi libi — wan okasi di gi mi foeroe reide foe prisiri na ini Jehovah. Bika doronomo transport go na a èilanti no ben de, meki wi ben tan feifi nanga afoe moen drape. A kongres ben tan aiti dei, èn den programa ben bigin neigi joeroe mamanten te leki neigi joeroe na neti. Ma noiti mi ben weri, èn mi ben angri foe ibri dei. Mi ben abi a grani foe taki toe miniti foe Sint Helena na tapoe a programa. Senwe ben naki mi kefalek di mi ben moesoe taki gi a kefalek bigi groepoe sma na ini Yankee Stadium nanga Polo Grounds.
A kongres ben tranga a bosroiti di mi ben abi foe go pionier. A poeblikitaki „Gado Kownoekondre e tiri — A kaba foe grontapoe de krosibei?”, ben gi mi spesroetoe deki-ati. Baka a kongres, wi ben fisiti na edekantoro foe a Genootschap na ini Brooklyn èn den ben tjari wi loekoe a drukkerij. Mi ben taki nanga brada Knorr, di ben de presidenti foe a Waktitoren Genootschap na a ten dati, foe a gro di a wroko e gro na ini Sint Helena. A ben taki dati a ben o wani srefisrefi foe kon fisiti na èilanti wan dei. Wi ben tjari cassette-lolo foe ala den lezing èn so srefi foeroe felem foe a kongres, gi famiri nanga mati.
Mi doro a marki foe a foeroeten diniwroko
Di mi ben drai baka, den ben aksi mi foe doe mi fosi wroko baka, foe di no wan tifidatra ben de na tapoe na èilanti. Ma mi ben froeteri den taki mi wani go na ini a foeroeten diniwroko. Baka foeroe negosi wi ben agri taki mi ben kan wroko dri dei na ini wan wiki, ma gi moro foeroe moni leki di mi ben wroko siksi dei wan wiki. Den wortoe foe Jesus ben kon troe: „Foe dati ede, tan soekoe fosi a kownoekondre nanga en regtfardikifasi, èn ala den tra sani disi oenoe sa kisi toe” (Mateus 6:33). A no ben makriki ala ten gi mi foe rèis na ini na èilanti di lai pikin bergi nanga den swaki foetoe foe mi. Ma tokoe mi ben pionier 14 jari langa èn mi ben man jepi foeroe sma di e tan na tapoe na èilanti foe kon sabi waarheid — èn dati troetroe ben gi foeroe prisiri.
Na ini 1961 lanti ben wani seni mi go na den Fidji Èilanti foe go teki leri toe jari langa, sondro taki mi moesoe pai gi dati, so taki mi ben man tron wan foeroeten tifidatra di sabi en wroko boen dorodoro. Den ben taki srefi taki den ben o seni mi osofamiri go nanga mi. Disi ben de wan moi pristeri, ma baka di mi ben prakseri boen foe en, mi no ben teki a pristeri. Mi no ben wani gowe libi den brada gi so wan langa ten èn libi a grani di mi ben abi foe dini nanga den. A basi foe datra afersi di ben orga a rèis ben broeja. A ben taki: „Efoe joe e denki taki a kaba de so krosibei, dan tokoe joe kan gebroiki a moni di joe sa froedini bifo a kaba e kon.” Ma mi ben tanapoe kánkan.
A jari na baka, mi ben kisi wan kari foe fisiti a Kownoekondre Diniwroko Skoro na ini Zuid-Afrika, wan skoro foe wán moen gi gemeente opziener. Wi ben kisi warti leri di ben jepi wi foe doe wi gemeente wroko moro boen. Na baka a skoro, mi ben kisi moro leri di mi ben e wroko nanga wan opziener di e rèis. Baka dati mi ben dini den toe gemeente na tapoe Sint Helena moro leki tin jari, leki wan sma di e teki presi gi a kringopziener. Baka wan pisi ten, tra bekwaam brada ben kon de, èn wan sistema ben gebroiki pe ibriwan foe wi ben kisi a toewijzing a wan baka a trawan.
Na a ten dati, wi ben froisi komoto foe Jamestown go na Levelwood pe moro jepi ben de fanowdoe, èn wi ben tan tin jari drape. Na a ten dati, mi ben wroko tranga srefisrefi sondro foe rostoe boen — e pionier, e wroko dri dei wan wiki gi lanti, èn ben e drai wan pikin wenkri. Boiti dati, mi ben sorgoe gi gemeente afersi, èn mi nanga mi wefi ben sorgoe gi wi osofamiri di abi fo bigi pikin. Foe man kakafoetoe gi problema, mi ben gowe libi mi dri-dei wroko, ben seri a wenkri, èn ben tjari a heri osofamiri go na Kaapstad, Zuid-Afrika, foe go dri moen nanga fakansi. Dan wi ben froisi go na Ascension Èilanti èn ben tan wán jari drape. Na a ten dati, wi ben man jepi foeroe sma foe kisi a soifri sabi foe a waarheid foe bijbel.
Di wi ben drai baka go na Sint Helena, wi ben froisi go baka na Jamestown. Wi ben repareer wan oso di ben fasi na sei a Kownoekondre zaal. Foe sorgoe gi sani na skinfasi, mi manpikin Johanes nanga mi ben bow wan ijsje-bus nanga wan Ford truck, èn wi ben seri ijsje feifi jari langa. Sjatoe na baka di mi ben bigin a bisnis, mi ben abi wan onkolokoe nanga a bus. A ben drai tapoe èn ben fasi mi foetoe. Leki wan bakapisi foe dati, den senwe tetei na ondro mi kindi ben dede, èn a ben tan dri moen bifo mi ben kon betre baka.
Foeroe blesi, fosi, èn na ini a ten di e kon
Na ini den foeroe jari, wi ben abi foeroe blesi — dati ben gi moro reide foe prisiri. Wan foe den ben de a rèis di wi ben meki go na Zuid-Afrika foe fisiti a nationaal kongres na ini a jari 1985 èn foe fisiti a njoen Bethel-oso, di ben e bow ete na a ten dati. Wan trawan ben de taki mi ben man doe pikinso wroko makandra nanga mi manpikin Johanes foe bow wan moi kongreshal krosibei Jamestown. Wi ben breiti toe taki dri foe wi manpikin e dini leki owroeman, èn wán granpikin e dini na a Bethel-oso foe Zuid-Afrika. Èn seiker wi abi foeroe prisiri nanga satisfaksi foe di wi ben man jepi foeroe sma foe kisi a soifri sabi foe bijbel.
A kontren foe doe wi diniwroko no bigi, nanga soso pikinmoro 5000 sma. Ma tokoe, foe wroko a srefi kontren ibritron baka ben tjari moi bakapisi kon. Pikinso sma nomo de grofoe nanga wi. Sma sabi Sint Helena na en switi fasi, èn awansi pe joe e go, sma sa gi joe odi — te joe e waka tapoe strati noso e rèi na ini joe wagi. Mi ondrofeni na taki o moro boen joe e kon sabi den sma, o moro makriki a de foe gi den kotoigi. Now wi abi 150 preikiman, ala di foeroe sma froisi go na doroseikondre.
Now di ala den pikin foe wi kon bigi èn froisi kaba, mi nanga mi wefi de wi wawan baka, baka di wi trow 48 jari kaba. A getrow lobi foe mi wefi èn a jepi foe en na ini ala den jari, ben jepi mi foe tan dini Jehovah nanga prisiri ala di tesi ben de. Wi e kon swaki na skinfasi, ma a jeje krakti foe wi e kon njoen ibri dei baka (2 Korentesma 4:16). Mi, makandra nanga mi famiri nanga mi mati, e froewakti wan moi tamara te mi sa kon gosontoe baka na skinfasi, srefi moro betre leki mi ben de di mi ben abi 17 jari. A moro moi winsi foe mi na foe de volmaakti na ibri fasi èn, na tapoe foe dati, foe dini wi lobi Gado, Jehovah, di e sorgoe wi, èn en Kownoe, Jesus Krestes, di e tiri foe têgo. — Nehemia 8:10.
[Prenki na tapoe bladzijde 26]
George Scipio nanga dri foe en manpikin di e dini leki owroeman
[Prenki na tapoe bladzijde 29]
George Scipio nanga en wefi Doris