Feni prisiri na ini Jehovah wortoe

„Kolokoe a man de . . . di en lostoe de na ini a wèt foe Jehovah.” — PSALM 1:1, 2.

1. Soema kisi a wroko foe gi leri na tra sma foe „den sani di Jehovah tjari kon na krin”?

FOEDI „den sani di ben kon na krin” de so toemsi prenspari gi wi ferloesoe, meki Jehovah ben gi nofotron na ferantwortoe sma na wroko foe de leriman foe waarheid di tjari kon na krin (Deuteronomium 29:29). Na ini Israël a ben de den priester nanga den levietsma di ben e doe a wroko disi (Leviticus 10:8-11; 2 Kronieken 35:3). Ooktoe den Israël papa nanga mama ben gi leri na den égi pikin foe den (Deuteronomium 11:19; Odo 6:20). Na ini a fosi jarhondro G.T. owroeman di den ben poti foe doe wroko tapoe wan fasi di fiti ben dini leki leriman na ini na gemeente foe salfoe kristen wan, èn den ben taki tranga nanga kristen papa nanga mama foe gi leri na den pikin foe den (Efese 6:4; 1 Timotéus 3:2; 2 Timotéus 2:2). Boiti foe dati, ibri aparti kristen ben abi na frantwortoe foe meki den sani di Jehovah ben tjari kon na krin bekènti gi den sma di ben de ete na ini na kristen gemeente. — Tori foe den Apostel 1:8.

2. A nofo foe wi fertrow a tapoe dati tra sma sa gi wi leri na ini Jehovah Wortoe? Tjari disi kon na krin.

² Ma a nofo foe bribi dati tra sma sa gi wi leri na ini a Wortoe foe Gado? Nono. Ibriwan foe oenoe e tjari ooktoe wisrefi na frantwortoe foe studeri „den sani di Jehovah ben tjari kon na krin”. Na so na Psalmsingiman ben singi gi kompe-Israëlsma: „Kolokoe a man de . . . di a lostoe foe en de na ini a wèt foe Jehovah èn di e lési ini a wèt foe en dé nanga neti nanga wan safri sten” (Psalm 1:1, 2). Ooktoe na apostel Petrus ben gi dek’ati na kompe-anbegiman foedi a ben skrifi: „Kweki wan lostoe gi na soifri merki di de foe na wortoe, sodati nanga jepi foe dati joe mag gro go miti ferloesoe.” — 1 Petrus 2:2.

3. Te wi loekoe na natuurlek firi foe foeroe sma ini a tori foe studi san de fanowdoe dan?

³ Fa joe e si bijbelstudi? Efoe joe e go alaten na kristen komakandra, dan joe kan arki na foeroe moi takmakandra di abi den gron tapoe na bijbel. Èn efoe joe ben kisi ’kweki na ini na waarheid’, soleki son sma e taki, dan sondro degedege joe papa nanga mama ben gi joe leri na ini foeroe foe den „sani di Jehovah ben tjari kon na krin”. Ma boiti foe dati joe e studeri ooktoe srefi a bijbel? A de krin dati na Psalmsingiman ben feni prisiri ini sowan sortoe studie ma kande joesrefi no e feni en so makriki. Efoe disi de so dan a no joe wawan tanapoe na ini disi. Dati Petrus ben kisi krakti nanga santa jeje foe gi tranga na kompe-bribiman ’foe kweki wan loste e gi na wortoe’, e sorl a tapoe dati foeroe sma no foe den srefi abi a firi foe studeer densrefi. Ma wi kan leri foe feni prisiri na ini. Fa so?

4. Sortoe eksempre e sori dati persoonlek studi kan meki tron wan sani di e hari wi kon?

⁴ We, fa joe ben sa feni en efoe den ben sa gi joe na wroko foe diki wan dipi olo na ini a gron? Efoe foe joesrefi no nanga prisiri joe e doe hebi skin-wroko, dan joe no ben sa loekoe na wroko nanga prisiri foe doe. Ma kon oen taki dati den ben sa ferteri joe dati wan goedoe de na ini a gron. Now na bigi wroko no ben sa de so hebi! A ben sa de srefi wan span sani, bika joe abi na ferwakti foe feni na goedoe di kibri. Na so studi, awinsi joe no abi wan studi ede kande wan prisiri sani èn srefi wan span sani efoe joe abi wan joisti jejefasi. Èn fasi de fa joe kan kweki na fasi disi.

Kweki na joisti jejefasi

5, 6. Ferteri foe wantoe foe den blesi di no abi den speri èn di wi e kisi via na Wortoe foe Jehovah di tjari kon na krin.

⁵ Na ini a fosi presi wi moe prakseri alaten dati na bijbel de troetroe wan maksin. Na apostel Paulus ben bari taki: „O na dipi foe Gado goedoe èn koni èn sabi!” (Romeini 11:33) Den prakseri foe Jehovah, di ben tjari kon na krin safrisafri ini den doesoendoesoenjari di psa, de sani di e gi joe frede èn di e gi wi wan howpoe di de wan wondroe sani èn ooktoe wan séker sani. Te wi poti den rai foe na libi di Jehovah ben meki den skrifi na ini a bijbel, dan alaten sani sa waka boen (2 Timotéus 3:16). A no de wan ferwondroe sani dati na Psalmsingiman ben kan singi taki: „Ija, a tjari kon na krin foe joe Wortoe e gi leti, a e meki den sma di no abi ondrofeni kon koni”! — Psalm 119:130.

⁶ Boiti foe dati, na bijbel abi den prakseri foe Gado, èn te wi teki den disi poti na ini wi, dan wi e kon krosbé foe en (Jakobus 4:8). Ooktoe wi e kisi na komando foe leri tra sma fa den moe tron discipel foe Jezus (Mattéus 28:19, 20). Foedi na bijbel de na ini disi wi moro prenspari wrokosani meki wi moe studeri en foe kan gebroiki en boen (Efese 6:17; 2 Timotéus 2:15). Èn te toe kaba wi sa kisi kibri èn kisi jepi foe waka na ini wi soifri-retifasi èn foe tan farawe foe fowtoe prakseri, foedi wi e foeroe wi ferstan nanga den prakseri di abi den fundamenti na tapoe a bijbel. — Odo 4:5, 6; 20:7; Filippi 4:8.

7, 8. Foe san-ede wi kisi now moro blesi ini a tori foe „den sani di ben tjari kon na krin” leki den dienstknegti foe Gao ini fosten?

⁷ Hori ooktoe na ini prakseri dati na ini a ten disi wi kan ’ferstan na jejefasi san de na bradi nanga langa nanga hè nanga dipi’ foe na waarheid èn dati de na tapoe wan fasi di den dienstknegti foe Gado na ini a ten di pasa no ben man. (Efese 3:14-18). Ma no fergiti dati Abraham ben gwe libi en foto pe a ben gebore èn ben libi a tra pisi foe en libi na ini tenti, aladi na ini a ten foe en libi noiti a ben sa kon si na pramisi foe Gado (Hebrewsma 11:8-10). Èn Daniël ben begi foe ferstan den visioen di a ben kisi foe si, ma a ben kisi foe jere: „Den wortoe e hori leki wan kibritori èn wan ségel e poti a tapoe te na a ten foe na kaba” (Daniël 12:8, 9). Now na Siri di Abraham ben e loekoe foe a kon sori ensrefi kaba langa ten. Wi e libi now na ini „na ten foe a kaba”, pe na betekenis foe foeroe sani san Daniël ben si ben kon a tapoe foe a ferstan di wi e ferstan den „sani di ben kon a krin”.

⁸ Na apostel Petrus ben skrifi: „Foe na ferloesoe disi den proféti di ben taki sani na fesi foe na no-ferdini-boenfasi di ben bedoel gi oenoe, ben aksi foe sabi sani faja-faja èn ben ondrosoekoe sani soifri. Den ben kisi krin taki den no e dini densrefi, ma den e dini oen nanga den sani di meki bekènti now na oenoe . . . Na ini den sani dati den engel e angri foe loekoe go na ini” (1 Petrus 1:10, 12). Meki wi warderi den waarheid disi troetroe èn no si den leki wan sani di e kon foe ensrefi, foedi Jehovah trowe now leti na tapoe someni sani di den fosten proféti ben wani sabi sote.

9, 10. Sortoe eksempre moesoe gi wi warderi foe na fri di a moro bigi pisi foe wi abi foe kan studeri na bijbel persoonlek?

⁹ Foe kisi na joisti jejefasi, dan wi moe ferstan o tranga son sma ben moesoe stré foe studeer a bijbel. Na ini a ten foe William Tyndale a ben de gi wan Ingrisiman wan ogridoe foe seri, ofoe bai ofoe lési wan veetaling foe den Griki Skrifi na ini en égi tongo. Na di foe tina siksi jarhondro Puritein prékiman John Foxe ben ferteri san ben psa di wan anitri di ben kon a bribi pas ben smokkel wan toe bijbel go na ini Spanje. Den ben tori en èn ben soetoe en na ini faja tapoe bron oedoe. Èn aiti hondro sma foe den di ben bai a bijbel den ben kisi. Twenti foe den den ben losi na wan isritiki. Trawan ben kisi strafoe foe den eri libi langa, den ben krawasi den na ini publiki ofoe ben seni den go na lo-boto. Wan pikin nomroe ben kon fri.

¹⁰ Ooktoe na ini a ten disi Jehovah Kotoigi ben moesoe studeri na bijbel sontron aladi bigi kefar ben de. Na ini concentratiekampoe ofoe straf’oso den ben teki a risico foe strafoe foe dede foe kan kon kisi wan bijbel. Wán zendeling di foe en bribi ede den ben sroto en na straf’oso ini wan kamra en wawan, ben skrifi ala tekst di a ben kan memre èn ben lési ala den kerki-rubriek na ini koranti foe soekoe wan toe bijbeltekst di kande ben tanapoe na ini den. Jari langa dati ben de en wanenkri doro foe go na a bijbel. Ija, te den tapoe a bijbel foe joe no abi en, dan kristensma e doe ala san den man foe lési en. Wi moe abi moro mendri faja te wi, èn dati de moro foeroe tron so, soso abi foe langa oen anoe foe teki na bijbel foe wan boekoeplanga?

11. Foedi wantoe bodoi e taki ete wantron, dan disi moesoe meki na belangstelling foe wi gi bijbelstudi kon moro mendri?

¹¹ Son sma e taki dati den kan piki den aksi na ini a tijdschrift Na Wachttoren sondro foeroe moeiti foedi na stof nofotron de soso wan taki ete wantron foe sani, Foe dat’ede den no e si na fanowdoe foe égistudi. Den sortoe sma disi e loekoe psa na waarde foe loekoe wan sani ete wantron. Na Psalmsingiman ben abi lobi gi Jehovah fermane, di ben e memre en na den wèt foe Gado, èn disi moesoe de ooktoe so nanga wi (Psalm 119:119). Hori na ini prakseri dati na grontapoe e tjari kon alaten baka na srefi propaganda foe hoeroedoe nanga na lobi foe goedoe. Soboen wi moesoe tranga wi jeje gi disi nanga bijbel fermane di wi e loekoe baka ete wantron.

Wroko foe wini problema

12. Gi wantoe praktis rai foe wini na problema foe feni ten gi bijbelstudi.

¹² Wan sma di abi na joisti jejefasi ini a tori foe bijbelstudi gewoonlek sa feni fasi foe studeer, ma disi no sa de alaten makriki. Den moe wini kande problema. Pe wi e feni ten gi égistudi foe eksempre na ini na disiten druk libi? Na fosi stap foe loesoe na problema disi, de foe go ferstan dati bijbelstudi de fanowdoe, netleki velddienst nanga a fisiti foe komakandra (1 Timotéus 4:15). Moro fara wi kan go ondrosoekoe wi aladé routine foe si pe wi kan feni wan presi gi bijbelstudi. Son sma e man foe studeri te den e reis na publiki. Trawan e arki na bijbel boekoe di de tapoe cassette-lolo te den e rij oto ofoe e doe osowroko. Joe abi ooktoe sma di e studeri na ini a ten di den e teki bro na tapoe den wroko. Trawan e opo pikinso moro froekoe na mamanten èn e studeri wan pisten bifo den bigin nanga den aladé wroko ofoe den e studeri neti te den pikin go na bedi. Nofotron wi moe bai ten foe tra activiteit foe kan studeri — kande srefi foe ten foe ontspanning (Kolosse 4:5). Ma foeroe sma e kon si dati den no abi so tranga fanowdoe moro den tra vorm foe ontspanning, foedi studi tapoe ensrefi de wan sani di e broko a span gi den.

13. Fa wi kan kisi jepi foe kan poti ala prakseri na tapoe san wi e studeri?

¹³ Trawan abi moeiti foe poti den prakseri na wan. A de moeilek gi den foe poeroe a prakseri foe den na den aladé problema èn poti den prakseri soso na tapoe den bijbelstudi. Begi kan de wan jepi foe wini disi. Foe san-ede, bifo joe bigin nanga joe studi joe no ben sa taki Jehovah tangi foe den sani di a ben tjari kon na krin èn aksi en foe jepi joe foe poti joe prakseri na wan èn foe kon si na waarde foe den? (Filippi 4:6; 2 Timotèus 2:7) Sowan begi de krinkrin ini akroederi nanga Jehovah wani gi wi (1 Johannes 5:14). Ooktoe a dwengi foe wisrefi de wan sani di de tranga fanowdoe spesroetoe na ini a bigin (1 Korinte 9:25). Den Beréasma ben ondrosoekoe Gado Wortoe aladé (Tori foe den Apostel 17:10, 11). Den ben gi wan boen eksempre. Geregelde studi sa de heri esi wan moi sani, èn a kan de séker dati nanga foeroe prisiri joe e loekoe na a ten, sondro foe joe moe dwengi joesrefi gi dati.

14. Foe san-ede wan tiri kontren de wan sani di boen efoe wi e hori wisrefi bezig nanga persoonlekstudi?

¹⁴ Ooktoe wan kontren di fiti e jepi wan sma hori en prakseri a wan. Isaäk ben go na ini gron te a ben wani go prakseri sani dipi — farawe foe na njoengoenjoengoe di ben de na ini den tenti (Genesis 24:63). A de troe dati wi alamala no kan feni foe wi studeri wan pisi presi di de so fri foe sani di kan poeroe joe prakseri leki wan opo gron, ma wi kan skotoe sani di de lontoe wi foe poeroe wi prakseri. Studeri na fesi wan t.v. di opo ofoe nanga babari stereopokoe no sa meki wi doe foeroe — ofoe de moi — leki studi na tapoe wan moro tiri presi. A no alaten wi kan lon komoto foe sani di e poeroe prakseri, ma a moro bigi pisi foe wi kan feni tog séker wan tiri studi-oekoe.

15. San de wantoe informeel fasi foe kisi bijbel sabi?

¹⁵ Ete wan tra problema kan de: Son sma kande no sabi fa den moe studeri. Spesroetoe na ini a ten disi a no de wan sani foe ensrefi dati pikinnegre e leri na skoro fa den moe studeri, èn den sma di komoto na skoro wan pisten kaba kande lasi na studi gwenti. Ma troetroe, studi no de so moeilek. Studi kan wani taki eenvoudig dati joe e lési moi artikel ini Jepi foe ferstan a bijbel ofoe wan pisi foe na Njoen Grontapoevertaling foe na bijbel. Sdon arki na bijbelboekoe di de tapoe cassette lolo ofoe go ondrosoekoe finfini punt di joe e feni persoonlek moi de tra fasi foe studeri. Joe ben proberi wan dé foe opo loekoe fosten uitgave foe na tijdschrift Na Wachttoren èn Ontwaakt! èn foe lési den artikel di abi joe belangstelling? Disi no de troetroe wan geconcentreerde studi, ma a sa jepi joe foe joe feni moro prisiri na ini Jehovah Wortoe.

16. Nanga sortoe marki na prakseri

¹⁶ Ma fa a de nanga wan moro officieel studi, soleki te joe e sreka joesrefi na tapoe na ala wiki Wachttoren-studi? Gi sowan sortoe studi na bijbelstudenti moe abi wan marki na en fesi. Sortoe marki? Na ini a tori foe na sreka foe na Wachttoren-studi a moe wani foe njan boen someni leki a kan foe na ’a njanjan na a reti ten’ di „na getrow èn koni srafoe” e gi èn a moe abi ooktoe na lostoe foe jepi trawan nanga en kommentaar na a ten foe a komakandra (Mattéus 24:45). Fa a kan doe na ini disi? Regel no de, ma djaso wan rai e kon:

17, 18. (a) Gi wantoe rai ini a tori foe na fasi fa wan bijbelstudenti kan sreka ensrefi tapoe na ala wiki Wachttoren-studi. (b) Gi tra rai di joe ben feni boen na ini joe persoonlek studi. (Loekoe voetnoot.)

¹⁷ Lési ini a fosi presi na heri artikel, kande sjatoe baka te joe kisi joe exemplaar foe Na Wachttoren. Sowan lési a fesi foe a artikel e teki kande twenti minut, ma a kan gi joe wan algemeen idee foe den edeprakseri di e behandel èn san na artikel abi na prakseri. Te a ten doro foe studeri na artikel sondro foe spotoe, go sdon dan nanga wan bijbel èn wan pen ofoe wan tra sani pe joe kan meki aantekening. Lési dan na fosi paragraaf finfini èn loekoe den bewijsi èn na fasi fa den tjari na prakseri kon a fesi. Loekoe tekst na ini a paragraaf di no skrifi na ini a paragraaf èn go loekoe efoe joe kan ferstan foe san-ede den poti den drape. Lési moro fara na aksi di de foe na paragraaf dati èn loekoe efoe joe sabi a piki. Te joe feni a piki, poti wan strepi na ondro wan toe wortoe na ini na paragraaf di sa tjari na piki kon baka na ini joe prakseri te joe de na a Wachttoren-studi. Na sé a paragraaf kande joe ben sa wani skrifi wan toe sani foe den tekst di joe ben soekoe, punt di joe ben wani go ondrosoekoe moro fara, èn so moro fara.

¹⁸ Te joe studeri na heri artikel na a fasi disi, loekoe dan den aksi na ini na faki ofoe fokanti na a kaba foe na artikel èn loekoe efoe joe ben ferstan den edepunt. Efoe aksi de di joe no kan gi wan piki a tapoe, naki den blaadje go baka na a artikel foe feni a piki. Efoe joe doe disi wan toe dé bifo na ala wiki Wachttoren-studi, dan séker kande joe sa feni en boen foe loekoe na artikel es’esi baka tapoe a dé foe na studi srefi foe njoen joe prakseri foe na artikel baka.a

Na fanowdoe foe go denki dipi foe sani

19. Fa na go denki dipi foe sani kan jepi foe bow lobi gi a Wortoe foe Jehovah?

¹⁹ Hori na ini prakseri taki studi wani taki ooktoe go denki sani dipi. Studeri sondro foe denki sani dipi de leki njan di e tan a tapoe joe ati. Go denki soboen foe san joe e studeri. Proberi foe tjari en kon ini kroederi nanga tra sani di joe sabi. Fa a abi dan krakti na tapoe joe libi? Fa joe kan gebroiki en foe jepi tra sma? (Odo 15:28) Leri foe poti prakseri na tapoe den finfini pisi foe a tori. Taki nanga trawan foe den sani di joe e leri. Ferteri den njoen sani di joe kan sabi na tra sma (Odo 27:17). Ooktoe disi sa meki dati joe feni prisiri na ini na bijbel.

20. Ferteri foe na faja warderi di kownoe David ben abi gi Jehovah Wortoe di ben tjari kon na krin.

²⁰ Kownoe David ben abi foeroe warderi gi Jehovah Wortoe. A ben skrifi: „Na wèt foe Jehovah de volmaakti, e tjari na sili kon baka. Na fermane foe Jehovah de getrow, e meki den sma di no abi ondrofeni kon koni. Den komando foe Jehovah de reti, e prisiri na ati; a gebod foe Jehovah de krin, e meki den ai kon brenki. Na frede foe Jehovah de soifri, a e tan hori foe tégo. Den kroetoe bosroiti foe Jehovah de troe; den alamala sori taki den de regtvaardiki. Den de sani di joe wani moro leki gowtoe; ija, leki foeroe gowtoe di de soifri; èn moro switi leki oni èn na oni di e lon foe den godo.” — Psalm 19:7-10.

21. Sortoe blesi wi sa kisi efoe wi kweki wan troetroe lobi gi „den sani di Jehovah tjari kon na krin”?

²¹ Te wi e waka na baka na fosi Psalm èn e studeri na bijbel na tapoe wan geregelde basis, dan ooktoe joe sa meki sowan warderi gro gi den „sani di Jehovah meki kon na krin”. Èn dati foe en sé sa meki dati joe sa kisi den blesi di na Psalm dati e pramisi na a sma di en lostoe de ini Jehovah Wortoe: „Séker a sa tron leki wan bon, di prani na kriki foe watra, di e gi en égi froktoe te a de na joisti ten foe dati èn di den wiwiri foe en no e flaw, èn ala San ai doe, sa waka boen. . . . Jehovah e loekoe na pasi foe den regtvaardikiwan.” — Psalm 1:3, 6.

[Foetoewortoe]

Fa joe ben sa leg disi uit?

◻ Foe san-ede a no de nofo foe fertrow soso dati trawan sa gi wi leri Wortoe foe Gado?

◻ Sortoe blesi o kon foe na studeri di wi e studeri a bijbel?

◻ Fa wi kan feni ten gi a studeri foe a bijbel?

◻ San de wantoe jepi-sani foe kan poti wisrefi krinkrin a tapoe te wi e studeri?

◻ Nanga sortoe marki na ini prakseri wi moe sreka wisrefi na fesi gi na Wachttoren-studi?

[Prenki na tapoe bladzijde 8]

Wi moe feni ten na ini wan presi ini a druk libi foe wi foe loekoe a Wortoe foe Gado